45
Magpakilā si Yusup ma Saga Danakanna
1 Manjari mbal na kasandalan eꞌ si Yusup kahansul atayna angkan sohoꞌna paluwas minnaꞌan saga aꞌa Misil bay ma deyom lumaꞌna. Na, halam paꞌin aniyaꞌ aꞌa saddī mainaꞌan, magpakilā na iya ma saga danakanna. 2 Akosog pagtangis si Yusup, takale isab eꞌ saga aꞌa Misil. Jari pinasampay habalna pehēꞌ ni astanaꞌ Piraꞌun.
3 Yuk si Yusup ma saga danakanna, “Aku na koꞌ itu si Yusup. Masi allum si Mmaꞌ?” Na, pagkale llingna itu eꞌ saga danakanna, magtūy sigām sinōd tāw, yukna, “Pasekot kam piꞌitu.” Jari pasekot na sigām. Yuk si Yusup isab, “Aku na koꞌ itu si Yusup, ya danakanbi bay pabꞌllihanbi boꞌ binowa ni Misil. 5 Na, daꞌa kam asukkal. Daꞌa isab pagsusuninbi baranbi pasal pamabꞌllibi ma aku. Ya angkan aku makapiꞌitu, sabab Tuhan ya bay amapiꞌitu aku, nggaꞌi ka kaꞌam. Tuꞌud aku pinarahū eꞌna min kaꞌam supaya kalappasan bangsa manusiyaꞌ min gotom. 6 Ma buwattinaꞌan yampa duwantahun paggotom ma lahat, jarina aniyaꞌ giꞌ limantahun halam aniyaꞌ tinanom, halam aniyaꞌ buwaꞌ niani. 7 Bay aku pinapiꞌitu eꞌ Tuhan dahū min kaꞌam supaya kam kalappasan ma sabab kawasana makainu-inu, boꞌ aniyaꞌ du paꞌin panubuꞌbi maitu ma dunya.
8 “Hatina,” yuk si Yusup, “nggaꞌi ka kaꞌam ya bay amapiꞌitu aku, sagōꞌ Tuhan. Min kahandakna ya angkan aku saliꞌ sapantun pagꞌmmaꞌan Piraꞌun angahūgan iya garaꞌ. Tahinang aku pagmakōkan ma deyomanna, maka ginꞌllal aku nakuraꞌ angꞌntanan sakalingkal lahat Misil. 9 Na, palꞌkkas na kam amoleꞌ ni si Mmaꞌ. Pasampayunbi ni iya lapalku itu. ‘Min kahandak Tuhan ya angkan aku (yuk si Yusup) tahinang pagnakuraꞌan ma sakalingkal lahat Misil. Palūd ka piꞌitu saruꞌun-duꞌun, daꞌa ka ananggu. 10 Maitu na ka patꞌnnaꞌ ma lahat Gosen supaya asekot ni aku. Bowahun piꞌitu saga anak-mpunu kamemon, sampay saga kahayopannu, bili-bili ka, kambing ka, sapiꞌ ka. Bowahun isab pangaltaꞌnu kamemon. 11 Bang ka mainaꞌan na ma Gosen aku ya angupiksaꞌ kaꞌa. Aniyaꞌ giꞌ limantahun tꞌggol gotom itu. Mbal aku bilahi bang kaꞌam magtaiꞌanak atawa baꞌanan hayopnu patay otas.’ ” Ya du inaꞌan lapal si Yusup ma mmaꞌna si Yakub.
12 Ahꞌlling giꞌ si Yusup ma saga danakanna, yukna, “Benjamin, taꞌndaꞌnu na aku itu langgungnu. Maka kaꞌam ilu kamemon taꞌndaꞌbi na, aku na koꞌ itu. 13 Suli-sulihinbi si Mmaꞌ pasal kawasaku maitu ma lahat Misil. Suli-sulihinbi pasal kamemon ya taꞌndaꞌbi maitu. Jari pasaꞌut kam amowa iya piꞌitu.”
