Panagnaꞌan 27

Pangakkal si Yakub

¹ Na palabay paꞌin daka pilantahun, atoꞌa na si Isaꞌak, mbal na makaꞌndaꞌ. Jari aniyaꞌ llaw pangalinganna ma si Esaw, ya anakna siyaka. Yukna ma iya, “Otōꞌ.”

Ya sambung si Esaw, “Oy, Mmaꞌ.”

² Yuk si Isaꞌak, “Otōꞌ, taꞌndaꞌnu aku itu atoꞌa na. Sōng-sōng na taꞌabut gantaꞌanku, angkan aniyaꞌ amuꞌku ma kaꞌa. ³ Bowahun panaꞌnu pehēꞌ ni kareya-reyahan amihaꞌan kita hayop susumbaliꞌan. ⁴ Adjalin aku pagkakan ahāp nanamna ya kasōbanku. Bowahun piꞌitu boꞌ kakanku ati amuꞌ-amuꞌanta ka ni Tuhan bang paꞌin ka pinasukuꞌan lidjikiꞌ. Pangꞌbbaku ma kaꞌa sasangku masi allum.”

⁵ Na, hinabu paꞌin si Isaꞌak magsuli-suli maka si Esaw, inaꞌan si Ripka pakale-kale. Jari makalanjal paꞌin si Esaw kaleya amanaꞌ, ⁶ magtūy ahꞌlling si Ripka ni si Yakub, yukna, “Otōꞌ, yambohoꞌ takaleku mmaꞌnu ahꞌlling ma siyakanu, yukna, ⁷ ‘Pihaꞌin kita susumbaliꞌan ma deya. Adjalun pahāp boꞌ aniyaꞌ palaukku ahāp nanamna. Aubus paꞌin aku amangan, amuꞌ-amuꞌanta ka kahāpan ni Tuhan bang paꞌin ka pinasukuꞌan lidjikiꞌ ya kapatutan pamasukuꞌ ma anak siyaka. Ya du inaꞌan pangꞌbbaku ma kaꞌa sasangku masi allum. Si Yawe ya saksiꞌku.’ ⁸ Na, Otōꞌ,” yuk si Ripka, “kalehun aku. Beyaꞌun panohoꞌanku itu. ⁹ Pehēꞌ na ka ni buluyan hayopta. Peneꞌun duwa anak kambing ahāp lꞌmmokna ati bowahun piꞌitu ni aku. Aku ya angadjalan mmaꞌnu lauk alanab ya kasōbanna toꞌongan. ¹⁰ Atahak paꞌin lauk eꞌ, kaꞌa ya amowa pehēꞌ ni mmaꞌnu ati kaꞌa ya amakan iya. Manjari kaꞌa ya niamuꞌ-amuꞌan kahāpan min Tuhan eꞌ mmaꞌnu sasangna masi allum lagiꞌ.”

¹¹ Yuk si Yakub ni inaꞌna, “Oy, Inaꞌ, bahibuan asal si Esaw. Aku nggaꞌi ka, alanuꞌ kuwitku. ¹² Painay bahāꞌ bang aku sinanaw eꞌ si Mmaꞌ, boꞌ kataꞌuwanna magtūy in aku amarupang ma iya. Bang buwattēꞌ nggaꞌi ka kahāpan ya taꞌāꞌku, saguwāꞌ suknaꞌ.”

¹³ Na ya sambung inaꞌna ma iya, “Mbal, Otōꞌ. In suknaꞌ inān subay papelleng ni aku, nggaꞌi ka ni kaꞌa. Pehēꞌ na ka, ngāꞌin kita kambing.”

¹⁴ Sakali pehēꞌ na si Yakub angāꞌ duwa anak kambing. Binowa eꞌna pehēꞌ ni inaꞌna boꞌ adjalanna lauk ya kasōban si Isaꞌak kinakan. ¹⁵ Pagubus, pinaluwas eꞌ si Ripka badjuꞌ si Esaw ahāp toꞌongan, ya bay ma deyom tauꞌan. Jari pasulugna na ma anakna siyali, ya si Yakub. ¹⁶ Niāꞌ isab eꞌ si Ripka kuwit kambing bay taꞌadjal inān ati pangalapis eꞌna ma bukut tangan si Yakub sampay ma buliꞌ kꞌllongna supaya iya bahibuan saliꞌ. ¹⁷ Aubus paꞌin eꞌ-i, niꞌndeꞌan eꞌ si Ripka ni si Yakub lauk ahāp nanamna, maka tinapay bahaꞌu bay hinangna.

¹⁸ Sakali pehēꞌ na si Yakub ni mmaꞌna, yukna, “O Mmaꞌ!”

