35
Pabīng Si Yakub ni Lahat Betel
1 bdNa aniyaꞌ panohoꞌan Tuhan ma si Yakub, yukna, “Patukad ka ni Betel boꞌ ka maglahat mahēꞌ. Hinangun pagtunuꞌan isab mahēꞌ pagkulbanannu ma aku, ya Tuhan bay magpaꞌndaꞌ ma kaꞌa waktu lagiꞌ kalahinu min siyakanu si Esaw.”
2 Ahꞌlling si Yakub ma saga anak-hꞌndana sampay ma saga aꞌa bebeyaꞌanna kamemon, yukna, “Timaninbi saga taꞌu-taꞌu kamemon ya pagtutuhananbi ilu. Sussihunbi baranbi pahāp boꞌ yampa kam magsalinan badjuꞌ alꞌssin. 3 Pagubus, patukad kitam ni Betel ati angahinang aku pagkulbanan mainaꞌan pangarapan ni Tuhan ya bay anabangan aku ma waktu kasukkalanku. Ginapiꞌ na paꞌin aku eꞌna piꞌingga-piꞌingga bay palꞌngngananku.” 4 Manjari bineyaꞌ lling si Yakub eꞌ saga aꞌana inān ati sinōngan ni iya saga taꞌu-taꞌu sigām kamemon sampay saga aretesa bay ma tainga sigām. Jari kinubul kamemonna eꞌ si Yakub ma tongod poꞌon kayu pagduwaꞌahan ya ma Sekem. 5 Pagubus, pasaltaꞌ paꞌin disi Yakub atulak minnēꞌ, pinatꞌkkahan tāw aheya saga aꞌa ma kakauman Sekem angkan sigām mbal makatawakkal anurul disi Yakub amalos.
6 Manjari itu magtꞌkkahan na si Yakub sampay saga aꞌana kamemon ni Lūs, ya pinagōnan Betel ma tahun damuli itu. Ma lahat Kanaꞌan koꞌ inān. 7 Aniyaꞌ pagtunuꞌan kulban nihinang eꞌ si Yakub mahēꞌ. El-Betelb ya pangōnna ma lahat inān, sabab ya na lahat bay pagpaꞌndaꞌan Tuhan ma iya waktu bay kalahina min siyakana.
8 Amatay na si Debora, ya dꞌnda bay angayurahan si Ripka min karikiꞌ-dikiꞌna giꞌ. Takubul iya ma tongod dakayuꞌ poꞌon kayu ya ma lūran lahat Betel. Allon Bakut (hatina Kayu Pagkarukkaꞌan) ya pangōn aꞌa ma kayu inān.
9 Na, ma waktu kapamoleꞌ si Yakub min lahat Mesopotami, bay magpaꞌndaꞌ Tuhan ni iya pabalik maka amuwanan iya kahāpan. 10 Ya pangallam Tuhan ma iya, “Ōnnu si Yakubc sagōꞌ puwas itu nggaꞌi ka na si Yakub ya pangōn kaꞌa, sagōꞌ si Israꞌild na.” Hatina Tuhan toꞌongan ya bay angōnan iya si Israꞌil.
11 Manjari angallam na isab Tuhan ma iya, “Aku itu Tuhan Sangat Kawasa. Anganak ka paheka, manjari ma waktu sinōng aniyaꞌ kabangsa-bangsahan patubuꞌ min kaꞌa. Lāgi aniyaꞌ saga sultan isab luwaꞌ min panubuꞌnu. 12 Ya lahat bay pamuwanku ma mboꞌnu si Ibrahim maka mmaꞌnu si Isaꞌak pamuwanku isab ma kaꞌa sampay ma saga panubuꞌnu.” 13 Pagubus, alaꞌan na Tuhan min lugal bay pagsuli-sulihanna maka si Yakub.
14 Na mainaꞌan, ma tongod bay pangallaman Tuhan ma iya, aniyaꞌ batu niosolan eꞌna. Taosol paꞌin, binusug eꞌ si Yakub binu-anggul maka nsꞌllan jaitune ma diyataꞌna panukbal ni Tuhan. 15 Manjari Betelf ya pangōn si Yakub ma lahat inaꞌan-i.
Kamatay si Rakiya
16 Pagpuwas, palanjal na si Yakub maka saga anak-hꞌndana min Betel inān. Na alawak-lawak lagiꞌ sigām min kauman Eprata, taꞌabut na bulanan si Rakiya anganak. Kahunitan iya toꞌongan. 17 Jari itu, pagka makalanduꞌ hunitna, yuk panday ma iya, “Ndūꞌ, Rakiya, daꞌa ka tināw, lꞌlla koꞌ itu.” 18 Song paꞌin abꞌkkat napasna, si Benoni (hatina ‘anak kasusahanku’) ya ōn pangꞌbba si Rakiya ma anakna. Manjari amutawan na iya. Saguwāꞌ Benjaming ya pangōn si Yakub ma ondeꞌ-ondeꞌ heꞌ.
19 Pagka amatay na si Rakiya, kinubul iya ma bihing lān tudju ni kauman Eprata, ya pinagōnan Betlehem ma tahun damuli itu. 20 Jari aniyaꞌ batu lakit niosolan eꞌ si Yakub, batu panganggindanan kubul si Rakiya. Inaꞌan du isab sampay ni buwattinaꞌan.
21 Pagpuwas, palanjal na disi Yakub (ya pinagōnan isab si Israꞌil) ati magpatꞌngge tolda paglumaꞌan sigām ma liyuhan Migdal-Eder.h 22 Sakali itu, waktu lagiꞌ disi Israꞌil patꞌnnaꞌ ma liyuhan Migdal-Eder inān, makapagbihing anakna si Rubin maka hꞌnda-hꞌndana si Bilha. Kahakaꞌan si Yakub pasal inaꞌan-i angkan akagit atayna.
Na, si Yakub itu, sangpūꞌ maka duwa anakna lꞌlla.
23 Ya itu saga anakna min si Leya:
si Rubin ya pagsiyakahan,
boꞌ si Simiyun, si Libi, si Yahud, maka si Issakar,
si Sibulun ya kasiyalihan.
24 Saga anak si Yakub min si Rakiya:
si Yusup ya siyaka, boꞌ si Benjamin.
25 Anakna isab min si Bilha ya ipatan si Rakiya:
si Dān maka si Naptali.
26 Anakna isab min si Silpa ya ipatan si Leya:
si Gād maka si Aser.
In sangpūꞌ maka duwa anak si Yakub lꞌlla itu bay nianakan ma lahat Mesopotami.
Kawapat si Isaꞌak
27 Manjari atꞌkka na si Yakub ni mmaꞌna si Isaꞌak ma lahat Mamre (hatina lahat Hebron), ya na lahat bay paglahatan si Isaꞌak maka si Ibrahim. 28 Na, taꞌabut paꞌin dahatus maka walumpūꞌ tahun umul si Isaꞌak, 29 awapat na iya ma deyom kasannangan, ati pinapagtimuk iya maka kaꞌmboꞌ-mboꞌanna. Takubul iya eꞌ anakna karuwangan si Esaw maka si Yakub.