Hatɩ́ŋnɩ́nɛ́cikó lɛ́kɛ
8
1 Pewie há kúé ka hatɩ́ŋnɩ́nɛ́cikó, balpɛ nyúú mí, a lɛ́kɛ, bána nyúú óŋ wuu báá waá dɔ́ŋ; dɩhɩ̃́ wuu síkló, a mʋ́ aá peri lɛ́ɛ́rɛ fá.
2 Ɛ́ nɛ́ ŋ ná malɩ́kawa ná balpɛ, rɩ ɓa cɩ́ Wɩɩsɛ sɩ́ɛ́; ɓa pa nyɩ́sɛ ná ɓa háá mué balpɛ, a pɔ́wɔ́.
3 Ɛ́ nɛ́ malɩ́ka nɔ́ŋɔ ko lɩɩ cɩ́ tulaalé koro* laka, a ka salmɛ kurupóóti, ʋ nɛ́sɛ mɛ́.
Ɓa pɔ́ʋ́ tulaalé ɓɩkana, rʋ́ʋ́ laa súúri Wɩɩsɛ nɩɛ wɩcʋɔlɔ́ mɛ́, a físi salmɛ koro daha; koro ná há mɩŋ kuóɓasa ná sɩ́ɛ́.
4 Tulaalé ná háá físé nyʋɔsɛ, rɩ́ Wɩɩsɛ nɩɛ wɩcʋɔlɔ́ ná hé náŋá mɛ́, a lɛ malɩ́ka ná nɛ́sɛ mɛ́, aá zɩ́ nyúú rí, Wɩɩsɛ sɩ́ɛ́.
5 Ɛ́ nɛ́ malɩ́ka ná pi kurupóóti ná, a pa koro ná daha níŋ hé, a pii yo tíé nyúú.
Líŋsi lɩ́lɛ, duóŋ fɩ́llɛ káá ɓɛ, tíé zíkli.
Nyɩ́sɛ ná balpɛ mui
6 Malɩ́kawa ná balpɛ, há kéŋ nyɩ́sɛ ná balpɛ cɩ́ rɩ́wɔ́ mu,
7 sɩ́laarɔ sɩɛ́ múú nyɩ́la.
Ɛ́ nɛ́ duódɔ́wʋ́ɔ́ rɩ́ níŋ kuosi cɛ́l mɛ́, a tuwi tíé.
Rɩ ɓa kéŋ tíé ɓa cɔrʋ botoro, cɔɔ nɔ́ŋɔ wuu dí níŋ; tuuni botoro wuu sɩɛrʋ, tuu balá má dí níŋ; tíé nyúú nyɔ́lɔɔ wuu dí níŋ.
8 Malɩ́ka ná há tʋ́kɛ́ bʋllɛ mɛ́, múú nyɩ́la.
Ɓa pi omo oro há dé nɛ paalɩzeno, káá ka níŋ, a yoo hé mʋʋ sɩɛrʋ.
Rɩ mʋʋ nyii cáksɛ́ botoro, cɔɔ nɔ́ŋɔ nyii wuu ní bɩ́rmɛ́ cɛ́l.
9 Mʋʋ sɩɛrʋ oŋwómme náŋa sʋsɛ.
Rɩ ɓa kéŋ mʋʋ sɩɛrʋ oŋwómme wuu pú púlli botoro, púl balá onni ní sʋ́sɛ́; rɩ ɓa kéŋ mʋʋ nyiidaborsi má ɓa púlli botoro, púl nɔ́ŋɔ ɓɩɛ wuu ní zɔ́kɛ́.
10 Botoro nyúú mí malɩ́ka má múú nyɩ́la.
Caŋwʋlzeno oro de cúri, nyololo anɛ caanɔ́, a tuwi ɓal polli nyii mí.
Rɩ polli wuu ní rɩ́wɔ́ kaa ɓa púlli botoro, púl balá polli nyii rí nyii dɩbulé wuu mí ní, ɛ́ caŋwʋl ɓal.
11 Caŋwʋl ná yɩr nɛ́ ká:
«Bɛrɔ́ bákalá.»
Ɛ́ nɛ́ nyii ná wuu sɩɛrʋ ʋ há ɓálɛ́, de háksɛ; nɩɛ ɓɩkana sʋsɛ, bɛrɔ́ há mɩŋ nyii ná mɛ́ wɩ́ɛ́.
12 Baná nyúú mí malɩ́ka má múú nyɩ́la.
Wɩpomí cɔɔ nɔ́ŋɔ zɔkɛ, cana má cɔɔ nɔ́ŋɔ zɔkɛ, caŋwʋllɛ má cɔrʋ náŋa zɔkɛ, anɛ ɓa há kéŋwó ɓa cɔrʋ botoro botorowa, ɓa oro wuu cɔɔ́ balá nɛ́ zɔ́kɛ́, a bíri.
Rɩ wɔhɔ cáksɛ́ botoro, cɔɔ nɔ́ŋɔ wɩ pʋmmɔ kené; rɩ tɩ́taŋ má cáksɛ́ botoro, cɔɔ nɔ́ŋɔ wɩ bíno kené.
13 Ɛ́ nɛ́ ŋ baa bel, a nɛ kiesí háá fil bána nyúú rí nyúú rí, liŋó, rʋʋ́ búólú a bʋlɛ́:
«Ʋ sɩ́ lɔrɛ a pá tíé nyúú nɩbííne.
Rɩ malɩ́kawa ná botoro há káánɛ́ nɛ́ kúé múwó nyɩ́sɛ ná botoro, ʋ sɩ́ lɔrɛ a pɔ́wɔ́.»