20
Si Daꞌud maka si Jonatan
1 Manjari, alahi na isab si Daꞌud min lūngan Nayot ya ma Rama inān tudju ni si Jonatan. Ya panilawna ma si Jonatan eꞌ, “Ai kasāꞌan bay tahinangku? Ai dusaku ma mmaꞌnu angkan iya angamohot amapatay aku?”
2 Yuk sambung si Jonatan. “Oy, sꞌlleꞌ bale puhuꞌnu! Mbal koꞌ kaꞌa ilu pinapatay eꞌ si mmaꞌ! Ai-ai kahinanganna aheya-arikiꞌ, subay pangaru eꞌna dahū ni aku.” Yuk lagiꞌ si Jonatan, “Angay angkan limbunganna min aku niyatna amapatay kaꞌa? Suli-suli sadja koꞌ ilu, daꞌa beyaꞌ-beyaꞌun.”
3 Sagōꞌ anapa si Daꞌud boꞌ anambung, yukna, “Kinataꞌuwan eꞌ mmaꞌnu in aku makasulut pangatayannu angkan pangannalna in kaꞌa subay mbal pinataꞌu sabab ya aniyaꞌ magkarukkaꞌan lagiꞌ ka.” Anubahat lagiꞌ si Daꞌud, yukna, “Sapahanku ma ōn si Yawe ya Tuhan kakkal salama-lama, maka ma ōnnu isab, in aku itu maraiꞌ na pinapatay.”
4 Na, ahꞌlling si Jonatan, yukna, “Hakaꞌin aku bang ai kabayaꞌannu. Tantu hinangku ma kaꞌa.”
5 Ya panambung si Daꞌud, “Salung,” yukna, “Paghinang Bulan Bahaꞌu, maka subay aku pajamu ma sultan. Sagōꞌ dūlin lagiꞌ aku patapuk ma kahumaꞌan deya sampay ni kasangoman ma llaw sumuddai. 6 Bang saupama tasayuna in aku alikut, ahꞌlling ka ni iya, yuknu, ‘Bay amaꞌid si Daꞌud min aku boꞌ pasaꞌut amoleꞌ ni Betlehem, ya lahatna luggiyaꞌ. Subay tasabuna hinang Pagtaubat sigām maglaulahasiyaꞌ.’ ” 7 Amissala lagiꞌ si Daꞌud, yukna, “Bang hal angahoꞌ mmaꞌnu, hatina asalamat aku. Sagōꞌ bang iya angastol, tantu aniyaꞌ niyatna angalaꞌat aku. 8 Aniyaꞌ isab panganjunjungku ni kaꞌa, tuwan. Atanu asal aku, jari hinangin aku kahāpan ma sabab paljanjiꞌan ya bay pagsapahanta ma matahan PANGHŪꞌ. Bang bꞌnnal aniyaꞌ kasāꞌan bay tahinangku, na, kaꞌa na ya magbaran amapatay aku! Daꞌa sadja aku tukbalun ni mmaꞌnu.”
9 Ya sambung si Jonatan ma si Daꞌud, “Oy! Daꞌa ka magpikil buwattilu,” yukna. “Bang hati tasayuku bꞌnnal-bꞌnnal aniyaꞌ niyat mmaꞌku angamula kaꞌa, pataꞌuta ka magtūy.”
10 Atilaw si Daꞌud, yukna, “Bang saupama akasla panambung mmaꞌnu ma kaꞌa, sai amataꞌu aku?”
11 Anambung si Jonatan yukna, “Sūng kita kaleya.” Jari pehēꞌ na sigām. 12 Ma huma paꞌin, yuk si Jonatan ma si Daꞌud, “Saksiꞌta si Yawe ya pagtuhanan bangsa Israꞌil, salung atawa sumuddai ma saliꞌ waktu buwattitu du, bowaku magbissala si mmaꞌ. Bang hati ahāp pamikilna ma pasalannu, pabeyaꞌanta paꞌin ka lapal. 13 Saguwāꞌ bang iya magmohot angalaꞌat kaꞌa, bang paꞌin aku pinagmulkaꞌan eꞌ PANGHŪꞌ bang ka mbal magtūy pataꞌuku boꞌ supaya ka makalahi. Mura-murahan bang paꞌin ka ginapiꞌ eꞌ PANGHŪꞌ buwat bay panganggapiꞌna ma mmaꞌku. 14 Malaingkan pangamuꞌku isab ma kaꞌa bang paꞌin aku paꞌndaꞌannu kahāpan satꞌggolku allum, buwat kahāpan PANGHŪꞌ. Maka bang aku saupama amatay, 15 daꞌa bꞌkkatun kahāpannu ma saga panubuꞌku, minsan aligis eꞌ PANGHŪꞌ kamemon palbantahannu min babaw dunya itu.”
