Báŋfɛlɔ rɩ́ tífɛlɔ wɩ́ɛ́
21
1 Ɛ́ nɛ́ ká ŋ ná báŋfɛlɔ.
Báŋbɩnɛ́ rɩ́ tíbɩnɛ́ ná é yʋ́ksɔ́; mʋʋ báá tóó.
2 Káŋ ná tɔ́fɛlɔ, Wɩɩsɛ Zerizalɛmɛ fɛlɔ nɛ́, rʋʋ lɛ́ bána, Wɩɩsɛ rɩ́, aá tuwi; a bɩ́rmʋ́ tɩɩ anɛ háfɛlɔ há ɓɩ́ɛ́rʋ́ tɩɩ, rʋ́ʋ́ lɩɩ cémú bála.
3 Ɛ́ nɛ́ ŋ nɛ líŋzeno oro há lɛ́ kuóɓasa rɩ́ cɔɔ, a bʋlɛ́:
«Wɩɩsɛ dɩmɩnɩ́ túwí nɩbííne sɩɛrʋ.
Ʋ sɩ́ mɩ́ŋwɔ́ sɩ́sɩ́ɛ́nnʋ́wa.
Ʋ sɩ́ mɩ́ŋwɔ́ sɩɛrʋ, ká rɩ́wɔ́ ɔ́ʋ́ duo nɩɛ.
Wɩɩsɛ tɩɩ sɩ́ mɩŋ rɩ́wɔ́, a nɛ́ ɔ́wɔ́ Wɩɩsɛ.
4 Ʋ sɩ́ mʋ́ʋ́rɩ́wɔ́ sɩ́sɛ sɩ́mɩnnʋ wuu.
Sʋʋ báá waá mɩŋ, yúó waá mɩŋ, hiĩne waá mɩŋ, wɩɩla waá mɩŋ.
Wɩ́bɩnɛ́wa wuu dáárɔ́.»
5 Ɛ́ nɛ́ nɛrɔ ná há ké kuóɓasa daha sɛ́:
«Ŋ bɩ́rsɛ wɩ́ɛ́ wuu, ɓa a wɩ́fɛ́lɛ́.»
Ká bʋ́lɩ́ŋ rɩ́ bʋlɛ́:
«Pʋ́ŋsɛ wɩ́ɛ́ nyáŋ, ŋ wɩ́bʋlɛ́ ká wɩ́táŋsɛ nɛ́, a mɔ laa díí.»
6 Ká baa súúri bʋlɛ́:
«Wɩ́ɛ́ wuu ténnó.
Ŋ nɛ́ ká Alfa* rɩ́ Omega,* púle rí tenné.
Nyinyʋɔ́sɛ há kéŋ nɛrɔ ná wuu, ŋ sɩ́ a hiẽsó nyibulé pɔ́ʋ́, rʋ́ʋ́ nyɔ yɔ́ɔ́.
7 Nɩɛ ná wuu há sɩ́ a bɩbárá, ŋ sɩ́ dí ɛ́ zilé pɔ́wɔ́; ŋ sɩ́ ɔ́wɔ́ Wɩɩsɛ, ká rɩ́wɔ́ áŋ bɛ́lɛ́.
8 Amá nɩmʋʋna, nɩɛ ná há wɩ cɩ́nɛ́ aá tɩkɛ wɩ́ɛ́, nɩbíbɔma, nɩɓʋ́ʋ́ra, nɩlɩɩlɛ́, hɩla, veŋɓaara rɩ́ nyɛtɩɩna wuu, ɓa sɩ́ héwó é, níŋ mʋʋ rɩ́ jirwílʋmɔ ná sɩɛrʋ, ʋ nɛ́ ká sʋʋ bʋllɛ.»
Zerizalɛmɛ fɛlɔ
9 Ɛ́ nɛ́ malɩ́kawa ná balpɛ, há kéŋ nyíŋgbaŋsɛ balpɛ ná, hatɩ́ŋnɛ́ wɩɩlawa balpɛ há súé, nɔ́ŋɔ ko bʋ́lɩ́ŋ rɩ́ bʋlɛ́:
«Ko rɩ́ŋ makɛ háfɛlɔ pɛ́ɩ́, Pewie háálɔ.»
10 Wɩɩsɛ Sabɩɩna* ko súŋ, ká malɩ́ka ná kánɩ́ŋ zɩ́ paalɩgbóó oro nyúú, a makɛ Wɩɩsɛ tɔ́fɛlɔ ná há wɩ busunnu kené, a páŋ, ʋ nɛ́ ká Zerizalɛmɛ ná há lɛ́ bána, Wɩɩsɛ rɩ́, aá tuwi.
11 Wɩɩsɛ píŋ cúólú, ʋ tʋ́tʋl anɛ dɔ́wɩ́wero* há ká sólósóló, anɛ zasɩpɛ,* ɩ bel aá ná ráŋ anɛ nyiiló.
12 Zeŋ ɓɩgbóó há ísé ní, ɓa sɔɔ kíl ɛ́ tɔ́ɔ́, arɩ́ dánnʋʋsɛ fí rí bɛllɛ, malɩ́kawa fí rɩ́ bɛllɛ cɩ́ pɔ́, ɛ́ dánnʋʋsɛ mɛ́.
Ɓa pʋ́ŋsɛ Ɩzɩrayɛl duo* jɩmʋ́ʋ́la ná fí rí bɛllɛ wuu yɩra, ɛ́ dánnʋʋsɛ nyúú.
