Sardɛ wɩcʋɔla púl kɛnɔ
3
1 «Pʋ́ŋsɛ pá malɩ́ka ná há mɩŋ Sardɛ wɩcʋɔla púl* nyúú, a bʋlɛ́:
«Nɛrɔ ná há kéŋ Wɩɩsɛ sabɩŋsɛ balpɛ, a ka caŋwʋllɛ ná má balpɛ sɛ́:
Ŋ ɩ́ɩ̃́ wɩ́'állɛ wuu ní.
Ŋ ɩ́ɔ̃́ rɩ́ nɩɛ sɩ́ɩ́ wómmó rí, kɛ́ɩ́ a sʋ́wɛ́.
2 Gírki isi, a pɔ́ káánɛ ná há cɩ́ sʋsɛ́ mɛ́ wérí, rɩ́wɔ́ sɩ́ ɓóŋ sʋ́sʋ́.
Ŋ nóó rɩɩ wɩ́'állɛ wɩ tʋ́ʋ́lɛ́, ŋ Wɩɩsɛ sɩ́ɛ́ mɛ́.
3 Líísí tɩɩ, rɩ́ ɛ́ ná ɩ há nɩ́ŋ wɩ́bʋlɛ ná a saŋ pɛ́ɩ́ tɩɩ.
Lo rʋ́ʋ́ mɩ́nɩ́ beŋtúú mí, ká rɩ́ɩ́ bɩ́rsɛ, a tá wɩ́bɔmɔ ɛɛ.
Rɩɩ nɛ́ wɩ dahá ísé, ŋ sɩ́ ko úrí mí, anɛ gaarɔ; ɩ waá a rɩ́ɩ́ zɩ́mɩ́ŋ tɛ́ŋ koolí.
4 «Ɩ nɩɛ sɩɛrʋ, náŋa mɩ́nɔ́, Sardɛ tɩɩ mɛ́, a wʋ́ɔ́ gɛnnɛ bírsé; ɓa sɩ́ su gɛpʋŋsɛ tɩ́ŋɩ́ŋ mɛ́, ráá vɩ́va, bee wɩ́ɛ́ ɓa cɛ́rɔ́ rɩ́ gɛpʋŋsɛ sui.
5 Nɛrɔ ná há sɩ́ a bɩbár, ɛ́ gɛpʋŋsɛ nɛ́ rʋ́ʋ́ su; ŋ wʋ́ʋ́ yɩ́r dʋsɛ hiẽsó nɩɛ kɛnɔ sɩɛrʋ.
Ŋ sɩ́ bʋlɩ́ŋ ʋ́ʋ̃́, ŋ Ana rɩ́rʋ́ malɩ́kawa sɩ́ɛ́ mɛ́.
6 Nɛrɔ ná há kɛ́ŋ dɩlla, ʋ́ʋ́ tɩ́na zesi wɩ́ɩ́ né, Sabɩɩna há bʋ́lɛ́ pá wɩcʋɔla púlli.
Fɩladɛlfɩ wɩcʋɔla púl kɛnɔ
7 «Pʋ́ŋsɛ pá malɩ́ka ná há mɩŋ Fɩladɛlfɩ wɩcʋɔla púl nyúú, a bʋlɛ́:
«Nɛrɔ ná há hóú tɩɩ Wɩɩsɛ tʋtʋmɛ́ mɛ́, aá tʋŋ rɩ́ taŋá, ʋ nɛ́ŋ ná há kéŋ kuóro Davidi* borwí, rʋʋ wúri dánnʋɔ, nɛ́ŋ toó a kaá tɔ́, rʋʋ kéŋ dánnʋɔ tɔ́, nɛ́ŋ toó a kaá wúri, ʋ sɛ́:
8 Ŋ ɩ́ɩ̃́ wɩ́'állɛ wuu ní.
Ŋ ɩ́ɔ̃́, ɩ dóé wɩ zeŋ, ká ɩ ha sáŋɩ́ŋ wɩ́bʋlɛ a wɩ́ŋ har lɩ́ɛ́.
Sɩɛ́ ná, dánnʋ́ɔ́ rɛ́, ŋ wúri pɛ́ɩ́, nɛ́ŋ wʋ́ʋ́ wuo kaá tɔ́.
9 Ná, Sɩtaanɛ naanɩɛ ná náŋa háá nyɛ nyɩɛrʋ, a bʋlɛ́ ɓa ká Zuwifiwa, ká tówó, ŋ sɩ́ a rɩ́wɔ́ ko ɓírmi tíé, ɩ sɩ́ɛ́, a zɩŋ rɩ́ɩ́ káŋ nɩcóllí rí.
