43
Ni Misil saga Danakan si Yusup, Kaminduwana
1 Na, karuhunan gotom ma lahat Kanaꞌan. 2 Ya balanjaꞌ bay tabꞌlli eꞌ saga anak si Yakub ma lahat Misil aubus na kamemon. Manjari ahꞌlling si Yakub ma saga anakna, yukna, “Pabalik kam pehēꞌ ni Misil amꞌlli balanjaꞌ minsan mbal aheka.”
3 Sagōꞌ yuk si Yahud ma iya, “Mmaꞌ, bay kami sinanggupan eꞌ gubnul ma lahat-i, yukna bang kami mbal amowa siyali kami pehēꞌ, mbal kami makajari paharap ni iya. 4 Bang hati pabeyaꞌnu siyali kami itu, na, pehēꞌ du kami amꞌlli balanjaꞌ. 5 Sagōꞌ bang iya mbal pabeyaꞌnu, in kami itu mbal pehēꞌ pagka mbal tinugutan paharap ni gubnul.”
6 Ya sambung si Israꞌil (hatina si Yakub), “Angay kam bay makahakaꞌan aꞌa inān aniyaꞌ giꞌ danakanbi saddī? Kasusahan sadja ya pamatꞌkkabi ma aku.”
7 Ya sambung sigām, “Tuꞌud mbal pahali aꞌa inān anilosa kami ma pasal kaukampungan kami. Tinilaw kami eꞌna pasal mmaꞌ kami bang masi allum, maka bang aniyaꞌ danakan kami saddī? Manjari, Mmaꞌ, mbal kami makapaginꞌmbal ma panilawna. Maka halam isab bay makani-pikilan kami in siyali kami sinōꞌ binowa pinaꞌan ni iya.”
8 Manjari si Yahud ya ahꞌlling, yukna, “Mmaꞌ, pangandolun ondeꞌ ilu ma aku boꞌ kami pehēꞌ magtūy amꞌlli balanjaꞌ supaya halam aniyaꞌ min kitam patay otas. 9 Paglillaꞌku baranku angakuhan iya min ai-ai makamula. Bang aniyaꞌ tumꞌkka ni iya, aku ya binīngan. Bang iya sꞌlleꞌ-bale puhuꞌ mbal tabowaku amoleꞌ piꞌitu ni kaꞌa ma halam baya-baya, aku ya kasusunan satꞌggolku allum. 10 Mmaꞌ, bang kami halam bay taggahannu, bay du kami magpehēꞌ-piꞌitu min duwa na.”
11 Yuk si Israꞌil ya mmaꞌ sigām, “Na, bang buwattēꞌ, subay kam amowa kasampangan pangahulmatbi ma gubnul eꞌ. Isihunbi ni karutbi ai-ai ya katapusan ahāp min lahatta itu, saga bulitik ahamut maka gulaꞌ buwani minsan sadja dangkuriꞌ, maka ginisan pamapā isab, maka saga kinakan ahāp nanamna buwat bigi-pistasyoa maka bigi-almon. 12 Bowahunbi isab sīn nilipat duwa min bay pamꞌllibi tagnaꞌ heꞌ, kalnaꞌ in sīn bay tabākbi ma bowaꞌ karut subay pinabalik ni sigām. Araiꞌ aniyaꞌ bay makasāꞌ. 13 Na, bowahunbi na siyalibi boꞌ kam magdaiꞌ-daiꞌ pehēꞌ ni gubnul. 14 Bang paꞌin iya pinatꞌkkahan atay ahāp eꞌ Tuhan Sangat Kawasa supaya aniyaꞌ aseꞌna amabīng ni kaꞌam si Benjamin maka danakanbi dakayuꞌ. Malaingkan bang aku saupama kalungayan anak, na, magsabal aku.”
15 Sakali itu, palanjal na saga kaꞌanakan si Yakub maka eꞌ sigām amowa kasampangan maka sīn nilipat duwa min bay dahū eꞌ. Tabowa isab si Benjamin. Pagtꞌkka sigām ni Misil, pehēꞌ sigām paharap ni si Yusup. 16 Manjari, pagꞌndaꞌ si Yusup ma si Benjamin, magtūy sohoꞌna sosohoꞌan ya angꞌntan kapatut ma lumaꞌna. Yukna, “Bowahun saga aꞌa itu pehēꞌ ni lumaꞌku. Pasumbaliꞌun hayop maka paꞌadjalin pagkakan. Magsalu kami amangan ugtu llaw ilu.”
17 Bineyaꞌ eꞌ sosohoꞌan inān bay panohoꞌan si Yusup ma iya, ati binowa saga dauranakanna pehēꞌ ni lumaꞌ. 18 Sakali itu, sabu paꞌin sigām binowa ni lumaꞌ, tꞌkkahan sigām tāw. Ma honaꞌ-honaꞌ sigām, “Ya angkan kitam binowa piꞌitu ma sabab sīn ya bay pinabīng ni deyom karuttam tagnaꞌ kitam bay amꞌlli balanjaꞌ. Maraiꞌ bahāꞌ pataggahaꞌ kitam nirugpak, ati sinaggaw kitam nihinang ata. Niagaw isab saga kuraꞌtam.”
