Dáŋsɩ́ɛ́wa bɛllɛ
11
1 Ɓa coki dapʋɔl páŋ ká bʋlɛ́:
«Isi kaa mʋ́ máŋsɛ vʋk koro, a máŋsɛ Wɩcʋɔlɩjɩzeno,* ká dɩɩsɛ nɩɛ ná há zʋ́ ráŋ, aá cʋɔlɛ Wɩɩsɛ.
2 Amá Wɩcʋɔlɩjɩzeno wuoljɛlɔ ná, lóú é, sʋ́ʋ́ máŋsʋ́; ɓa pí ráŋ pá nɩɛ ná há to Wɩɩsɛ nɩɛ nɛ́.
Ɓa sɩ́ zʋʋ fɩ́rkɛ Wɩɩsɛ tɔ́wero onni wuu, caná canáwa mɛɛ́sɛllɛ rɩ́ bɛllɛ.
3 Ká rɩ́ŋ tʋ́mɩ́ŋ dáŋsɩ́ɛ́wa bɛllɛ, rɩ́wɔ́ su yúó gɛnnɛ, a láŋ nʋɔ wɩ́ɛ́ bʋl pá nɩɛ, tápʋlɛ bʋ́ɩ́ rɩ́ zɔwɛllɛ rɩ́ mɛɛ́sɩbotoro.»
*f5*
4 Dáŋsɩ́ɛ́wa ná bɛllɛ há cɩ́ tíé wuu Nyuutɩna sɩ́ɛ́, nɛ́ ká ólívi tuuni ná bɛllɛ rɩ́ cáŋsɛ dɩsakɛ́ ná bɛllɛ.
5 Rɩ nɛ́ŋ já rʋ́ʋ́ pi bɔ́ŋbɔ́ŋ tʋ́ŋwɔ́ mɛ́, níŋ níí lɩ́wɔ́ nʋʋsɛ lɛ, a zɔ́kwɔ́ dɩŋdɔma.
Rɩ nɛ́ŋ já rʋ́ʋ́ tʋŋ bɔ́ŋbɔ́ŋ ɓa mɛ́, ɛ́ sʋʋ duo ní, rɩ́ɩ́ tɩ́na sʋwɛ.
6 Ɓa wo bána aá suki, rɩ́ duóŋ sɩ́ kó, tápʋlɛ ná wuu ɓa há lá Wɩɩsɛ nʋɔ wɩ́ɛ́ bʋl aá pá nɩɛ.
Ɓa wo nyii má kaa a, ɓaá bɩrmɛ cɛ́l; a wólli wɩɩla rɩ́rʋ́ duó wuu yiki, aá hé tíé nyúú nɩɛ mɛ́, ɛ́ ɓa há có.
7 Ɓa háá kóó tɛ́wɔ́ sɩɛ́da rɩ́ tenni, ballɔ ná há lɛ cúŋcúŋbʋɔ aá lɛ, sɩ́ ko yówó.
Ʋ sɩɛ́ sɩ́ wóllíwó, a ɓʋ́ʋ́sɩ́wɔ́.
8 Ɓa sɩ́ káŋwɔ́ lɛlɛ lɩɩ bil tɔ́zeno dɩjɛlɔ, ráŋ ná ɓa há ɓásɩ́wɔ́ Nyuutɩna dagɛsɛ́* daha.
Ɛ́ tɔ́zeno nɩɩsɔ ɔ́ɔ́, ɓa kánʋ́ aá yɩ́rɛ Sodomi* arɩ́ Ezipiti.*
9 Duo wuu nɩɛ, íriŋ íriŋ wuu nɩɛ, líŋsi wuu nɩɛ, tɔ́ɔ́ duó wuu nɩɛ, sɩ́ ko bélwó lɛlɛ, tápʋlɛ botoro rɩ́ fá,*f6* káá sɩ́ sáŋʋ́ rɩ́wɔ́ paa mʋ́ hu.
10 Tíé nyúú nɩbííne wuu tɛŋ sɩ́ pɔrɛ, Wɩɩsɛ wɩ́laabʋlla ná bɛllɛ sʋʋ wɩ́ɛ́, rɩ́wɔ́ jɩ́jʋɔsɛ, a dí zilé aá pá náŋá; bee wɩ́ɛ́ ɛ́ wɩ́laabʋlla bɛllɛ fa wálmɛ nɩbííne wérí.
