26
Pasal si Isaꞌak maka si Abimelek
1 Sakali itu aniyaꞌ gotom ma lahat Kanaꞌan eꞌ, saddī min gotom bay kalabayan disi Ibrahim ma waktu dahū. Jari maglain disi Isaꞌak pehēꞌ ni Gerar, ya lahat pagsultanan si Abimelek sultan bangsa Pilistin. 2 Bay na magpaꞌndaꞌ asal PANGHŪꞌ ma si Isaꞌak maka eꞌna ahꞌlling, yuk-i, “Isaꞌak, daꞌa ka pehēꞌ ni lahat Misil. Ya paglahatannu subay lahat song panōꞌku ma kaꞌa. 3 Sagōꞌ pahantiꞌ ka buwattinaꞌan ma jadjahan ya patꞌnnaꞌannu ilu. Taptap du aku mailu ma kaꞌa amuwanan kaꞌa kahāpan. Saga lahat kamemon ma jadjahan itu-i pamasukuꞌku ma kaꞌa sampay ma saga panubuꞌnu. Tumanku isab bay paljanjiꞌanku ma mmaꞌnu si Ibrahim. 4 Buwananta ka paltubuꞌan aheka, buwat saga bituꞌun ma diyataꞌ langit ya heka sigām. Pamuwanku du isab katibuꞌukan lahat ilu ma sigām. Manjari kabangsahan kamemon ma deyom dunya angamuꞌ kahāpan du min aku bang paꞌin pinasaliꞌ ni kahāpan ya pamuwanku ma saga panubuꞌnu. 5 Ahoꞌ, buwananta ka kahāpan ma sabab kapameyaꞌ si Ibrahim ma panohoꞌanku. Bay kabogbogan eꞌna saraꞌ maka panohoꞌan bay pamatꞌnnaꞌku ma iya.” 6 Manjari mahēꞌ na si Isaꞌak pahantiꞌ ma lahat Gerar.
7 Na, tinilaw paꞌin iya eꞌ saga lꞌlla minnaꞌan pasal si Ripka, ya sambungna ma sigām, “Danakanku koꞌ ilu.” Halam bay bontolna in si Ripka hꞌndana du, sabab tināw iya. Pangannalna in iya binonoꞌ eꞌ saga aꞌa inān boꞌ taꞌāꞌ si Ripka eꞌ sigām pagka ahāp dꞌnda sidda.
8 Sakali itu, atꞌggol-tꞌggol paꞌin kamahēꞌ disi Isaꞌak ma lahat Gerar, aniyaꞌ dakayuꞌ llaw amantaw sultan Abimelek min tandawanna. Taꞌndaꞌ eꞌna si Isaꞌak anapu-napu si Ripka. 9 Magtūy pinalinganan si Isaꞌak eꞌ si Abimelek, sinōꞌ patampal ma iya. Yukna, “Halam aniyaꞌ pagduwa-ruwana, hꞌndanu koꞌ ilu. Angay kami putingannu in iya konoꞌ danakannu?”
Ya sambung si Isaꞌak, “Tuwan sultan, tuꞌud aku tināw binonoꞌ bang aku angahaka sabꞌnnal-bꞌnnal in iya hꞌndaku.”
10 Yuk si Abimelek, “Angay kami talaꞌatnu buwattilu? Bang saupama aniyaꞌ aꞌaku bay makabihing atuli ma iya, na, kaꞌa ya sababna bang kami katꞌkkahan dusa.” 11 Angkanna sinanggupan eꞌ si Abimelek saga tendogna kamemon, yukna, “Sai-sai angalaꞌat aꞌa itu atawa hꞌndana, patꞌnnaꞌanku iya hukuman ni kamatay.”
12 Manjari itu, ma Gerar paꞌin si Isaꞌak maglahat, maghuma iya ati ahāp toꞌongan buwaꞌ tinanomna ma tahun inān. Maghatusan buwaꞌna dampoꞌon maka dampoꞌon ma sabab lidjikiꞌ min PANGHŪꞌ. 13 Pakꞌnnop na paꞌin altaꞌ si Isaꞌak sampay aheya toꞌongan karayana. 14 Na, pagka aheka toꞌongan bili-bilina, kambingna maka sapiꞌna, maka aheka isab saga sosohoꞌanna, nijingki iya eꞌ bangsa Pilistin. 15 Ya heꞌ sababna angkan nirasokan tanaꞌ saga pagboheꞌan kamemon bay kinali eꞌ saga sosohoꞌan mmaꞌna si Ibrahim ma masana allum lagiꞌ.
16 Angkanna si Abimelek bay amowa si Isaꞌak maggaraꞌ, yukna, “Tuwan, subay kam papinda ni lahat saddī, sabab agaꞌos na kam min kami.”
