40
Si Yusup Angamaꞌanahana Uppi
1-2 Na atꞌggol-tꞌggol paꞌin, aniyaꞌ duwa sosohoꞌan Piraꞌun makarusa ma iya. Dakayuꞌ itu bay pagnakuraꞌan saga aꞌa magbubuhat inumanna, maka dakayuꞌ ya pagnakuraꞌan saga aꞌa maghinang tinapayna. Angastol Piraꞌun ma sigām karuwangan itu, 3 ati pinakalabusu sigām ma deyom lumaꞌ kapitan saga jaga, hatina lumaꞌ pangumbisan si Yusup. 4 Mainaꞌan paꞌin sigām, aniyaꞌ hinang pamatꞌnnaꞌ kapitan jaga ma si Yusup. Sinōꞌ iya anabangan aꞌa duwangan-i ma ai-ai kagunahan sigām.
Na, atꞌggol-tꞌggol paꞌin sigām ma deyom kalabusu, ma dasangom du, 5 aniyaꞌ tauppi eꞌ duwangan pilisu itu, ya bay pagnakuraꞌan ma deyom astanaꞌ Piraꞌun. Magsaddī uppi sigām dangan maka dangan, maka saddī isab maꞌanana.
6-7 Pagsubu, pasekot si Yusup ni duwangan sosohoꞌan Piraꞌun ya seheꞌna ma deyom kalabusu itu. Taꞌndaꞌna magtūy aniyaꞌ pagsusahan sigām angkan tilawna. “Asusa pahāp pamaihuꞌanbi ilu. Angay bahāꞌ?”
8 Ya sambung sigām karuwangan, “Aniyaꞌ uppi kami dibuhiꞌ, sagōꞌ halam aniyaꞌ maitu ataꞌu angamaꞌanahan iya.”
“Ā,” yuk si Yusup, “dakayuꞌ-kayuꞌ du Tuhan makabuwan pangitaꞌu magmaꞌana. Hakaꞌin aku konoꞌ ya bay tauppibi ilu.”
9 Manjari ahꞌlling aꞌa dangan ya pagnakuraꞌan saga aꞌa magbubuhat inuman Piraꞌun, yukna, “Ya taꞌndaꞌku ma deyom uppiku dampoꞌon bahan anggul 10 tꞌllu sangana. Paguplutna, magtūy anumping. Pagsumping itu, magtūy patahak buwaꞌna. 11 Na, inaꞌan asal sawan pagiꞌinuman Piraꞌun ma tanganku, jari kꞌttuꞌku buwaꞌ anggul eꞌ boꞌ yampa pꞌggaꞌku ni deyom sawan. Puwas eꞌ, bay sōnganku boheꞌna pehēꞌ ni Piraꞌun. Na, halam na.”
12 Yuk si Yusup, “Ya na itu maꞌana uppinu ilu. Ya tꞌllu sanga ilu, hatina tꞌllungꞌllaw. 13 Tꞌllungꞌllaw giꞌ minnitu in kaꞌa pinaluwas du eꞌ Piraꞌun min deyom kalabusu. Pinabīng du ka ni bay hinangnu dahū magbubuhat inumanna. 14 Sagōꞌ aniyaꞌ pangamuꞌku ma kaꞌa,” yuk si Yusup. “Bang ka ma deyom kasannangan na, ndūꞌ, entomun paꞌin aku sangkahāpan. Sabbutun kahālanku ma mundaꞌan Piraꞌun supaya aku makaluwas min deyom kalabusu itu. 15 Sabab ya bꞌnnalna, in aku itu bay tasaggaw min lahatku porol, ya lahat bangsa kami Hibrani. Damikiyanna isab maitu ma lahat Misil, takalabusu aku ma halam aniyaꞌ sababna.”
16 Na, takale paꞌin kahāp maꞌana itu eꞌ nakuraꞌ dakayuꞌ ya maghihinang tinapay Piraꞌun, magtūy iya amaluwas uppina ma si Yusup. Yukna, “Ya du aku taga-uppi dibuhiꞌ. Ma deyom uppiku in aku baranku bay angandurung tꞌllu ligu magbangkat-bangkat. 17 Aniyaꞌ ginisan tinapay maka bāng-bāng ma ligu diyataꞌ, arak pangalabot Piraꞌun, sagōꞌ pinagtittuk eꞌ saga manuk-manuk. Na, ya du ilu uppiku.”
18 Manjari ahꞌlling si Yusup ma nakuraꞌ maghihinang tinapay, “Ya maꞌana uppinu ilu,” yukna “buwattitu. Ya tꞌllu ligu sapantun tꞌllungꞌllaw. 19 Jari tꞌllungꞌllaw minnitu in kaꞌa-i pinaluwas du eꞌ Piraꞌun min deyom kalabusu boꞌ yampa paponggolanna kōknu. Pagpuwas, pinasagnat bangkaynu ma diyataꞌ hāg boꞌ pinagtittuk isina eꞌ saga manuk-manuk.”
20 Na, tꞌllungꞌllaw paꞌin damuli minnēꞌ, taꞌabut na llaw pagmahaltabat kapaganak ma Piraꞌun. Pinagjamuhan eꞌna kamemon saga tendogna ya pagnakuraꞌan, maka sohoꞌna pinaluwas min kalabusu ya nakuraꞌ magbubuhat inumanna inān sampay nakuraꞌ maghihinang tinapayna. Pinatampal sigā ni matahan baꞌanan nakuraꞌ inān. 21 Ya nakuraꞌ magbubuhat inuman pinabalik eꞌ Piraꞌun ni bay hinangna. 22 Saguwāꞌ in nakuraꞌ maghihinang tinapay inān sinōꞌ pinasagnat bangkayna ni hāg. Jari taluwaꞌ bay pagmaꞌana si Yusup ma pasal panguppi duwangan itu.
23 Malaingkan halam taentom eꞌ nakuraꞌ magbubuhat inuman ya bay tambuku si Yusup ma iya. Takalipatna na.