19 Angkan na, pagabut sigām ni bowaꞌ lawang, pasekot sigām ni aꞌa angꞌntan kapatut ma lumaꞌ si Yusup amowa iya magbissala. Yuk sigām, 20 “Tuwan, daꞌa busung, aniyaꞌ pahꞌlling kami ma kaꞌa. Bay kami makapiꞌitu mintꞌdda amꞌlli balanjaꞌ. 21-22 Sagōꞌ makahantiꞌ paꞌin kami ma lꞌngnganan tudju amoleꞌ, taukab kami saga karut pakaniya-pakaniya. Pagukab itu, taꞌndaꞌ kami ma bowaꞌ karut sīn bay pamayad kami balanjaꞌ, jukup toꞌongan. Daka sai bay amatꞌnnaꞌ sīn inān ni deyom karut kami. Angkan na itiyaꞌ kami amowa sīn eꞌ pinapoleꞌ ni kaꞌam. Maka aniyaꞌ itu sīn saddī pamꞌlli kami balanjaꞌ ma lꞌngngan itu.”
23 Ya sambung aꞌa angꞌntan kapatut eꞌ, “Daꞌa kam asusa. Daꞌa kam tināw. Tuhanbi, ya pagtuhanan mmaꞌbi, bay makaisi sīn inān ni deyom karutbi. Bay du tasambutku bayadbi.” Puwas eꞌ pinaluwas eꞌna si Simiyun niꞌndeꞌan ni sigām.
24 Na, binowa na saga danakan si Yusup ni deyom lumaꞌna eꞌ sosohoꞌanna heꞌ. Binuwanan sigām boheꞌ pangoseꞌ tapeꞌ sigām maka binuwanan isab pagkakan saga kuraꞌ sigām. 25 Makataꞌu paꞌin sigām binowa sigām amangan ma lumaꞌ si Yusup, sinakap baꞌanan kasampangan pangahulmat sigām ma iya pagtꞌkkana ni lumaꞌ ugtu llaw.
26 Manjari pagtꞌkka si Yusup ni lumaꞌ, pasujud sigām ma dahuanna maka eꞌ sigām amuwanan iya saga kasampangan bay binowa eꞌ sigām ni deyom lumaꞌ. 27 Tinilaw sigām eꞌ si Yusup pasal kahālan sigām. Yukna, “Painay na mmaꞌbi ya bay pangahakabi ma aku atoꞌa na? Masi iya allum?”
28 Ya sambung sigām, “Ahoꞌ tuwan, ahāp masi mmaꞌ kami maka alasig.” Pasujud na isab sigām ni si Yusup pagaddat sigām ma iya.
29 Na, pagꞌndaꞌ si Yusup ma langgungna si Benjamin, yukna, “Ā, ya na ka itu siyalibi, ya bay panuli-nulibi ma aku? Bang paꞌin ka binuwanan kahāpan eꞌ Tuhan, Otōꞌ.” 30 Agon-agon ahansul pangatayan si Yusup pagꞌndaꞌna ma langgungna. Angkan iya paraiꞌ-daiꞌ paluwas sabab mbal tasandal boheꞌ matana amꞌttak. Jari pasōd iya ni deyom bilikna anangis mainaꞌan.
31 Pagpuwas, akulaꞌup iya boꞌ pabalik ni saga danakanna. Sinandalan eꞌna boheꞌ matana maka eꞌna anohoꞌ saga aꞌana amatꞌnnaꞌ kinakan sigām.
32 Pinatꞌnnaꞌan si Yusup dangan-danganna. Saga danakanna pinatꞌnnaꞌan ma pamanganan saddī, sigām-sigām sadja. Saddī isab ma saga bangsa Misil ya magkakan mainaꞌan. Mbal sigām makapagsalu maka bangsa Hibrani, sabab asammal bang ma sigām. 33 Jari pinatingkōꞌ saga danakan si Yusup ma anggopanna, maka pinagsunuꞌ-sunuꞌ isab tingkōꞌan sigām min siyaka ni siyali. Pagꞌndaꞌ sigām ma pagpatingkōꞌ ma sigām buwattēꞌ, magtūy sigām magꞌndaꞌ mata tabowa eꞌ kainu-inuhan sigām. 34 Manjari aniyaꞌ palauk pangalabot ma sigām bay min lamisahan si Yusup, sagōꞌ ya pangalabot si Benjamin nilipat lima min bay pangalabot saga danakanna. Na magjamu sigām maka si Yusup, maginum sampay maglami-lami.