Ɩfɛɛzɛ wɩcʋɔla púl kɛnɔ
2
1 «Pʋ́ŋsɛ pá malɩ́ka ná há mɩŋ Ɩfɛɛzɛ* wɩcʋɔla púl* nyúú, a bʋlɛ́:
«Nɛrɔ ná há kéŋ caŋwʋllɛ balpɛ, ʋ néduu mí, aá va salmɛ onni ná balpɛ, ɓa há pí cáŋsɛ aá sakɛ, pɛ́kɛ, ʋ sɛ́:
2 Ŋ ɩ́ɩ̃́ wɩ́'állɛ wuu ní, a zɩ́mɩ́ tɩɩ haarɛ́, rɩ́rɩ́ nyamma wuu mʋɔsɔ.
Ŋ ɩ́ɔ̃́, ɩ rɩ́ saháksɩ́tɩɩna wɩ náŋá mɛ́ wo; nɩɛ ná há sɛ́ ɓa ká Zeezi nɩtʋmɛ́ ká tówó, ɩ mɩ́lwɔ́, a ná rɩ nyɩɛrʋ nɛ́ ɓaá nyɛ.
3 Ɩ ná wɩɩla ŋ wɩ́ɛ́, ká ɩ nyámmɩ́wɔ́ wuu, ɩ naasɛ wɩ yʋ́ɔ́rɛ́.
4 «Amá ŋ kéŋ wɩ́ɩ́ rɛ́ cɩ́nɩ́ mɛ́:
Ɩ fa há cóŋ ɛ́, ɩ báá wɩ́ŋ ɛ́ có.
5 Sɩɛ́ bɩɩnɛ mʋ́ túkí dɩgɛ́rɓalɩ́ mɛ́, a bɩ́rsɛ, a baa ɩ́'ɛ́ɩ́ dʋ́ŋdʋ́ʋ̃́ wɩ́'állɛ; rɩ ɛ́ rá, ŋ sɩ́ ko kánɩ́ caanɔ́ kórú dɩsakɩ́ ká tɛ́ɩ́, rɩɩ nɛ́ wɩ bɩ́rsɛ́.
6 Ɩ taŋa cɩ́ wɩ́wérí mí, ɩ há bɛ́rɛ Nikolayitiwa* wɩ́'állɛ, anɛ ŋ má há bɛ́rwɔ́ ɛ́.
7 «Nɛrɔ ná wuu há kéŋ dɩlla, ʋ́ʋ́ tɩ́na zesi wɩ́ɩ́ né, Sabɩɩna* há bʋ́lɛ́ pá wɩcʋɔla púlli:
‹Nɛrɔ ná há sɩ́ a bɩbár, ŋ sɩ́ pi hiẽsó tuu ná há mɩŋ Wɩɩsɛ záádɛ́ sɩɛrʋ nɔnɔ pɔ́ʋ́, rʋ́ʋ́ dí.›
Simirini wɩcʋɔla púl kɛnɔ
8 «Pʋ́ŋsɛ pá malɩ́ka ná há mɩŋ Simirini wɩcʋɔla púl* nyúú, a bʋlɛ́:
«Nɛrɔ ná há ká sɩ́laarɔ rɩ́ hatɩŋnɔ, a nɛ́ sʋwɛ ká bɩr'isi a a nɩwómmí, ʋ sɛ́:
9 Ŋ ɩ́ɩ̃́ wɩɩla mɛ́, a zɩ́mɩ́ súmmu má mʋɔsɔ, ká ɩ a kuór; nɩɛ ná há sɩ́ ɓa ká Zuwifiwa,* ká to Zuwifiwa, há kéŋ zaŋbawɩ́ɛ́ ná cɩ́nɩ́ mɛ́, ŋ ɩ̃́wɔ́ wuu mí.
Sɩtaanɛ* púl nɩɛ nɛ́ kɔ́wɔ́.
10 Ɓa sɩ́ a rɩ́ɩ́ ná wɩɩla, amá sɩ́ héwíŋ fá.
