Kɛnɔ ná
Ziidi
há pʋ́ŋsɛ́
Cʋɔla
1
1 Ŋ é Ziidi, há ká Zeezi* Kirisi* tʋtʋnnɔ, a a Zakɛ* maábio, ŋ nɛ́ pʋ́ŋsɛ kɛnɔ né, aá pá nɩɛ ná á Ana Wɩɩsɛ há yɩ́rɛ́; ʋ cówó aá bélwó mí, rʋ́ʋ́ pá Zeezi Kirisi.
2 Rɩ́ Wɩɩsɛ susufárʋ, rɩ́rʋ́ tɛŋfɩ́ɛ́l, arɩ́rʋ́ cólle, péríwa kɩ́ŋkáŋ maahʋ̃́!
Ɩ́ kánɩ́wa tɩɩ, arɩ́ nɩɛ ná háá karmɛ nyɛwɩ́ɛ́
3 Ŋ nɩcólle tɩɩ, ŋ faá hɩ́ɛ̃́nʋ́ rɩ́ taŋá, rɩ́ŋ pʋ́ŋsɛ pɛ́ɩ́wa, a bʋl Wɩɩsɛ laatɛ́ ná á wuu há tʋ́mʋ́ mɛ́ wɩ́ɛ́.
Ŋ sɩɛ́ nóó rʋʋ ká fɩkɛ́ má tɩɩ rɛ́, a páŋ, rɩ́ŋ pʋ́ŋsɛ pɛ́ɩ́wa, a makɛ rɩ́ŋ dúóríwa naasɛ, rɩ́ɩ́wa lowi yardá loo; Wɩɩsɛ pí ɛ́ yardá pɔ́ʋ́ nɩɛ, naasɩ́ balá dʋŋɔ nɛ́.
4 Nɩbɔma bamma pɛ́llɔ́ zʋ́ɩ́wa sɩɛrʋ; ɓaá pírá Wɩɩsɛ zilé ná wɩ́ɛ́ bʋl yalá, a makɛ rɩ́wɔ́ wólli nɩlɩɩlɩ́wɩ́ɛ́ aá a, káá báásɛ Zeezi Kirisi, ʋ dʋŋɔ nɛ́ há kárá Nyuutɩna, a árá Karmɩ'ana má.
Wɩɩsɛ Kɛnɔ sɩɛrʋ, ɓa bʋ́l sarɩ́ya ná háá á rʋ́ʋ́ dí yówó, a héwó wɩɩla mɛ́ wɩ́ɛ́, fól wuu.
5 Ɩ́ ɛ̃ wɩ́ɛ́ ná wuu ní wérí, ɩ́ taŋa lo rɩ́ŋ ha píwó líísíwa.
Nyuutɩna Wɩɩsɛ há lɩ́sɛ Ɩzɩrayɛl duo* nɩɛ Ezipiti* mí, ɛ́ har rɩ́ mɛ́, nɩɛ ná há wɩ Wɩɩsɛ yardá ɛ́ɛ́, ʋ ɔ́ɔ́ ɓa sʋsɛ.
6 Wɩɩsɛ malɩ́kawa ná há wɩ tíŋ ná Wɩɩsɛ há pɔ́wɔ́ wérí kené, ká vɛ́wɔ́ dɩkéni, Wɩɩsɛ héwó bɛŋzɛllɛ mɛ́ tá diŋderé, ɓa mɩŋ bíno líŋlíŋ sɩɛrʋ, aá dɛllɛ tápʋl zeno ná, ɓa háá á rɩ́wɔ́ díwó sarɩ́ya.
7 Sodomi* rɩ́ Gɔmɔɔrɛ* nɩɛ, arɩ́wɔ́ kílo tɔ́nɛ nɩɛ, ɓa má fa tʋ́ŋ ɛ́ nɛ́, ɓa á nɩlɩɩlɩ́wɩ́ɛ́, aá ja rɩ́wɔ́ pɩ́ nɩɛ ná há to nɩbííne má tɩɩ.
Ɛ́ nɛ́ tɛ, Wɩɩsɛ a ɓa ná wɩɩla níŋ ná há waá dʋsɛ sɩɛrʋ, a makɛ rɩ́ nɩɛ ná, a pɔ́wɔ́ tɩɩ mɛ́.
