28
1 Manjari halam giꞌ makauntas si Yakub, pinalinganan iya eꞌ si Isaꞌak. Mainaꞌan paꞌin, sinagina iya maka niamay-amayan. Yuk mmaꞌna ma iya, “Otōꞌ, daꞌa ka maghꞌnda dꞌnda Kanaꞌan. 2 Pehēꞌ ka gom paꞌin ni lahat Mesopotami, ni tumpuk si Bituwil ya mboꞌnu min inaꞌ. Peneꞌun dꞌnda ngāꞌnu hꞌnda min kaꞌanakan bapaꞌnu si Leban. 3 Mura-murahan, bang paꞌin ka binuwanan kahāpan eꞌ Tuhan Sangat Kawasa, bang paꞌin pinaheka panubuꞌnu boꞌ ka tahinang pagꞌmboꞌan ma kabangsa-bangsahan. 4 Bang paꞌin pinasampay ni kaꞌam dapanubuꞌan ya kahāpan bay panganjanjiꞌ Tuhan ma mmaꞌku si Ibrahim. Hatina kaꞌam iya tahinang tag-dapu lahat pahantiꞌantam itu, ya lahat bay pamuwan asal eꞌ Tuhan ma mmaꞌku.” 5 Aubus paꞌin eꞌ si Isaꞌak ahꞌlling ma si Yakub, pinatulak na iya boꞌ pauntas tudju ni lahat Mesopotami, ni kauman siꞌitna si Leban. Ya si Leban itu anak si Bituwil aꞌa Aram.
6 Manjari tataꞌu eꞌ si Esaw pasal si Isaꞌak bay angamuꞌ-ngamuꞌan si Yakub kahāpan. Bay patulakna isab pehēꞌ ni lahat Mesopotami amiha dꞌnda ngāꞌna hꞌnda. Niamay-amayan iya sinōꞌ daꞌa maghꞌnda dꞌnda bangsa Kanaꞌan. 7 Ya takale isab eꞌ si Esaw in si Yakub konoꞌ bay ameyaꞌ ma panohoꞌan mattoꞌana, hatina waꞌi na palꞌngngan tudju ni lahat Mesopotami. 8 Na minnēꞌ kinataꞌuwan na eꞌ si Esaw in mmaꞌna si Isaꞌak mbal toꞌongan kasulutan ma saga dꞌnda bangsa Kanaꞌan, 9 angkan iya pehēꞌ ni siꞌitna si Ismaꞌil anak si Ibrahim. Mainaꞌan paꞌin, makahꞌnda iya ni si Mahalat anak si Ismaꞌil, danakan isab si Nebayot. Manjari tꞌllu na hꞌnda si Esaw.
Panguppi si Yakub ma Lahat Betel
10 Na, pauntas na si Yakub min lahat Beꞌerseba boꞌ palꞌngngan tudju ni kauman Haran. 11 Manjari makasampay paꞌin iya ni dakayuꞌ paꞌatagan, pahantiꞌ iya mainaꞌan sabab pasꞌddop na llaw. Angāꞌ iya dakayuꞌ batu paūꞌanna boꞌ yampa pabahak atuli. 12 Jari anguppi iya. Ya taꞌndaꞌna ma deyom uppina haronan bay pinatꞌngge min tanaꞌ tudju ni diyataꞌ langit. Aniyaꞌ isab taꞌndaꞌna saga malaꞌikat magdeyoꞌ-diyataꞌ. 13 Inaꞌan isab PANGHŪꞌ anꞌngge min diyataꞌna maka eꞌna magsuwala. Yukna, “Aku itu si Yawe ya pagtuhanan mboꞌnu si Ibrahim maka mmaꞌnu si Isaꞌak. Ya tanaꞌ pabahakannu ilu pamuwanku ma kaꞌa sampay ma saga panubuꞌnu. 14 Pahekaku du tubuꞌnu, ya heka sigām saliꞌ solagan gusung ma gintanaꞌan. Paheka du sigām ma kaluhaꞌan lahat itu, min sobangan sampay ni sꞌddopan. Maka kabangsa-bangsahan kamemon maitu ma dunya buwananku kahāpan du ma sababannu maka ma sababan saga panubuꞌnu. 15 Na, taptap du aku mailu ma kaꞌa, jagahanta ka piꞌingga-piꞌingga palꞌngnganannu, sampay ni waktu pamowata kaꞌa pabīng ni lahat itu. Mbal ka bbahanku, maka tumananku toꞌongan ya paljanjiꞌanku itu ma kaꞌa.”
16 Jari abatiꞌ na si Yakub maka eꞌna amikilan. “Sabꞌnnal-bꞌnnal, itiyaꞌ PANGHŪꞌ ma lahat itu, sagōꞌ halam bay kataꞌuwanku.” 17 Sinōd iya tāw angkan yukna, “Agꞌmma sumangatku ma tongod itu-i! Paglumaꞌan Tuhan koꞌ itu. Itiyaꞌ isab maitu lawang pagsosōran sulgaꞌ.”
18 Pagsubu-subu paꞌin, binuhat eꞌ si Yakub batu bay paūꞌanna sangom-i boꞌ pinatꞌngge eꞌna saliꞌ hāg. Tapatꞌngge paꞌin, binaseꞌ maka nsꞌllan boꞌ nihinang eꞌna tampat pangentoman. 19 Manjari Betela ya pangōn si Yakub ma lahat inān. (Lūs ya ōn kauman ma atag inaꞌan ma masa awal lagiꞌ.)
20 Sakali magnajal si Yakub ni Tuhan, yukna, “Bang kaꞌa-i sabꞌnnal-bꞌnnal pataptap anganjagahan aku ma lꞌngngananku itu, bang ka amuwanan aku pagkakan maka tamongon, 21 maka bang aku papoleꞌnu isab ni lumaꞌ mmaꞌku ma deyom kasalamatan, na, si Yawe ya Tuhanku, halam aniyaꞌ saddī. 22 Ya batu tapatꞌnggeku itu ibarat lumaꞌ pagsusumbahan ni kaꞌa. Tukbalanku isab ma kaꞌa bahagiꞌ sangpūꞌ min ai-ai kamemon ya pamasukuꞌnu ma aku.”