46
Si Yakub Maglain ni Lahat Misil
1 Na, palintas na disi Israꞌil (hatina si Yakub) min lahat Kanaꞌan maka eꞌ sigām amowa ai-ai sigām kamemon. Tatꞌkka paꞌin eꞌ sigām lahat Beꞌerseba, anumbaliꞌ iya hayop pagkulbanna tudju ni Tuhan ya pagtuhanan mmaꞌna si Isaꞌak. 2 Jari itu, sangom paꞌin, takale eꞌ si Israꞌil itu suwala Tuhan angalinganan iya. “Yakub, O Yakub,” yukna.
Ya sambung si Yakub, “Oy, itiyaꞌ aku.”
3 Ya lling suwala-i, “Aku itu Tuhan ya pagtuhanan mmaꞌnu. Daꞌa ka tināw palain ni lahat Misil, sabab mahēꞌ aku angahinang saga panubuꞌnu bangsa akosog. 4 Pataptap du aku ma kaꞌa, maka bowaku isab panubuꞌnu pabalik piꞌitu ni lahat itu ma sinosōng. Bang taꞌabut na waktunu awapat, inaꞌan du si Yusup ma bihingnu.”
5 Manjari palanjal na disi Yakub min Beꞌerseba tudju ni lahat Misil. Si Yakub ya pinariyataꞌ eꞌ saga anakna ni karitun bay min Piraꞌun pameyaꞌan sigām. Ya du pinariyataꞌ isab saga anak-hꞌnda sigām. 6 Bay binowa eꞌ sigām baꞌanan kahayopan sigām maka palsukuꞌan bay tausaha sigām mainaꞌan ma lahat Kanaꞌan boꞌ na palūd ni lahat Misil. Binowa eꞌ si Yakub saga tubuꞌna kamemon. 7 Tabeyaꞌ ma iya kamemon saga anak-mpuna lꞌlla maka dꞌnda.
Saga Panubuꞌ si Yakub
8 Ya na itu salsila ma kapanubuꞌan si Israꞌil (hatina si Yakub) bay tabeyaꞌ ma iya waktu kapaglainna ni Misil:
Si Rubin ya kasiyakahan.
9 Anak si Rubin lꞌlla, ya na disi Hanok, si Pallu, si Hesdon maka si Karmi.
10 Pasunuꞌ si Simiyun maka saga anakna lꞌlla,
ya na disi Jamuwal, si Jamin, si Hūd, si Yakin, si Sohar maka si Saꞌul. Si Saꞌul itu anakna min dꞌnda bangsa Kanaꞌan.
11 Pasunuꞌ isab si Libi maka saga anakna lꞌlla,
ya disi Gerson, si Kohat maka si Merari.
12 Pasunuꞌ si Yahud maka saga anakna lꞌlla,
ya disi Sela, si Peres maka si Sera.
Aniyaꞌ isab duwa anak si Yahud lꞌlla bay amatay ma lahat Kanaꞌan lagiꞌ, ya na si Ēr maka si Onan.
Aniyaꞌ isab saga anak si Peres lꞌlla,
ya na si Hesdon maka si Hamul.
13 Pasunuꞌ isab si Issakar maka saga anakna lꞌlla,
disi Tola, si Puwa, si Jasub, maka si Semlon.
14 Kasiyalihan si Sibulun. Ya itu ōn anakna lꞌlla,
disi Sered, si Elon maka si Jahaleꞌel.
15 Jari ya na inaꞌan saga anak si Yakub min hꞌndana poꞌon si Leya, ya bay nianakan mahēꞌ ma lahat Mesopotami. Aniyaꞌ isab anakna dꞌnda si Dina. Jari tꞌllumpūꞌ maka tꞌllu ya heka panubuꞌ si Yakub min hꞌndana poꞌon si Leya.
16 Ya anak si Yakub siyaka min hꞌnda-hꞌndana si Silpa,
ya na si Gād. Ya itu ōn anakna lꞌlla,
disi Sepon, si Haggi, si Suni, si Esbon, si Iri, si Arod maka si Arili.
17 Pasunuꞌ si Aser maka anakna lꞌlla,
ya disi Imna, si Isba, si Isbi, si Biriya,
maka dakayuꞌ dꞌnda isab si Sera.