17 Sakali pauntas disi Isaꞌak pehēꞌ ni Lꞌbbak Gerar ati mahēꞌ na sigām patꞌnnaꞌ. 18 Aniyaꞌ saga pagboheꞌan asal ma tongod inaꞌan-i bay kinali ma masa lagiꞌ mmaꞌna si Ibrahim, sagōꞌ amatay paꞌin si Ibrahim bay nirasokan tanaꞌ eꞌ saga aꞌa Pilistin. Manjari ya boheꞌ inān bay pinakali pabīng eꞌ si Isaꞌak, pinatꞌnnaꞌan isab ōn bay pangōn eꞌ mmaꞌna-i.
19 Puwas eꞌ aniyaꞌ pagboheꞌan bahaꞌu bay kinali eꞌ saga sosohoꞌan si Isaꞌak ma lꞌbbak inān ati makabāk sigām boheꞌ ahāp. 20 Sagōꞌ magsaggaꞌ saga aꞌa Gerar maka saga aꞌa magiꞌipat hayop si Isaꞌak. Yuk aꞌa Gerar eꞌ, “Kami dapu boheꞌ ilu.” Ya heꞌ sababna angkan boheꞌ inān niōnan ‘Esek’ eꞌ si Isaꞌak, hatina ‘Pagsaggaꞌan.’ 21 Na angali giꞌ saga sosohoꞌan si Isaꞌak pagboheꞌan saddī, jari ya du inaꞌan tahinang pagsasawan eꞌ saga aꞌa Gerar, angkan niōnan eꞌ si Isaꞌak ‘Sitna’, hatina ‘Pagbantahan.’ 22 Palawak giꞌ disi Isaꞌak minnēꞌ boꞌ yampa angali boheꞌ saddī. Na halam na aniyaꞌ pagsaggaꞌan ma pagboheꞌan itu angkan niōnan Rehobot, hatina ‘Kaluhayaꞌan.’ Yuk si Isaꞌak, “Itiyaꞌ kitam pinaluhaya eꞌ PANGHŪꞌ-Yawe patꞌnnaꞌ toꞌongan ma lahat itu. Tantu kitam makabāk kahāpan maitu.”
23 Na, patukad sigām minnēꞌ tudju ni lahat Beꞌerseba. 24 Pagtꞌkka sigām pehēꞌ boꞌ sangom na, magpaꞌndaꞌ PANGHŪꞌ ma si Isaꞌak magsuwala, yuk-i, “Aku ya Tuhan pagtuhanan mmaꞌnu si Ibrahim. Daꞌa ka tināw sabab taptap du aku mailu ma kaꞌa. Buwananta ka kahāpan, pahekaku panubuꞌnu ma sabab sosohoꞌanku si Ibrahim.”
25 Aniyaꞌ pagtunuꞌan kulban nihinang eꞌ si Isaꞌak mainaꞌan, boꞌ anaꞌat iya ma ōn si Yawe.a Jari mainaꞌan iya patꞌnnaꞌ, mainaꞌan isab saga sosohoꞌanna bay angali pagboheꞌan.
Pagsulutan si Isaꞌak maka si Abimelek
26 Na aniyaꞌ dakayuꞌ llaw pinehēꞌ si Isaꞌak eꞌ si Abimelek, ya sultan ma lahat Gerar. Ya seheꞌ si Abimelek si Ahussat, ya bagayna pangandolan, maka si Pikul, ya nakuraꞌ saga kasundaluhanna. 27 Atilaw si Isaꞌak ma sigām, yukna, “Tuwan sultan, ai gawinu piꞌitu? Bay aku palaꞌanbi min lahatbi inān maka aheya kabꞌnsibi ma aku. Na, ai maksudbi ma aku?”
28 Ya sambung sigām, “Ahoꞌ tuwan, saguwāꞌ kataꞌuwan kami in kaꞌa tinabang sadja eꞌ si Yawe, angkan yuk kami subay aniyaꞌ pagsulutantam. Manjari ya maksud kami itu mikisapa ma kaꞌa, 29 supaya ka mbal angalaꞌat kami. Bistahun, satꞌggol kam bay ma lahat kami kahāpan sadja ya tahinang kami ma kaꞌam. Maka taꞌabut waktu isab kalaꞌanbi, pinatulak kam ma deyom kasannangan. Tantu ka kabuwanan kahāpan na paꞌin eꞌ si Yawe.”
30 Pagkale si Isaꞌak, magpajamu iya pangahulmatna ma disi Abimelek ati magsalu sigām amangan maka anginum. 31 Pagsubu paꞌin magjanjiꞌ sigām min karuwambilaꞌ, magsapa in sigām mbal na magbonoꞌ danseheꞌan. Pagubus, pinabaꞌid disi Abimelek eꞌ si Isaꞌak ati amoleꞌ sigām magatay poteꞌ.
32 Na, ma llaw inaꞌan-i, pinaꞌan ni si Isaꞌak saga sosohoꞌanna angahakaꞌan iya pasal pagboheꞌan yambohoꞌ kinali eꞌ sigām. “Makabāk kami boheꞌ!” yuk sigām. 33 Ya pangōn si Isaꞌak ma boheꞌ inān ‘Sibaꞌ’. Ya heꞌ sababna angkan kauman inān kaōnan Beꞌerseba sampay ni kabuwattituhan.b