39
Si Yusup maka Hꞌnda si Putipar
1 Na, in si Yusup bay na tabowa ni lahat Misil eꞌ saga aꞌa bangsa Ismaꞌil. Pinabꞌllihan iya eꞌ sigām ni si Putipar, ya pagnakuraꞌan saga jaga ma deyom astanaꞌ Piraꞌun.
2 Manjari itu, ahāp sadja katꞌkkahan ai-ai nihinang eꞌ si Yusup hinabuna patꞌnnaꞌ ma lumaꞌ nakuraꞌna si Putipar aꞌa Misil. Tuꞌud iya tinabang na paꞌin eꞌ si Yawe. 3 Taꞌndaꞌ isab eꞌ si Putipar in si Yusup tinabang asal eꞌ si Yawe, maka ahāp kasōngan hinangna kamemon. 4 Manjari kasulutan si Putipar ma si Yusup ati tahinang iya pangandolanna. Binuwanan iya kapatut magnakuraꞌ ma aꞌana kamemon sampay ma pangaltaꞌna kamemon. 5 Na, tinagnaꞌan min waktu inaꞌan-i, si Putipar aꞌa Misil bay nilidjikiꞌan eꞌ PANGHŪꞌ ma sabab si Yusup. Paheka na paꞌin palsukuꞌanna, ai na ka ma deyom lumaꞌ, ai na ka ma humana maka ma kabbunna. 6 Angandol toꞌongan si Putipar ma si Yusup, angkan pangandolna ma iya pangaltaꞌna kamemon. Halam aniyaꞌ pagsusahan si Putipar, luwal pagkakanna.
Na, si Yusup itu dakayuꞌ lꞌlla ahāp luwana maka pamarananna. 7 Sakali itu, mbal isab atꞌggol, kinabilahian iya eꞌ hꞌnda si Putipar. Yukna ma si Yusup, “Piꞌitu ka ni deyom bilik, maghulid kita.”
8 Sagōꞌ mbal si Yusup. Ya llingna ma dꞌnda heꞌ, “Oy, aku itu pangandolan eꞌ nakuraꞌku, ya na hꞌllanu. Mbal pamagayna ai-ai pangaltaꞌna ma deyom lumaꞌ itu pagka pangandolna ma aku. 9 Bang binista, in kapatutku daheya du maka kapatutna ma deyom lumaꞌ itu. Pagdūl-bayaꞌanku kamemon, luwal du kaꞌa sabab hꞌndana ka. Angkan aku mbal makahinang laꞌat ya yuknu ilu, sabab dusa koꞌ ilu ni Tuhan!” 10 Na minsan buwattēꞌ lling si Yusup, masi-masi du iya nilogos eꞌ hꞌnda si Putipar, saguwāꞌ mbal toꞌongan iya ameyaꞌ maghulid maka iya. Mbal minsan pasekot ni tongodna.
11 Sakali aniyaꞌ dakayuꞌ llaw, makasōd paꞌin si Yusup ni deyom lumaꞌ maghinang ai-ai kabiyaksahanna, halam aniyaꞌ sosohoꞌan saddī ma deyom lumaꞌ. 12 Pagsōdna, magtūy iya tahellaꞌ ma tōng badjuꞌna eꞌ hꞌnda si Putipar. Yukna ma iya, “Daiꞌ na ka. Maghulid kita.” Daipara makakawas si Yusup min balutanna maka eꞌna alahi paluwas. Kaꞌbbahan badjuꞌna ma tangan dꞌnda.
13 Na, pagꞌndaꞌ hꞌnda si Putipar ma si Yusup paragan paluwas, maka badjuꞌ bay kaꞌbbahan eꞌna, 14 magtūy lingananna saga sosohoꞌanna. “Ndaꞌunbi,” yukna, “aꞌa Hibrani bay pinapiꞌitu eꞌ hꞌllaku angahinaꞌ kitam. Bay iya anōd bilikku, arak aku niusibaꞌan eꞌna, mandaꞌ aku angolang saruꞌun-duꞌun. 15 Na, pagolangku itu,” yukna, “alahi iya paluwas magdaiꞌ-daiꞌ. Oꞌo, badjuꞌna bay bbahanna ma bilikku.”
16 Manjari dꞌnda inān bay angꞌnnaꞌ badjuꞌ si Yusup ma bihingna sampay atꞌkka hꞌllana. 17 Na, atꞌkka paꞌin si Putipar magtūy iya sinuli-sulihan eꞌ hꞌndana. Yukna, “O, ya atanu Hibrani bay bowanu piꞌitu, bay makasōd ni deyom bilikku insiniꞌ amuwanan aku kaiyaꞌan. 18 Daipara angolang aku saruꞌun-duꞌun. Pagolangku, magtūy iya alahi magdaiꞌ-daiꞌ paluwas. Sagōꞌ taꞌbba badjuꞌna ma bihingku.”
19 Na, pagkale paꞌin si Putipar ma sumbungan hꞌndana pasal bay tahinang konoꞌ eꞌ atana heꞌ, magtūy akagit sidda atayna, 20 ati sohoꞌna si Yusup sinaggaw boꞌ pinakalabusu ma deyom lumaꞌ pagkumbisan saga pilisu bay makalanggal saraꞌ Piraꞌun.
Kasangdanan si Yusup ma deyom kalabusu, 21 malaingkan halam bay pinasagaran eꞌ PANGHŪꞌ. Taptap iya pinatꞌkkahan lasa maka aseꞌ, ya angkan iya makasulut atay nakuraꞌ kalabusu inān. 22 Si Yusup kabuwanan eꞌna kapatut magbayaꞌ ma saga pilisu kaseheꞌan, maka pangandolna isab ma iya kahinangan ai-ai mainaꞌan ma kalabusu. 23 Manjari itu, pagka si Yusup ya aꞌa pangandolan ma deyom kalabusu, halam aniyaꞌ pagsusahan nakuraꞌ inān sabab aheya tabang PANGHŪꞌ ma si Yusup. Ai-ai hinangna ahāp sadja kasōnganna.