32
Magsakap si Yakub Magbāk maka si Esaw
1 Ya du si Yakub bay pauntas ni patudjuhanna. Sakali itu, ma labayan paꞌin, aniyaꞌ saga malaꞌikat min Tuhan anampang iya. 2 Ya lling si Yakub pagꞌndaꞌna ma sigām, “Kilāku, patꞌnnaꞌan kasundaluhan Tuhan koꞌ itu.” Ati Mahanaima ya pangōnna ma lahat inān.
3 Manjari aniyaꞌ panohoꞌan si Yakub ma saga aꞌana, yukna, “Parahū kam min aku ni danakanku si Esaw, inaꞌan ma jadjahan Seꞌer, ma lahat Edom. 4 Ya llingbi ma iya subay buwatittu, ‘Tuwan, aniyaꞌ itu lapal min atanu si Yakub. Yuk lapal itu, “Atꞌggol aku bay maglahat ma deyoman siꞌitta si Leban. Halam aku bay maglaꞌan-laꞌan minnēꞌ. 5 Aheka na hayop palsukuꞌanku, buwat saga sapiꞌ, kuraꞌ, bili-bili, maka kambing. Aheka na isab saga sosohoꞌanku dꞌnda-lꞌlla. Manjari, tuwan, ya angkan pabowaku lapal itu ni kaꞌa, bang paꞌin aku taimaꞌnu magatay poteꞌ.” ’ ”
6 Sakali itu, makabīng paꞌin saga aꞌa bay pamabowahan lapal si Yakub, aniyaꞌ pangahaka sigām ma iya, yuk-i, “Tuwan, bay kami patampal pehēꞌ ni danakannu si Esaw, maka iluꞌun na iya pasampang ma kaꞌa. Aniyaꞌ ma iya saga tendogna mpat hatus hekana.” 7 Na, sinōd tāw magtūy si Yakub, aheya toꞌongan kasusahanna, angkan binahagiꞌ duwa saga aꞌa ya bebeyaꞌanna. Ya du baꞌanan hayopna sampay saga untaꞌna, binahagiꞌ duwa isab. 8 Ya ma deyom pikilan si Yakub, bang si Esaw gantaꞌ pinaꞌan amonoꞌ sigām, makalꞌppa sigām dabahagiꞌ.
9 Jari angamuꞌ-ngamuꞌ si Yakub ni Tuhan, yukna, “O Tuhanku, kaꞌa ya pagtuhanan mboꞌku si Ibrahim maka mmaꞌku si Isaꞌak, angamuꞌ aku tabang ma kaꞌa. O Yawe, kaꞌa ya bay anohoꞌ aku subay amoleꞌ ni lahatku maka ni kakampunganku. Bay aku janjiꞌannu isab in aku buwanannu kahāpan ma ai-ai hinangku. 10 Atanu aku, aꞌa mbal tinōp subay nihāp eꞌnu. Sagōꞌ minsan na, aheya aseꞌ maka lasanu ma aku. Waktu lagiꞌ kauntasku ni dambilaꞌ sapaꞌ Jordan, halam aniyaꞌ tabowaku, luwal laꞌa dakayuꞌ tungkud ma tanganku. Saguwāꞌ ma buwattinaꞌan itiyaꞌ na aku magduwa tumpukan ma labayan tudju amoleꞌ. 11 O Tuhan, tabangin aku sabab aheya kagawahanku ma siyakaku si Esaw. Piꞌitu iya araiꞌ amonoꞌ aku sampay saga anak-hꞌndaku. 12 Entomun lagiꞌ bay paljanjiꞌannu ma aku, in aku buwanannu kahāpan, maka buwanannu aku tubuꞌ mbal taitung hekana, sapantun heka solagan gusung ma bihing tahik.” Ya na heꞌ pangamuꞌ-ngamuꞌ si Yakub ma Tuhan.
13 Manjari pahantiꞌ iya mainaꞌan dambahangi. Pagsubu, ameneꞌ iya hayop aheka pamasampangna ma si Esaw. 14 Ya tapeneꞌna duwa hatus kambing dꞌnda maka duwampūꞌ kambing lꞌlla, duwa hatus bili-bili dꞌnda maka duwampūꞌ bili-bili lꞌlla, 15 tꞌllumpūꞌ untaꞌ dꞌnda taga-anak masi anganduruꞌ, mpatpūꞌ sapiꞌ dꞌnda maka sangpūꞌ sapiꞌ mandangan, duwampūꞌ kuraꞌ dꞌnda maka sangpūꞌ kuraꞌ lꞌlla. 16 Jari pinagbahagiꞌ magbaꞌan-baꞌan saga hayop itu eꞌ si Yakub ati patungguꞌanna ma saga aꞌana. Ya panohoꞌanna ma sigām, “Pauntas kam dahū min aku. Paglawak-lawakunbi isab saga hayop ilu dambaꞌan maka dambaꞌan.”
