Pewie lɛ́ksɛ nɛ́cikówa ná há tɔ́ kɛnɔ ná
6
1 Ɛ́ nɛ́ káŋ ná Pewie,* rʋʋ kéŋ nɛ́cikówa* ná balpɛ nɔ́ŋɔ lɛ́kɛ.
Ɛ́ nɛ́ ŋ nɛ oŋwómme* ná baná nɔ́ŋɔ liŋó; ʋ liŋó zéŋ anɛ duóɓɛɛlɔ́.
Ʋ sɛ́:
«Ko!»
2 Ɛ́ nɛ́ ŋ bel, a ná zákpʋmmɔ.
Nɛrɔ ná há zɩ́nɛ́ kénú daha, kéŋ túó, ká ɓa pi bɩbasiile cúú nyúú mí.
Ʋ col ballɩ́ maahʋ̃́, rʋ́ʋ́ baa mʋ́ dí ballɩ́ súúri.
3 Ʋ báá há lɛ́kɛ nɛ́cikówa ná nɔ́ŋɔ, bʋllɛ nyúú mí, ŋ nɛ́ oŋwómme* ná baná nɔ́ŋɔ má liŋó; bʋllɛ nyúú mí omo ní, ʋ sɛ́:
«Ko!»
4 Ɛ́ nɛ́ záka nɔ́ŋɔ má baa ko lɛ, ɓɩfɩɛ́ŋ múímúí.
Nɛrɔ ná há zɩ́nɛ́ kénú daha, ɓa pɔ́ʋ́ dóé rʋ́ʋ́ ka tɛŋfɩ́ɛ́l la dúníé mí, ká rɩ́ nɩbííne ɓʋ́ʋ́sɛ náŋá.
Ɓa pi tókowí ɓɩgbeso pɔ́ʋ́.
5 Ɛ́ nɛ́ Pewie baa lɛ́kɛ nɛ́cikówa ná nɔ́ŋɔ má, botoro nyúú mí, oŋwómme ná baná, botoro nyúú mí omo má baa cáási bʋlɛ́:
«Ko!»
Ŋ béló rɩ zákbíno ní.
Nɛrɔ ná há zɩ́nɛ́ kénú daha, ʋ kéŋ omo ná ɓa há píé aá máŋsɛ onni zíŋ ní, ʋ nɛ́sɛ mɛ́.
6 Ŋ nɩ́ɔ́, anɛ liŋó há lɛ́ oŋwómme ná baná pɛ́kɛ, a bʋlɛ́:
«Muí kííló yɛlɩ́*f3* nɛ́ ká déníé* balá; mɩ́ɛ́ má kííló botoro yɛlɩ́ a déníé balá.
Taŋa sɩ́ ólívi* nʋʋ rɩ́ dɩvɛ́ŋ* mɛ́ tɩ́kʋ́.»
7 Pewie há lɛ́kɛ nɛ́cikówa ná nɔ́ŋɔ má, baná nyúú mí, ŋ nɛ́ oŋwómme ná nɔ́ŋɔ liŋó; baná nyúú mí omo ní, ʋ sɛ́:
«Ko!»
8 Ɛ́ nɛ́ ŋ bel, a ná záka, ʋ pʋ́na ká zɔ́knyíí.
Nɛrɔ ná há zɩ́nɛ́ kénú daha yɩr nɛ́ ká sʋʋ.
Lɛlɛ tɔ́ɔ́ wuu tɩ́ŋʋ́ mɛ́.
Wɩɩsɛ pɔ́wɔ́ tíŋ, rɩ́wɔ́ ɓʋ́ʋ́sɛ tíé nyúú nɩɛ.
Rɩ ɓa kéŋ tíé nyúú nɩɛ wuu pú púlli baná, rɩ́wɔ́ wólli púl balá nɩɛ wuu ɓʋ́ʋ́sɛ, a tɩŋ tókowí, rɩ́ losu, rɩ́ pʋɔlɩ́, rɩ́ baka kaadíhuorúwa mɛ́.
