18
Angimbū si Saꞌul ma si Daꞌud
1 Na, aubus paꞌin pagbissala si Daꞌud maka si Saꞌul, makapagdaꞌatay iya maka si Jonatan ya anak si Saꞌul. In lasa si Jonatan ma si Daꞌud saliꞌ du lasana ma baranna. 2 Tinagnaꞌan min llaw inaꞌan, halam na pinapoleꞌ eꞌ si Saꞌul si Daꞌud ni okoman mmaꞌna. 3 Sakali itu, pagka alasa si Jonatan ma si Daꞌud buwat eꞌna alasahan baranna, bay iya magjanjiꞌ maka si Daꞌud. 4 Nihurusan eꞌ si Jonatan jubana boꞌ pamuwanna ma si Daꞌud, beyaꞌ isab sꞌmmekna pagbobonoꞌ maka kalisna sampay panaꞌna maka kambotna.
5 Piꞌingga-piꞌingga panohoꞌan si Saꞌul ma si Daꞌud, aheya sadja daꞌuganna angkan iya tahinang nakuraꞌ alanga ma saga sundalu. In kapatꞌnnaꞌ ma si Daꞌud itu makasulut pangatayan kamemon saga aꞌa Israꞌil sampay saga pagnakuraꞌan sundalu si Saꞌul.
6 Manjari waktu lagiꞌ bay kapamoleꞌ saga sundalu Israꞌil puwas bay tapatay eꞌ si Daꞌud si Golayat, pinaꞌan pabāk ni si Saꞌul saga karꞌndahan min katilingkal kauman Israꞌil magpangigal maka magkalangan, magbowa sigām tambul-tambul maka biyula. 7 Hinabu sigām magpangigal, angalang sigām buwattitu,
“Ibuhan tapatay eꞌ sultan Saꞌul,
maka hatusan ibu isab ma si Daꞌud.”
8 Pagkale si Saꞌul ma pagkalang itu, landuꞌ iya angastol angkan yukna ma deyom atayna, “Bang ma saga aꞌa itu hatusan ibu ya bay tapatay eꞌ si Daꞌud boꞌ aku itu ibuhan sadja. Na, ai lagiꞌ bahāꞌ takapin ya makajari niagaw eꞌna? Luwal laꞌa pagsultanku.” 9 Angkan tinagnaꞌan min llaw inān alaꞌat na pangꞌndaꞌ si Saꞌul ma si Daꞌud kabowa pangimbūna.
10 Manjari pagꞌllaw dakayuꞌ, aniyaꞌ saitan bay min Tuhan pasangon ni si Saꞌul. Binelaw iya, maka magligaw eꞌna amissala ma deyom lumaꞌna, hinabu si Daꞌud magbiyula buwat kabiyaksahanna. Na, aniyaꞌ budjak ma tangan si Saꞌul, 11 ati yukna ma deyom atayna, “Gom lagbasku si Daꞌud itu ni dinding.” Sakali, binudjak si Daꞌud eꞌ si Saꞌul, daipara katangkisan eꞌna min duwa.
12 Aheya tāw si Saꞌul ma si Daꞌud sabab tinabang na paꞌin iya eꞌ PANGHŪꞌ-Yawe boꞌ si Saꞌul tinaikutan na. 13 Pagka buwattēꞌ, pinatulak eꞌna si Daꞌud boꞌ pinagmakōk ma tumpukan sundalu dangibu hekana. Jari magmakōk si Daꞌud ma saga sundaluna piꞌingga-piꞌingga ya pagbonoꞌan sigām. 14 Ajatu kamemon kahinanganna sabab inaꞌan asal PANGHŪꞌ patꞌttog ma iya. 15 Ya itu sababan angkan pasōng gom paꞌin tāw si Saꞌul ma si Daꞌud. 16 Malaingkan in kamemon aꞌa Israꞌil maka Yuda palasa ma si Daꞌud sabab ahāp eꞌna magmakōkan sigām ma pagbonoꞌan.
17 Na, aniyaꞌ waktu ahꞌlling si Saꞌul ni si Daꞌud, yukna, “Bang aesog eꞌnu amogbogan aku maka bang tꞌnggehannu pahāp pagbonoꞌ PANGHŪꞌ, pamahꞌndaku ma kaꞌa si Merab, ya anakku siyaka.” Buwattēꞌ pamissala si Saꞌul sabab ma pikilanna nggaꞌi ka iya ya amapatay si Daꞌud, sagōꞌ saga bangsa Pilistin.
