21
Si Daꞌud ma Kauman Nōb
1 Pabutas paꞌin si Daꞌud min si Jonatan, pehēꞌ na iya ni kauman Nōb boꞌ tibawna imam Ahimelek. Pagbāk si Ahimelek itu ma si Daꞌud, amidpid iya kabowa tāwna. Atilaw iya, yuk-i, “Angay ka karangan-danganan ilu? Angay halam seheꞌnu?”
2 Yuk sambung si Daꞌud, “Aniyaꞌ bay panohoꞌan aku eꞌ sultan. Bay aku binandaꞌan eꞌna sinōꞌ mbal amataꞌu minsan ma sai pasalan lꞌngngan itu. Ma takdil saga aꞌaku, bay na sigām hakaꞌanku bang maingga pagsabuhan kami.” 3 Atilaw giꞌ si Daꞌud, yukna, “Na, aniyaꞌ bahāꞌ takakanta? Buwanin giꞌ aku limansolag tinapay, atawa ai-ai na aniyaꞌ mailu.”
4 Anambung si Ahimelek, yukna, “Halam aniyaꞌ tinapay maitu luwal ya tinapay bay pamasukuꞌ Tuhan, sagōꞌ wajib sadja itu kinakan eꞌ saga aꞌabi bang sigām halam bay makapaghulid maka dꞌnda sōngbi piꞌitu.”
5 Ahꞌlling si Daꞌud yukna, “Ma addat kami, pangalāngan asal maghulid maka dꞌnda bang song ni pagbonoꞌan. Asussi saga aꞌaku sampay pamaranan sigām minsan ma lꞌngngan mꞌssaꞌ biddaꞌ. Ya lagiꞌna bang ni lꞌngngan aheya buwat na itu-i!” 6 Sakali, pamuwan eꞌ imam inān ma si Daꞌud tinapay bay pamasukuꞌ Tuhan, ya bay nilaꞌanan min matahan Tuhan boꞌ ginantiꞌan magtūy maka tinapay bahaꞌu. Halam aniyaꞌ takakan saddī tapamuwan eꞌ imam liyu minnēꞌ. 7 Na, aniyaꞌ dakayuꞌ sosohoꞌan si Saꞌul bay pasabu mainaꞌan pagka aniyaꞌ hinangna tudju ni PANGHŪꞌ. Ōnna si Doꞌeg bangsa Edom, ya aesog toꞌongan ma saga magiꞌipat bili-bili si Saꞌul.
8 Jari atilaw si Daꞌud ma si Ahimelek, yukna, “Aniyaꞌ budjak atawa kalis maitu? Halam aku bay magbowa pakokos pagka asaꞌut panohoꞌan sultan heꞌ.”
9 Yuk sambung imam, “Itiyaꞌ maitu kalis si Golayat aꞌa Pilistin ya bay tapataynu ma Lꞌbbak Ela. Itiyaꞌ ma liyu epod, pinutus maka kakanaꞌ. Bang hati kabilahiannu, ngāꞌun na sabab halam aniyaꞌ saddī kalis minnilu.”
Jari ahꞌlling si Daꞌud, “Na, ndiya ma aku sabab halam na aniyaꞌ pahāp minnilu.”
Si Daꞌud ma Gāt
10 Jari itu palanjal na si Daꞌud ma kalahina min si Saꞌul boꞌ pehēꞌ ni si Akis, ya sultan ma daꞌira Gāt. 11 Mahēꞌ paꞌin, ahꞌlling ni si Akis saga tendogna pangandolan, yuk-i, “Ya na koꞌ ilu si Daꞌud ya sultan ma paglahat Israꞌil. Iya na aꞌa pinagkalangan eꞌ saga karꞌndahan hinabu sigām magpangigal, yuk-i,
‘Ibuhan tapatay eꞌ sultan Saꞌul,
jari hatusan ibu ma si Daꞌud’.”
12 Tinaliꞌ-taliꞌ pahāp eꞌ si Daꞌud pahꞌlling saga aꞌa itu, jari sinōd iya tāw landuꞌ aheya ma sultan Akis. 13 Angkan iya magbelaw-belaw di-na sakahabaꞌ aniyaꞌ aꞌa angꞌndaꞌ iya. Hinabuna binalutan eꞌ sigām, magbauꞌ-bauꞌ iya kinangog. Maggudlis iya indalupaginis ma saga tambol lawang ya ma ād daꞌira inān, maka pinatūꞌ isab bohelona ni pꞌngngotna.