22
Si Daꞌud ma Lahat Adullam maka Mispa
1 Manjari, alaꞌan si Daꞌud min Gāt boꞌ alahi ni dakayuꞌ songab batu ma lahat Adullam. Pagtaꞌu paꞌin itu eꞌ saga mattoꞌa-danakanna, pehēꞌ sigām parakayuꞌ ma iya. 2 Parakayuꞌ isab ma si Daꞌud kamemon saga aꞌa sasuku kasigpitan maka ma deyom utang atawa taga-kotoꞌ-kotoꞌ ma deyom atay, ati tahinang iya pagnakuraꞌan sigām. Saga mpat hatus puhuꞌ ya heka sigām.
3 Palanjal si Daꞌud minnēꞌ ni daꞌira Mispa ma lahat bangsa Mowab boꞌ ahꞌlling ni sultan sigām, yukna, “Tuwan, angamuꞌ aku junjung bang paꞌin parūlnu inaꞌ-mmaꞌku pahantiꞌ ma deyomannu sampay kataꞌuwanku bang ai ya kahandak Tuhan ma aku.” 4 Jari pangꞌbba eꞌna inaꞌ-mmaꞌna ma sultan Mowab heꞌ, ati mahēꞌ sigām pahantiꞌ satꞌggol si Daꞌud pahantiꞌ ma patapukan ahogot.
5 Sagōꞌ binandaꞌan si Daꞌud eꞌ nabi Gād, yukna, “Daꞌa ka patꞌggol ma tapukan ilu. Pehēꞌ ka ni jadjahan Yuda.” Angkan alaꞌan si Daꞌud minnēꞌ boꞌ pehēꞌ ni katalunan ma Heret.
Pinapatay saga Imam ma Kauman Nōb
6 Mbal atꞌggol, takale eꞌ si Saꞌul pasal si Daꞌud maka saga tendogna tabāk na. Pasaltaꞌ, inaꞌan si Saꞌul ma Gibeya, aningkōꞌ ma sindungan kayu tamarisa ya ma būd eꞌ. Aniyaꞌ asal budjak ma tanganna. Inaꞌan isab saga aꞌa kawakilanna anꞌngge ma katilibutna. 7 Jari ahꞌlling si Saꞌul ni sigām, yuk-i, “Akale kam pahāp, kaꞌam saga panubuꞌ Benjamin! Ma pikilanbi bahāꞌ, kabuwanan kam kabbun anggul maka tanaꞌ paghumaꞌan eꞌ anak si Jesseb inān? Tahinang bahāꞌ kam eꞌna nakuraꞌ alanga ma saga ibuhan atawa hatusan sundaluna? 8 Ya bahāꞌ ilu sababanna angkan kam magisunan aku? Angay halam aniyaꞌ minsan dangan min kaꞌam amataꞌuwan aku in anakku maka anak si Jesse bay makapagjanjiꞌ? Halam aniyaꞌ pagkaꞌinagonbi ma aku atawa minsan hal laꞌa angahakaꞌan aku in anakku bay amidjakan iya amapatay aku ma labayan. Inaꞌan na iya anipihan aku buwattinaꞌan!”
9 Na inaꞌan isab si Doꞌeg, aꞌa bangsa Edom, samatꞌngge maka saga pagnakuraꞌan tendog si Saꞌul. Ahꞌlling si Doꞌeg itu, yukna, “Bay taꞌndaꞌku anak si Jesse pehēꞌ ni kauman Nōb boꞌ patibaw ni si Ahimelek anak si Ahitub. 10 Bay angaru si Ahimelek ni PANGHŪꞌ pasal si Daꞌud bang ai subay hinangna, maka bay pamuwanna isab ma iya balanjaꞌ maka kalis ya bay pakokos si Golayat aꞌa Pilistin.”
11 Manjari, magpanohoꞌan si Saꞌul pinaꞌāꞌ si Ahimelek sampay kamemon saga kampungna ya magimam ma Nōb. Jari pinaꞌan na sigām ni sultan. 12 Mainaꞌan paꞌin, ahꞌlling si Saꞌul, yukna, “Akale ka Ahimelek!”
“Ahoꞌ, tuwan sultan,” yuk si Ahimelek.
13 Atilaw si Saꞌul ma iya, yuk-i, “Angay ka bay magisun maka anak si Jesse inān boꞌ angatu ma aku? Bay iya buwanannu tinapay maka kalis, maka bay ka isab angaru ni Tuhan ma pasalanna, angkan iya anaggaꞌ pagsultanku maka angamohot amapatay aku ma labayan! Inaꞌan na iya anipihan aku buwattinaꞌan!”
14 Anambung si Ahimelek, yukna, “Tuwan, aniyaꞌ bahāꞌ tendog kapangandolan labi min si Daꞌud? Ayuwannu iya, maka pagnakuraꞌan ma saga sundalu ya anganjagahan kaꞌa. Pinagaddatan isab iya eꞌ aꞌa kamemon ma deyomannu. 15 In pasal pangaruku ni Tuhan ma pasalanna, tuwan, ya na tuꞌud kabiyaksahanku. Arapun in pasal kapagisun angatu ma kaꞌa, ndūꞌ tuwan, daꞌa aku tunaꞌun atawa minsan sai-na ma kami maglaulahasiyaꞌ, sabab halam aniyaꞌ panaꞌuku ma pasal palkalaꞌ inān.”
16 Jari yuk si Saꞌul, “Ahimelek, kaꞌa maka saga kakampungannu ilu subay pinapatay!” 17 Magtūy magpanohoꞌan sultan ma saga jaga ya ma bihingna, yuk-i, “Papatayun kamemon saga imam si Yawe itu sabab ya du sigām pagapiꞌ na ma si Daꞌud. Kinataꞌuwan eꞌ sigām in iya alahi min aku sagōꞌ halam bay anumbung ni aku.” Sagōꞌ halam sai-na min saga jaga inān makatawakkal amapatay saga imam eꞌ pagka imam si Yawe.
18 Pagubus, si Doꞌeg ya sinohoꞌ eꞌ si Saꞌul. Yukna, “Na kaꞌa! Papatayun saga imam itu.” Jari pinapatay eꞌ si Doꞌeg kamemon saga imam heꞌ. Walumpūꞌ maka lima ya heka sigām magpamakay epod. 19 Min panohoꞌan si Saꞌul isab, talaglag kamemon dꞌnda-lꞌlla, kamemon saga kaondeꞌ-ondeꞌan, sampay isab kamemon saga hayop ya bay ma kauman Nōb.
20 Luwal si Abiyatar anak si Ahimelek, mpu si Ahitub, ya bay makaliyus boꞌ alahi pehēꞌ ni si Daꞌud. 21 Kahakaꞌan eꞌna si Daꞌud in kamemon saga kaimaman si Yawe bay pinapatay eꞌ si Saꞌul. 22 Angkan ahꞌlling si Daꞌud ma si Abiyatar, yukna, “Llaw heꞌ, pagtaꞌuku in si Doꞌeg bangsa Edom bay mahēꞌ ma Nōb, makatantu aku in iya anumbung du ni si Saꞌul. Aku palsababan ya angkan amatay saga lahasiyaꞌnu kamemon. 23 Na, maitu na ka ma aku sabab in aꞌa bilahi amapatay kaꞌa anganiyat isab amapatay aku. Daꞌa ka agawa sabab halam kamulahannu bang paꞌin ka ma deyomanku.”