25
Saga Panubuꞌ si Ibrahim
1 Manjari si Ibrahim makapaghꞌnda na pabīng, ōn hꞌndana si Kitura. 2 Nnom anakna lꞌlla min si Kitura. Ya siyaka si Simran, pasunuꞌ si Joksan, boꞌ si Medan, boꞌ si Midiyan, kalimana si Isbak boꞌ si Suwa ya kasiyalihan. 3 Si Joksan itu ya na mmaꞌ si Seba maka si Dedan. Manjari saga panubuꞌ si Dedan, ya na bangsa Assur, bangsa Litus maka bangsa Leyom. 4 Aniyaꞌ isab saga anak si Midiyan lꞌlla. Ōn sigām si Epa, si Eper, si Hanok, si Abida maka si Elda. Na, iya na inaꞌan panubuꞌ si Ibrahim min hꞌndana si Kitura.
5-6 Si Isaꞌak ya pamusakaꞌan eꞌ si Ibrahim sukuꞌna kamemon. Daipara sasangna allum lagiꞌ, aniyaꞌ altaꞌ pamuwanna ma saga anakna min saga hꞌndana saddī min si Sara. Sinohoꞌ sigām maglahat ma lahat dakayuꞌ tampal ni sobangan boꞌ supaya sigām alawak min anakna si Isaꞌak.
7-8 Na atahaꞌ toꞌongan umul si Ibrahim, dahatus maka pitumpūꞌ maka limantahun. Manjari amatay na iya ma deyom kasannangan ati pinapagtimuk iya maka kaꞌmboꞌ-mboꞌanna. 9-10 Kinubul iya eꞌ anakna si Isaꞌak maka si Ismaꞌil ma deyom songab batu ma tanaꞌ si Makpela tampal ni sobangan min tanaꞌ si Mamre. Songab batu itu asal ma tanaꞌ bay binꞌlli eꞌ si Ibrahim min si Epron anak si Sohar bangsa Hīt. Jari kinubul si Ibrahim ma bihing hꞌndana si Sara. 11 Na, pagka amatay na si Ibrahim, si Isaꞌak ya pasꞌlleꞌ binuwanan kahāpan na paꞌin eꞌ Tuhan. Maglahat si Isaꞌak ma tongod boheꞌ Beꞌer-Lahai-Ruwi.
Saga Panubuꞌ si Ismaꞌil
12 Ya na itu saga panubuꞌ si Ismaꞌil, anak si Ibrahim min si Hajara aꞌa bangsa Misil, ya bay ipatan si Sara. 13 Ya itu ōn saga anak si Ismaꞌil magsunuꞌ-sunuꞌ: si Nebayot ya kasiyakahan, pasunuꞌ si Kedar, boꞌ si Abbeꞌel, boꞌ si Mibsam. 14 Ya pasunuꞌ ma si Mibsam si Misma, boꞌ si Duma, boꞌ si Massa, 15 boꞌ si Hadad, boꞌ si Tema, boꞌ si Jetor, boꞌ isab si Napis, kasiyalihan si Kedema. 16 Na saga anak si Ismaꞌil itu tahinang poꞌonan sangpūꞌ maka duwa tumpuk. Maka ōn sigām tahinang ōn lahat isab, ya patꞌnnaꞌan baꞌanan katumpukan itu. 17 Taꞌabut paꞌin umul si Ismaꞌil dahatus maka tꞌllumpūꞌ maka pituntahun, amatay na iya ati pinapagtimuk maka kaꞌmboꞌ-mboꞌanna. 18 Manjari saga panubuꞌ si Ismaꞌil itu inaꞌan maglahat ma tongaꞌan lahat Habila maka Sūr, ma bihing lahat Misil tampal ni sobangan. Magsaddī asal patꞌnnaꞌan sigām min saga panubuꞌ si Ibrahim kaseheꞌan.
