36
Saga Panubuꞌ si Esaw
1 Ya na itu salsila panugsugan saga panubuꞌ si Esaw, ya pinagōnan isab si Edom. 2 Min lahat Kanaꞌan hꞌndana katꞌllungan. Hꞌndana dakayuꞌ si Ada anak si Elon, aꞌa bangsa Hīt. Karuwana si Oholebama anak si Ana anak si Sebeyon, aꞌa bangsa Hīb. 3 Katꞌlluna si Basemat anak si Ismaꞌil, ya magdanakan maka si Nebayot. 4 Si Elepas ya anak si Esaw min si Ada, si Ruwil iya anakna min si Basemat. 5 Saga anakna min si Oholebama, ya na si Jiyus, si Jalam maka si Kora. In itu kamemon bay nianakan ma si Esaw ma lahat Kanaꞌan.
6 Manjari aniyaꞌ waktu pabutas na si Esaw min siyalina si Yakub, maglain ni lahat saddī. Tabeyaꞌ ma iya saga anak-hꞌndana sampay saga tendogna kamemon. Tabowa isab kahayopanna sampay pangaltaꞌna kamemon bay tausahana ma lahat Kanaꞌan. 7 Ya angkan si Esaw pabutas min si Yakub, sabab aheka makalanduꞌ baꞌanan hayop ya sukuꞌ sigā karuwangan, mbal sꞌddong ma tanaꞌ bay paglahatan sigā heꞌ. Mbal na sigā makapagdakayuꞌ lahat. 8 Manjari si Esaw, hatina si Edom, pehēꞌ na ni kabūd-būran lahat Seꞌer boꞌ maglahat mahēꞌ.
9 Ya na itu isab salsila panugsugan panubuꞌ si Esaw, ya pangꞌmboꞌan bangsa Edom, aꞌa kabūd-būran Seꞌer.
10 Saga anak si Esaw lꞌlla:
Si Elepas ya anakna min hꞌndana si Ada, si Ruwil ya anakna min hꞌndana si Basemat.
11 Saga anak si Elepas lꞌlla:
si Teman, si Omar, si Sepo, si Gatam maka si Kenas.
12 Aniyaꞌ hꞌnda-hꞌnda isab si Elepas, ōnna si Timna,
ya bay anganakan lꞌlla, ōnna si Amalek. Ya du inaꞌan saga mpu si Esaw min hꞌndana si Ada.
13 Saga anak si Ruwil lꞌlla:
si Sera, si Samma maka si Missa. Ya du inaꞌan saga mpu si Esaw min hꞌndana si Basemat.
14 Aniyaꞌ giꞌ anak si Esaw lꞌlla min hꞌndana si Oholebama anak si Ana, mpu isab si Sebeyon:
si Jeꞌus, si Jalam maka si Kora.
15 Itiyaꞌ na saga datuꞌ bay patubuꞌ min si Elepas anak si Esaw siyaka:
si Teman, si Omar, si Sepo, si Kenas, 16 si Kora, si Gatam maka si Amalek. Si Ada hꞌnda si Esaw ya mboꞌ saga aꞌa magdaratuꞌ itu ya bay panubuꞌ si Esaw.
17 Saga datuꞌ isab bay patubuꞌ min si Ruwil ya anak si Esaw dakayuꞌ:
si Nahat, si Sera, si Samma maka si Missa. Si Basemat hꞌnda si Esaw ya mboꞌ sigām.
18 Saga anak si Esaw isab min hꞌndana si Oholebama anak si Ana:
si Jeꞌus, si Jalam maka si Kora, aꞌa magdaratuꞌ kamemon.
19 Manjari ya du inaꞌan saga bangsa maka baꞌanan datuꞌ sigām ya bay patubuꞌ min si Esaw (ya pinagōnan isab si Edom).
20-21 Na, in pasal saga bangsa porol ma lahat Edom, si Seꞌer bangsa Hōr ya pangꞌmboꞌan sigām. Saga anak si Seꞌer ya tahinang datuꞌ, ya na si Lotan, si Sobal, si Sebeyon, si Ana, si Disun, si Eser maka si Disan.
22 Saga anak si Lotan:
si Hore maka si Homan. Si Timna ya danakan si Lotan dꞌnda.
23 Saga anak si Sobal:
si Alban, si Manahat, si Ebal, si Sepo maka si Onam.
24 Saga anak si Sebeyon isab:
si Aya maka si Ana. Si Ana itu bay makabāk boheꞌ amukal-mukal ma lahat paslangan, hinabuna magipat saga kuraꞌ mmaꞌna.
25 Saga anak si Ana:
si Disun ya anakna lꞌlla, si Oholebama ya anakna dꞌnda.
26 Saga anak si Disun:
si Hemdan, si Esban, si Itran maka si Keran.
27 Saga anak si Eser anak si Seꞌer:
si Bilhan, si Saꞌaban maka si Akan.
28 Saga anak si Disan:
si Ūs maka si Aran.
29-30 Itiyaꞌ na isab ōn saga aꞌa pagdatuꞌan kabangsa-bangsahan Hōr ya bay maglahat ma lahat Seꞌer:
si Lotan, si Sobal, si Sebeyon, si Ana, si Disun, si Eser maka
si Disan.
Saga Sultan ma Lahat Edom
31 Na, ya na itu saga aꞌa magsusultan ma lahat Edom masa halam giꞌ aniyaꞌ sultan ma bangsa Israꞌil. 32 Si Bela anak si Beyor tahinang sultan ma bangsa Edom. Dinhaba ya ōn daꞌira pagsultananna.
33 Amatay paꞌin si Bela, si Johab anak si Seraꞌ ya pasꞌlleꞌ aningkōꞌ magsultan. Aꞌa iya min lahat Bosla.
34 Amatay paꞌin si Johab, ya pasꞌlleꞌ magsultan si Husam aꞌa min jadjahan bangsa Teman.
35 Amatay paꞌin si Husam, ya pasꞌlleꞌ magsultan si Hadad anak si Bedad. Abit iya ōn daꞌira pagsultananna. Si Hadad itu bay makaraꞌug ma bangsa Midiyan ma deyom lahat Mowab.
36 Amatay paꞌin si Hadad, ya pasꞌlleꞌ magsultan si Samla min lahat Masleka.
37 Pagmatay si Samla, ya pasꞌlleꞌ magsultan si Saꞌul, aꞌa min lahat Rehobot ma bihing sapaꞌ aheya.
38 Na, amatay paꞌin si Saꞌul, ya pasꞌlleꞌ magsultan si Baꞌal-Hanan anak si Akbor.
39 Amatay paꞌin si Baꞌal-Hanan anak si Akbor, ya pasꞌlleꞌ magsultan si Hadad. Pau ya ōn daꞌira pagsultananna. Si Mehetabel anak si Matered, mpu si Mesahab, ya hꞌnda si Baꞌal-Hanan itu.
40 Itiyaꞌ na isab ōn saga datuꞌ bay patubuꞌ min si Esaw, kaniya-kaniya sigām magsaddī-saddī lahat maka bangsa: si Timna, si Alba, si Jetet, 41 si Oholebama, si Ela, si Pinun, 42 si Kenas, si Teman, si Mibsar, 43 si Magdeꞌel maka katapusan si Iram. Saga panubuꞌ si Esaw itu kamemon bay datuꞌ ma lahat Edom kaniya-kaniya ma paglahatan sigām.
Na, ya na inaꞌan salsila pasal paltubuꞌanan si Esaw, ya poꞌonan bangsa Edom.