9 Pewie baa lɛ́kɛ nɛ́cikówa ná nɔ́ŋɔ má, bɔmmʋ́ɔ́ nyúú mí.
Ɛ́ nɛ́ ŋ ná nɩsʋsɛ́ dʋŋsɛ.
Nɩɛ ná há bʋ́l Wɩɩsɛ wɩ́bʋlɛ, a ɔ́ʋ́ dáŋsɩ́ɛ́wa, ɓa kɛsɛ ɓʋ́ʋ́sɛ, ɓa dʋŋsɛ nɛ́.
Tulaalé koro* mʋ́l nɛ́ ŋ nówó,
10 rɩ ɓaá cáású kɩ́ŋkáŋ a bʋlɛ́:
«Nyuutɩna há wɩ busunnu kené, taŋá tɩ́na, kal beé rí, ɩɩ́ ja rɩ́ɩ́ dí nɩɛ ná há ɓʋ́ʋ́sɩ́rá sarɩ́ya?
Kal beé rí, ɩɩ́ ja rɩ́ɩ́ tʋ́rwɔ́ á wɩ́ɛ́?»
11 Ká Wɩɩsɛ pi yɛ́wɩpʋmmɔ súwó oro wuu; ká bʋlɛ́ rɩ́wɔ́ fɩ́fɩɛlɛ, ká dɛllɛ mʋɔ́.
Ká rɩ́wɔ́ ɓʋ́ʋ́sɩ́wɔ́ maábináŋa há kɔ́wɔ́ tʋtʋ́nnʋ́náŋa wuu kɛ́rɛ́, anɩ́wɔ́ tɩɩ, rɩ́wɔ́ nʋɔ cesi.
12 Ŋ baa ná Pewie rʋʋ mʋ́ɔ́ ka nɛ́cikówa ná nɔ́ŋɔ má, balgo nyúú mí, a kaa lɛ́kɛ.
Ɛ́ nɛ́ tíé zíkli; wɩɩsɛ wuu bíri, anɛ gɛrɔ ɓa há píé hé bíro mí, cana wuu fɛ́l, anɛ cɛ́l,
13 ká caŋwʋllɛ tuwi ɓallɛ, anɛ sotulli pozeno há lúé ɓa yuori.
14 Bána de fúúri col, anɛ basa ɓa há kené guŋ hé náŋá mɛ́.
Pallɛ wuu gínni, a báá wʋ́ɔ́ dɩcɩ́ŋsɛ cɩ́nɛ́; tíé cɔrʋ ná wuu há nyɩ́ɩ́sɛ́ mʋrʋ sɩ́sɩ́ɛ́nnʋ́wa, ɓa má yʋ́ksɛ.
15 Ká tíé nyúú nɩbííne wuu isi fa, aá yʋ́ksɛ:
kuóre, sɩ́dííre, sóóji nyúútɩ́náwa, ɓɩɛ tɩ́náwa, dóé tɩ́náwa, arɩ́ yósi rɩ́wɔ́ ná há to yósi wuu, a zʋ aá féŋsi pallɛ bʋɔnnɛ rɩ́ bʋ́ɔ́ pɛ́ksɛ mɛ́.
16 A yɩ́rɛ hé pallɛ rɩ́ bʋ́ɔ́ mɛ́ bʋlɛ́:
«Ɩ́ tuwi tɔ́rá mɛ́, a kɛ́rɛ rɩ́ nɛrɔ ná há ké kuóɓasa daha sɩ́ɩ́ sɩ́rá ná, rɩ́ Pewie cɔwɩɩlɔ́ sɩ́rá pérú.
17 Ɓa cɔwɩɩlɔ́ tápʋl zeno ní pʋ́lɛ́, áŋ rɩ́ sɩɛ́ wuolé cɩ́ aá tɩkɛ?»