23
Lappasan eꞌ si Daꞌud saga Aꞌa Kela
1 Na, aniyaꞌ lapal pinasampay ni si Daꞌud, yuk-i, “Waꞌi parugpak saga bangsa Pilistin ni kauman Kela maka pinagtangkaw na paꞌin heꞌ sigām saga pai bahaꞌu bay niani, ya inaꞌan ma pagtꞌppahan.” 2 Manjari angaru si Daꞌud ni PANGHŪꞌ yukna, “Ya Tuhan, parugpak bahāꞌ aku ni saga Pilistin inān?”
Anambung Tuhan, “Ahoꞌ” yukna. “Dugpakun sigām boꞌ lappasun kauman Kela.”
3 Saguwāꞌ ahꞌlling ni si Daꞌud saga aꞌana, yuk-i, “Tuwan, minsan maitu kitam ma paglahat Yuda, landuꞌ kitam tināw, ya lagiꞌna bang kitam pehēꞌ ni Kela bahasa parugpak ni saga sundalu Pilistin.”
4 Manjari angaru na isab pabalik si Daꞌud ni PANGHŪꞌ, jari buwattitu ya sambung PANGHŪꞌ ma iya, yuk-i, “Palūd ka pehēꞌ ni Kela sabab pamarūlku ma kaꞌa in daꞌugan min saga bangsa Pilistin.” 5 Angkan palanjal na disi Daꞌud maka saga aꞌana ni Kela. Tarugpak eꞌ sigām saga bangsa Pilistin maka taꞌāꞌ eꞌ sigām saga kahayopan sigām. Aheka bangsa Pilistin bay tapapatay eꞌ sigām boꞌ arapun lappasan saga aꞌa ma Kela. 6 (Ma waktu bay kalahi si Abiyatar anak si Abimelek pinaꞌan ni si Daꞌud, bay asal bowana epoda.)
Niapas eꞌ si Saꞌul si Daꞌud
7 Na, kahakaꞌan si Saꞌul pasal si Daꞌud inaꞌan ma lahat Kela, angkan yukna, “Itiyaꞌ tinukbalan eꞌ Tuhan si Daꞌud ni komkomanku sabab waꞌi iya bay angalikusan kauman kinutaꞌ, ya mbal agon kaluwasan.” 8 Sakali, pinalinganan eꞌ si Saꞌul kamemon sundaluna sinōꞌ magsakap amonoꞌ boꞌ palūd ni Kela angahapaꞌan si Daꞌud maka saga aꞌana boꞌ mbal makaluwas min kauman eꞌ.
9 Pagtaꞌu paꞌin si Daꞌud ma kagaraꞌan si Saꞌul itu, magpanohoꞌan iya ma imam Abiyatar, yukna, “Bowahun piꞌitu epod ilu.” 10 Mainaꞌan paꞌin, angamuꞌ-ngamuꞌ si Daꞌud ni Tuhan. Yukna, “O Yawe, Tuhan bangsa Israꞌil, takaleku in si Saꞌul maggaraꞌ angalubu kauman Kela ma sababku. 11 Tinukbalan bahāꞌ aku eꞌ saga aꞌa maitu-itu ni si Saꞌul? Piꞌitu bahāꞌ iya buwat bay pangalapal itu? Ya PANGHŪꞌ kami bangsa Israꞌil, sambungin lagiꞌ sosohoꞌannu itu.”
Sakali anambung PANGHŪꞌ yukna, “Ahoꞌ, tantu piꞌilu si Saꞌul.”
12 Manjari, angamuꞌ-ngamuꞌ pabalik si Daꞌud yukna, “Tinukbalan bahāꞌ aku maka saga aꞌaku ni si Saꞌul eꞌ saga aꞌa Kela?”
Ya sambung PANGHŪꞌ, “Ahoꞌ.”
13 Pagka buwattēꞌ, si Daꞌud maka saga aꞌana kulang-labi nnom hatus hekana maglaꞌanan na min Kela boꞌ maglatun-latun ma kalahatan. Tataꞌu paꞌin eꞌ si Saꞌul in si Daꞌud waꞌi na makalahi min Kela heꞌ, halam na iya pehēꞌ.