16 Sakali aniyaꞌ lagiꞌ paljanjiꞌan si Jonatan ma si Daꞌud maka panubuꞌna, yukna, “Bang paꞌin tinungbasan eꞌ Tuhan saga palbantahan si Daꞌud.” 17 Kinalasahan si Daꞌud eꞌ si Jonatan buwat eꞌna alasahan baranna, angkan sohoꞌna si Daꞌud amatuman janjiꞌna, ma sabab lasana isab ma si Jonatan.
18 Pagubus, ahꞌlling si Jonatan ma si Daꞌud, yukna, “Salung na in Paghinang Bulan Bahaꞌu, angkan tantu koꞌ kaꞌa ilu piniha heꞌ si mmaꞌ pagka halam aꞌa ma tingkōꞌannu. 19 Na, ma sumuddai heꞌ, saga abay kohap, pehēꞌ ka ni lugal ya bay patapukannu waktu panagnaꞌ paniyaꞌ palkalaꞌ itu. Angagad ka mahēꞌ ma tambak batu ya niōnan Esel, 20 ati amanaꞌ aku mintꞌllu ni kīd batu patapukannu heꞌ, buwat hantang toꞌongan aniyaꞌ panaꞌku. 21 Sohoꞌku dakayuꞌ ondeꞌ lꞌlla angāꞌ panaꞌ heꞌ. Jari bang yukku ma iya, ‘Inaꞌan saga panaꞌ ma atag batu tampal piꞌitu, bowahun piꞌitu,’ makajari ka paluwas. Sapahanta ka ma kallum PANGHŪꞌ, halam aniyaꞌ laꞌat tumꞌkka ni kaꞌa. Asalamat ka. 22 Sagōꞌ bang yukku ni ondeꞌ ya sohoꞌku inān, ‘Waꞌi ma katāhan saga panaꞌ,’ hatina subay ka pasaꞌut alahi sabab ya na kahandak PANGHŪꞌ ma kaꞌa. 23 Maka pasal bay paljanjiꞌanta inān, entomun pahāp, PANGHŪꞌ ya saksiꞌta sampay salama-lama.”
24 Buwattēꞌ paꞌin, patapuk na si Daꞌud ma lugal bay kapagisunanna maka si Jonatan. Taꞌabut paꞌin Paghinang Bulan Bahaꞌu, inaꞌan na sultan Saꞌul aningkōꞌ ma pagjamuhan. 25 Mainaꞌan iya aningkōꞌ ma bihing dinding, buwat kabiyaksahanna. Magalop iya maka si Jonatan, maka inaꞌan isab si Abner ma bihingna. Sagōꞌ in paningkōꞌan si Daꞌud halam magaꞌa. 26 Halam ahꞌlling-hꞌlling si Saꞌul itu, sabab ma pikilanna, kalu aniyaꞌ bay tahinang eꞌ si Daꞌud ya makabatal iya. 27 Sagōꞌ pagꞌllaw dakayuꞌ paꞌin, llaw karuwana ma bulan inān, halam na isab magaꞌa paningkōꞌan si Daꞌud. Angkan atilaw si Saꞌul ma anakna si Jonatan, yukna, “Angay sangay diꞌilaw, halam pajamu piꞌitu anak si Jesse ilu?”
