Panagnaꞌan 38

Si Yahud maka si Tamar

¹ Na, ma waktu inaꞌan pabutas na si Yahud min saga danakanna boꞌ pehēꞌ ni daꞌira Adullam patꞌnnaꞌ ma lumaꞌ si Hira. ² Mahēꞌ paꞌin si Yahud, makapagkilā iya maka budjang, anak si Suwa bangsa Kanaꞌan. Jari tahinangna hꞌnda. ³ Anganak iya lꞌlla ati si Ēr ya pangōn si Yahud ma iya. ⁴ Angiram hꞌndana pabīng boꞌ anganak isab lꞌlla. Onan ya pangōnna ma iya. ⁵ Ma lahat Keseb paꞌin, anganak giꞌ iya pabīng, lꞌlla isab. Sela ya pangōnna ma iya.

⁶ Na palabay paꞌin daka pilantahun, si Yahud bay amahꞌndaꞌan anakna siyaka, ya si Ēr, ma si Tamar. ⁷ Sagōꞌ lumanduꞌan alaꞌat kajarihan si Ēr ma pangꞌndaꞌ PANGHŪꞌ-Yawe, angkan iya magtūy minomos.

⁸ Manjari ahꞌlling si Yahud ma si Onan ya anakna pasunuꞌ. “Otōꞌ,” yukna, “ipalnu si Tamar abalu na. Subay ka magpūn maka iya supaya aniyaꞌ tubuꞌ siyakanu. Ya na addat bang aniyaꞌ amatay ma halam aniyaꞌ anakna.” ⁹ Sagōꞌ kinataꞌuwan asal eꞌ si Onan bang si Tamar gantaꞌ abꞌttong eꞌna boꞌ anganak, in anak inān mbal taitung anakna. Taitung anak siyakana. Angkanna si Onan itu, sakahabaꞌ iya magbihing maka si Tamar, mbal tinoꞌongan eꞌna supaya halam aniyaꞌ tubuꞌ ma siyakana ya bay amatay heꞌ. ¹⁰ Alaꞌat isab hinang si Onan inān ma pangꞌndaꞌ PANGHŪꞌ angkan amatay isab iya.

¹¹ Na, aniyaꞌ lling si Yahud ma ayuwanna si Tamar, yukna, “Amoleꞌ na ka ni okoman mmaꞌnu. Daꞌa ka maghꞌlla saddī, lagarin giꞌ anakku si Sela. Subay na iya asangpot boꞌ kam magpūn.” Angkan buwattēꞌ lling si Yahud sabab ahalliꞌ iya ma si Sela. Kalu iya amatay buwat duwangan siyakana heꞌ. Jari amoleꞌ na si Tamar ni mattoꞌana.

¹² Atꞌggol-tꞌggol paꞌin, amatay isab anak si Suwa ya hꞌnda si Yahud. Ataptap paꞌin pangatayan si Yahud itu min bay kamatay hꞌndana, magbeyaꞌ iya maka bagayna si Hira aꞌa Adullam. Amaklay sigām karuwangan pehēꞌ ni lahat Timna, ni lugal pagguntingan bulbul saga bili-bili si Yahud.

¹³ Manjari aniyaꞌ makahaka ma si Tamar in matoꞌana song atꞌkka ni Timna angangguntingan saga bili-bilina. ¹⁴ Na pagtaꞌu si Tamar, magtūy iya analinan sꞌmmekna balu. Tinambunan isab baihuꞌna maka sulban boꞌ mbal takilā, ati aningkōꞌ iya ma tongod pagsosōran ni deyom kauman Inaim, ya ma bihing kalsara tudju ni Timna. Kinataꞌuwan asal eꞌ si Tamar in si Sela asangpot na, sagōꞌ halam giꞌ tapamahꞌlla ma iya.

¹⁵ Na, taꞌndaꞌ eꞌ si Yahud si Tamar eꞌ sagōꞌ halam takilāna. Pangannalna dꞌnda pinagtatambahan sabab magtambun baihuꞌna. ¹⁶ Manjari itu, pagka halam kinataꞌuwan eꞌ si Yahud in dꞌnda inān ayuwanna, pinaꞌan si Yahud ni tongodna ma bihing lān. Yukna ma iya, “Bilahi ka ameyaꞌ ma aku?”