Si Yakub maka si Esaw
19 Ya na itu salsila pasal si Isaꞌak, anak si Ibrahim.
Si Ibrahim ya mmaꞌ si Isaꞌak. 20 Mpatpūꞌ tahun ya umul si Isaꞌak waktu pahꞌndana ma si Ripka danakan si Leban, anak si Bituwil. (Si Bituwil itu aꞌa Aram min lahat Mesopotami.) 21 Sakali itu, pagka halam makaꞌanak si Ripka minsan atꞌggol na pagpūn sigām, angamuꞌ-ngamuꞌ si Isaꞌak ni PANGHŪꞌ-Yawe bang paꞌin pinapangiram hꞌndana. Manjari pinarūl pangamuꞌna eꞌ PANGHŪꞌ ati abꞌttong si Ripka. 22 Ya kinabꞌttongan eꞌ si Ripka kꞌmbal, sagōꞌ ma halam lagiꞌ paluwas tananamna sigām magkosog-kosogan ma deyom bꞌttongna. Yuk si Ripka, “Angay bahāꞌ buwattitu pagbꞌttongku?” Jari angaru iya ni PANGHŪꞌ-Yawe.
23 Ati yuk PANGHŪꞌ ma iya,
“Ya ma deyom bꞌttongnu ilu, duwa ondeꞌ-ondeꞌ,
manjari tahinang sigām duwa bangsa mbal toꞌongan magsulut.
Sababna dakayuꞌ ilu akosog min dakayuꞌ,
maka anaknu siyaka ilu pinagbayaꞌan du eꞌ siyali.”
24 Manjari taꞌabut na bulanan si Ripka, kꞌmbal lꞌlla anakna. 25 Ya dahū paluwas, akeyat-keyat kuwitna maka bahibuan baranna kamemon saliꞌ kahantang kakanaꞌ akasap. Angkan iya niōnan Esaw.a 26 Ya paluwas damuli waꞌi amalut pahogot ma buliꞌ tapeꞌ si Esaw. Angkanna iya niōnan si Yakub.b Nnompūꞌ tahun asal umul si Isaꞌak ma waktu kapanganak ma anakna kꞌmbal itu.
Pinabꞌllihan eꞌ si Esaw Kapatutanna Anak Siyaka
27 Manjari asangpot paꞌin umul duwangan kꞌmbal itu, si Esaw ya aꞌa magpapanaꞌ, apanday toꞌongan angāꞌ hayop talun. Ya katagihanna subay ma luwasan sadja. Saddī kajarihan si Yakub. Ahantap iya, ya katagihanna subay pataptap ma kauman. 28 Na, aheya lasa si Isaꞌak ma si Esaw sabab asōb iya amangan susumbaliꞌan ya tapanaꞌ eꞌ si Esaw. Sagōꞌ si Yakub ya kalasahan si Ripka.
29 Manjari dakayuꞌ llaw, hinabu paꞌin si Yakub itu maghinang sayul batung keyat nilohoꞌan, makapoleꞌ si Esaw min pagpanaꞌan. Lingantu toꞌongan iya, 30 angkan yukna ma si Yakub, “Buwanin aku min lohoꞌ keyat ya bꞌllanu ilu. Sidda aku pinunung!” Ya heꞌ sababanna angkan iya niranglay si Edom, hatina ‘keyat.’
31 Ya sambung si Yakub, “Ahoꞌ, sagōꞌ buwanin aku kapatutannu dahū, ya pamusakaꞌ anak siyaka.”
32 Ya sambung isab si Esaw, “Na, pehēꞌun na, ma kaꞌa na kapatutan eꞌ. Pamagayku bang aku araiꞌ na patay otas?”
33 Yuk si Yakub ma iya, “Subay ka anapa dahū, in kapatutan pamusakaꞌ ma kaꞌa pamuwannu na ma aku sabꞌnnal-bꞌnnal.” Magtūy sinapahan eꞌ si Esaw, jari pamuwanna pusakaꞌna ma siyalina.
34 Pagsapa si Esaw, binuwanan iya tinapay maka lohoꞌ keyat eꞌ kꞌmbalna. Na, amangan na iya sampay anginum boꞌ na paluwas. Halam toꞌongan pinahalgaꞌ eꞌna kapatutanna ya pamusakaꞌ ma anak siyaka.