37
Si Yusup maka Panguppina
1-2 Ya na itu salsila pasal si Yakub maka anak-mpuna. Maglahat asal iya ma Kanaꞌan, ya lahat bay paghantiꞌan mmaꞌna si Isaꞌak.
Manjari itu, ya anakna si Yusup waꞌi angipat saga hayop sigām, beyaꞌ isab saga danakanna lꞌlla min saddī inaꞌ, min si Bilha maka si Silpa. Sangpūꞌ maka pituntahun umul si Yusup ma waktu inaꞌan-i. Jari sinumbung eꞌ si Yusup saga danakanna itu ni mmaꞌ sigām. Aniyaꞌ konoꞌ hinang sigām mbal taluwaꞌ.
3 Na, aheya lasa si Yakub ma si Yusup. Salasa-lasa iya ma anakna kaseheꞌ, alasa giꞌ ma si Yusup sabab anak ma katoꞌana. Jari pinatahiꞌan eꞌna si Yusup juba alingkat. 4 Kinataꞌuwan paꞌin eꞌ saga dauranakan kaheya lasa si Yakub ma si Yusup, labi-labi min lasana ma sigām kaseheꞌan, magtūy sigām abꞌnsi ma iya. Mbal na sigām amissala sangkahāpan ma iya.
5 Manjari itu, aniyaꞌ waktu anguppi si Yusup. Kahakaꞌan paꞌin dauranakanna pasal uppina, gom paꞌin abꞌnsi sigām ma iya. 6 Yukna ma sigām, “Ā, kalehunbi bay tauppiku. 7 In kitam kamemon bay ma huma magpꞌkkos pai, manjari ya pꞌkkosan pai bay ma aku magtūy anꞌngge pabontol. Ya du saga pꞌkkosan pai bay ma kaꞌam, anꞌngge isab boꞌ patilibut ni pꞌkkosanku ati pasujud.”
8 Sinambungan si Yusup eꞌ danakanna, yuk sigām, “Ē! Kaꞌa ilu magsultan bahāꞌ ma kami? Pagbayaꞌannu kami?” Pasōng gom paꞌin kabꞌnsi sigām ma iya ma sabab uppina maka suli-sulina heꞌ.
9 Pinauppihan na isab si Yusup pabalik ati suli-sulihanna isab saga danakanna. Yukna ma sigām, “Kalehunbi pasal uppiku dakayuꞌ itu. Tauppiku llaw maka bulan sampay saga bituꞌun sangpūꞌ maka ssa hekana pasujud ni aku.”
10 Anuli-nuli isab si Yusup ma mmaꞌna pasal uppina itu. Magtūy iya pinahꞌllingan eꞌ mmaꞌna, yuk-i, “Oy! Uppi ai ilu? Pikilnu bahāꞌ in aku maka inaꞌnu sampay saga danakannu subay pasujud ni kaꞌa?” 11 Manjari akagit atay saga danakan si Yusup ma iya. Sagōꞌ kinannal eꞌ mmaꞌna palkalaꞌ inān.
Pinabꞌllihan si Yusup boꞌ Binowa ni Lahat Misil
12 Manjari dakayuꞌ llaw, pagka mainaꞌan saga danakan si Yusup ma lahat Sekem angipat baꞌanan kahayopan ya sukuꞌ mmaꞌ sigām, 13 aniyaꞌ panohoꞌan si Israꞌil (hatina si Yakub) ma si Yusup. Yukna, “Otōꞌ, kataꞌuwannu asal, inaꞌan saga danakannu ma Sekem angipat hayop. Bilahi aku anohoꞌ kaꞌa pehēꞌ.”
Ya sambung si Yusup, “Ahoꞌ, Mmaꞌ, pehēꞌ aku.”
14 Yuk mmaꞌna isab, “Na, pehēꞌ na ka. Tibawun danakannu inān bang ahāp du kahālan sigām maka saga hayopta boꞌ ka amoleꞌ isab piꞌitu angahakaꞌan aku.” Jari pinatulak iya min kapantayan Hebron tudju ni lahat Sekem.
Pagtꞌkkana ni Sekem, 15 hinabuna amiha saga danakanna ma kaparang-parangan, aniyaꞌ aꞌa makalanggal ma iya. Yukna, “Otōꞌ, ai pihanu ilu?”
16 Ya sambung si Yusup, “Ya pihaku, tuwan, saga danakanku. Maitu konoꞌ sigām angipat kahayopan kami. Kataꞌuwannu bahāꞌ tuwan bang maingga sigām?”
17 Yuk aꞌa inān, “Ā, halam na sigām maitu. Takaleku sigām magsuli-suli, ni lahat Dotan konoꞌ.”
Manjari paturul si Yusup ni saga danakanna sampay taꞌabutna sigām ma tongod Dotan. 18 Na, alawak-lawak giꞌ si Yusup, taꞌndaꞌ iya heꞌ saga danakanna. Magtūy iya pinagisunan pinapatay eꞌ sigām.
