Panagnaꞌan 29

Katꞌkka si Yakub ni Siꞌitna si Leban

¹ Palꞌngngan na paꞌin si Yakub sampay taꞌabutna lahat sobangan. ² Mainaꞌan paꞌin, boꞌ ma tongod kaparangan, aniyaꞌ taꞌndaꞌna boheꞌ kali tinambolan asal maka batu aheya. Aniyaꞌ isab bili-bili tꞌllu baꞌananna pahali-hali ma tongod inaꞌan angagad pinainum. ³ Sagōꞌ ya kabiyaksahan saga aꞌa magiꞌipat bili-bili mainaꞌan, subay atipun baꞌanan bili-bili kamemon boꞌ yampa sigām angaligiran batu sampay amainum. Jari aubus paꞌin pinainum baꞌanan bili-bili kamemon, magtūy tinūran batu-i ni baina.

⁴ Manjari itu atilaw si Yakub ma saga aꞌa magiꞌipat inān, yukna, “Saga tuwan, minningga sa kaꞌam ilu?”

Ya sambung saga aꞌa inān, “Kami itu min Haran, tuwan.”

⁵ Yuk si Yakub isab, “Magkataꞌu kam bahāꞌ maka si Leban, mpu si Nahor?”

Ya sambung sigām, “Ahoꞌ tuwan, kataꞌuwan kami.”

⁶ Atilaw giꞌ si Yakub, yukna, “Ahāp isab ginhawa baranna?”

“Ahoꞌ tuwan”, yuk aꞌa-i, “Ahāp du. Oꞌo, iluꞌun na anakna si Rakiya maka baꞌanan bili-bilina.”

⁷ Yuk si Yakub, “Ndaꞌunbi ba, masi alanga llaw. Mbal giꞌ waktu pamapoleꞌ hayop ni deyom sasak. Bang bahāꞌ painumbi buwattinaꞌan boꞌ yampa bowabi ni kaparang-parangan pinakan pabīng.”

⁸ Ya sambung saga aꞌa heꞌ, “Mbal makajari, tuwan. Subay atimuk piꞌitu kabaꞌanan bili-bili kamemon boꞌ yampa ligiran kami tambol batu itu. Makajari pinainum bang maitu na kamemon.”

⁹ Na, hinabu paꞌin si Yakub magsuli-suli itu maka saga aꞌa magiꞌipat inān, atꞌkka na si Rakiya maka baꞌanan bili-bili mmaꞌna. Tuꞌud hinangna angipat bili-bili. ¹⁰ Jari pagꞌndaꞌ si Yakub ma kakina si Rakiya maka bili-bili siꞌitna si Leban, magtūy niligiran eꞌna batu min bowaꞌ boheꞌ boꞌ painumna saga bili-bili ya sukuꞌ siꞌitna. ¹¹ Aubus paꞌin, siniyum eꞌna si Rakiya maka eꞌna anangis ma sabab kakōganna. ¹² Yuk si Yakub ma iya, “Aku itu si Yakub, kamanakan mmaꞌnu. Inaꞌku si Ripka, ya danakan mmaꞌnu.” Na, pagkale si Rakiya, magtūy iya paragan amoleꞌ angahakaꞌan mmaꞌna.

¹³ Manjari itu, makataꞌu paꞌin si Leban pasal katꞌkka kamanakanna si Yakub, magtūy iya magdaiꞌ-daiꞌ pehēꞌ anampang. Ginapus eꞌna si Yakub, siniyum isab ati binowa pehēꞌ ni lumaꞌ. Pagka ma deyom lumaꞌ na, sinuli-sulihan si Leban eꞌ si Yakub pasal kamemon bay kalabayanna. ¹⁴ “Ā,” yuk si Leban ma iya, “lahasiyaꞌta ka sabꞌnnal-bꞌnnal, magdalahaꞌ magdaisi.” Manjari dambulan ya kahantiꞌ si Yakub ma deyoman disi Leban.

Pasal Paghꞌnda si Yakub

¹⁵ Palabay paꞌin dambulan-i, ahꞌlling si Leban ma si Yakub, yukna, “Otōꞌ, minsan kita magdalahaꞌ, bang ka gantaꞌ maghinang ma aku mbal apatut bang halam aniyaꞌ tongodna. Subay ka gadjihanku. Hakaꞌin aku bang pila kabayaꞌannu?”

¹⁶ Na, aniyaꞌ duwa anak si Leban budjang. Ya ōn siyaka si Leya maka si Rakiya ya ōn siyali. ¹⁷ Bulahaw asal mata si Leya, sagōꞌ si Rakiya ya alingkat, ahāp pamarananna. ¹⁸ Jari kinabilahian si Rakiya itu eꞌ si Yakub ati yukna ma si Leban, “Bapaꞌ bang kaꞌa-i asulut, maghinang aku maitu ma kaꞌa pituntahun, minsan aku mbal gadjihannu. Ya sadja amuꞌku ma kaꞌa bang paꞌin pamahꞌndanu ma aku anaknu si Rakiya.”

