19
Pasulay si Saꞌul Amonoꞌ si Daꞌud
1 Na, magsuli-suli si Saꞌul ma anakna si Jonatan maka saga tendogna pangandolan pasal si Daꞌud subay pinapatay. Sagōꞌ alasa toꞌongan si Jonatan ma si Daꞌud, 2 angkan iya binandaꞌan eꞌna. Yuk si Jonatan, “Angamohot mmaꞌku si Saꞌul amapatay kaꞌa, angkan ka subay pahalliꞌ salung subu. Amiha ka lugal patapukannu. Ebot-ebot, daꞌa ka magluwas-luwas. 3 Pagsalung, magbeyaꞌ aku maka mmaꞌku ni huma ya patapukannu. Bissalahanku iya ma pasalannu, jari hakaꞌanta paꞌin ka bang ai ya kaluwasanna.”
4 Sakali pagꞌllaw dakayuꞌ paꞌin, binissalahan si Saꞌul eꞌ si Jonatan pasalan kahāp si Daꞌud. Yukna, “Mmaꞌ, daꞌa inayun si Daꞌud sabab halam iya bay angalaꞌat kaꞌa. Bang pinaꞌamu, in kamemon bay tahinangna aheya sidda katabanganna ma kaꞌa. 5 Bay paglillaꞌna kallumna waktu kapamonoꞌna si Golayat ati aheya daꞌugan bay pamuwan PANGHŪꞌ ma kitam bangsa Israꞌil. Kasaksiꞌannu itu kamemon maka kinōgan ka isab. Na, angay laꞌatnu aꞌa halam dusahan buwat si Daꞌud angkan iya subay papataynu?”
6 Tabowa si Saꞌul ma pamissala si Jonatan inān angkan iya ahꞌlling, yukna, “Sapahanku ma ōn si Yawe ya kakkal salama-lama, in si Daꞌud mbal na pinapatay.” 7 Sakali pinalinganan si Daꞌud eꞌ si Jonatan boꞌ pangahakana kamemon bay kapagbissalahanna maka mmaꞌna. Manjari binowa si Daꞌud ni si Saꞌul, ati maghinang iya ma deyoꞌan sultan buwat bay kaꞌina tagnaꞌ.
8 Malaingkan paniyaꞌ na isab bonoꞌ aheya, jari pehēꞌ si Daꞌud angandugpak ni bangsa Pilistin. Apaslod sidda pangandugpakna angkan maglahian sadja saga sundalu Pilistin.
9 Sagōꞌ aniyaꞌ na saitan bay min PANGHŪꞌ pasōd ni si Saꞌul hinabuna aningkōꞌ ma deyom lumaꞌna maka heꞌna angꞌntanan budjakna. Sakali itu, hinabu si Daꞌud magbiyula, 10 binudjak iya magtūy eꞌ si Saꞌul. Daipara makatangkis si Daꞌud, boꞌ budjak inān tumaluwaꞌ sadja ni dinding. Jari ma sangom du inān, alahi si Daꞌud minnaꞌan.
11 Sakali, magpanohoꞌan si Saꞌul ma saga tendogna sinōꞌ anganjagahan lumaꞌ si Daꞌud, ati sinōꞌ iya pinapatay pagsubu. Daipara binandaꞌan si Daꞌud eꞌ hꞌndana si Mikal, yukna, “Tuwanku, bang ka mbal alahi sangom itu, tantu ka binonoꞌ salung.” 12 Angkan pinaluwas si Daꞌud eꞌ si Mikal labay min tandawan boꞌ iya magtūy alahi. 13 Manjari aniyaꞌ taꞌu-taꞌu bay ningāꞌ eꞌ si Mikal. Pinabahak eꞌna ma kantil boꞌ yampa minantahan eꞌna, maka pinatꞌnnaꞌan bū kambing isab ma kōkna.
14 Pagtꞌkka pinaꞌan saga tendog si Saꞌul bahasa anaggaw si Daꞌud, ahꞌlling si Mikal ni sigām in si Daꞌud inaꞌan asaki.
15 Kahakaꞌan paꞌin si Saꞌul, magtūy iya magpanohoꞌan ma saga aꞌa inān, yukna, “Pabalik kam pehēꞌ boꞌ bowahunbi piꞌitu si Daꞌud beyaꞌ maka pabahakanna. Aku magbaran ya amapatay iya.” 16 Anā, pagsōd paꞌin saga sosohoꞌan inān ni deyom bilik, luwal taꞌu-taꞌu ya taꞌndaꞌ sigām patꞌnnaꞌ ma pabahakan eꞌ, maka bū kambing ma kōkna.
17 Pinahꞌllingan si Mikal eꞌ si Saꞌul, yukna, “Angay aku akkalannu? Angay dūlannu bantaku alahi?”
Yuk sambung si Mikal ni mmaꞌna, “Ya llingna ma aku, in aku papatayna konoꞌ bang iya mbal tugutanku alahi.”
Tinabangan si Daꞌud eꞌ si Samwel
18 Manjari makalahi paꞌin si Daꞌud, pehēꞌ iya ni Rama boꞌ angahakaꞌan si Samwel pasal kamemon bay kahinangan si Saꞌul ma iya. Pagka buwattēꞌ paꞌin, magbeyaꞌ sigā karuwangan ni lūngan Nayot boꞌ mahēꞌ patꞌnnaꞌ. 19 Kahakaꞌan paꞌin si Saꞌul in si Daꞌud konoꞌ waꞌi ma Nayot, ma kauman Rama, 20 magtūy iya anohoꞌ saga tendogna pehēꞌ anaggaw iya. Saguwāꞌ pagtꞌkka saga tendog itu, taꞌndaꞌ eꞌ sigām dakayuꞌ tumpukan nabi amaluwas bissala mbal tahati, maka inaꞌan isab si Samwel pagmakōkan sigām. Jari pahōp Rū Tuhan ma saga tendog inān, maka ya du sigām tabowa amaluwas bissala ya mbal tahati. 21 Makataꞌu paꞌin si Saꞌul pasal itu-i, aniyaꞌ tendogna saddī bay sohoꞌna pehēꞌ. Ya du sigām tabowa amaluwas bissala buwattēꞌ. Jari aniyaꞌ giꞌ tendog kaseheꞌ pinapehēꞌ eꞌ si Saꞌul, kamintꞌlluna na, ati ya du sigām isab amaluwas bissala mbal tahati. 22 Katapusanna, magbaran si Saꞌul pehēꞌ ni Rama boꞌ ni kꞌppong aheya ya ma lahat Seku. Mainaꞌan paꞌin, atilaw iya, yukna, “Maingga bahāꞌ si Samwel maka si Daꞌud?”
Ya sambung saga aꞌa bay panilawan, “Tuwan sultan, waꞌi sigā ma Rama, ma lūngan Nayot.”
23 Sakali, palanjal si Saꞌul ni Nayot, sagōꞌ ya du iya kahōpan eꞌ Rū Tuhan ati aniyaꞌ bissala mbal tahati pinaluwas eꞌna sampay tatꞌkkana lūngan Nayot eꞌ. 24 Mainaꞌan paꞌin, nihurusan eꞌ si Saꞌul panꞌmmekna maka ya du iya tabowa magbissala kaligawan ma matahan si Samwel. Jari pabahak iya maka panantangna animpus dangꞌllaw dambahangi. Ya itu sababan angkan pinagsambatan eꞌ aꞌa, “Nabi bahāꞌ sampay si Saꞌul?”