8 Arɩ́ ɛ́ wuu, nɩbɔma ná há pɛ́llɛ́ zʋ́ɩ́wa sɩɛrʋ, ɓa máá tʋŋ ɛ́ nɛ́.
Ɓaá tɩ́ŋwɔ́ duosewa mɛ́, a káŋwɔ́ tɛnnɛ aá tʋŋ busunnu tʋtʋmɛ́; aá lɔ́rɛ Nyuutɩna Wɩɩsɛ tíŋ ná, aá tʋksɛ bána nyúú píŋ tɩ́náwa má.
9 Wɩɩsɛ malɩ́kawa nɔhɔ̃́ Mɩsɛl* má tɩɩ, wɩ ɛ́ tʋ́mɛ́.
Ʋ rɩ́ Sɩtaanɛ* fa há kéŋ Moyizi* lɛlɔ wɩ́ɛ́ aá pɔsɛ náŋá, ʋ wɩ kɔ́llɛ́ dí sarɩ́ya tʋksɛ Sɩtaanɛ, amá ʋ sɛ́:
«Rɩ́ Nyuutɩna Wɩɩsɛ bɛ́ŋsɩ́!»
10 Ká ɛ́ nɩɛ é, ɓaá tʋksɛ onni ná ɓa há wʋ́ɔ́ ɛ̃ nɛ́.
Ɓa wɩ wɩ́zɩmɛ kené, anɛ pʋsɛ; ɓa má há sɛ́ ɓa ɛ̃ wɩ́ɛ́ ná, ɛ́ wɩ́ɛ́ nɛ́ ɔ́sɛ́ aá yéŋŋíwó.
11 Ɓa sɩ́ ná wɩɩla!
Kayɛŋ* nabulle ní ɓa tɩŋ.
Ɓa píwó tɩɩ yoo hé nyɩɛrʋ mɛ́, a makɛ rɩ́wɔ́ ná meéwíé anɛ Balaamɛ.
* Ɓa sʋ́sɔ́, bee wɩ́ɛ́ ɓa sɩ́ ɓa waá saŋ, anɛ Kore.*
12 Rɩɩ́wa nɛ́ hé náŋá mɛ́ cólle sɩɛrʋ rɩ́ɩ́wa dí ɓɩɛ, rɩ́wɔ́ maanɛ ráŋ, ɓaá de zɔ́kɩ́wa kéne ná yɩr nɛ́.
Ɓaá dí ní, a vɔksɛ wérí, ká ɓa é rɩ́, ʋ to hɩɩ̃sɛ́ a pɔ́wɔ́; ɓa tɩɩ mɛ́ belé dʋŋɔ nɛ́, ɓaá bɩɩnɛ.
Ɓa dé nɛ duóbásɛ há wɩ nyii kené, ká poo lɛ́l aá va nɛ́; anɛ tuuni, tɔ́cille há dáárɛ́, ká ɓa wɩ nɔ́ŋ wuu nɔ́nɛ́, ká a tucúnnitáálɛ, a sʋsɛ naasɩ́ bʋllɛ.
13 Mʋʋ nyii háá de gʋ́llɛ́ rɩ́ dóé, a pa náŋá ko lɩɩ yo gíŋgiŋí, a lɩ́sɛ kuúme tá ɛ́, ɛ́ nɩɛ má ká ɛ́ nɛ́; ɓaá gírki ɛ́ nɛ́, ɓa hɩɩ̃sɛ wɩ́'állɛ ko lɩɩ ɓɛ́sɛ.
Ɓa báá nɩhɩ̃́ caŋwʋllɛ há gʋ́ɔ́rɛ́ aá baarɛ nɛ́; Wɩɩsɛ sɩɛ́ já dɩhɩ̃́ ná há kéŋ bíno kɩ́ŋkáŋ tim ní, a bílwó mí, rɩ́wɔ́ mɩŋ ráŋ, a kaá mʋ́ wuu.
14 Ɩnɔkɛ* má há lá Wɩɩsɛ nʋɔ mɛ́ a bʋl wɩ́ɩ́ ná fól wuu, nɩɛ nyáŋ wɩ́ɛ́ nɛ́; Ɩnɔkɛ nɛ́ kárá naabálwa balpɛ nyúú mí, a pɔ́ Adaŋ* mɛ́ káá ko.
Ʋ sɛ́:
«Ɩ́ ná, Nyuutɩna Wɩɩsɛ sɩ́ ko arɩ́rʋ́ malɩ́kawa bʋ́ɩ́ bʋ́ɩ́wa,
15 a dí nɩɛ wuu sarɩ́ya.