10 Ŋ há sɩ́ɩ́ dí nyamma, ɩ ɓɩɛ́na saŋ dí, ɛ́ wɩ́ɛ́, wɩɩla ná há sɩ́ ko, a dí tíé nyúú nɩbííne wuu dúníé mí rɛɛ́, ɛ́ tɛ́ŋ mɛ́, ŋ sɩ́ kɛ́rɩ́ mɛ́ rɩ́ ɛ́ wɩɩla sɩ́ɩ́ wóllú.
11 «Ŋ sɩ́ ko mʋ́l néé mí.
Ɔsɛ ka óŋ ná ɩ há kené, rɩ́ nɛ́ŋ wuu sɩ́ɩ́ bɩbasiile lá.
12 Nɛrɔ ná há sɩ́ a bɩbár, ŋ sɩ́ a rʋ́ʋ́ bɩrmɛ nafara, Wɩcʋɔlɩjɩzeno* sɩɛrʋ, a mɩŋ ráŋ wuu.
Ŋ sɩ́ pʋ́ŋsɩ́ŋ Wɩɩsɛ yɩr, a rɩ́rʋ́ tɔ́ɔ́ má yɩr, ʋ daha; ɛ́ tɔ́ɔ́ nɛ́ ká Zerizalɛmɛ* fɛlɔ ná há lɛ́ bána nyúú, ŋ Wɩɩsɛ rɩ́, aá tuwi.
Ŋ sɩ́ pʋ́ŋsɩ́ŋ má tɩɩ yɩfɛlɔ ná, ʋ daha.
13 Nɛrɔ ná wuu há kéŋ dɩlla, ʋ́ʋ́ tɩ́na zesi wɩ́ɩ́ né, Sabɩɩna há bʋ́lɛ́ pá wɩcʋɔla púlli.
Lawodise wɩcʋɔla púl kɛnɔ
14 «Pʋ́ŋsɛ pá malɩ́ka ná há mɩŋ Lawodise wɩcʋɔla púl nyúú, a bʋlɛ́:
«Nɛrɔ ná ɓa háá yɩ́rɛ Amɩɩ,* a a dáŋsɩ́ɛ́ ná háá bʋl taŋá dʋŋɔ; Wɩɩsɛ tɩ́ŋʋ́ mɛ́ a onni wuu, ʋ sɛ́:
15 Ŋ ɩ́ɩ̃́ wɩ́'állɛ wuu ní.
Ɩ wɩ fɩɛlɛ, a báá wɩ lʋŋ má.
Rɩɩ́ fɩ́ɛ́lʋ́, ɩ fɩɛlɛ, rɩɩ báá lʋ́mʋ́ má, ɩ lʋŋ.
16 Ɩ sɩɛ́ há tɔ́llɛ́ rɛ́, a wɩ lʋŋ, a báá wɩ fɩɛlɛ má, ŋ sɩ́ pʋ́sɩ́ tá.
17 Ɩ sɩ́ɩ́ jɔ́ɔ́ tuki ɓɩɛ mɛ́, a a kuór, a báá wɩ óŋ wuú ja.
Ɩ wɩ ɛ̃ nɛ́ tɛ; ɩ ká súmmú rí, susu nɛ́ŋ, nɩyár, nyʋ́mmʋ́, a a tɛŋɓɩlá tɩ́ná.
18 Zesi rɩ́ŋ cáánɩ́:
Kóŋ rɩ́, a yɔwɛ salmɛ ná ɓa há hé níŋ mí, a cʋɔrɛ lɩ́sɛ busunnu tá, a makɛ rɩ́ɩ́ a kuór.
Ko yɔwɛ gɛpʋŋsɛ, a suu tɔ́ɩ́ hɩɩ̃sɛ mɛ́, a báá sɩ́ tɛŋɓɩla kánʋ́.
Ko yɔwɛ sɩ́ɛ́ nʋʋ má, a héí sɩ́ɛ́ mɛ́, a makɛ rɩ́ɩ́ nɩ́ná ráŋ wérí.
19 «Ŋŋ́ tʋ́rɩ́ŋ nɩcólle, a káŋwɔ́ aá hé ŋmɛ́nɔ mɛ́, rɩ ɓa nɛ́ ɛ́ɛ́ nyɔ́rkɛ.
Ɛ́ wɩ́ɛ́, hé kajáŋa a bɩ́rɩ́ har tɛ wɩ́bɔmɔ.
20 Ná, ŋ cɩ́ dánnʋɔ mɛ́ aá ɓásɛ; rɩ nɛ́ŋ nɩ́ŋ liŋó, a wúrí dánnʋɔ páŋ, ŋ sɩ́ zʋ́ʋ́ jaa, rɩ́ŋ rɩ́rʋ́ wuu hé náŋá dí ɓɩdííli.