Panagnaꞌan 30

¹ Na si Rakiya itu, pagka tasayuna in iya mbal toꞌongan makabuwanan si Yakub anak, angimbū na ma siyakana si Leya. Ahꞌlling iya ma si Yakub, yukna, “Buwanin aku anak. Bang aku mbal makaꞌanak, gom giꞌ aku amatay.”

² Apasuꞌ magtūy atay si Yakub ma si Rakiya, yukna, “Pangannalnu aku itu Tuhan bahāꞌ, makapagbayaꞌ amuwanan kaꞌa anak maka mbal?”

³ Ya lling si Rakiya ma iya, “Oꞌo, ipatanku si Bilha itu. Pahulid ka ma iya supaya iya anganak gantiꞌ min aku, ati taga-tubuꞌ aku min iya.” ⁴ Jari sinōngan eꞌna ipatanna si Bilha ma si Yakub pamahꞌndana. Magbihing sigām atuli, ⁵ ati abꞌttong si Bilha maka anganak lꞌlla. ⁶ Ya lling si Rakiya, “Kabogbogan aku eꞌ Tuhan in aku patut taga-anak. Takalena bay pangamuꞌ-ngamuꞌku ma iya, ati kabuwanan aku anak lꞌlla.” Manjari Dān ya pangōnna ma iya.

⁷ Abꞌttong na isab si Bilha pabīng ati aniyaꞌ giꞌ anak si Yakub lꞌlla min iya, karuwana na. ⁸ Ya pahꞌlling si Rakiya, “Aheya paggaggud kami maka siyakaku, sagōꞌ ma aku daꞌugan.” Manjari Naptali ya pangōnna ma ondeꞌ.

⁹ Na si Leya isab, pagka tasayuna in iya mbal na anganak, manjari pamuwanna isab ipatanna si Silpa ma si Yakub pamahꞌndana. ¹⁰ Abꞌttong isab si Silpa ati anganak lꞌlla. ¹¹ “Ahāp sukudku!” yuk si Leya. Jari Gād ya pangōnna ma anakna heꞌ. ¹² Damuli paꞌin minnēꞌ, anganak pabīng si Silpa itu, jari duwa na anak si Yakub min iya. ¹³ Ya pahꞌlling si Leya, “Aheya kakōganku! Pinagsuli-sulihan du aku eꞌ saga karꞌndahan in aku itu dꞌnda akōd.” Angkan na Aser ya pangōn si Silpa ma anakna.

¹⁴ Na ma musim pagani lagiꞌ, inaꞌan si Rubin anak si Leya maglunsul ma huma. Aniyaꞌ tabākna buwaꞌ kayu tapagtambal pamapangiram, jari binowa eꞌna pehēꞌ ni inaꞌna si Leya. Ahꞌlling magtūy si Rakiya ni si Leya, yukna, “Kakaꞌ, buwanin aku min buwaꞌ kayu ya tabāk eꞌ anaknu ilu.”

¹⁵ Ya sambung si Leya, “Ē, mamarahi pahāp kaꞌa ilu! Bay taꞌagawnu hꞌllaku ati agawnu lagiꞌ buwaꞌ kayu anakku?”

Yuk si Rakiya, “Bang aku buwanannu, tugutanku si Yakub pabihing ma kaꞌa sangom ilu.”

¹⁶ Manjari itu, pagtꞌkka si Yakub min huma abay kohap na, sinampang iya eꞌ si Leya. Yukna ma si Yakub, “Subay ka pabihing ma aku atuli sangom ilu. Makapagisun kami maka si Rakiya insiniꞌ. Bay iya buwananku saga buwaꞌ kayu ya tapuwaꞌ eꞌ anakku si Rubin, manjari pinatuli ka ma aku.” Manjari pabihing si Yakub ma si Leya ma sangom inān.

¹⁷ Na nirūlan si Leya eꞌ Tuhan. Abꞌttong iya ati anganak lꞌlla. Manjari lima na anak si Yakub lꞌlla min hꞌndana si Leya. ¹⁸ Yuk si Leya, “Katungbasan aku eꞌ Tuhan ni kahāpan ma sabab kapamuwanku ipatanku ma hꞌllaku.” Angkanna Issakar ya pangōnna ma anakna itu.

¹⁹ Angiram isab si Leya pabīng, paganakna lꞌlla. Manjari nnom na anak si Yakub lꞌlla bay min si Leya. ²⁰ “Na,” yuk si Leya, “ahalgaꞌ toꞌongan ya pamuwan Tuhan ma aku. Tantu aku pinaheya na eꞌ hꞌllaku ma sabab nnom na anakna lꞌlla min aku.” Manjari Sibulun ya pangōn si Leya ma anakna itu.

²¹ Na, mbal paꞌin atꞌggol, abꞌttong si Leya pabīng ati anganak iya dꞌnda. Dina ya pangōnna ma iya.

²² Na, in si Rakiya isab, taentom du eꞌ Tuhan. Takale bay pangamuꞌ-ngamuꞌ si Rakiya ma iya, ati nirūlan iya boꞌ makapangiram na. ²³ Manjari abꞌttong si Rakiya ati anganak iya lꞌlla. Ahꞌlling iya, yukna, “Kalaꞌanan na kaiyaꞌanku eꞌ Tuhan sabab itiyaꞌ aku kabuwanan anak. ²⁴ Mura-murahan bang paꞌin aniyaꞌ giꞌ anakku lꞌlla pinasunuꞌ eꞌ PANGHŪꞌ ni ondeꞌ dakayuꞌ itu.” Manjari Yusup ya pangōn si Rakiya ma anakna-i.