Aniyaꞌ isab anak si Biriya lꞌlla duwa hekana, si Heber maka si Malkiꞌil.
18 Jari sangpūꞌ maka nnom ya heka panubuꞌ si Yakub min si Silpa, ya dꞌnda ipatan bay pamuwan eꞌ si Leban ma si Leya waktu kapagpūnna maka si Yakub.
19 Saga anak si Yakub lꞌlla isab min hꞌndana si Rakiya,
ya na si Yusup maka si Benjamin.
20 Si Manasse isab maka si Epraꞌim, ya anak si Yusup lꞌlla bay nianakan ma lahat Misil eꞌ si Asenat anak si Potipero imam ma daꞌira Ūn.
21 Na, si Benjamin du isab maka saga anakna lꞌlla,
ya na disi Bela, si Beker, si Asbel, si Gera, si Naꞌaman, si Ihi, si Rōs, si Muppim, si Huppim maka si Harid.
22 Ya du inaꞌan saga tubuꞌ si Yakub min hꞌndana si Rakiya, sangpūꞌ maka mpat puhuꞌ.
23 Ya anak si Yakub siyaka min hꞌnda-hꞌndana si Bilha,
ya na si Dān. Ya anak si Dān lꞌlla si Husim.
24 Pasunuꞌ si Naptali, maka anakna lꞌlla,
disi Jasil, si Guni, si Jeser maka si Sillim.
25 Ya du inaꞌan saga tubuꞌ si Yakub pituꞌ puhuꞌ hekana min si Bilha, ya dꞌnda ipatan bay pamuwan ma si Rakiya eꞌ mmaꞌna si Leban.
26 Manjari nnompūꞌ maka nnom ya heka panubuꞌ si Yakub lissi bay tabeyaꞌ ma iya pehēꞌ ni Misil, halam talapay niꞌitung saga ayuwanna dꞌnda. 27 Pakꞌnnop isab duwangan anak si Yusup ya bay nianakan ma Misil. Manjari pitumpūꞌ ya heka sigām kamemon.
28 Manjari si Yahud ya sinōꞌ eꞌ si Yakub parahū min sigām ni tongod si Yusup, boꞌ aniyaꞌ magmalim ma lahat Gosen. Pagtꞌkka paꞌin sigām pehēꞌ, 29 boꞌ kinataꞌuwan eꞌ si Yusup, magtūy pinasakap eꞌna kalesana. Jari paraiꞌ-daiꞌ iya ni Gosen amāk mmaꞌna. Magbāk paꞌin, magtūy ginapus si Yusup ma mmaꞌna maka eꞌna anangis patꞌggol.
30 Ya lling si Israꞌil ma si Yusup, “Ndūꞌ anakku, allum du hati ka! Lillaꞌ na aku amatay pagka kaꞌa-i taꞌndaꞌku na.”
31-32 Puwas eꞌ, ahꞌlling si Yusup ma saga danakanna sampay ma lahasiyaꞌna kamemon ya ma deyoman mmaꞌna. Yukna, “Patut aku subay paharap ni Piraꞌun amataꞌuwan iya in dauranakanku sampay lahasiyaꞌku kamemon magtꞌkkahan na min lahat Kanaꞌan. Itiyaꞌ na kam ma aku. Pataꞌuku isab iya pasal pagusahabi magipat bili-bili maka sapiꞌ, ya angkan tabowabi piꞌitu baꞌanan kahayopan maka pangaltaꞌ bay sukuꞌbi ma lahat Kanaꞌan. 33 Jarina, bang kam sinōꞌ patampal ni Piraꞌun boꞌ kam tinilaw bang ai pagusahabi, 34 sambungunbi iya buwattitu, yukbi, ‘Ya kami sosohoꞌannu itu, aꞌa magiꞌipat hayop asal min jaman kaondeꞌ-ondeꞌ kami. Angꞌntan kami bay pagusaha kaꞌmboꞌ-mboꞌan kami.’ Na, bang buwattēꞌ panambungbi, tinugutun du kam patꞌnnaꞌ ma lahat Gosen. Sababna ya addat bangsa Misil mbal magdalahat maka aꞌa magiꞌipat hayop, asammal konoꞌ ma pangꞌndaꞌ sigām.”