Ná, Sɩtaanɛ sɩ́ kɛ́sɩ́wa náŋa tɔ́ bɩnajaa, a mɩ́lɩ́wa ná.
Ʋ sɩ́ a rɩ́ɩ́wa ná wɩɩla tápʋlɛ fí.
Sɩɛ́ ka wérí, rʋʋ nɛ́ hé sʋʋ má mɛ́, ŋ sɩ́ pi hiẽsó pɛ́ɩ́, anɛ bɩbasiile.
11 «Nɛrɔ ná wuu há kéŋ dɩlla, ʋ́ʋ́ tɩ́na zesi wɩ́ɩ́ né, Sabɩɩna há bʋ́lɛ́ pá wɩcʋɔla púlli:
Nɛrɔ ná há sɩ́ yoo dí dóé, sʋʋ bʋllɛ wɩ tɩ́na tʋ́ŋ kené.
Pɛrgaamɛ wɩcʋɔla púl kɛnɔ
12 «Pʋ́ŋsɛ pá malɩ́ka ná há mɩŋ Pɛrgaamɛ wɩcʋɔla púl* nyúú, a bʋlɛ́:
«Nɛrɔ ná há kéŋ tókowí há sɛ́sɛ́, sɩ́ɛ́ rɩ́ gʋma wuu dídí, ʋ sɛ́:
13 Ŋ ɩ́ɩ̃́ dɩmɩnɩ́; ráŋ nɛ́ Sɩtaanɛ má dí kuorí.
Amá ɩ wɩ́ɩ́ yardá yóé tá, ká ha kánɩ́ŋ wɩ́ɛ́ wérí.
Ɓa ɓʋ́ Aŋtɩpaasɛ, ŋ sɩɛ́da nɛrɔ ná há wʋ́ʋ́ nʋɔ hár bɩrɛ, ká ɩ́ ha láŋ dí ɛ́ mɛ́; ɓa ɓʋ́ʋ́ ɩ dɩhɩ̃́, ráŋ ná Sɩtaanɛ há mɩnɛ́.
14 «Ŋ taŋa kéŋ wɩ́ɩ́ rɛ́, arɩ́rɩ́:
Nɩɛ mɩ́nɩ́ dɩhɩ̃́, aá tɩŋ Balaamɛ* karmɛ́.
Ʋ nɛ́ cáánɛ kuóro Balakɛ, rʋ́ʋ́ nyɩsɛ kɛsɛ Ɩzɩrayɛl duo* nɩɛ, rɩ́wɔ́ dídí pʋsɛ ná ɓa há ɓʋ́ʋ́sɛ́ pá venni namɩŋsa,* ká a rɩ́wɔ́ ɩ́'a nɩlɩɩlɩ́wɩ́ɛ́.
15 Ká náŋa má mɩŋ ráŋ, aá tɩŋ Nikolayitiwa* má karmɛ́.
16 Ɛ́ wɩ́ɛ́, bɩ́rsɩ́ mála, rɩ ɛ́ rá, ŋ sɩ́ kóí rɩ́, a ka tókowí ná há lɩ́ŋ nʋɔ aá lɛ, a yówó.
17 «Nɛrɔ ná wuu há kéŋ dɩlla, ʋ́ʋ́ tɩ́na zesi wɩ́ɩ́ né Sabɩɩna há bʋ́lɛ́ pá wɩcʋɔla púlli.
Nɛrɔ ná há sɩ́ a bɩbár, ŋ sɩ́ pi ɓɩdííli ná ɓa háá yɩ́rɛ máánɛ* há féŋsé, a pɔ́ʋ́.
Ŋ sɩ́ pi dɔ́wɩ́pʋmmɔ pɔ́ʋ́, ɛ́ dɔ́wɩ́ daha, yɩfɛ́lʋ́ rɩ́ pʋ́ŋsɛ ráŋ; nɛ́ŋ wuu wʋ́ʋ́ ɛ̃, rɩ́ nɛrɔ ná ŋ há píé pá dʋŋɔ rá.
