9
1 Ɛ́ nɛ́ bɔmmʋ́ɔ́ nyúú mí malɩ́ka múú nyɩ́la.
Ŋ ná caŋwʋl oro, rʋʋ cúró, a lɛ bána rɩ́ tuwi ɓal tíé.
Ɓa pi cúŋcúŋbʋɔ borwí pɔ́ʋ́.
2 Ɛ́ nɛ́ caŋwʋl ná wúri bʋɔ ná nʋɔ, nyʋɔsɛ lɛ ráŋ lɛ́; nyʋɔsɛ ná há nɩhɩ̃́ níŋzeno nyʋɔsɛ, a tɔ́ wɩɩsɛ rɩ́ poo wuu mí, ɓa bíri tim.
3 Hʋɔ̃́sɛ lɛ nyʋɔsɛ ná sɩɛrʋ, a ɓɛ́sɛ tíé nyúú wuu.
Ɓa pɔ́wɔ́ tíŋ, tíŋ ná duo nʋɔnnɛ há kené tíé nyúú, a a nɩɛ nɩ́ná wɩɩla.
4 Ɓa sɛ́ rɩ́wɔ́ sɩ́ á rɩ́ nyɔ́ɔ́, rɩ́ tuuni, arɩ́ tíé oŋnyʋ́ʋ́lɛ ná náŋa ná wɩɩla.
Amá rɩ́wɔ́ lo, rɩ́ nɩbííne ná Wɩɩsɛ malla há tówó tulli mí, rɩ́wɔ́ nɛ́ ná wɩɩla.
5 Ɓa wʋ́ɔ́ ŋmɛ́nɔ pɛ́ɛ́, rɩ́wɔ́ ɓʋ́ʋ́sɛ ɛ́ nɩbííne.
Ɓa taŋa sɛ́ rɩ́wɔ́ a rɩ́wɔ́ ná wɩɩla nɛ́ wérí, caŋsɛ bɔmmʋ́ɔ́.
Ɛ́ hʋɔ̃́sɛ nɩwálmɔ wɩ́ nɩbííno mí, aá nɛ nʋɔmɔ háá dʋ́mʋ́, ʋ wɩ́wɛ ɛ́ nɛ́.
6 Caŋsɛ ná bɔmmʋ́ɔ́ pɛ́kɛ, nɩbííne sɩ́ jɩ́ja sʋʋ, ká sʋ́ʋ́ ná; ɓa sɩ́ cólli rɩ́ sʋʋ ko kɛ́sɩ́wɔ́, ká rɩ́ sʋʋ fá kɛ́kwɔ́ mɛ́.
7 Ɛ́ hʋɔ̃́sɛ dé nɛ záksɛ ɓa há ɓɩ́ɛ́rɛ́, rɩ́wɔ́ kaa mʋ́ yo lal nɛ́.
Nyútɔ́llɛ há nɩhɩ̃́ salmɛ kuónéŋcunni, ní tɔ́wɔ́ nyunni mí, ká ɓa sɩ́paanɛ́ nɛ́ nɩbííne sɩ́paanɛ́.
8 Ɓa nyúpʋ́sɛ dé nɛ háálɔ nyúpʋ́sɛ*f4* nɛ́, ɓa nyɩla má nɛ kɩ́ŋkáná nyɩla.
9 Gɛrɔ há nɩhɩ̃́ hɔɔ gɛrɔ nɛ́ tɔ́wɔ́ baŋcɩllɛ mɛ́.
Rɩ ɓa kiŋkeru nɩ́ɩ́ dɔ́mɛ́, ʋʋ́ de nɛ lalyoore tórkowa, záksɛ ɓɩkana há pɔ́sɛ́ kaá fá, aá mʋ́ lal dɩyóé, dɔ́mɛ nɛ́.
10 Ɓa mʋ́dunni rɩ́ hɛmɛ nɛ́, anɛ nʋɔnnɛ mʋ́dunni; ɓa dóé mɩ́ŋwɔ́ mʋ́dunni ná mɛ́ nɛ́, rɩ́wɔ́ kaa wálmɛ nɩbííne, caŋsɛ ná bɔmmʋ́ɔ́.
11 Hʋɔ̃́sɛ ná kuóro ní ká cúŋcúŋbʋɔ malɩ́ka.
Ʋ yɩr nɛ́, Abadɔŋ, Ebirewa* liŋó mí, ká Gɩrɛkɛwa* má kaá yɩ́rɛ, Apɔlɩyɔŋ, ɓa liŋó mí.