Magkarayahan si Yakub

²⁵ Manjari itu, bay paꞌin nianakan si Yusup, binowa eꞌ si Yakub matoꞌana si Leban magisun. Yuk si Yakub, “Bapaꞌ, pabaꞌirun aku sabab bilahi na aku amoleꞌ ni lahatku. ²⁶ Pabeyaꞌun ma aku saga anak-hꞌndaku, ya tausahaku maitu ma deyomannu. Kataꞌuwannu du ya katuyuꞌku maghinang ma kaꞌa.”

²⁷ Sagōꞌ ya sambung si Leban ma si Yakub, “Otōꞌ, daꞌa giꞌ. Aniyaꞌ pamowahanta kaꞌa magsuli-suli. Taꞌndaꞌku ma putikaꞌan kaꞌa iya sababna ya angkan aku nilidjikiꞌan eꞌ PANGHŪꞌ. ²⁸ Ahꞌlling sadja ka. Gadjihanta ka pila-pila kabayaꞌannu.”

²⁹ Anambung si Yakub, yukna “Kataꞌuwannu du bang buwattingga eꞌku maghinang maitu ma kaꞌa. Angahāp sadja kahayopannu ma deyom kapagipatku. ³⁰ Ma halam giꞌ aku maitu, kulang asal pangaltaꞌnu. Malaingkan aheka na ma buwattinaꞌan. Minsan maingga-maingga paghinanganku ma deyomannu, nilidjikiꞌan sadja ka eꞌ PANGHŪꞌ-Yawe. Bang ma aku taꞌabut na waktu pamasꞌlleꞌ ma aku, boꞌ supaya aniyaꞌ palsukuꞌan ma kami sampay anak-hꞌndaku.”

³¹ Atilaw si Leban ma iya, yukna, “Na, subay pila panganggadji ma kaꞌa?”

Ya sambung si Yakub, “Nggaꞌi ka gadji ya kabayaꞌanku. Bang pagsulutanta, subay aku parūlnu angipat baꞌanan hayopnu buwat bay dahū. Saguwāꞌ aniyaꞌ amuꞌku ma kaꞌa. ³² Tugutin aku angaliling baꞌanan hayopnu ma llaw itu toꞌongan. Ingga aniyaꞌ bili-bili ettom atawa kambing kabang-kabang, ma aku na palsukuꞌanku. Ya du ilu panganggantiꞌnu gadjiku. ³³ Manjari ma sinosōng, bang ka gantaꞌ bilahi angitung bang pila panambanu ma aku, kataꞌuwannu magtūy bang aku kapangandolan atawa mbal. Bang saupama aniyaꞌ taꞌndaꞌnu ma aku kambing nggaꞌi ka kabang atawa bili-bili nggaꞌi ka ettom, takilānu du bay tangkawku min kaꞌa.”

³⁴ Ya sambung si Leban, “Ahoꞌ, sulut. Buwattēꞌ na.” ³⁵ Malaingkan karahūan si Yakub eꞌ si Leban ma llaw inaꞌan-i. Pinasaddī eꞌna patꞌnnaꞌan saga kambingna lꞌlla jaliꞌ-jaliꞌ maka kambing dꞌnda kabang-kabang maka bili-bili ettom-ettom isab. Pinaipat kamemon ma saga anakna eꞌ si Leban, ³⁶ ati palawak sigām min si Yakub saga tꞌllungꞌllaw nilꞌngngan. Si Yakub ya taꞌbba mainaꞌan angipat kahekaꞌan hayop si Leban ya halam binowa.

³⁷ Na pagka buwattēꞌ akkal si Leban, aniyaꞌ saga sanga kayu nilabas eꞌ si Yakub min kayu tꞌllungginis. Kinupas-kupasan kuwitna supaya magjaliꞌ-jaliꞌ ettom maka poteꞌ. ³⁸ Kakupasan paꞌin, pinatꞌnnaꞌ eꞌna ma deyom pagboheꞌan saga hayop boꞌ taꞌndaꞌ eꞌ sigām pasaltaꞌ anginum pehēꞌ. Bang taꞌabut timpu pagdꞌnda saga hayop, ³⁹ magdꞌnda du ma dahuan saga sanga kayu jaliꞌ-jaliꞌ heꞌ. Manjari tapangāꞌan lihi eꞌ kambing dꞌnda maka bili-bili dꞌnda ati jaliꞌ-jaliꞌ maka kabang-kabang maka bꞌttikan ya nianakan eꞌ sigām.

⁴⁰ Na, ya anak hayop eꞌ pinasaddī na paꞌin eꞌ si Yakub. Saguwāꞌ ya hayop asangpot pinaharap eꞌna tudju ni saga hayop jaliꞌ-jaliꞌ maka ettom-ettom ya sukuꞌ si Leban. Minnēꞌ pinapagsaddī baꞌanan hayop si Yakub maka baꞌanan hayop si Leban.

⁴¹ Tiyap-tiyap aniyaꞌ hayop dꞌnda ahāp baranna ya magdꞌnda, pinatꞌnnaꞌ eꞌ si Yakub saga sanga kayu nijaliꞌ-jaliꞌ ma deyom paginuman boꞌ supaya magdꞌnda ma kasekotan saga sanga-i. ⁴² Saguwāꞌ bang hayop kulang ahāp ya magdꞌnda, mbal pinatꞌnnaꞌan kayu-kayu. Ya katꞌkkahanna, in hayop kulang hāpna pinasukuꞌ ma si Leban. Malaingkan ya pinasukuꞌ ma si Yakub anak hayop ahāp sadja baranna. ⁴³ Ya katꞌkkahanna, paheka na paꞌin boꞌ paheka karaya si Yakub. Gana-gana aheka na baꞌanan bili-bili maka kambingna. Aheka isab saga untaꞌna maka kuraꞌna. Ya du saga sosohoꞌanna dꞌnda-lꞌlla, aheka du isab.