Yuk si Tamar, “Ai panambanu aku?”

¹⁷ Ya sambung si Yahud, “Pabeyaꞌanta ka dakayuꞌ anak kambing min baꞌanan kambingku.”

“Na,” yuk si Tamar, “makajari. Sagōꞌ subay aniyaꞌ sandaꞌ pangꞌbbanu ma aku.”

¹⁸ Atilaw si Yahud, “Ai pangꞌbbaku?”

Yuk dꞌnda, “Ā, engkot kꞌllongnu ilu maka tungkudnu.” Na sinōngan magtūy eꞌ si Yahud ati magbihing na sigā maka angiram iya. ¹⁹ Puwas eꞌ amoleꞌ na si Tamar boꞌ yampa nilaꞌanan sulban bay panambun baihuꞌna ati magsinꞌmmek iya balu pabīng.

²⁰ Na, si Yahud itu bay amabeyaꞌ kambing ma bagayna si Hira. Sinōꞌ eꞌna angāꞌ ai-ai bay pangꞌbbana ma dꞌnda heꞌ, sagōꞌ halam tabāk eꞌna. ²¹ Aniyaꞌ isab saga aꞌa Inaim bay tinilaw eꞌ si Hira bang maingga dꞌnda pinagtatambahan ya bay ma bihing lān.

Ya sambung saga lꞌlla heꞌ, “Tuwan, bay min katagnaꞌ lagiꞌ halam aniyaꞌ dꞌnda pinagtambahan maitu.”

²² Pabalik si Hira pehēꞌ ni si Yahud angahakaꞌan iya. Yukna, “Tuwan, halam tabākku. Yuk isab saga lꞌlla mainaꞌan halam konoꞌ aniyaꞌ dꞌnda pinagtambahan mainaꞌan min katagnaꞌ.”

²³ “Na,” yuk si Yahud, “ya niyatku subay anambahan iya dakayuꞌ anak kambing, sagōꞌ halam ya tabāknu. Ma iya na ai-ai bay pangꞌbbaku. Pasagarin na boꞌ kita mbal pagtunggīngan eꞌ aꞌa.”

²⁴ Sakali itu, palabay paꞌin saga tꞌllumbulan, aniyaꞌ aꞌa makahaka ma si Yahud, yukna, “Ayuwannu si Tamar alaꞌat kajarihanna magusahaꞌan baranna, maka abꞌttong na iya.”

Magpanohoꞌan si Yahud, yukna, “Bowahunbi iya paluwas min kauman itu. Tunuꞌunbi boꞌ amatay.”

²⁵ Hinabu si Tamar binowa paluwas bahasa tinunuꞌ, bay iya amabeyaꞌ lapal ni matoꞌana. Yuk lapalna, “Abꞌttong aku eꞌ aꞌa ya tag-dapu engkot kꞌllong maka tungkud itu. Ndaꞌun pahāp, kalu takilānu.”

²⁶ Takilā magtūy eꞌ si Yahud. Yukna, “Abontol iya labi-labi min aku. Tinaikutan eꞌku addattam pagka halam bay pamahꞌllaku ma iya anakku si Sela.” Jari puwas minnēꞌ halam iya bay makasekot pabalik ni ayuwanna si Tamar eꞌ.

²⁷ Na, taꞌabut paꞌin bulan panganak si Tamar, kꞌmbal lꞌlla ya nianakan eꞌna. ²⁸ Angꞌddon paꞌin iya, amaluwas tanganna kꞌmbal dakayuꞌ. Magtūy niengkotan eꞌ panday maka salban keyat. “Ya itu,” yukna, “kꞌmbal siyaka.” ²⁹ Sagōꞌ sinuhutan tanganna. Jari ya kꞌmbal pasunuꞌ paluwas dahū. Yuk panday isab, “Mamarahi pahāp kaꞌa ilu paꞌagaw paluwas dahū!” Jari si Peres ya pangōn ondeꞌ-ondeꞌ dahū paluwas eꞌ. ³⁰ Puwas eꞌ, paluwas na kꞌmbal ya taga-salban keyat ma tanganna, lꞌlla du isab, ati niōnan iya si Sera.