Zaŋ ná Wɩɩsɛ rɩ ɓaá dɛ́nnʋ́, bána nyúú
4
1 Ɛ́ há dáárɛ́, ŋ báá ná dánnʋɔ bána nyúú, rʋʋ wúró.
Liŋó ná fa há lá sɩ́ɛ́ bʋ́lɩ́ŋ rɩ́ aá dɔ́ŋ, anɛ nyɩ́la ɓa háá mué, ʋ baa bʋ́lɩ́ŋ rɩ́ bʋlɛ́:
«Zɩ́ rɛɛ́, rɩ́ŋ makɛ wɩ́ɛ́ ná háá kué nyáŋ har rɩ́ mɛ́ a pɛ́ɩ́.»
2 Mʋ́l ná tɩɩ tɩɩ mɛ́, rɩ Wɩɩsɛ Sabɩɩna kúó súŋ.
Ŋ ná kuóɓasa rʋʋ cíksó, bána mɛ́ ráŋ, ká nɛrɔ kénú daha.
3 Nɛrɔ ná há ké ɛ́ ɓasa daha, ʋ dé tʋ́tʋl, anɛ dɔ́wɩ́were* bamma ɓa háá yɩ́rɛ zasɩpɛ* rɩ́ saadʋanɛ,* háá tʋl ɛ́ nɛ́.
Ká duósii kíl kuóɓasa ná, a má tʋ́tʋl anɛ emerodi.*
4 Ɓa bil kuóɓaŋsa náŋa má, mɛrɛ́ rɩ́ baná, a kílú.
Nɩhɩɛ̃́sɛ* mɛrɛ́ rɩ́ baná há sú gɛpʋŋsɛ, a cú salmɛ kuónéŋcunni, ɓa má kéŋwó daha.
5 Duófɩ́llɛ lɛ kuóɓasa ná mɛ́ aá lɛ.
Líŋsi bʋ́bʋl wɩ́ɛ́, ká dɔ́mɛ má lɩ́lɛ ráŋ anɛ duóɓɛ́llɛ.
Ɓa vɔsɛ níŋkáŋtɔrɔ balpɛ, a nyɩkɛ tá kuóɓasa ná sɩ́ɛ́:
Wɩɩsɛ sabɩŋsɛ ná balpɛ nɛ́ ká ɛ́ níŋkáŋtɔrɔ.
6 Ɓasa ná sɩ́ɛ́ dé nɛ mʋzeno ní, anɛ nyii há lʋ́lɛ́, aá tʋl anɛ nyiiló.
Oŋwómme* bamma baná, nɛ́ cɩ́ kuóɓasa ná sáŋcɔrʋ wuu, a kílú.
Ɓa hara rɩ́wɔ́ sɩ́ɛ́ wuu, de a sɩ́sɛ dʋŋɔ.
7 Ɛ́ oŋwómme sɩ́laarɔ dé nɛ kɩ́ŋkáná nɛ́, ʋ ná há tʋ́kɛ́ dé nɛ nɔɓala nɛ́, botoro nyúú mí omo, sɩ́paanɛ́ de nɛ nɩbííno sɩ́paanɛ́, ká baná nyúú mí omo, má nɛ kiesí háá filé.
8 Oŋwómme ná baná, oro wuu kéŋ kiŋkeru balgo ní.
Ɓa tɛŋ wuu dé a sɩ́sɛ dʋŋɔ nɛ́, har rɩ́ sɩ́ɛ́ wuu.
*f2* Ɓaá yɩ yɩɩla tɩ́taŋ rɩ́ wɔhɔ wuu, ká waá tá.
Ɓa yɩl ná nɛ́ ká:
«Nyuutɩna Wɩɩsɛ, dóé wuu tɩ́na,
ʋ ká páár, ʋ ká páár, ʋ ká páár.
Ʋ nɛ́ fa mɩnɛ́, a zaa má mɩŋ,
ká nɛ́ haá a rʋ́ʋ́ mɩŋ cíé má.»
9 Ɓa yɩ́ɔ́ aá píŋsi nɛrɔ ná há ké kuóɓasa ná daha nɛ́.
A yɩ aá hʋ́ʋ́mʋ́, aá bárkʋ́, ʋ nɛ́ŋ ná há wómmó, a waá sʋ́wɩ́ ná.
10 Ɓaá yɩ́yɛ, ká nɩhɩɛ̃́sɛ ná mɛrɛ́ rɩ́ baná má ɓírmi tíé, aá dɛnnɛ nɛrɔ ná há wómmó, a waá sʋ́wɩ́ ná, a ké kuóɓasa daha.
Ɓaá wúnníwó kuónéŋcunni ná yóú ɓasa sɩ́ɛ́, ká bʋlɛ́:
11 «Nyuutɩna á Wɩɩsɛ, ɩ nɛ́ ká dóé wuu tɩ́na,
ɩ mɔhɔ̃́ rɩ́wɔ́ píŋsí, a hʋ́ʋ́mɩ́.
Ɩ nɛ́ a onni wuu.
Ɩ nɛ́ có rɩ ɓa mɩ́nɔ́, ɛ́ nɛ́ ɩ ɔ́wɔ́.»