Wɩmakpaalɛ
kɛnɔ ná Zaŋ há pʋ́ŋsɛ́
Púle
1
1 Wɩ́ɛ́ ná há ká wɩ́féŋsé Wɩɩsɛ makɛ pá Zeezi* Kirisi,* ɓa nɛ́ mɩŋ kɛnɔ né sɩɛrʋ.
Wɩɩsɛ mákwɔ́ pɔ́ʋ́, rʋ́ʋ́ laa pɔ́ʋ́ tɩɩ Zeezi tʋtʋnna, rɩ́wɔ́ zɩŋ wɩ́ɛ́ ná háá kué, mʋɔ́sʋ́ɔ́ mɛ́.
Zeezi sɩɛ́ tʋ́mʋ́ malɩ́ka* nɛ́, ʋ ko máŋsɩ́wɔ́ pɔ́ʋ́ tʋtʋnnɔ Zaŋ.*
2 Zaŋ há ná ɛ́ wɩ́ɛ́, ʋ dí dáŋsɩ́ɛ́ rɩ ɓa ká Wɩɩsɛ wɩ́bʋlɛ nɛ́, a a Zeezi Kirisi sɩɛ́da má.
3 Wɩɩsɛ wɩ́laabʋlɛ́ nɛ́ kɛnɔ né sɩɛrʋ.
Nɛrɔ ná há kármɩ́wɔ́, ʋ ná wér; nɩɛ ná má há zésíwó, a saŋ pɔ́wɔ́ tɩɩ, ɓa má ná wér.
Tɛ́ŋ ná mɛ́ Wɩɩsɛ há sɩ́ lo rɩ́ ɛ́ wɩ́ɛ́ a, pérí tɛ́sɩ́ɩ́.
Zaŋ bɔ́llɛ Zeezi laadííre ná há mɩŋ Azi dɩtɩ́llɛ
tɔ́nɛ balpɛ mɛ́
4 Ŋ é Zaŋ* nɛ́ pʋ́ŋsɛ kɛnɔ né, aá pá Zeezi laadííre ná há mɩŋ Azi dɩtɩ́llɛ tɔ́nɛ balpɛ mɛ́:
Wɩɩsɛ ná zaa há wómmó, a nɛ́ die má mɩŋ, ká nɛ́ haá a rʋ́ʋ́ mɩŋ cíé má, ʋ rɩ́ sabɩŋsɛ balpɛ ná há mɩ́nʋ́ kuóɓasa sɩ́ɛ́,
5 arɩ́ Zeezi Kirisi ná há ká dáŋsɩ́ɛ́ ná há kéŋ taŋá, dʋ́ŋdʋ́ʋ̃́ nɛrɔ ná há sʋ́wɛ́ ká bɩr'isi sʋʋ mɛ́, tíé nyúú kuóre wuu kuóro, rɩ́wɔ́ héíwa nyúú bárka, a pɛ́ɩ́wa tɛŋfɩ́ɛ́l!
Kirisi ní córá, a tɩ́ŋʋ́ cɛ́l mɛ́, a lárá tá wɩ́bɔmɔ nɛ́sɛ mɛ́.
6 Ʋ nɛ́ ɛ́ɛ́, á ɔ́ʋ́ kuótɔ́ɔ́ sɩɛrʋ nɩ́ɛ́, a a vʋk'ɔ́ɔ́sá, a tʋŋ aá pɔ́ʋ́ Ana Wɩɩsɛ.
Ɛ́ wɩ́ɛ́, rɩ́ Kirisi ní tɩ́llɛ píŋ arɩ́ dóé wuu, bɩŋsɛ rɩ́ bɩŋsɛ!
Amɩɩ*!
7 Ɩ́ ná, ʋ zʋ́ duóbásɛ sɩɛrʋ aá ko rí.
Nɛrɔ wuu sɩ́ɩ́ sɩ́ nóú,
ɓa rɩ́ nɩ́ɛ́ ná há cɔ́ksʋ́ lúnni wuu.
Dúníé nɩbííne duo wuu sɩ́ wii hiĩni, ʋ wɩ́ɛ́.
Taŋá tɩɩ nɛ́!
Amɩɩ*!
8 Nyuutɩna Wɩɩsɛ ná zaa há wómmó, a díé má mɩŋ, ká nɛ́ haá á rʋ́ʋ́ mɩŋ cíé má, dóé wuu tɩ́na, ʋ sɛ́:
«Ŋ nɛ́ ká Alfa* rɩ́ Omega*.»
Zaŋ há ná Kirisi ɛ́wa
9 Ŋ é Zaŋ, ŋ kɛ́ɩ́wa maábinɔ́ŋ rɛ́.