13 Dánnʋʋsɛ botorowa nɛ́ mɩŋ cɔɔ́ wuu rí:
tɔ́ɔ́ mʋ́l rɩ́ botoro, tɔ́ɔ́ nyúú rɩ́ má botoro, tɔ́ɔ́ lʋ́lɔ́ŋsɛ má rɩ́ botoro botorowa.
14 Ɓa sɔ́ zeŋ ná sakɛ ɓɔdɔ́wʋ́ɔ́ fí rí bɛllɛ daha nɛ́, a pʋ́ŋsɛ Pewie nɩtʋmɛ́* fí rɩ́ bɛllɛ yɩra hé, ɛ́ dɔ́wʋ́ɔ́ daha.
15 Malɩ́ka ná háá bʋ́lɩ́ŋ rɩ́, ʋ fa kéŋ salmɛ deŋtuke ʋ nɛ́sɛ mɛ́, rʋ́ʋ́ pii máŋsɛ tɔ́ɔ́ ná, dánnʋʋsɛ rɩ́rʋ́ zeŋ wuu jɛ́l, rɩ́wɔ́ gbési.
16 Tɔ́ɔ́ ná jɛ́l rɩ́rʋ́ gbési wuu mɔhɛ̃́ náŋá.
Malɩ́ka ná púú salmɛ deŋtuke ná máŋsɛ:
tɔ́ɔ́ ná gbési ká kííló bʋ́ɩ́wʋllɛ rɩ́ zɔwɛllɛ, ʋ jɛ́l rɩ́rʋ́ lúŋ má ká ɛ́ nɛ́.
17 Malɩ́ka ná baa máŋsɛ zeŋ ná má; ʋ isé ká mɛ́ɛ́tɩr mɛɛ́sɩbotoro rɩ́ fí rɩ́ bɛllɛ*f7*; nɩbííne háá máŋsɛ ɓɩɛ ɛ́, ɛ́ nɛ́ ʋ máŋsɛ.
18 Zasɩpɛ* nɛ́ ɓa kaa sɔ zeŋ ná há kɛ́rɛ́, ká pi salmɛ cʋɔrɩ́ háá ná ráŋ anɛ nyiiló, a sɔ tɔ́ɔ́ ná tɩɩ.
19 Zeŋ ná há kíl tɔ́ɔ́ ná, mʋ́biló dɔ́wʋ́ɔ́ wuu ká dɔ́wɩ́were* dʋŋɔ nɛ́, fí arɩ́ bɛllɛ:
Ɓaá yɩ́rɛ dʋ́ŋdʋ́ʋ̃́ dɔ́wɩ́ zasɩpɛ,* bʋllɛ ɓɩnɔ safiiri,* botoro ɓɩnɔ agatɛ,* baná ɓɩnɔ emerodi,*
20 bɔmmʋ́ɔ́ ɓɩnɔ oniksi,* balgo ɓɩnɔ saadʋanɛ,* balpɛ ɓɩnɔ kirizoliti,* córí ɓɩnɔ berili,* nɛ́mɛ́ ɓɩnɔ tɔpaazɛ,* fí ɓɩnɔ kirizopaazɛ,* fí rí oro ɓɩnɔ tɩrkʋɔzɛ,* fí rí bɛllɛ dɔ́wɩ́ má yɩr a ametiisi.*
21 Dánnʋʋsɛ ná fí rɩ́ bɛllɛ má ká bʋrsɩ́ɛ́ fí rí bɛllɛ nɛ́, ɓa kaa ɔ́wɔ́; bʋrsɩ́ balá nɛ́ á dánnʋ́ɔ́ wuu.
Salmɛ háá tʋlɛ́ anɛ nyiiló ní, ɓa pii mʋɔlɛ tɔ́ɔ́ ná nɩɛ náŋá dɩcémi.
22 Amá ŋ há bél tɔ́ɔ́ ná sɩɛrʋ, ŋ wɩ Wɩcʋɔlɩjɩzeno* ráŋ néé, bee wɩ́ɛ́ dóé wuu tɩ́na Wɩɩsɛ, rɩ́ Pewie ní ká ɛ́ tɔ́ɔ́ Wɩcʋɔlɩjɩzeno.
23 Ɛ́ tɔ́ɔ́ wɩ wɩɩsɛ pʋmmɔ́ ja, a wɩ cana pʋmmɔ́ ja.
Wɩɩsɛ píŋ tʋlɛ́ nɛ́ kɔ́ʋ́ pʋmmɔ, ká Pewie má nɛ́ kɔ́ʋ́ caanɔ́.
24 Dúníé nɩɛ wuu sɩ́ válʋ́ pʋmmɔ sɩɛrʋ, rɩ́ tíé nyúú kuóre káŋwɔ́ píŋ kuóɓɩɛ ko ráŋ.
25 Tɔ́ɔ́ ná dánnʋʋsɛ waá tɔ́ɔ́ ná, bee wɩ́ɛ́ tɩ́taŋ báá wɩ ráŋ mɩŋ.
26 Ɓa sɩ́ ka dúníé nɩɛ kuóɓɩɛ rɩ́wɔ́ píŋ ɓɩɛ wuu ko ráŋ.
27 Omo ná wuu há to páár wɩ ɛ́ tɔ́ɔ́ sɩɛrʋ́ zʋ; nɩbibɔma rɩ́ nyɛtɩɩna má wɩ ráŋ zʋ.
Amá nɩɛ ná ɓa há pʋ́ŋsɩ́wɔ́ yɩra hé Pewie hiẽsó kɛnɔ ná sɩɛrʋ, ɓa dʋŋɔ nɛ́ wo ráŋ, aá zʋ.