Yuk si Isaꞌak, “Ahoꞌ, Otōꞌ. Sai sa kaꞌa ilu?”

¹⁹ Ya sambung si Yakub, “Si Esaw, anaknu siyaka. Tahinangku na bay panohoꞌannu ma aku. Itiyaꞌ na lauk bay adjalanku kaꞌa. Papunduk ka amangan boꞌ aku yampa amuꞌ-amuꞌannu kahāpan ni Tuhan.”

²⁰ Ahꞌlling giꞌ si Isaꞌak ma si Yakub, yukna, “Alꞌkkas pahāp kapihanu susumbaliꞌan ilu. Angay bahāꞌ?”

Ya sambung si Yakub, “Tuꞌud aku tinabang eꞌ si Yawe, ya pagtuhanannu.”

²¹ Yuk si Isaꞌak isab, “Otōꞌ, pasekot ka konoꞌ. Sanawta ka bang ka bꞌnnal-bꞌnnal anakku si Esaw.”

²² Manjari pasekot na si Yakub ni mmaꞌna boꞌ tasanaw eꞌna. Yuk si Isaꞌak, “Lagamnu saliꞌ lagam si Yakub, malaingkan tangannu itu saliꞌ tangan si Esaw.” ²³ Na, halam takilāna in aꞌa inān si Yakub, sabab tasanawna tanganna bahibuan, dasaliꞌ maka tangan si Esaw. Na, araiꞌ paꞌin si Isaꞌak angamuꞌ-ngamuꞌ kahāpan tudju ni Tuhan, ²⁴ tinilaw eꞌna si Yakub pabīng, yukna, “Bꞌnnal bahāꞌ? Kaꞌa ilu anakku si Esaw?”

“Ahoꞌ, Mmaꞌ,” yuk si Yakub. “Halam saddī.”

²⁵ Sakali ahꞌlling si Isaꞌak, yukna, “Ndiya na lauk bay adjalannu aku-i. Amangan na aku boꞌ yampa ka amuꞌ-amuꞌanku kahāpan tudju ni Tuhan.”

Magtūy iya binowahan lauk maka binu-anggul eꞌ si Yakub. ²⁶ Aubus paꞌin, nilinganan iya. Yuk mmaꞌna ma iya, “Otōꞌ, piꞌitu ka konoꞌ, siyumun aku.”

²⁷ Manjari pasekot na si Yakub ni mmaꞌna aniyum iya. Sakali itu, tahamut paꞌin sꞌmmekna eꞌ si Isaꞌak, hamut si Esaw toꞌongan, magtūy iya niamuꞌ-amuꞌan kahāpan ni Tuhan. Ya pagkallam si Isaꞌak ma iya,

“Ya hamut anakku itu saliꞌ hamut tanaꞌ paghumaꞌan

kabuwanan kahāpan eꞌ si Yawe.

²⁸ Bang paꞌin binusugan tanaꞌnu eꞌ Tuhan

maka aluꞌ min diyataꞌ langit.

Bang paꞌin isab pinajatu eꞌna tanomannu,

supaya aheka buwaꞌna pagkakannu maka paginumnu!

²⁹ Bang paꞌin kapagbayaꞌannu saga kabangsa-bangsahan,

bang paꞌin sigām pasujud ma kaꞌa.

Bang paꞌin ka magnakuraꞌ ma kakampungannu kamemon,

bang paꞌin isab pasujud ma kaꞌa kapanubuꞌan inaꞌnu.

Bang paꞌin kataluwaꞌan mulkaꞌ

sasuku anabbut ōnnu ni kalaꞌatan.

Bang paꞌin binuwanan kahāpan

sasuku anabbut ōnnu ni kahāpan.”

³⁰ Manjari itu, aubus paꞌin pangamuꞌ-ngamuꞌ si Isaꞌak, boꞌ yambohoꞌ paluwas si Yakub, inaꞌan na si Esaw atꞌkka min deya. ³¹ Magtūy du iya angadjal lauk ahāp nanamna boꞌ yampa bowana pehēꞌ ni mmaꞌna. Yukna, “O Mmaꞌ, itiyaꞌ na lauk bay adjalanku kaꞌa. Papunduk ka amangan boꞌ yampa aku amuꞌ-amuꞌannu kahāpan ni Tuhan.”

³² Tinilaw iya magtūy eꞌ si Isaꞌak, “Arī, sai sa kaꞌa ilu?”

Ya sambung si Esaw, “Aku itu si Esaw, anaknu siyaka.”

³³ Agsai takuddat si Isaꞌak, amidpid toꞌongan baranna. Yukna, “Sai sa aꞌa bay amowahan aku palauk insiniꞌ. Susumbaliꞌan konoꞌ bay tapanaꞌ eꞌna! Yambohoꞌ takakanku ma waktu katꞌkkanu itu. Bahaꞌu du iya bay amuꞌ-amuꞌanku kahāpan ni Tuhan. Pangannalku kaꞌa, sagōꞌ kahāpan ilu mbal kapindahan sabab makalagtik na dꞌllaꞌku.”