14 Magtūy ginapus eꞌ si Yusup siyalina si Benjamin. Ginapus isab si Yusup eꞌ si Benjamin, jari tatangis sigām karuwangan. 15 Siniyum eꞌna danakanna kamemon dakayuꞌ maka dakayuꞌ, maka eꞌna anangisan sigām. Pagubus, magsambung-siyambungi sigām magbissala.
16 Na, makasampay paꞌin ni astanaꞌ Piraꞌun habal pasal katꞌkka saga danakan si Yusup, akōd toꞌongan Piraꞌun maka saga tendogna pagnakuraꞌan. 17 Yuk Piraꞌun ma si Yusup, “Sohoꞌun saga dauranakannu angamomos saga kuraꞌ sigām boꞌ pabalik ni lahat Kanaꞌan. 18 Sōꞌun sigām angāꞌ mmaꞌbi sampay anak-hꞌnda sigām kamemon boꞌ binowa eꞌ sigām piꞌitu waktu kapabalik sigām. Buwananku sigām tanaꞌ landuꞌ ahāp maitu ma Misil, supaya sigām maglabi-labi ma kalluman.”
19 Amissala giꞌ Piraꞌun, yukna, “Sohoꞌun sigām amowa saga karitun minnitu pameyaꞌan saga anak-hꞌnda sigām piꞌitu, ya lagiꞌna mmaꞌbi. 20 Daꞌa na kinabimbangan palsukuꞌan sigām taꞌbba ma lahat, sabab ma sigām na ai-ai ya ahāp toꞌongan maitu ma Misil.”
21 Manjari bineyaꞌ panohoꞌan Piraꞌun inān eꞌ saga anak si Yakub. Binuwanan sigām saga karitun eꞌ si Yusup ma buwat bay pahꞌlling Piraꞌun ma iya. Binuwanan sigām balanjaꞌ isab palutuꞌ sigām ma lꞌngnganan. 22 Aniyaꞌ isab dapangampuꞌan sꞌmmek ahalgaꞌ pamuwan sigām pakaniya-pakaniya. Malaingkan ya pamuwan si Yusup ma si Benjamin, lima pangampuꞌan sꞌmmek pagsalinanna maka tꞌllu hatus pilak. 23 Mmaꞌna ya pinabowahan eꞌ si Yusup sangpūꞌ kuraꞌ lꞌlla apꞌnnoꞌ eꞌ ai-ai ahāp hinangan Misil, maka sangpūꞌ kuraꞌ dꞌnda apꞌnnoꞌ eꞌ balanjaꞌ maka saga tinapay maka ginisan takakan-kakan pamalutuꞌ iya ma lꞌngngananna tudju ni Misil. 24 Manjari itu, pinalanjal na saga danakanna eꞌ si Yusup. Yukna ma sigām, “Ebot-ebot, daꞌa kam magkalukassa ma palꞌngngananbi.”
25 Na, alaꞌan na sigām min Misil boꞌ pabalik pehēꞌ ni lahat Kanaꞌan. Pagtꞌkka sigām, magtūy sigām angahaka ma mmaꞌ sigām, yuk-i, 26 “Mmaꞌ, masi allum si Yusup! Pagnakuraꞌan iya buwattinaꞌan ma sakalingkal lahat Misil.” Magtūy takꞌbbal atay si Yakub, saliꞌ alungay pangannalna, mbal agon makapamꞌnnal ma bay pangahaka ma iya eꞌ saga anakna. 27 Malaingkan pagkalena kamemon bay panambuku si Yusup ma sigām, maka pagꞌndaꞌna isab saga karitun bay pinabeyaꞌan iya eꞌ si Yusup pameyaꞌanna tudju ni Misil, magtūy pabalik pangannalna.
28 Yuk si Yakub, “Kamattanan na aku. Allum du anakku si Yusup. Halam aniyaꞌ angutku saddī, bang paꞌin aku makapehēꞌ angꞌndaꞌ iya dahū satꞌggolku masi allum.”