44
Pasal Sawan Alungay
1 Manjari aniyaꞌ panohoꞌan si Yusup ma aꞌa angꞌntan kapatut ma deyomanna, yukna, “Pꞌnnoꞌin balanjaꞌ karut sigām ilu kamemon, pila-pila ya takaya binowa eꞌ sigām. Poleꞌin isab sīn bay pamayad sigām pakaniya-pakaniya, patꞌnnaꞌun ma diyataꞌ balanjaꞌ ya ma deyom karut sigām. 2 Ngāꞌun isab ya sawanku dī pilak boꞌ patꞌnnaꞌun pehēꞌ ni deyom karut kasiyalihan eꞌ, pabeyaꞌun ma sīn bay pamayadna.” Na bineyaꞌ eꞌ aꞌa inān bay panohoꞌan si Yusup ma iya.
3 Pagsubu-subu lagiꞌ, pinapoleꞌ na saga dauranakan eꞌ maka saga kuraꞌ ya pagduruwaꞌan sigām. 4 Sakali itu, ma halam lagiꞌ sigām makalawak min daꞌira bay kamahēꞌan sigām-i, ahꞌlling si Yusup ma aꞌa tag-kapatut ma deyomanna. “Palꞌkkas ka,” yukna. “Turulun saga aꞌa inān. Pagabutnu, tilosahun sigām. Yuknu, ‘Ē, kaꞌam ilu! Kabuwanan kam kahāpan ati kalaꞌatan ya panungbasbi! 5 Angay tatangkawbi sawan pilak ya sukuꞌ nakuraꞌku? Sawan panginumanna koꞌ ilu, sawan isab pagputikaꞌanna. Langgal saraꞌ toꞌongan ya tahinangbi ilu!’ ”
6 Na, makaꞌabut paꞌin sosohoꞌan si Yusup-i ni sigām magdanakan, magtūy isabanna kabtangan bay pahꞌlling si Yusup ma iya. 7 Ya panambung saga magdanakan ma iya, “Tuwan, angay kami pahꞌllingannu buwattilu? Makabusung koꞌ ilu bang kami makahinang buwat yuknu ilu. 8 Entomun sīn ya bay tabāk kami ma bowaꞌ karut kami. Bay tabowa kami min lahat Kanaꞌan boꞌ tinūran ni kaꞌa. Jari pangannalnu bahāꞌ in kami makatangkaw pilak atawa bulawan min deyom lumaꞌ nakuraꞌnu? 9 Tuwan, bang sawan ilu gantaꞌ tabāk ma sai-sai min kami, aꞌa inān subay papataynu, maka kami kaseheꞌan subay magpaꞌata ma kaꞌa.”
10 Ya sambung aꞌa si Yusup-i, “Sulut na,” yukna, “sagōꞌ ya sadja hinangku ata, bang ma sai kabākan sawan ilu. Malaingkan kaꞌam kaseheꞌan puwas min palkalaꞌ.”
11 Magtūy sigām magdaiꞌ-daiꞌ amareyoꞌ duwaꞌan sigām boꞌ yampa angukab karut pakaniya-pakaniya. 12 Manjari pinaglungkad toꞌongan saga karut sigām magdanakan eꞌ sosohoꞌan si Yusup. Tinagnaꞌan min siyaka tudju ni siyali. Allā, tabākna in sawan pilak ma deyom karut si Benjamin. 13 Pagbāk itu, magtūy gineret eꞌ saga dauranakan si Yusup saga badjuꞌ sigām ma sabab kaheya susa sigām. Taparuwaꞌ paꞌin ai-ai sigām ma saga kuraꞌ, pehēꞌ na sigām pabalik ni daꞌira.
14 Pagtꞌkka si Yahud maka saga danakanna ni lumaꞌ si Yusup, inaꞌan iya masi. Magtūy sigām pakꞌppang ni tanaꞌ ma dahuanna. 15 Yuk si Yusup ma sigām, “Angay kam makahinang buwattēꞌ? Aꞌawam kam bahāꞌ? Bang aꞌa buwat aku ataꞌu angꞌndaꞌ putikaꞌan, halam aniyaꞌ kalimbungan min aku.”
