Ɓa dɛ́nnɛ́ Pewie
5
1 Ɛ́ nɛ́ ŋ baa ná kɛnɔ oro; nɛrɔ ná há ké kuóɓasa ná daha nɛ́ kenú, ʋ néduu mí.
Ɓa pʋ́ŋsʋ́ har arɩ́ sɩɛrʋ wuu, a kaa guŋ tɔ́ rɩ́ nɛ́cikówa* balpɛ.
2 Ŋ ná Malɩ́ka bɩbar oro má rʋʋ́ búólú rɩ́ líŋzeno a bʋlɛ́:
«Áŋ rɩ́ mɔhɛ̃́ rʋ́ʋ́ lɛ́ksɛ nɛ́cikówa ná, ká wúri kɛnɔ ná?»
3 Ká nɛ́ŋ wuu to bána daha, tíé nyúú rɩ́ tíé mʋ́l wuu mí, a wólli kɛnɔ ná wúri aá karmɛ.
4 Ɛ́ nɛ́ ŋ wi sɩ́mɩlɔɔ, nɛ́ŋ wuu há toó, a wólli kɛnɔ ná wúri aá karmɛ wɩ́ɛ́.
5 Ɛ́ nɛ́ nɩhɩɛ̃́sɛ ná nɔ́ŋɔ bʋ́l páŋ bʋlɛ́:
«Sɩ́ wí.
Ná, Ziida jɩmʋ́l áŋwóŋ, kuóro Davidi* keŋ, ʋ yóó dí dóé; ʋ sɩ́ wólli nɛ́cikówa ná balpɛ lɛ́ksɛ, ká wúri kɛnɔ ná.»
6 Ɛ́ nɛ́ ŋ ná Pewie* rʋʋ cɩ́ dahá, kuóɓasa ná sɩ́sɩ́ɛ́nnʋ́wa, ká oŋwómme* ná baná rɩ́ nɩhɩɛ̃́sɛ ná mɛrɛ́ rɩ́ baná kílú.
Pewie ná nɩhɩ̃́ anɛ, ɓa há ɓʋ́ɛ́ nɛ́.
Ʋ kéŋ nyɩ́sɛ balpɛ arɩ́ sɩ́ɛ́ má balpɛ.
Sɩ́ɛ́ ná balpɛ nɛ́ ká Wɩɩsɛ sabɩŋsɛ ná balpɛ, ʋ há tʋ́mɛ́ ɓa ceŋ dúníé wuu.
7 Ɛ́ nɛ́ Pewie ná tuu peri, a la kɛnɔ ná nɛrɔ ná há ké kuóɓasa ná daha, néduu mí.
8 Ʋ lá kɛnɔ ná ko tenni, rɩ oŋwómme ná baná rɩ́ nɩhɩɛ̃́sɛ* ná mɛrɛ́ rɩ́ baná túwó ɓírmi tíé, ʋ sɩ́ɛ́.
Ká ɓa oro wuu ka cemo, arɩ́ salmɛ pipíísi, áŋsáŋsɛ* há súwó wuu.
Ɛ́ áŋsáŋsɛ nɛ́ ká Wɩɩsɛ nɩɛ wɩcʋɔlɔ́.
9 Ɓa wuu ɓá yɩfɛlɔ aá yɛ, a bʋlɛ́:
«Ɩ nɛ́ mɔhɛ̃́ rɩ́ɩ́ la kɛnɔ ná,
a lɛ́ksɛ nɛ́cikówa ná ɓa há kené taarɛ tɔ́.
Ɩ nɛ́ ɓa kaa ɔsɛ vʋk,
ɩ píí cɛ́l yɔwɛ la nɩ'íriŋ íriŋwa wuu duó a pá Wɩɩsɛ.
Liŋó wuu nɩɛ, duo wuu nɩɛ, tɔ́ɔ́ duó wuu nɩɛ.
10 Ɩ nɛ́ ɛ́ɛ́ ɓa ɛ́ɩ́ Ana kuótɔ́ɔ́ sɩɛrʋ nɩ́ɛ́,
a a vʋk'ɔ́ɔ́sá, a tʋŋ aá pɔ́ʋ́.
Ká rɩ́wɔ́ má tɩ́llɛ dúníé nɩɛ, a dí kuorí ɓa nyúú.»
11 Káŋ baa bel a nɛ malɩ́ka kana liŋó.
Ɓa káŋ pérí bʋ́ɩ́ bʋ́ɩ́wa ɛrɛ́, bʋ́ɩ́ bʋ́ɩ́wa bʋ́ɩ́zɔwanáwa má ɛrɛ́, a ko kíl kuóɓasa ná rɩ́ oŋwómme ná baná, arɩ́ nɩhɩɛ̃́sɛ ná mɛrɛ́ rɩ́ baná wuu.
12 Ɓa ɓɔ́wɔ́ líŋsi, a yɩ yɩɩla bʋlɛ́:
«Pewie ná ɓa há ɓʋ́ɛ́, anɛ vʋk pʋná,
ʋ nɛ́ mɔhɛ̃́ rʋ́ʋ́ tɩ́llɛ dóé, ɓɩɛ kanɛ́,
wɩ́zɩmɛ, arɩ́ wɩ́ɩ́ wuu wólle.
Ʋ nɛ́ mɔhɛ̃́ rɩ́wɔ́ zílú, a píŋsú, a cʋ́ɔ́lʋ́.»
13 Ŋ nɛ́ Wɩɩsɛ oŋ'aalɛ́ má wuu há mɩŋ bána mɛ́, a mɩŋ tíé nyúú rí tíé mʋ́l, mʋʋ sɩɛrʋ onni, arɩ́ dúníé sɩɛrʋ onni wuu, rɩ ɓaá yɩ yɩɩla a bʋlɛ́:
«Nɛrɔ ná há ké kuóɓasa daha,
ʋ rɩ́ Pewie ní mɔhɛ̃́ rɩ́wɔ́ cʋ́ɔ́lɩ́wɔ́,
a zílwó, a píŋsíwó, a pi wólle wuu tá pɔ́wɔ́,
a kaá mʋ́ bɩŋsɛ́ rɩ́ bɩŋsɛ́!»
14 Oŋwómme ná baná saŋ hé, a bʋlɛ́:
«Amɩɩ*!»
Ká nɩhɩɛ̃́sɛ ná má ɓírmi tíé, a cʋ́ɔ́lɩ́wɔ́.