17 Aniyaꞌ isab pamanduꞌna ma sosohoꞌanna dakayuꞌ ya parahū min kamemon, yukna, “Bang ka saupama talanggal eꞌ siyakaku, boꞌ yukna ma kaꞌa, ‘Piꞌingga ka, maka sai nakuraꞌnu, maka sai isab tag-dapu saga hayop ilu?’ 18 Ya panambungnu ma iya subay buwattitu. Yuknu, ‘Tuwan, atanu si Yakub ya tag-dapu itu kamemon. Sinōꞌ binowa piꞌitu ni kaꞌa kasampangan. Iluꞌun na iya paturul min buliꞌan.’ ”
19 Ya du panohoꞌan si Yakub ma saga aꞌana magsunuꞌ-sunuꞌ ya tag-tungguꞌan saga hayop kaseheꞌ. Yukna, “Bang kam gantaꞌ talanggal eꞌ siyakaku si Esaw, ya pangahakabi ma iya subay buwattitu, 20 ‘Ahoꞌ tuwan, iluꞌun du atanu si Yakub paturul min buliꞌan.’ ” Ya ma deyom pikilan si Yakub, bang aniyaꞌ kasampangan pinabeyaꞌan si Esaw dahū giꞌ min kapaglanggal sigām, kalu ahāp atayna tudju ni si Yakub ati magkahāp sigām pabīng. 21 Manjari pinarahū eꞌ si Yakub kasampanganna inān kamemon. Sagōꞌ si Yakub baranna angagad giꞌ ma pahantiꞌan sigām dambahangi.
Magkosogan si Yakub maka Tuhan ma Lahat Peniyēl
22 Na, ma sangom inān, papunduk si Yakub min patulihanna. Niāꞌ hꞌndana karuwangan maka ipatan sigām, sampay anakna lꞌlla kasangpūꞌ maka dda. Niꞌndeꞌan sigām eꞌna pehēꞌ ni dambilaꞌ sapaꞌ Jabbok. 23 Ma dambilaꞌ paꞌin saga anak-hꞌndana, pinauntas isab eꞌ si Yakub kaniyaꞌna kamemon. 24 Sagōꞌ in iya baranna patꞌnnaꞌ dangan-danganna ma tongod inaꞌan. Sakali aniyaꞌ magpasalupa ma si Yakub amowa iya magkosogan sampay asekot ni karaiꞌ-llawan. 25 Na, pagnanam eꞌ aꞌa inān in si Yakub mbal taraꞌugna, magtūy tibuꞌna ma pangkulna ati magsāꞌ loꞌatanna. 26 Ya yuk aꞌa-i ma iya, “Bbahin aku, maraiꞌ na llaw.”
Anambung si Yakub, yukna, “Ē, mbal ka bbahanku. Subay ka amuwanan aku barakat dahū.”
27 Manjari tinilaw si Yakub bang sai ōnna. “Si Yakub,” yukna.
28 Angabtang aꞌa inān, yukna, “Nggaꞌi ka na Yakub ya pangōn kaꞌa puwas minnitu, sagōꞌ si Israꞌilb na, ma sabab kapagkosognu maka Tuhan maka ma pagkahinu manusiyaꞌ. Bay taraꞌugnu saliꞌ-saliꞌ.”
29 Ahꞌlling giꞌ si Yakub, “Tuwan, pahatiꞌun aku konoꞌ bang sai ōnnu.”
Anambung aꞌa-i, yukna, “Oy, angay tilawnu ōnku?” Manjari barakatanna si Yakub.
30 Ya pahꞌlling si Yakub, “Arī, magharap aku maka Tuhan, boꞌ paꞌin itiyaꞌ aku masi allum.” Angkanna lahat inān niōnan Peniyēlc eꞌ si Yakub.
31 Yambohoꞌ paluwas mata llaw ma waktu kalanjal si Yakub min lahat Peniyēl eꞌ. Magpengkaꞌ-pengkaꞌ isab iya ma sabab dambilaꞌ loꞌatan pangkulna magsāꞌ. 32 Ya heꞌ sababna angkan bangsa Israꞌil mbal toꞌongan amangan ugat sumbaliꞌan ya ma loꞌatan pangkul. Ya inaꞌan addat sigām sampay ni kabuwattituhan, tuꞌud nientom mboꞌ sigām si Yakub bay waktu kapanibuꞌ pangkulna.