11 Tápʋlɛ ná botoro rɩ́ fá há dáárɛ́, hiẽsó lɛ́ Wɩɩsɛ rɩ́, a ko zʋ́ wɩ́laabʋlla ná bɛllɛ, ɓa gírki isi; ɛ́ nɛ́ héwíŋ ɓɩzeno ka nɩɛ ná wuu há cɩ́nɛ́ aá bel.
12 Ká liŋó oro lɛ bána rɩ́, a ko bʋl wɩ́laabʋlla ná bɛllɛ rɩ́ a bʋlɛ́:
«Ɩ́ zɩ́ rɛɛ́.»
Ɛ́ nɛ́ ɓa tɩŋ duóbána mɛ́, a zɩ́ bána, ɓa dɩŋdɔma sɩ́ɛ́ mɛ́.
13 Tíé zíkli kɩ́ŋkáŋ ɛ́ tɛ́ŋ mɛ́, jɩɩsɛ ɓallɛ.
Jɩɩsɛ fí wuu sɩɛrʋ, jaá balá nɩ́ ɓálɛ́, tɔ́zeno ná sɩɛrʋ.
Ɛ́ tíé zíkle ɓʋ́ʋ́sɛ nɩɛ bʋ́ɩ́'alpɛ.
Héwíŋ ka nɩɛ ná há káánɛ́, ɓa pi píŋ pá bána nyúú Wɩɩsɛ.
14 Wɩɩla bʋllɛ mɛ́ nɛ́ dáárɛ́ nyɛ; botoro mí wɩɩla sɩ́ ko mʋ́l néé mí.
Balpɛ nyúú mí nyɩ́la mui
15 Ɛ́ nɛ́ balpɛ nyúú mí malɩ́ka múú nyɩ́la.
Líŋzeŋsi bʋl wɩ́ɛ́ bána rɩ́, a bʋlɛ́:
«Á Nyuutɩna rɩ́rʋ́ Nɩlɩsɛ nɛ́ tɛ kuorí díí,
mʋ́l néé mí.
Ʋ sɩ́ dí kuorí ná há waá tóki,
bɩŋsɛ́ rɩ́ bɩŋsɛ́!»
16 Nɩhɩɛ̃́sɛ ná mɛrɛ́ rɩ́ baná há kéŋwó kuóɓaŋsa mɛ́, Wɩɩsɛ sɩ́ɛ́, ɓa ɓírmi, a ka tulli tuwi aá ɓá tíé, a cʋɔlɛ Wɩɩsɛ,
17 a bʋlɛ́:
«Nyuutɩna, dóé wuu tɩ́na Wɩɩsɛ,
ɩ nɛ́ mɩnɛ́, anɛ ɩ die há mɩ́nɔ́ ɛ́.
Áá bárkɩ́; ɩ há tʋ́mɩ́ ballɩ́,
a tɩ́llɛ kuorí aá dí wɩ́ɛ́.
18 Dúníé nɩɛ cɔ́ɛ́ faá wɩ́ɩ́;
ɩ cɔwɩɩlɔ́ tɛ́ŋ nɛ́ sɩɛ́ péré.
Tɛ́ŋ péró, rɩ́ɩ́ dí nɩsʋsɛ sarɩ́ya;
ká túmí tʋtʋnna kɛ́ɩ́ wɩ́laabʋlla,
arɩ́ nɩɛ ná wuu há kɛ́ɩ́ nɩɛ, aá fɛ́ɩ́,
ɓa bɩbara rɩ́wɔ́ pʋɔllɛ wuu.
Tɛ́ŋ péró, rɩ́ɩ́ zɔkɛ nɩɛ ná wuu há ká tízɔ́krá.»
19 Ɛ́ nɛ́ bána nyúú Wɩcʋɔlɩjɩzeno* wúri, ká ɓa nɩ́ná nʋtʋmɛ dáka* ná há bíl ráŋ.
Líŋsi lɩ́lɛ, duóŋ fɩ́fɩ́llɛ, a ɓɩ́ɓɛ, duódɔ́wɩ́zeŋsi ɓɩ́ɓallɛ, tíé zíkli.