19 Yuk sigām danseheꞌan, “Oꞌo, ndaꞌunbi. Ilu na si Pangunguppi. 20 Sūng, bonoꞌta iya ati timananta baranna ni deyom lowang bay pagtauꞌan boheꞌ itu. Ya pangahakata ma pasalna in iya bay pinapatay maka kinakan eꞌ sattuwa talun. Ndaꞌta minnēꞌ bang ai kapūsan uppina.”
21 Na, pagkale pagisun itu eꞌ siyaka sigām si Rubin, magtūy iya amikil bang buwattingga eꞌna anabang si Yusup boꞌ mbal kinalaꞌatan eꞌ saga danakanna. Yukna ma sigām, “Ndūꞌ, daꞌa iya papatayhunbi. 22 Hūgta sadja iya ni lowang itu. Halam aniyaꞌ aꞌa maglahat maitu. Saguwāꞌ daꞌa iya inay-inayunbi.” Angkan buwattēꞌ lling si Rubin sabab magmaksud iya angāꞌ si Yusup pabalik boꞌ pinapoleꞌ ni mmaꞌna.
23 Ahā, pagtꞌkka si Yusup pehēꞌ ni saga danakanna, magtūy iya sinaggaw eꞌ sigām boꞌ niurusan jubana alingkat eꞌ. 24 Puwas eꞌ, binowa iya nihūg ni deyom lowang halam boheꞌna sabab atigang na.
25 Sakali itu, hinabu saga danakan si Yusup aningkōꞌ amangan, na, aniyaꞌ taꞌndaꞌ eꞌ sigām saga aꞌa bangsa Ismaꞌil. Inaꞌan sigām magturul-turul min lahat Giliyad tudju ni lahat Misil. Aniyaꞌ isab dagangan paruwaꞌ ma saga untaꞌ sigām, saga ginisan bulitik pahamut maka ginisan pamapā.
26 Ahꞌlling magtūy dakayuꞌ danakan sigām ōnna si Yahud, “Ai untungna bang bonoꞌta siyalita itu boꞌ limbunganta kamatayna? 27 Gom lagiꞌ iya pabꞌllihanta ni saga aꞌa Ismaꞌil itu. Daꞌa sadja iya mulata sabab danakanta du iya, dalahaꞌ maka kitam.” Manjari kasulutan saga danakan si Yahud ma llingna heꞌ.
28 Manjari itu, makasekot paꞌin saga aꞌa magdaragang eꞌ,a nihellaꞌ si Yusup paluwas min deyom lowang boꞌ yampa pinabꞌllihan ma saga bangsa Ismaꞌil eꞌ. Ya bꞌllihanna duwampūꞌ pilak tibuꞌuk.b Pagbꞌlli paꞌin, tabowa iya pehēꞌ ni lahat Misil.
29 Na, pabalik si Rubin ni lowang bay pangahūgan si Yusup arak angāꞌ iya. Pagdomolna halam mainaꞌan si Yusup, agsai gineret eꞌna badjuꞌna tandaꞌ sin pagdukkana. 30 Pabīng iya magdaiꞌ-daiꞌ ni tongod saga danakanna boꞌ yukna, “Arōy! Halam mainaꞌan si Yusup! Daka painay hinangku!”
31 Jari, anumbaliꞌ sigām kambing ati niledje juba si Yusup maka lahaꞌna. 32 Binowa juba inān amoleꞌ boꞌ pinaꞌndaꞌan ni mmaꞌ sigām. Ya yuk sigām, “Ndūꞌ Mmaꞌ, ndaꞌun ba bay tabāk kami. Juba si Yusup bahāꞌ?”
33 Takilā magtūy eꞌ si Yakub. “Ahoꞌ,” yukna. “Ma si Yusup koꞌ ilu! Kilāku aniyaꞌ sattuwa talun bay angāꞌ iya anagpeꞌ baranna. Arōy! Anakku si Yusup!”
34 Magtūy gineret eꞌ si Yakub badjuꞌ ma baranna boꞌ yampa magbinadjuꞌ karut,c tandaꞌ ma pagkarukkaꞌanna. Jari atꞌggol toꞌongan pagdukka si Yakub ma anakna. 35 Pinaꞌan ni iya saga anakna dꞌnda-lꞌlla bahasa amauliꞌ karukkaꞌanna, saguwāꞌ mbal iya, subay pasangdan magdukka. Angabtang iya, yukna, “Mbal alaꞌan pagdukkaku ma anakku sampay aku amoleꞌ ni ahirat.” Manjari kasangdanan si Yakub magdukka ma anakna si Yusup.
36 Pasaltaꞌ, si Yusup bay binowa ni lahat Misil eꞌ saga magdaragang.d Ma Misil paꞌin, pinabꞌllihan iya ni dakayuꞌ kapitan pangandolan Piraꞌun,e ōnna si Putipar. Pagnakuraꞌan iya ma saga jaga ma deyom astanaꞌ Piraꞌun.