16 Ya sambung si Yahud, “Daka ai pangabtang kami ma kaꞌa, tuwan. Halam aniyaꞌ pangandaꞌawahan kami in kami itu asaltun. Tapabukis na dusa kami eꞌ Tuhan. Atanu na kami itu kamemon, nggaꞌi ka sadja ya aꞌa dangan bay kabākan sawannu.”
17 Ya sambung si Yusup, “Ā, mbal. Mbal ahoꞌanku ya yuknu ilu. Ya sadja hinangku ata ya aꞌa bay kabākan sawanku. Kaꞌam kaseheꞌan ilu makajari na amoleꞌ pehēꞌ ni mmaꞌbi ma deyom kasalamatan.”
18 Sakali si Yahud pasekot ni si Yusup maka eꞌna ahꞌlling, yukna, “Tuwan, daꞌa aku busung, aniyaꞌ pamowahanta ka magsuli-suli. Daꞌa isab apꞌddiꞌ ataynu ma aku, sabab bang ma aku in kaꞌa saliꞌ Piraꞌun. 19 Tuwan,” yuk si Yahud, “bay kami tatilawnu bang aniyaꞌ lagiꞌ mmaꞌ kami atawa danakan kami saddī. 20 Ya sambung kami ma kaꞌa, aniyaꞌ mmaꞌ kami sagōꞌ atoꞌa na. Maka aniyaꞌ giꞌ siyali kami lꞌlla bay nianakan ma katoꞌa si Mmaꞌ. Duwangan sigām maglanggung sagōꞌ amatay na langgung siyaka. Manjari hal iya laꞌa takapin min sigām da-inaꞌ, angkan iya kinalasahan toꞌongan eꞌ si Mmaꞌ.”
21 Ahꞌlling giꞌ si Yahud, yukna, “Manjari, tuwan, bay sohoꞌnu kami amowa siyali kami piꞌitu ni kaꞌa supaya iya taꞌndaꞌnu. 22 Ya sambung kami ma kaꞌa, ‘Ondeꞌ heꞌ mbal makabutas min mmaꞌna, sabab bang iya abutas, arakalaꞌ amatay si Mmaꞌ.’ 23 Sagōꞌ ya llingnu in kami mbal makapagharap maka kaꞌa pabalik, luwal bang tabeyaꞌ piꞌitu siyali kami. 24 Na manjari tuwan, pagbīng kami pehēꞌ ni si Mmaꞌ, magtūy iya kahakaꞌan pasal bay pangabtangnu ma kami.
25 “Na, mbal atꞌggol, sinohoꞌ na isab kami eꞌ si Mmaꞌ piꞌitu pabalik amꞌlli balanjaꞌ mbal aheka. 26 Ya sambung kami ma iya, ‘Mmaꞌ, bang mbal pabeyaꞌnu si Benjamin mbal kami makapehēꞌ, sabab mbal tinugutan paharap ni gubnul eꞌ bang halam tabeyaꞌ danakan kami kasiyalihan.’
27 “Ya sambung si Mmaꞌ ma kami, ‘Kataꞌuwanbi asal, duwa du anakku lꞌlla min hꞌndaku si Rakiya. 28 Dakayuꞌ eꞌ halam na. Maraiꞌ iya bay tasagpeꞌ eꞌ sattuwa talun, sabab halam iya taꞌndaꞌku pabīng sangay min llaw bay kalaꞌanna.’ 29 Yukna isab ma kami, ‘Bang pabutasbi si Benjamin min aku boꞌ aniyaꞌ kamulahan pataluwaꞌ ma iya, na, patꞌkkahanbi aku karukkaꞌan mbal kasandalan eꞌ aꞌa toꞌa. Ati tabowa aku amatay eꞌ karukkaꞌan.’ ”
30-31 Ahꞌlling giꞌ si Yahud ma si Yusup. “Bang pinagbahasa, tuwan, ondeꞌ itu ya kapangāꞌan lasig si Mmaꞌ. Bang aku gantaꞌ amoleꞌ boꞌ taꞌndaꞌ eꞌ si Mmaꞌ in ondeꞌ halam tabeyaꞌ ma aku, piligdu, amatay du iya magkarukkaꞌan. 32 Paligay aku itu, tuwan,” yukna, “bay angakuhan kallum ondeꞌ itu. Yukku ma si Mmaꞌ, ‘Bang iya mbal tabowaku pabīng piꞌitu ni kaꞌa, aku iya kasusunan satꞌggolku allum.’