47
1 Na, pehēꞌ si Yusup ni Piraꞌun. Yukna ma iya, “Tuwan sultan, ilu na mmaꞌku maka saga danakanku atꞌkka min Kanaꞌan. Tabowa eꞌ sigām baꞌanan saga kahayopan maka pangaltaꞌ sigām kamemon. Inaꞌan sigām ma jadjahan Gosen buwattinaꞌan.” 2 Manjari aniyaꞌ lima danakanna pineneꞌ eꞌ si Yusup pinakilā ma Piraꞌun.
3 Tinilaw sigām eꞌ Piraꞌun, “Ai usahabi?”
Ya sambung sigām, “Tuwan Piraꞌun, in kami sosohoꞌannu itu aꞌa magiꞌipat bili-bili, buwat bay kaꞌmboꞌ-mboꞌan kami. 4 Bay kami piꞌitu arak maglahat maitu sabab asigpit na gotom ma lahat Kanaꞌan. Halam aniyaꞌ minsan sagmot pagkakan saga hayop kami. Angkan koꞌ kami parahing ni kaꞌa, Tuwan, bang paꞌin kami tugutannu patꞌnnaꞌ ma Gosen.”
5 Angabtang Piraꞌun ma si Yusup, yukna, “Na, pagka ilu na mmaꞌ-danakannu ma kaꞌa, 6 makajari na sigām maglahat maingga-maingga kabayaꞌan sigām ma kaluhaꞌan lahat Misil. Pihaꞌin sigām tanaꞌ umbul-satu paglahatan sigām ma Gosen. Maka bang aniyaꞌ aꞌa kataꞌuwannu min sigām taga-kapandayan, patꞌnnaꞌun iya magmandul ma saga aꞌa ya magiꞌipat baꞌanan hayopku.”
7 Pagpuwas inaꞌan, binowa eꞌ si Yusup mmaꞌna si Yakub pinakilā pehēꞌ ni Piraꞌun. Ati angamuꞌan si Yakub pahalaꞌ ma Piraꞌun pangahulmatna ma iya. 8 Jari aniyaꞌ patilaw Piraꞌun ma iya, yukna, “Pilantahun na umulnu, tuwan?”
9 Ya sambung si Yakub, “Tuwan sultan, dahatus na maka tꞌllumpūꞌ tahun ya paglunsul-lunsulku maitu ma dunya. Aheka isab kasukkalan bay kalabayanku. Sagōꞌ mbal sakit atꞌggol, nggaꞌi ka buwat bay paglunsul-lunsul kamattoꞌahanku.” 10 Na niamuꞌ-amuꞌan Piraꞌun kahāpan isab eꞌ si Yakub boꞌ yampa amaꞌid paluwas minnēꞌ.
11 Manjari pinatuntul pahāp eꞌ si Yusup paglahat mmaꞌna maka saga danakanna mainaꞌan ma lahat Misil. Bineyaꞌ eꞌna panohoꞌan Piraꞌun angkan disi Yakub kabuwanan tanaꞌ ahāp toꞌongan ma jadjahan daꞌira Ramisis. 12 Jari amalanjaꞌ na paꞌin si Yusup ma mmaꞌna maka ma saga danakanna sampay ma lūng-kampungna kamemon. Talapay isab saga kamanahutan.
Si Yusup maka Gotom Asigpit
13 Pasōng na paꞌin kasigpit gotom sampay halam na toꞌongan aniyaꞌ kinakan minsan maingga-maingga. Jari saga aꞌa kamemon ma kalahat-lahatan Misil maka Kanaꞌan magkalammahan na eꞌ punung. 14 Magbꞌlli na paꞌin sigām balanjaꞌ pehēꞌ ni si Yusup. Tinipun eꞌna kamemon sīn pamꞌlli sigām boꞌ yampa bowana ni deyom astanaꞌ Piraꞌun. 15 Na, apuppus paꞌin saga sīn kamemon ma kalahatan Misil maka lahat Kanaꞌan, pinaꞌan ni si Yusup saga aꞌa Misil parahing. Yuk sigām, “Arōy, tuwan, buwanin kami pagkakan! Halam aniyaꞌ sīn kami pamꞌlli. Daꞌa paꞌin kami pasagarin amatay eꞌ punung itu!”
16 Ya sambung si Yusup, “Bang hatiꞌ halam aniyaꞌ sīnbi, na, bowahun piꞌitu saga hayopbi panambiꞌ kinakan.” 17 Manjari binowa saga hayop sigām, saga kuraꞌ, bili-bili, kambing maka sapiꞌ. Binowa eꞌ sigām pehēꞌ ni si Yusup panambiꞌ pagkakan. Jari aniyaꞌ kinakan pamalanjaꞌ sigām eꞌ si Yusup ma deyom dantahun inān, panambiꞌ saga hayop sigām.