¹⁹ Ya sambung si Leban, yukna, “Ā, gom lagiꞌ kaꞌa ya pamahꞌllaku ma iya, daꞌa aꞌa saddī. Maitu na ka ma deyomanku.” ²⁰ Manjari pituntahun ya paghinang si Yakub ma si Leban supaya tahꞌndana si Rakiya, sagōꞌ halam tabistana tꞌggolna ma sabab kaheya lasana ma si Rakiya.

²¹ Na, palabay paꞌin pituntahun eꞌ, yuk si Yakub ma si Leban, “Bapaꞌ, taꞌabut na waktu, kawinun kami maka si Rakiya boꞌ kami makapagdakayuꞌ na.” ²² Angahoꞌ si Leban ati magsakap iya jajamuhan. Pinataꞌu eꞌna saga aꞌa kamemon ma lahatna, sinōꞌ paluruk ni pagkawinan. ^23-24 Saguwāꞌ pagsangom eꞌ, nggaꞌi ka si Rakiya ya niꞌndeꞌan eꞌ si Leban ni si Yakub sagōꞌ si Leya. (Aniyaꞌ isab ipatan si Leban ōnna si Silpa bay pamuwanna ma si Leya nihinang ipatan.) Jari si Yakub maka si Leya magbihing na atuli.

²⁵ Na, pagkꞌllat paꞌin llaw dakayuꞌ, yambohoꞌ tasayu eꞌ si Yakub in si Leya bay seheꞌna sangom inān! Pehēꞌ iya magtūy ni si Leban. “Bapaꞌ,” yukna, “angay buwattilu hinangnu ma aku? Jukup na pituntahun ya paghinangku ma kaꞌa boꞌ supaya si Rakiya taꞌāꞌku hꞌnda. Angay aku angkan akkalannu?”

²⁶ Ya sambung si Leban, “Otōꞌ, ya addat kami maitu, mbal makajari bang siyali pinahꞌllaꞌan dahū min siyaka. ²⁷ Tangguhanta dapituꞌ lagiꞌ. Subay na aubus paglami-lami ma si Leya itu boꞌ yampa ka pakawin kami maka si Rakiya. Saguwāꞌ aniyaꞌ tongodna. Ya paghinangnu maitu ma aku subay sinugpatan pituntahun lagiꞌ.”

²⁸ Na, kasulutan si Yakub. Aubus paꞌin dapituꞌ iya paglami-lami sigām ma si Leya, pinakawin si Yakub eꞌ si Leban ma anakna si Rakiya. ²⁹ Damikiyanna du isab, aniyaꞌ ipatan dꞌnda pamuwan si Leban ma si Rakiya, ōnna si Bilha. ³⁰ Sakali itu magdakayuꞌ na si Yakub maka si Rakiya. Aheya sidda lasana ma si Rakiya, labi-labi min lasana ma si Leya. Jari pituntahun giꞌ ya paghinang si Yakub ma deyoman si Leban.

Saga Anak si Yakub

³¹ Na, taꞌndaꞌ paꞌin eꞌ PANGHŪꞌ arikiꞌ asal lasa si Yakub ma si Leya, aniyaꞌ kahāpan pamuwanna ma iya. Jari si Leya ya makapangiram du, sagōꞌ si Rakiya mbal makaꞌanak. ³² Jari abꞌttong na si Leya ati anganak iya lꞌlla. Yukna, “Taꞌndaꞌ kasusahanku eꞌ PANGHŪꞌ. Tantu aku kinalasahan na eꞌ hꞌllaku.” Manjari Rubin ya pangōnna ma anakna heꞌ.

³³ Manjari abꞌttong iya pabīng ati lꞌlla du isab anakna. Yukna, “Ya anak itu pamuwan PANGHŪꞌ ma aku sabab takalena pasal aku mbal kinalasahan.” Angkan Simiyun ya pangōnna ma ondeꞌ. ³⁴ Na, abꞌttong iya pabīng ati lꞌlla isab anakna. Yukna, “Na, tantu hꞌllaku patꞌttog na ma aku sabab tꞌllu na anak lꞌlla ya pamuwanku ma iya.” Manjari Libi ya pangōnna ma ondeꞌ itu.

³⁵ Anā, abꞌttong si Leya pabīng, kaꞌmpatna na, lꞌlla du isab. Yukna, “Pudjiku na PANGHŪꞌ buwattinaꞌan.” Angkan ōnanna anakna si Yahud. Na minnēꞌ pahondong si Leya maganak.