Ʋ sɩ́ dí sarɩ́ya yo nɩbɔma ná wuu, a tɩ́ŋwɔ́ nɩbɔŋwɩ́'állɛ ná wuu wɩ́ɛ́, arɩ́ wɩ́tɩɛnnɛ ná wuu, ɛ́ nɩbɔma há bʋ́lɛ́ mʋ́ tɩɩnɛ Wɩɩsɛ mɛ́ wɩ́ɛ́.»
16 Ɛ́ nɩɛ sɩɛrʋ ha wɩ tɔ́rɛ́ ná, ɓa có ŋmaame tɛ́ŋ wuu mí, káá tʋ́ŋwɔ́ wɩ́hɩɛ̃nɛ́; ɓaá bʋl wɩ́zeŋsi, káá tʋɔsɛ nɩɛ, a makɛ rɩ́wɔ́ ná dí.
Cáánɛwa
17 Amá ɩ́ é, ŋ nɩcólle tɩɩ, wɩ́ɛ́ ná á Nyuutɩna Zeezi Kirisi* nɩtʋmɛ́* há lá sɩ́ɛ́ bʋl, ɩ́ píwó aá líísíwa tɩɩ.
18 Ɓa fa bʋ́lɔ́ pɛ́ɩ́wa bʋlɛ́:
«Hatɩ́ŋnɩ́tápʋlɛ mɛ́, cerme tɩ́náwa sɩ́ mɩŋ, a tɩ́ŋwɔ́ wɩ́hɩɛ̃nɛ́ mɛ́ aá tʋŋ bɔ́ŋbɔ́ŋ.»
19 Ɓa nɛ́ sɩɛ́ nyɛ; ɓa nɩ́ɩ́ hé cakɔ́.
Ɓaá tʋŋ nɩbinní ní, Wɩɩsɛ Sabɩɩna* tówó mí.
20 Amá ɩ́ é, ŋ nɩcólle tɩɩ, ɩ́ sɩ́sɔ́ɩ́wa hiẽsó, ɩ́ yardá ná há wɩ busunnu mʋɔ́ wuu kené daha, anɛ jaa ɓa háá sɔ ɛ́.
Ɩ́ tɩŋ Wɩɩsɛ Sabɩɩna mɛ́ aá cʋɔlɛ Wɩɩsɛ.
21 Wɩɩsɛ há cóíwa ɛ́, ɩ́ ka ɛ́ mɛ́, aá dɛllɛ, ráá Nyuutɩna Zeezi Kirisi tɩ́ŋʋ́ susufárʋ mɛ́, a pɛ́ɩ́wa mɩɩsɛ ná há waá tenni.
22 Nɩɛ ná háá káŋsɛ́, ɩ́ fɩ́fɔ́wɔ́ susu;
23 ɓa ná há wúóló la aá tá, ɩ́ lɔ́wɔ́ tá, rɩ́wɔ́ sɩ́ níŋ zʋ́.
Ká náŋa é, ɩ́ makɛ susufárʋ pɔ́wɔ́, ká fɩ́fá héwíŋ, a pɔ́ rɩ́ɩ́wa sɩ́wɔ́ lɛ́lʋ́ kɩ́ŋkáŋ, rɩ́wɔ́ nɩbinní busunnu wɩ́ɛ́ ná ɓa háá ɛ́ɛ́, háá dáárɩ́wa.
24 Nɛrɔ ná há wóíwa mɛ́ aá pɔ́, rɩ́ɩ́wa sɩ́ wɩ́bɔ́ŋ wuu á, ká a rɩ́ɩ́wa sɩ́ dɩzɔkɩ́ wuu kánʋ́, ká jʋɔsɛ kɩ́ŋkáŋ a lɩɩ cɩ́nʋ́ píŋ sɩ́ɛ́, ʋ nɛ́ ká Wɩɩsɛ.
25 Wɩɩsɛ dʋŋɔ léŋ ní tɩ́ŋrá Nyuutɩna Zeezi Kirisi mí, a lárá tá, ʋ nɛ́ tɛ píŋse, rɩ́ yɩr, rɩ́ dóé, arɩ́ tíŋ, fól wuu, zaa, a de kaá mʋ́ wuu!
Amɩɩ*!