Tiyatiiri wɩcʋɔla púl kɛnɔ
18 «Pʋ́ŋsɛ pá malɩ́ka ná há mɩŋ Tiyatiiri wɩcʋɔla púl* nyúú, a bʋlɛ́:
«Wɩɩsɛ Bio ná sɩ́ɛ́ háá tʋlɛ́, anɛ níŋváá, ká naasɛ nɛ́ hɔcʋɔrɩ́ ɓa há kené má, ʋ sɛ́:
19 Ŋ ɩ́ɩ̃́ wɩ́'állɛ rɛ́; ŋ ɩ́ɔ̃́ rɩ́ɩ́ kéŋ cólle, a ka yardá, aá tʋŋ rɩ́ kajáŋa, ɩ kéŋ nyamma; ɩ mʋ́l néé mí wɩ́'állɛ káŋ nɛ́ kɩ́ɩ́ dʋ́ŋdʋ́ʋ̃́ ɓɩɛ.
20 «Amá ŋ kéŋ wɩ́ɩ́ rɛ́ cɩ́nɩ́ mɛ́.
Ɩ sáŋɔ́ pá háálɔ ná ɓa háá yɩ́rɛ́ Zɩzabɛl, a bʋlʋ́ lá Wɩɩsɛ wɩ́ɛ́ nɛ́ aá bʋl, káá yéŋŋíŋ tʋtʋnna.
Ʋ nyɩ́sɩ́wɔ́, ɓa ɩ́'a nɩlɩɩlɩ́wɩ́ɛ́, a dídí pʋsɛ ná ɓa há ɓʋ́ʋ́sɛ pá venni namɩŋsa.*
21 Ŋ pɔ́ʋ́ tɛŋ, a makɛ rʋ́ʋ́ bɩ́rsɛ, a lo nɩlɩɩlɩ́wɩ́ɛ́ ɛɛ, ká ʋ waá ja rʋ́ʋ́ bɩ́rsɛ.
22 Ŋ sɩɛ́ sɩ́ a rʋ́ʋ́ ɓal pʋɔlɩ́, a ná wɩɩla wérí, ʋ rɩ́ nɩɛ ná wuu há tʋ́ŋ cɔ́rmʋ rɩ́rʋ́, rɩ ɓa má nɛ́ wɩ bɩ́rsɛ́, a tá ɛ́ wɩ́ɛ́ duduusi mí ɛɛ.
23 Ŋ sɩ́ ɓʋ́ʋ́sʋ́ bɛlɛ, a makɛ rɩ́ wɩcʋɔla púlli wuu zɩŋ, rɩ́ŋ ɛ̃ nɩbííne sabɩŋsɛ rɩ́wɔ́ wɩ́hɩɛ̃nɛ́ wuu ní.
Ŋ sɩ́ túmíwa oro wuu, ʋ tʋmɛ́ mʋɔsɔ.
24 «Amá ɩ́ é, nɩɛ ná há láŋ dí Tiyatiiri mí, a wɩ háálɔ ná wɩ́máŋsɛ ná sáŋɛ́, a wɩ wɩ́ɛ́ ná ɓa háá yɩ́rɛ, Sɩtaanɛ wɩ́luŋe sɩɛrʋ zʋ́ɛ́, ŋ wɩ wɩ́ɩ́ oro wuu kené, a pi aá cɩ́ɩ́nɩ́wa.
25 Ɩ́ taŋa ka wɩ́ɛ́ ná ɩ́ há nɩ́ɛ́ géŋgéŋ, a kaá jáŋ tápʋl koolí.
26 «Ɩ́ sɩɛrʋ nɩɛ ná há sɩ́ a bɩbárá, aá tɩ́ŋɩ́ŋ wɩ́máŋsɛ ná a kaá ja tokó, ŋ sɩ́ pɔ́wɔ́ tíŋ, tíŋ ná ŋ Ana há páŋ; rɩ́wɔ́ ka tíŋ, duowa nyúú.
27 ‹A nɩ́nʋ́ɔ́lɩ́wɔ́ arɩ́ hɔɔ deŋtuke,*
a yɛ́rkwɔ́ anɛ cʋ́ʋ́ viini.›