28 Anambung si Jonatan, yukna, “Bay iya amaꞌid min aku, mmaꞌ, amoleꞌ konoꞌ iya ni Betlehem. 29 Yukna ma aku, ‘Dūlin lagiꞌ aku amoleꞌ sabab in kami magkaukampung maghinang pagkulban ma kauman kami. Bay aku niamay-amayan eꞌ danakanku,’ yukna, ‘sinōꞌ pahadil.’ Bang konoꞌ makajari ma aku,” yuk si Jonatan, “tinugutan iya amoleꞌ boꞌ magꞌndaꞌ maka dauranakanna. Na, ya ilu sababan angkan halam makapiꞌitu si Daꞌud ni pagjamuhan.”
30 Angastol toꞌongan si Saꞌul pagkalena ma bissala si Jonatan itu, angkan yukna, “Ē! Halambiyaraꞌ itu, mamarahi tuwas kōknu. Aheya toꞌongan dapitnu ma si Daꞌud. Kaiyaꞌan aheya koꞌ ilu ma kaꞌa sampay ma inaꞌnu! 31 Halam tasayunu satꞌggol masi allum anak si Jesse ilu ma babaw dunya itu, mbal ka makapagsultanan paglahat itu. Na, sohoꞌun iya binowa piꞌitu sabab patut iya subay pinapatay!”
32 Anambung si Jonatan yukna, “Angay angkan subay pinapatay si Daꞌud? Ai dusana?” 33 Pagka buwattēꞌ panambung si Jonatan, magtūy iya nihiyak eꞌ si Saꞌul maka budjak. Minnēꞌ kinataꞌuwan eꞌ si Jonatan in mmaꞌna magmohot toꞌongan amapatay si Daꞌud.
34 Sakali akagit toꞌongan atay si Jonatan ati anꞌngge iya magtūy min pagkakanan. Manjari ma llaw pagjamu karuwana, halam iya amangan sabab apꞌddiꞌ landuꞌ atayna pasalan pangahinaꞌ mmaꞌna ma si Daꞌud.
35 Na, pagꞌllaw dakayuꞌ, pehēꞌ na si Jonatan ni huma bay kapagisunanna pagbākanna maka si Daꞌud. Aniyaꞌ isab ondeꞌ lꞌlla ameyaꞌ ma si Jonatan, 36 manjari ahꞌlling iya ni ondeꞌ inān, yukna, “Paragan ka pehēꞌ boꞌ pihaꞌun saga panaꞌ ya pamanaꞌku itu.” Sakali, hinabu paragan ondeꞌ itu, pinaleyang eꞌ si Jonatan dakayuꞌ panaꞌ pinaliyu min iya. 37 Pagtꞌkka ondeꞌ ni lugal kahūgan panaꞌ heꞌ, niolangan iya eꞌ si Jonatan, yuk-i, “Ilu panaꞌ ma dahuannu! 38 Na, palꞌkkasun dagannu ilu! Daꞌa ka maghoggaꞌ-hoggaꞌ!” Pinuwaꞌ na panaꞌ inān heꞌ ondeꞌ boꞌ niꞌndeꞌan ni nakuraꞌna si Jonatan. 39 Tuꞌud halam panghati ondeꞌ inān ma saga palkalaꞌ heꞌ, luwal si Jonatan maka si Daꞌud ya makataꞌu. 40 Pagubus itu, sinōngan eꞌ si Jonatan panaꞌna ni ondeꞌ lꞌlla inān boꞌ sohoꞌna amoleꞌ. “Pehēꞌ na ka,” yukna, “bowahun saga panaꞌ itu amoleꞌ ni kauman.”
41 Makalaꞌan paꞌin ondeꞌ heꞌ, paluwaꞌ na si Daꞌud min liyu batu bay patapukanna boꞌ pasujud mintꞌllu ma dahuwan si Jonatan. Manjari, maggapus sigām karuwangan maka heꞌ sigām magtangis. Saguwāꞌ palabi heya tangis si Daꞌud min si Jonatan. 42 Yuk si Jonatan ma iya, “Na, bagay, bang paꞌin ka mura-murahan asalamat. Ma takdil kapagbagayta, PANGHŪꞌ ya saksiꞌ ma saga paljanjiꞌanta karuwangan sampay ma saga panubuꞌta magsuring-magsaingsing.” Pagubus itu, alaꞌan na si Daꞌud minnēꞌ, boꞌ si Jonatan pabalik na ni kauman.