Ʋ mʋ́l nɛ́ ká:
«Zɔkrɔ».
12 Dʋ́ŋdʋ́ʋ̃́ nabɔnɛ́ dáárɔ́; nabɔnɛ́wa bɛllɛ nɛ́ sɩɛ́ haá kué.
Balgo nyúú mí nyɩ́la mui
13 Balgo nyúú mí malɩ́ka má múú nyɩ́la.
Ŋ nɛ́ liŋó há lɛ́ salmɛ koro ná há mɩŋ Wɩɩsɛ sɩ́ɛ́, ʋ keŋe baná rɩ́ cɔɔ,
14 a bʋl balgo nyúú mí malɩ́ka ná há kéŋ nyɩ́la rɩ́, a bʋlɛ́:
«Puri malɩ́kawa ná baná há vɔ́sɛ́ Ɩfɩratɛ fozeno laka tá.»
15 Ɛ́ nɛ́ ɓa púrwó tá.
Ɓa fa dé káŋwɔ́ tɩɩ a pɔ́ tɩkɛ rɩ́ bɩna peri, rɩ́ cana peri, rɩ́ tɔ́ɔ́ pʋl, rɩ́ tɛ́ŋ peri, rɩ́wɔ́ ɓʋ́ʋ́sɛ tíé nyúú nɩbííne, nɩɛ botoro wuu sɩɛrʋ, nɛ́ŋ baláwa.
16 Ɛ́ nɛ́ ɓa makɛ nɩɛ ná há zɩ́ záksɛ nʋɔ páŋ:
nɩɛ bʋ́ɩ́ bʋ́ɩ́wa bʋ́ɩ́zɔwɛllɛ.
17 Ŋ há ná záksɛ ná rɩ́ nɩɛ ná há kéŋwó daha, ɓa nɩɩsɔ nɛ́ nyɛ:
Zákzɩ́nna ná gɛnnɛ, há nɩhɩ̃́ hɔɔ gɛnnɛ, ɓa fɩɛmɩ́ anɛ níŋ, ká bíri má anɛ bʋ́lá, ká a sʋʋ́míŋ anɛ jirwí.
Záksɛ ná nyunni nɩhɩ̃́ kɩ́ŋkánáwa nyunni ní; ká níŋ rɩ́ nyʋɔsɛ rɩ́ jirwílʋmɔ lɩ́lɩ́wɔ́ nʋʋsɛ mɛ́.
18 Wɩɩla nyáŋ botoro háá lɩ́wɔ́ nʋʋsɛ mɛ́:
Níŋ rɩ́ nyʋɔsɛ rɩ́ jirwílʋmɔ nɛ́ ɓʋ́ʋ́sɛ nɩbííne, nɩɛ botoro wuu sɩɛrʋ nɛ́ŋ baláwa.
19 Záksɛ ná wólle wuu lɩ́wɔ́ nʋʋsɛ rɩ́wɔ́ mʋ́dunni ní.
Ɓa mʋ́dunni nɩhɩ̃́ dʋma nɛ́ arɩ́ nyunni, ɓa kaá dʋsɛ nɩɛ, ɓaá ná wɩɩla.
20 Nɩkáánɛ ná, wɩɩla ná botoro há wɩ ɓʋ́ʋ́sɛ́, ɓa wʋ́ɔ́ mála bɩ́rsɛ́, káá ɔ́wɔ́ wɩ́'állɛ nʋ́ʋ́.
Ɓa haá cʋɔlɛ kaŋtɔmɔ, aá ɓaarɛ venni; venni ná ɓa há pí salmɛ cʋɔrɛ náŋa, a pi wárɛ cʋɔrɛ náŋa, a pi hɔfɩɛmɔ cʋɔrɛ náŋa, a pi dɔ́wʋ́ɔ́ bɩrmɛ náŋa, a pi daasɛ cɔ́ náŋa.
Ɓa wɩ ráŋ ná, a wɩ wɩ́ɛ́ nɛ, a wɩ wuó va.
21 Ɛ́ nɩkáánɛ ha wɩ bɩ́rsɛ́, a tɔ́wɔ́ nɩɓʋ́, bɔmɩ́, nɩlɩɩlɩ́wɩ́ɛ́ rɩ́wɔ́ gaárʋ.