33
Kapagsampang si Yakub maka si Esaw
1 Manjari itu, makaꞌndaꞌ paꞌin si Yakub ni dahuanna, ilu na si Esaw maka saga tendogna mpat hatus puhuꞌ. Magtūy pinapagtumpuk eꞌ si Yakub saga ondeꞌ-ondeꞌ maka kainaꞌan sigām magkaniya-kaniya. 2 Ya pinarahū eꞌna si Bilha maka si Silpa sampay saga anak sigām. Pasunuꞌ disi Leya maka saga anakna, ati karamulihan si Rakiya maka anakna si Yusup. 3 Si Yakub baranna ya parahū min kamemon. Na, asekot-sekot paꞌin iya ni si Esaw, magtūy iya pasujud min pituꞌ pagaddatna ma siyakana.
4 Malaingkan si Esaw paragan anampang si Yakub. Anganggapus iya maka aniyum, ati magtangis sigām karuwangan. 5 Pagꞌndaꞌ si Esaw ma saga karꞌndahan maka saga ondeꞌ-ondeꞌ, atilaw iya ma si Yakub, yukna, “Sai kaseheꞌannu ilu?”
Ya sambung si Yakub, “Kakaꞌ tuwan, ya na itu kaꞌanakan bay pangalidjikiꞌ Tuhan ma aku, ya atanu itu.”
6 Manjari pasōng isab saga ipatan si Yakub maka kaꞌanakan sigām, ati pasujud ma dahuan si Esaw. 7 Pasunuꞌ isab si Leya maka saga anakna, karamulihan si Rakiya maka anakna si Yusup, pasujud sigām kamemon.
8 Atilaw giꞌ si Esaw, yukna, “Pamagay baꞌanan tumpukan hayop bay talanggalku ma lān inaꞌan? Ai kagunahanna?”
Ya sambung si Yakub, “Ya kagunahanna, Kakaꞌ tuwan, pamuwanku ma kaꞌa pamahāp ataynu tudju ni aku.”
9 Yuk si Esaw, “Otōꞌ, daꞌa na. Aheka du ma aku. Mailuhun na ma kaꞌa.”
10 Yuk si Yakub, “Ndūꞌ, Kakaꞌ tuwan, bang sabꞌnnal-bꞌnnal ahāp na ataynu ma aku, taimaꞌun kasampanganku itu ma kaꞌa. Ya pagharapku maka kaꞌa llaw itu, saliꞌ hantang pagharapku maka Tuhan, sabab ahāp sidda pamaihuꞌannu ma aku. 11 Taimaꞌun, Kakaꞌ tuwan, ya kasampanganku itu ma kaꞌa, sabab aheya kahāpan ya bay pamuwan Tuhan ma aku. Halam aniyaꞌ kulang ma aku.” Jari tinaimaꞌ na eꞌ si Esaw pagka tapogos eꞌ si Yakub.
12 “Na,” yuk si Esaw, “Sūng na kitam. Seheꞌanta kam.”
13 Sagōꞌ mbal si Yakub. Yukna, “Kakaꞌ tuwan, kataꞌuwannu du. Alamma saga ondeꞌ-ondeꞌ itu. Maka pagsusahanku isab saga bili-bili maka saga sapiꞌ taga-anak duruꞌan lagiꞌ. Bang puspusanta palꞌngngan minsan dangꞌllaw sadja, maraiꞌ magpatayan du kamemon. 14 Ndūꞌ, Kakaꞌ,” yuk si Yakub ma si Esaw, “parahū giꞌ ka min kami. Kami maka saga anakku sampay saga baꞌanan hayop itu subay paturul min damuliannu. Painut-inut sadja kami palꞌngngan sampay ka taꞌabutku mahēꞌ ma lahat Seꞌer.”
15 “Na ahoꞌ, Otōꞌ,” yuk si Esaw. “Bbahanku isab saga aꞌaku pagapiꞌ ma kaꞌam.”
Yuk si Yakub, “Minsan mbal na, Kakaꞌ tuwan. Ya sadja aheya ma aku bang paꞌin ahāp na ataynu ma aku.”
16 Manjari ma llaw inaꞌan-i magpamoleꞌ na disi Esaw ni lahatna Seꞌer. 17 Sagōꞌ si Yakub iya pehēꞌ gom paꞌin ni lahat Sokkot. Ma Sokkot paꞌin, angahinang iya lumaꞌ patꞌnnaꞌanna maka saga anak-hꞌndana. Angahinang isab iya saga kamalig pasindungan baꞌanan kahayopanna. Ya heꞌ sababna angkan lahat inān niōnan Sokkot.a
18 Ya hatulanna, makapoleꞌ paꞌin si Yakub min lahat Mesopotami, atꞌkka na ni lahat Kanaꞌan ma halam aniyaꞌ baya-baya. Tatꞌkkana daꞌira Sekem ati mainaꞌan iya magpatꞌngge tolda paglumaꞌan sigām, inaꞌan ma anggopan daꞌira. 19 Manjari ya tanaꞌ patꞌnnaꞌan sigām inān bay binꞌlli eꞌna min saga panubuꞌ si Hamor mmaꞌ si Sekem, dahatus pilak tibuꞌuk ya pamꞌllina. 20 Aniyaꞌ isab pagtunuꞌan kulban nihinang eꞌ si Yakub ma tanaꞌ inaꞌan. El-Elohe-Israꞌilb ya pangōnna ma pagkukulbanan inān.