³⁴ Na, pagkale si Esaw ma lling mmaꞌna heꞌ magtūy iya anangis pakosog kabowa kagit atayna. Yukna, “Arōy, aku isab Mmaꞌ, amuꞌ-amuꞌin aku kahāpan isab!”

³⁵ Ya sambung si Isaꞌak, yukna, “Arōy, Otōꞌ. Bay aku tarupang eꞌ siyalinu. Taꞌāꞌna na kahāpan ya arak pamasukuꞌku ma kaꞌa.”

³⁶ “Ā,” yuk si Esaw, “tinōp iya niōnan Yakub, sabab min duwa na aku kaꞌakkalan eꞌna. Taꞌagaw eꞌna pusakaꞌ ya kapatutanku pagka aku anak siyaka. Maka ma buwattinaꞌan isab, taꞌāꞌna kahāpan min Tuhan ya subay pamasukuꞌ aku. Mmaꞌ, halam bahāꞌ aniyaꞌ lidjikiꞌ bay kapinannu aku?”

³⁷ Anambung si Isaꞌak, yukna, “Bay na amuꞌ-amuꞌanku si Yakub kahāpan bang paꞌin iya tahinang nakuraꞌnu. Maka kampungna kamemon subay tahinang sosohoꞌanna. Taꞌamuꞌ-amuꞌku isab bang paꞌin iya binalanjaꞌan kinakan ahāp eꞌ Tuhan maka binu-anggul paginumna. Hatina, Otōꞌ, si Yakub ya pinasukuꞌan kamemon, ati halam aniyaꞌ tahinangku ma kaꞌa.”

³⁸ Sakali angamuꞌ na paꞌin si Esaw, yukna, “Mmaꞌ, min tꞌdda sadja ka bahāꞌ angamuꞌ-ngamuꞌ kahāpan ni Tuhan? Mbal bahāꞌ kaisaban? Ndūꞌ Mmaꞌ, amuꞌ-amuꞌin aku kahāpan isab.” Jari aheya tangisna.

³⁹ Manjari magkallam si Isaꞌak ma si Esaw, yukna,

“Paglahatannu alawak du min huma

ya taptap pinajatu eꞌ Tuhan.

Mbal ka pinasukuꞌan tanaꞌ

ya binusugan maka aluꞌ min diyataꞌ langit,

tanaꞌ akansang buwaꞌna.

⁴⁰ Magbonoꞌ du ka boꞌ aniyaꞌ tatabannu pagkallumannu,

sagōꞌ siyalinu ya pagnakuraꞌannu na paꞌin.

Malaingkan bang ka mbal makasandal pinagbayaꞌan eꞌna,

angatu du ka ati makalꞌppa min komkomanna.”

Kalahi si Yakub

⁴¹ Sakali abꞌnsi sidda si Esaw ma si Yakub ma sabab kahāpan ya pamasukuꞌ ma iya eꞌ mmaꞌ sigām. Ya minohot eꞌ si Esaw ma deyom atayna, “Mbal atꞌggol amatay du si Mmaꞌ ati papatayku si Yakub itu.”

⁴² Daipara kahakaꞌan si Ripka pasal kamohotan si Esaw. Makataꞌu paꞌin iya, magtūy lingananna si Yakub, yukna, “Otōꞌ, pakale ka. Agaraꞌ si Esaw amalosan kaꞌa. ⁴³ Na, buwattitu panganggaraꞌku ma kaꞌa, Otōꞌ. Alaꞌan ka magdaiꞌ-daiꞌ pehēꞌ ni kauman Haran, ni danakanku si Leban eꞌ. ⁴⁴ Subay ka pahantiꞌ ma deyomanna sampay alungay na kabꞌnsi siyakanu ma kaꞌa. ⁴⁵ Jari bang ahāp-hāp na atayna ni kaꞌa, boꞌ alungay min pangentomna bay hinangnu ma iya, na, tambukuhanta paꞌin ka boꞌ ka makapoleꞌ piꞌitu. Tuꞌud aku mbal bilahi kalungayan duwa anak ma dangꞌllaw.”

⁴⁶ Sakali aniyaꞌ pahꞌlling si Ripka ma si Isaꞌak, yukna, “Abꞌnsi aku ma saga dꞌnda bangsa Hīt buwat hꞌnda si Esaw itu. Bang si Yakub gantaꞌ maghꞌnda isab ma bangsa Hīt, na, ahāp lagiꞌ aku amatay.”