Ɩzɩrayɛl duo nɩɛ ná, Wɩɩsɛ malla há mɩ́ŋwɔ́ mɛ́
7
1 Ɛ́ wɩ́ɛ́ har rɩ́ mɛ́, ŋ ná malɩ́kawa baná, rɩ ɓa cɩ́ dúníé kíŋkere baná mɛ́, a kɛ́rɛ dúníé kíŋkere poo wuu mí, rʋ́ʋ́ sɩ́ tíé daha lú, a sɩ́ mʋʋ daha lú, a sɩ́ tuu wuu daha lú.
2 Ɛ́ nɛ́ ŋ ná malɩ́ka nɔ́ŋɔ má, rʋʋ lɛ́ tɔ́ɔ́ mʋ́l, wɩɩsɛ dɩpomí rɩ́ aá ko; a ka Wɩɩsɛ ná há wómmó malla omo, ʋ nɛ́sɛ mɛ́.
Ʋ cáási bɩbarɩ́, a yɩ́rɛ malɩ́kawa ná baná, Wɩɩsɛ há pɔ́wɔ́ tíŋ rɩ́wɔ́ zɔkɛ tíé rɩ́ mʋʋ, a bʋlɛ́:
3 «Ɩ́ sɩ́ bɔ́ŋbɔ́ŋ tʋ́mʋ́, tíé rɩ́ mʋʋ rɩ́ tuuni mí.
Ɩ́ lo ráá pírá Wɩɩsɛ malla hóú tʋtʋnna tulli mí kɛ́rɛ́.»
4 Ká ŋ nɛ nɩɛ ná malla há mɩ́ŋwɔ́ tulli mí, káŋ nʋɔ:
nɩɛ bʋ́ɩ́ zɔlɔ mɛɛ́sɩbaná rɩ́ baná, a lɛ Ɩzɩrayɛl duo* nɩɛ jɩmʋ́ʋ́la wuu sɩɛrʋ.
5 Ziida* jɩmʋ́l* nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
Ribaŋ jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
Gaadɛ jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
6 Azɛrɛ jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
Nefitali jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
Manase jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ.
7 Sɩmɩyɔŋ jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
Levi* jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
Ɩsakaarɛ jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
8 Zabɩlɔŋ jɩmʋ́l nɩɛ sɩɛrʋ, nɩɛ bʋ́ɩ́ fí rí bɛllɛ;
Zɔzɛfɛ* jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ;
Bɛŋzamɛ* jɩmʋ́l nɩɛ sɩɛrʋ, nɩɛ bʋ́ɩ́ fí rɩ́ bɛllɛ.
Ɓa wuu ní kéŋ Wɩɩsɛ malla, ɓa tulli mí.
Nɩkaŋdɔ́ɔ́ dɛ́nnɛ́ Wɩɩsɛ
9 Ɛ́ nɛ́ ká ŋ ná nɩɛ ɓɩkana, rɩ ɓa cɩ́ dahá, kuóro há kénú ɓasa daha, rɩ́ Pewie* wuu sɩ́ɛ́.
Nɛ́ŋ wuu wʋ́ɔ́ wuó dɩɩsɛ.
Ɓa sú gɛpʋŋsɛ, a bónni habɛ́ tuhílli káŋwɔ́ nɛ́ŋsa mɛ́.
Ɛ́ nɩɛ ká dúníé kíŋkere tɔ́nɛ wuu nɩɛ nɛ́, duó duó wuu nɩɛ, tɔ́ɔ́ tɔ́ɔ́ wuu nɩɛ, liŋó duó wuu nɩɛ.
10 Ɓa dɛnnɛ kɩ́ŋkáŋ bʋlɛ́:
«Á Wɩɩsɛ há kénú kuóɓasa daha,
ʋ rɩ́ Pewie ní lá nɩɛ aá tá.»
11 Malɩ́kawa wuu cɩ́ kíl kuóɓasa ná rɩ́ nɩhɩɛ̃́sɛ ná, rɩ́ oŋwómme* ná baná, a káŋwɔ́ sɩ́ɛ́ cú tíé, ɓasa ná laka, aá cʋɔlɛ Wɩɩsɛ,
12 a bʋlɛ́:
«Amɩɩ*!
Á dɛ́nnɩ́rá Wɩɩsɛ, a píŋsú,
a bárkʋ́, a hʋ́ʋ́mʋ́; ʋ nɛ́ kéŋ wɩ́zɩmɛ,
dóé rɩ́ wólle, tɛ́ŋ wuu mí!
Amɩɩ!»
13 Ɛ́ nɛ́ nɩhɩɛ̃́sɛ ná nɔ́ŋɔ bɔ́sɩ́ŋ bʋlɛ́:
«Nɩɛ nyáŋ há sú gɛpʋŋsɛ, áŋwa rɩ́ kɔ́wɔ́?
Ɓa lɛ́ nɛɛ́ rɛ́?»
14 Ɛ́ nɛ́ ŋ sɛ́:
«Ŋ nɔhɔ̃́, ɩ ɩ́ɔ̃́.»
Ɛ́ nɛ́ ʋ bʋl páŋ bʋlɛ́:
«Wɩɩla ná há dúkí nɛ́sɛ, há pérí nɩɛ ná nɛ́.
Pewie cɛ́l sɩɛrʋ nɛ́ ɓa sɛ́sɩ́wɔ́ gɛnnɛ, ɓa lɛ, a tʋ́ksɛ.
15 Ɛ́ nɛ́ tɛ,
‹ɓa cɩ́ Wɩcʋɔlɩjɩzeno sɩɛrʋ, Wɩɩsɛ kuóɓasa sɩ́ɛ́,
a tʋŋ aá pɔ́ʋ́, wɔhɔ rɩ́ tɩ́taŋ.
Nɛrɔ ná há ké kuóɓasa daha zaaró, sɩ́ tɔ́wɔ́ mɛ́.
16 Losu báá wʋ́ɔ́ káá ná,
nyinyʋɔ́sɛ má báá wʋ́ɔ́ káá ná;
wɩɩsɛ waá póŋ ŋmɔ́wɩ́wɔ́,
lʋmɔ má báá wʋ́ɔ́ wuuri.
17 Pewie ná há ké kuóɓasa daha tɩɩ sɩ́ ɔ́wɔ́ nɩ́nʋɔlɔ,
a nʋ́ɔ́lɩ́wɔ́ kaa mʋ́ peri hiẽsó nyibúlbʋɔnnɛ,
ká rɩ́ Wɩɩsɛ mʋ́ʋ́rɩ́wɔ́ sɩ́ɛ́ sɩ́mɩnnʋ wuu.› »