Á wuu há cɔ́ Kirisi mí, á ká óŋ balá rɛ́; á wuu wɩɩla nɛ́ balá, á tʋ́ŋ Wɩɩsɛ kuorí mí, a wuu tʋŋ nyamma mɛ́.
Ŋ bʋ́l Wɩɩsɛ wɩ́bʋlɛ nɛ́, a tɛ Kirisi sɩɛ́da, ɓa fa kánɩ́ŋ mʋ́ tá tɔ́ɔ́ oro mí, nyii há kílé, ɓaá yɩ́rɛ Patɩmɔsɛ.
10 Nyuutɩna cʋɔlɛ́ tápʋl*f1* nɛ́, ʋ Sabɩɩna* ko súŋ; ɛ́ nɛ́ ŋ nɛ líŋbɩbar oro háá bʋl wɩ́ɛ́ ŋ har rɩ́, anɛ nyɩ́la ɓa háá mué.
11 Ɛ́ liŋó sɛ́:
«Ɩ há ná wɩ́ɛ́ ná, pʋ́ŋsɛ hé kɛnɔ mɛ́, a pii tʋŋ rɩ́wɔ́ kaa mʋ́ pá wɩcʋɔla púlli ná há mɩŋ tɔ́nɛ balpɛ nyáŋ mɛ́:
Ɩfɛɛzɛ,* Simirini, Pɛrgaamɛ, Tiyatiiri, Sardɛ, Fɩladɛlfɩ, rɩ́ Lawodise.»
12 Ɛ́ nɛ́ ŋ bɩ́rbel, rɩ́ŋ ná nɛrɔ ná háá bʋlɛ́.
Ŋ bɩ́rɔ́ bel ɛ́, a ná salmɛ onni balpɛ ɓa há pí cáŋsɛ* aá sákwɔ́ daha,
13 ká nɛrɔ cɩ́ŋwɔ́ sɩ́sɩ́ɛ́nnʋ́wa, anɛ nɩbííno bio; a su gɛluŋo ʋ tuwi aá tɩ́kʋ́ nacɛ́sɛ mɛ́, ká vɔwɛ salmɛ báltɛ ʋ baŋcɩla mɛ́.
14 Ʋ nyúú nyúpʋ́sɛ wuu pʋmmɩ́, anɛ pelɔ́ŋpʋmmɔ, anɛ gepúkʋ́l; ʋ sɩ́ɛ́ tʋ́tʋl anɛ níŋváá,
15 ká ʋ naasɛ wuu fɛ́l, anɛ hɔɔ ɓa há píé hé níŋ mí, ʋ fɛ́l.
Ʋ liŋó nɩhɩ̃́ nyikana há cúúré aá dɔ́ŋ ɛ́ nɛ́.
16 Ʋ kéŋ caŋwʋllɛ balpɛ, ʋ néduu mí, ká tókowí, sɩ́ɛ́ rɩ́ gʋma wuu háá díé, lʋ́ʋ́ nʋɔ mɛ́ aá lɛ.
Wɔhɔ wɩpomí háá cuoli nɩɛ ɛ́, ʋ sɩ́paanɛ́ tʋlɛ́ nɩhɩ̃́ ɛ́ nɛ́.
17 Ŋ há nóú ɛ́, ŋ túwó ɓal tíé ʋ naasɛ laka, a pɛ́, anɛ ŋ sʋ́wɔ́.
Ɛ́ nɛ́ ʋ púú néduu tɩ́kɩ́ŋ mɛ́, ká bʋlɛ́:
«Sɩ́ héwíŋ fá, ŋ nɛ́ ká sɩ́laarɔ rɩ́ hatɩŋnɔ,
18 ŋ nɛ́ ká nɛrɔ ná há wómmó.
Ŋ nɛ́ fa sʋ́wɛ́, ká zaa, ŋ wómmó, ŋ sɩɛ́ báá waá sʋwɛ, bɩŋsɛ́ rɩ́ bɩŋsɛ́.
Ŋ kéŋ tíŋ, sʋʋ rɩ́ lɛlɛ tɔ́ɔ́ wuu nyúú.
19 «Pʋ́ŋsɛ wɩ́ɛ́ ná wuu ɩ há néé; ɓa ná há ká mʋ́l néé mí wɩ́ɛ́, arɩ́ ɓa ná wuu há sɩ́ ko tʋkɛ.
20 Caŋwʋllɛ ná balpɛ ɩ há néé, ŋ néduu mí, arɩ́ salmɛ onni ná balpɛ, ɓa há pí cáŋsɛ aá sakɛ ná má balpɛ, nówó mʋ́l:
Wɩcʋɔla púlli* ná balpɛ nɛ́ ká salmɛ onni balpɛ ná, ɓa há pí cáŋsɛ aa sákwɔ́ daha; ɓa malɩ́kawa má nɛ́ ká caŋwʋllɛ ná balpɛ.