34
Niusibaꞌan si Dina
1 Na, aniyaꞌ anak si Yakub maka si Leya budjang, ōnna si Dina. Dakayuꞌ llaw palꞌngngan si Dina itu anibaw saga bagayna dꞌnda, aꞌa Kanaꞌan. 2 Jari taꞌndaꞌ iya eꞌ si Sekem anak si Hamor, ya pagbebeyaꞌan ma lahat inān. (Aꞌa bangsa Hīb disi Hamor itu.) Pagꞌndaꞌ si Sekem ma si Dina, magtūy saggawna boꞌ yampa usibaꞌanna. 3 Sagōꞌ kaꞌamuhan iya ma si Dina heꞌ maka sinōd lasa. Jari bissalahanna pahāp-hāp, kalu tabowa alasa isab ma iya. 4 Yuk si Sekem ma mmaꞌna si Hamor, “Mmaꞌ, pahꞌndaꞌun ma aku dꞌnda itu.”
5 Sakali itu, makataꞌu paꞌin si Yakub pasal pangusibaꞌ itu ma anakna si Dina, halam aniyaꞌ tapahꞌllingna pasal palkalaꞌ itu. Subay na bay makapoleꞌ saga anakna min kaparangan, min hinang sigām anungguꞌ kahayopan.
6 Manjari si Hamor, ya mmaꞌ si Sekem-i, pehēꞌ ni si Yakub amowa iya maggaraꞌ. 7 Mainaꞌan isab saga anak si Yakub lꞌlla bahaꞌu bay atꞌkka min deya. Kahakaꞌan paꞌin sigām pasal palkalaꞌ itu, magtūy sigām astolan makalanduꞌ ma sabab pangusibaꞌ si Sekem ma danakan sigām si Dina. Mbal toꞌongan manjari, talapay saga aꞌa Israꞌil kamemon nihinangan kaiyaꞌan.
8 Ahꞌlling si Hamor ma si Yakub maka saga anakna-i, yukna, “Ndūꞌ tuwan, in anakku si Sekem itu aheya toꞌongan bayaꞌna ma anaknu si Dina. Taimaꞌun iya, pahꞌndaꞌun ma anaknu. 9 Ahāp kitam magpikit-pikiti dꞌnda maka lꞌlla. 10 Bang hati buwattēꞌ, makapaglahat du kam maitu maingga-maingga kabayaꞌanbi patꞌnnaꞌan. Aluhaya du kam angusaha maitu, makajari isab amꞌlli tanaꞌ.”
11 Ahꞌlling isab si Sekem ma mmaꞌ si Dina sampay ma saga danakanna, yukna, “Ndūꞌ, saga Tuwan, bang paꞌin aku makasulut ataybi. Ai-ai amuꞌbi ma aku pamuwanku du ma kaꞌam. 12 Hakaꞌinbi aku bang pila ungsudna maka sokatna ati akuhanku du, bang aku pakawinbi ma si Dina.”
13 Sagōꞌ angakkal saga anak si Yakub ma si Sekem maka mmaꞌna si Hamor, ma sabab pangusibaꞌna ma danakan sigām si Dina. 14 Yuk sigām, “Ē, mbal makajari. In danakan kami itu mbal tapahꞌlla ma lꞌlla halam bay taislam. Kaiyaꞌan koꞌ ilu ma kami. 15 Magsulut du kitam bang paꞌin niꞌislam kalꞌllahanbi kamemon, buwat pagislam ma kami. 16 Jari magpikit-pikiti du kitam. Magdalahat kitam magdabangsa. 17 Malaingkan bang kam mbal ameyaꞌ ma garaꞌ kami itu, pagka mbal bilahi magislam, na, ngāꞌ kami na danakan kami dꞌnda itu boꞌ alaꞌan minnitu.”
18 Manjari kasulutan si Hamor maka anakna si Sekem ma garaꞌ bay nihūgan sigām eꞌ saga anak si Yakub eꞌ. 19 Mbal paꞌin atꞌggol, bineyaꞌ eꞌ si Sekem garaꞌ sigām ma sabab bayaꞌna ma si Dina anak si Yakub. Si Sekem ya pinagaddatan asal labi min kakampunganna kaseheꞌan. 20 Manjari pehēꞌ na iya maka mmaꞌna si Hamor ni tongod pasōran daꞌira boꞌ amowa magisun saga lꞌlla ya magtipun mainaꞌan. 21 Yuk sigām, “Saga tuwan, in bangsa Israꞌil itu patibagayun asal. Ahāp bang sigām tugutanta maglahat maitu maka magusaha isab ma deyom kaluhayaꞌan, sabab aluha asal lahattam. Ahāp isab bang tugutantam saga anak sigām subul-budjang magkawin-kiyawani maka anaktam. 22 Saguwāꞌ mbal giꞌ sigām makajari magdalahat-magdabangsa maka kitam. In kitam kalꞌllahan subay magislam dahū buwat kapagislam ma sigām. 23 Manjari bang beyaꞌta addat sigām eꞌ, in hayop sigām kamemon maka pangaltaꞌ sigām kamemon ma kitam du ma waktu sinōng. Jari patut bahāꞌ bang kitam magsulut supaya sigām maglahat maitu ma kitam?”
24 Manjari kasulutan saga lꞌlla ma daꞌira inān kamemon. Bineyaꞌ eꞌ sigām garaꞌ si Hamor maka anakna si Sekem ati magislam sigām kamemon.
25 Na, palabay paꞌin tꞌllumbahangi min bay pagislam eꞌ, boꞌ halam giꞌ kauliꞌan, pinaꞌan na duwangan anak si Yakub lꞌlla, si Simiyun maka si Libi ya langgung si Dina. Pasōd sigām magtakos kalis ni deyom daꞌira inān ma halam aniyaꞌ pangalab-ngalab saga aꞌa mainaꞌan. Jari nilagut pinapatay saga lꞌlla inān kamemon eꞌ sigām karuwangan. 26 Talapay isab si Hamor maka anakna si Sekem pinapatay. Si Dina iya niāꞌ eꞌ sigām min deyom lumaꞌ si Sekem. 27 Magpatayan paꞌin saga aꞌa itu, paturul isab saga anak si Yakub kaseheꞌan anaban kamemon ai-ai bay ma deyom daꞌira. Ya heꞌ pamalos sigām ma kaiyaꞌan danakan sigām budjang. 28 Tinaban eꞌ sigām pangaltaꞌ kamemon ma deyom-luwasan daꞌira inān, buwat saga kambing, bili-bili, sapiꞌ maka kuraꞌ, hatina ai-ai taga-guna. 29 Tinaban pangaltaꞌ kamemon bay ma deyom lumaꞌ, sinaggaw isab saga dꞌnda maka kaondeꞌan kamemon.
30 Na, kinataꞌuwan paꞌin eꞌ si Yakub hinang si Simiyun maka si Libi itu, magtūy pahꞌllinganna sigām. Yukna, “Arōy! Aheya kasusahan ya pamuwanbi itu ma aku. Binantahan du aku eꞌ saga bangsa Kanaꞌan maka bangsa Pirissi sampay bangsa aꞌa kamemon ma lahat itu. Arikiꞌ du kitam. Bang sigām gantaꞌ magdakayuꞌ piꞌitu angandugpak, tantu kitam alaglag kamemon magtaiꞌanak.”
31 Ya sambung si Simiyun maka si Libi, “Pasagaranta bahāꞌ bang danakan kami si Dina tahinang saliꞌ dꞌnda pinagtatambahan?”