18 Aubus paꞌin dantahun eꞌ, pabalik na isab sigām pehēꞌ ni si Yusup. Ya lling sigām, “Tuwan, mbal kalimbungan kami min kaꞌa, halam na aniyaꞌ sīn kami maka ilu ma kaꞌa isab saga hayop kami kamemon. Halam aniyaꞌ takapin pamuwan kami ma kaꞌa, luwal baran kami maka tanaꞌ kami. 19 Ndūꞌ tuwan, daꞌa kami pasagarin pinunung. Kaugun isab tanaꞌ kami bang halam aniyaꞌ makapajatu iya. Bꞌllihun baran kami sampay tanaꞌ kami panambiꞌ kinakan. Minsan kami pinaꞌata ma Piraꞌun, minsan tanaꞌ kami pinasukuꞌ ma iya, bang paꞌin kami mbal amatay gotom. Buwanin kami isab binhiꞌ tinanom boꞌ mbal kaugun tanaꞌ kami.”
20 Na, pagka buwattēꞌ kabisa gotom, tabꞌlli eꞌ si Yusup tanaꞌ kamemon bay sukuꞌ saga aꞌa Misil pakaniya-pakaniya. Manjari Piraꞌun na tag-tanaꞌ kamemon, 21 ati saga aꞌa kamemon ma lahat Misil tahinang atana ma sabab hinang si Yusup. 22 Ya sadja halam tabꞌlli eꞌ si Yusup tanaꞌ saga kaimaman. Aniyaꞌ balanjaꞌ sigām min Piraꞌun sakahabaꞌ llaw, angkan halam bay tapabꞌlli saga tanaꞌ sigām.
23 Manjari aniyaꞌ pamissala si Yusup ma saga aꞌa inān kamemon, yukna, “Na buwattinaꞌan, pagka tabꞌlliku kaꞌam sampay tanaꞌbi boꞌ kam sukuꞌ Piraꞌun na, na, itiyaꞌ na saga binhiꞌ pananombi ma deyom tanaꞌ. 24 Malaingkan, bang kam magani buwaꞌ tinanombi, ya buwaꞌna subay binahagiꞌ palima. Dabahagiꞌ ilu subay pinasukuꞌ ma Piraꞌun, ya mpat bahagiꞌ takapin subay ma kaꞌam boꞌ aniyaꞌ pananombi pabīng maka aniyaꞌ takakanbi magtaiꞌanak.”
25 Ya sambung sigām “Tuwan, kalappasan kami min kamatay sabab kaꞌa. Bang paꞌin ahāp sadja ataynu tudju ni kami, kami itu magpaꞌata na ma Piraꞌun.”
26 Manjari aniyaꞌ saraꞌ pinatꞌnnaꞌ eꞌ si Yusup ma lahat Misil, subay pinasukuꞌ ma Piraꞌun bahagiꞌ lima min ai-ai pinagani ma deyom lahat. Bineyaꞌ saraꞌ inān sampay ni kabuwattinaꞌanan. Luwal tanaꞌ saga kaimaman halam bay pinasukuꞌ ma Piraꞌun.
Si Yakub Angꞌbba Bissalana Katapusan
27 Manjari maglahat na bangsa Israꞌil ma Gosen, ma deyom lahat Misil. Pasōng heka puhuꞌ sigām, pasōng isab heka pangaltaꞌ sigām.
28 Sangpūꞌ maka pituntahun ya paglahat si Yakub mahēꞌ ma Misil sampay dahatus maka mpatpūꞌ maka pituntahun umulna. 29 Manjari itu, song paꞌin taꞌabut waktuna, nilinganan eꞌna anakna si Yusup. Yukna, “Bang kaꞌa-i alasa du ma aku, patꞌnnaꞌun lagiꞌ tangannu ma llotan paꞌaku boꞌ yampa ka magsapa in janjiꞌnu ma aku mbal binalubahan. Janjiꞌin aku in aku mbal kubulnu maitu ma lahat Misil. 30 Bilahi aku kinubul ma pangubulan saga kaꞌmboꞌ-mboꞌanku. Angkan na bang aku amatay, bowahun bangkayku paluwas min Misil itu ati kubulunbi aku ma bay pagkubulan sigām.”
Ya sambung si Yusup, “Ahoꞌ Mmaꞌ, beyaꞌku llingnu ilu.”
31 “Magsapa ka,” yuk si Yakub eꞌ. Agsai pinagsapahan eꞌ si Yusup. Manjari mahēꞌ na si Yakub patukkuꞌ ma pabahakanna angamuꞌ duwaꞌa ni Tuhan.