Patapuk si Daꞌud ma Paslangan
14 Manjari itu, pahantiꞌ na paꞌin disi Daꞌud ma saga patapukan ahogot ma paslangan Sīp maka ma kabūd-būran. Piniha iya eꞌ si Saꞌul sakahabaꞌ llaw, sagōꞌ mbal iya tinugutan eꞌ Tuhan ni komkoman si Saꞌul.
15 Dakayuꞌ llaw, ma Hores paꞌin si Daꞌud, ma paslangan Sīp, tataꞌuna in si Saꞌul song pinaꞌan amapatay iya. 16 Sakali pinaꞌan si Jonatan ni si Daꞌud hinabuna ma Hores, boꞌ pinahogot eꞌna iman si Daꞌud. 17 Yuk si Jonatan ma si Daꞌud, “Daꞌa ka tināw sabab tantu mbal ka tainay eꞌ mmaꞌku si Saꞌul. Kataꞌuwanna asal in kaꞌa magsultan ma Israꞌil maka aku itu ma deyoꞌannu.” 18 Jari magpaljanjiꞌan sigā karuwangan ma matahan PANGHŪꞌ. Pagubus itu, amoleꞌ na pabalik si Jonatan, saguwāꞌ magpaꞌbba si Daꞌud ma Hores.
19 Manjari aniyaꞌ saga aꞌa min Sīp patukad ni si Saꞌul ma Gibeya boꞌ anumbungan iya pasal si Daꞌud. Yuk sigām, “Tuwan sultan, waꞌi si Daꞌud patapuk ma lūngan kami ma Hores, mainaꞌan ma būd Hakila tampal ni satan min lahat Jesemon. 20 Palūd paꞌin ka sumiyan-sumiyan katanamannu sabab tantu kami ya atas-pikil anukbalan iya ni kaꞌa.”
21 Anambung si Saꞌul yukna, “Mura-murahan kam binarakatan eꞌ PANGHŪꞌ ma sabab pagkaꞌinagonbi ma aku. 22 Pehēꞌ na kam boꞌ ndaꞌunbi pahāp bang maingga si Daꞌud maka bang sai ya bay makaꞌndaꞌ iya. Kahakaꞌan aku in si Daꞌud aillag makalanduꞌ. 23 Taꞌuhunbi kamemon patapukanna boꞌ kam pabalik piꞌitu amissalahan aku bang maingga iya. Jari bang iya masi mahēꞌ, ameyaꞌ aku ma kaꞌam. Pihaku iya minsan alatag eꞌku kamemon jadjahan ma sakalibut lahat Yuda.”
24 Na, palanjal na saga aꞌa Sīp inān boꞌ parahū min si Saꞌul. Pasaltaꞌ, inaꞌan si Daꞌud maka saga aꞌana ma paslangan Maꞌon, ma jadjahan Araba tampal ni satan min Jesemon. 25 Si Saꞌul isab maka saga sundaluna anagnaꞌ na amiha si Daꞌud. Jari tasumbung paꞌin ni si Daꞌud pasalan pagpiha inān, magtūy iya palanjal ni būd abatu ma paslangan Maꞌon ati mainaꞌan iya pahantiꞌ. Pagtaꞌu si Saꞌul isab ma pasalan itu-i, niurul eꞌna pehēꞌ si Daꞌud.
26 Sakali, inaꞌan disi Saꞌul ma dambilaꞌ būd, ati inaꞌan isab si Daꞌud maka saga aꞌana ma dambilaꞌ magdaiꞌ-daiꞌ boꞌ alahi. Na, baya-baya asekot paꞌin si Saꞌul maka saga sundaluna anaggaw si Daꞌud, 27 aniyaꞌ atꞌkka pinaꞌan ni si Saꞌul dakayuꞌ sosohoꞌanna amowa habal, yuk-i, “Tuwan sultan, pakasay lagiꞌ ka. Waꞌi kalangpasan lahattam eꞌ saga Pilistin!” 28 Magtūy pahali si Saꞌul min pangapasna ma si Daꞌud boꞌ pehēꞌ angatuhan saga Pilistin. Ya itu sababan angkan kaōnan lugal inān Sela Hammalekot.b 29 Sakali in si Daꞌud bay patukad minnēꞌ boꞌ patꞌnnaꞌ ma saga patapukan ahogot ya ma kabūran En Gedi.