Malɩ́ka há kéŋ kɛŋwie wɩ́ɛ́
10
1 Ɛ́ nɛ́ ŋ baa ná malɩ́ka bɩbar oro, rʋʋ lɛ́ bána rɩ́ aá tuwi.
Duóbána tɔ́ʋ́ mɛ́ anɛ gɛrɔ, ʋ su, duósii báákʋ́ nyúú mí.
Ʋ sɩ́paanɛ́ dé nɛ wɩɩsɛ nɛ́, ʋ naasɛ má nɛ níŋvásɛ.
2 Ʋ kéŋ kɛŋwie há wúré, ʋ nɛ́sɛ mɛ́.
Ʋ púú néduu naa sakɛ mʋʋ daha, ká púú nágʋɔ naa sakɛ tíé nyúú.
3 Ʋ cáási liŋó ɓɩzéní, anɛ kɩ́ŋkáná háá uuré.
Ʋ há cáási ɛ́, duóɓɛ́llɛ dɔ́mɔ́, naasɩ́ balpɛ.
4 Duóɓɛ́llɛ ná balpɛ dɔ́mɛ har rɩ́ mɛ́, ŋ faá já rɩ́ŋ pʋ́ŋsɛ rɛ́; ɛ́ nɛ́ liŋó oro lɛ bána rɩ́, a ko bʋ́lɩ́ŋ rɩ́ bʋlɛ́:
«Lo rɩ́ duóɓɛ́llɛ líŋsi ná a wɩ́féŋsé; sɩ́wɔ́ pʋ́ŋsʋ́.»
5 Ɛ́ nɛ́ malɩ́ka ná ŋ há néé, rʋʋ cɩ́ dahá, naa nɔ́ŋɔ sakɛ mʋʋ daha, ká nɔ́ŋɔ sakɛ tíé nyúú, kánʋ́ néduu ɓɔ́ bána rɩ́,
6 ká ŋmɩ́ɛ́sɛ Wɩɩsɛ yɩr mɛ́.
Wɩɩsɛ ná há to wɩsʋwɩ́, a nɛ́ a bána rɩ́rʋ́ sɩɛrʋ onni wuu, a a tíé rɩ́rʋ́ daha onni wuu, arɩ́ mʋʋ rɩ́rʋ́ sɩɛrʋ onni wuu, yɩr mɛ́ nɛ́, ʋ ŋmɩ́ɛ́sɛ, a bʋlɛ́:
«Ʋ báá waá dáánɛ.
7 Balpɛ nyúú mí malɩ́ka sɩ́ múú nyɩ́la; ɛ́ mɛ́ nɛ́, rɩ́ Wɩɩsɛ a wɩ́ɛ́ ná wuu, ʋ há bɩ́ɩ́nɛ́ rʋ́ʋ́ a, ká kaa féŋsi, anɛ ɛ́ ʋ há bʋ́lɛ́ pɔ́ʋ́ tʋtʋnna, há kɔ́ʋ́ wɩ́laabʋlla.»
8 Ɛ́ nɛ́ liŋó ná ŋ há nɩ́ɛ́ rʋʋ lɛ́ bána rɩ́, baa bʋ́lɩ́ŋ rɩ́ bʋlɛ́:
«Mʋ́ la kɛŋwie ná há wúré, a mɩŋ malɩ́ka ná há cɩ́ mʋʋ rɩ́ tíé wuu daha, nɛ́sɛ mɛ́.»
9 Ɛ́ nɛ́ ŋ mʋ́ malɩ́ka ná rɩ́, a bʋlʋ́ pi kɛŋwie ná páŋ.
Ɛ́ nɛ́ ʋ sɛ́:
«La, a dí, ʋ sɩ́ a ɓɩŋmɔ́ŋ, anɛ tʋʋ ɩ nʋɔ mɛ́, ká a ɓɩhɔɔ́, ɩ file mí.»
10 Ɛ́ nɛ́ ŋ la kɛnɔ ná ʋ nɛ́sɛ mɛ́, a pii dí.
Ŋ nʋɔ mɛ́, ʋ ŋmɔ́mɔ́ anɛ tʋʋ; ká, ŋ líŋó ko tenni, rʋʋ háákɔ́, ŋ file mí.
11 Ɛ́ nɛ́ ɓa bʋl páŋ bʋlɛ́:
«Ɩ ha sɩ́ la Wɩɩsɛ nʋɔ mɛ́, a bʋl wɩ́ɛ́ caasɛ nɩbííne duo wuu ɓɩkana, tɔ́nɛ duó duó wuu ɓɩkana, líŋsi duo wuu ɓɩkana, rɩ́ kuóre ɓɩkana.»