18 Saguwāꞌ anambung si Daꞌud. “Tuwan,” yukna, “aku maka saga mattoꞌa-danakanku sampay na saga kaꞌmboꞌanku itu aꞌa areyoꞌ du koꞌ ma bangsa Israꞌil. Angkan mbal aku patut amikit ni sultan.” 19 Malaingkan, taꞌabut paꞌin waktu bay panugun pamakawin si Merab ma si Daꞌud, pinakawin na iya ma lꞌlla saddī ya pinagōnan si Adareꞌel, aꞌa min Mehola.
20 Na, si Mikal, ya anak si Saꞌul budjang kasiyalihan, bilahi sidda ma si Daꞌud. Jari pagtaꞌu si Saꞌul ma pasalan itu-i kasulutan iya. 21 Yukna ma deyom atayna, gom pamahꞌndaku si Mikal ma si Daꞌud supaya iya takatina amonoꞌ boꞌ pinapatay eꞌ saga bangsa Pilistin. Angkan binalikan eꞌ si Saꞌul bay llingna ma si Daꞌud, yukna, “Makajari na ka tahinang ayuwanku.”
22 Manjari magpanohoꞌan si Saꞌul ma saga tendogna sinōꞌ magbissala maka si Daꞌud ma halam aniyaꞌ makataꞌu. Sinōꞌ sigām amissalahan iya buwattitu, “Kasulutan sultan ma kaꞌa, maka kinalasahan ka eꞌ kamemon saga tendogna, angkan ahāp lagiꞌ bang ngāꞌnu na hꞌnda anakna heꞌ.”
23 Jari buwattēꞌ pamissala saga tendog inān ma si Daꞌud, sagōꞌ anambung iya, yukna, “Angay, taluhay-luhaybi bahāꞌ tahinang dakayuꞌ ayuwan sultan? Aku itu aꞌa miskin maka nggaꞌi ka babantugun.”
24 Makataꞌu paꞌin si Saꞌul pasal bay kabtangan si Daꞌud heꞌ, 25 yuk panambungna, “Hakaꞌinbi si Daꞌud buwattitu, ‘Halam aniyaꞌ saddī ungsud niamuꞌ min kaꞌa eꞌ sultan, luwal dahatus kuwit bay pangislaman min bangsa Pilistin. Minnēꞌ makabalos in sultan ma saga bantana.’ ” Sagōꞌ ya toꞌongan mohot si Saꞌul in si Daꞌud tapapatay eꞌ bangsa Pilistin.
26 Pagkale si Daꞌud ma pamissala saga tendog inān, sulut na iya tahinang ayuwan sultan Saꞌul. Angkan minsan halam lagiꞌ taꞌabut waktu bay panugun, 27 parugpak si Daꞌud maka saga sundaluna ni bangsa Pilistin, ati tapatay eꞌ sigām saga duwa hatus puhuꞌ. Pagubus, binowa eꞌ si Daꞌud duwa hatus kuwit bay pangislaman min saga Pilistin eꞌ. Niꞌndeꞌan eꞌna ni si Saꞌul supaya iya makajari na ayuwan sultan. Pagka buwattēꞌ, bay pamakawin eꞌ si Saꞌul anakna si Mikal ma si Daꞌud.
28 Tasayu paꞌin eꞌ si Saꞌul in si Daꞌud tinabang eꞌ PANGHŪꞌ maka kinalasahan eꞌ anakna si Mikal, 29 gom paꞌin magduruhun tāwna. Jari binantahan si Daꞌud eꞌ si Saꞌul satꞌggolna allum.
30 Na, masi na paꞌin saga pagnakuraꞌan bangsa Pilistin amowa magbonoꞌ maka bangsa Israꞌil buwat asal daran nihinang eꞌ sigām. Jari kahabaꞌ sigām parugpak ni saga Pilistin, aheya daꞌugan si Daꞌud min kaseheꞌan saga nakuraꞌ sundalu si Saꞌul. Minnēꞌ landuꞌ abantug ōn si Daꞌud.