Háálɔ rɩ́ Dɩragɔŋ wɩ́ɛ́
12
1 Ɛ́ nɛ́ ká, nyɩnɛ ɓɩzeno oro lɩɩ nyɩɩsɛ bána mɛ́:
Hál rɛ́, a ka wɩpomí báákʋ́ tɩɩ, anɛ gɛbasa, a ka cana hóú naasɛ mʋ́l, ká ka caŋwʋllɛ fí rí bɛllɛ báákʋ́ nyúú, anɛ nyúɓikó.
2 Ɛ́ háálɔ fa kéŋ puo, a cɩ́ lʋlɛ́ mɛ́.
Ʋ luoru háá wɩ́ɛ́ rʋ́ʋ́ lʋl wɩɩla wʋ́wʋ́ mɛ́, ʋ cícáási.
3 Nyɩnɛ nɔ́ŋɔ má baa lɩɩ nyɩɩsɛ bána mɛ́:
Dɩragɔŋ* fɩɛmɔ ɓɩzeno oro, há kéŋ nyunni balpɛ arɩ́ nyɩ́sɛ fí, nyúɓikó kílú nyunni ná oro wuu.
4 Ʋ kenú mʋ́dúŋ kɛ́nnɛ caŋwʋllɛ yo tíé nyúú.
Caŋwʋllɛ botoro wuu sɩɛrʋ, caŋwʋ́l caŋwʋ́lwa.
Ká cɩ́ tɩkɛ háálɔ ná háá já rʋ́ʋ́ lʋl, rʋʋ lʋ́lɔ́, rʋ́ʋ́ pi bio ná dí.
5 Háálɔ ná lʋl heŋbóle ná, há sɩ́ isi dí kuorí, duó wuu nɩɛ nyúú, a nʋ́ɔ́lɩ́wɔ́ rɩ́ hɔɔ deŋtuke.
Ɓa pi bio ná kaa mʋ́ bil Wɩɩsɛ há kénú kuóɓasa daha, laka.
6 Ká háálɔ ná fá zʋ gɩrbétéke, a mʋ́ mɩŋ dɩhɩ̃́ ná Wɩɩsɛ há bɩ́rmɛ́ bílú mí, rɩ́wɔ́ dɩ́ɛ́sʋ́ tápʋlɛ bʋ́ɩ́ rɩ́ zɔwɛllɛ rɩ́ mɛɛ́sɩbotoro.
7 Ɛ́ nɛ́ lal isi bána nyúú.
Wɩɩsɛ malɩ́kawa nɔhɔ̃́, Mɩsɛl* rɩ́rʋ́ harwa yo Dɩragɔŋ*; Dɩragɔŋ má rɩ́rʋ́ malɩ́kawa yówó.
8 Ɓa wólli Dɩragɔŋ, ʋ rɩ́rʋ́ malɩ́kawa báá wɩ dɩkéni kené, bána nyúú.
9 Ɛ́ nɛ́ ɓa lɩ́sɛ Dɩragɔŋ zeno bána nyúú, a yíkú rɩ́rʋ́ malɩ́kawa yoo tá tíé nyúú.
Ʋ nɛ́ ká dʋbɩnɛ́ ná, ɓa há kené aá yɩ́rɛ kaŋtɔmɔ nɔhɔ̃́, a kaá yɩ́rɛ Sɩtaanɛ* má.
Ʋ wólli dúníé wuu a yéŋŋi.
10 Líŋduo oro bʋl wɩ́ɛ́ bána rɩ́, ŋ nɛ.
Ʋ sɛ́:
«Mʋ́l néé mí, nɩɛ laatɛ́ tɛ́ŋ péró.
Mʋ́l néé mí, Wɩɩsɛ mákʋ́ dóé, a bílú kuorí.
Mʋ́l néé mí, Wɩɩsɛ Kirisi* mákʋ́ tíŋ.
Zaŋbatɩɩnɔ ná fa há cɩ́ŋrá maábináŋa mɛ́,
a cɩ́ Wɩɩsɛ sɩ́ɛ́ wɔhɔ rɩ́ tɩ́taŋ wuu,
a bʋl zaŋbawɩ́ɛ́ aá cáásɩ́wɔ́,
ɓa lɩ́sʋ́ bána mɛ́ yoo tá.
11 Pewie cɛ́l yɩr mɛ́, á maábináŋa dí dóé ʋ nyúú.
Ɓa dí dóé ʋ nyúú, a tɩŋ Wɩɩsɛ wɩ́bʋlɛ ná má
ɓa há bʋ́lɛ́ pá nɩɛ wɩ́ɛ́.
Ɓa wʋ́ɔ́ mɩɩsɛ mɛ́ kɛ́rɛ́, ká sʋ́wɩ́wɔ́ sɩɛ́da har.
12 Ɛ́ wɩ́ɛ́, bána, jɩ́jʋɔsɛ;
ɩ́ má nɩɛ ná há mɩŋ bána sɩɛrʋ, ɩ́ má jɩ́jʋɔsɛ!
Amá tíé rɩ́ mʋʋ é, wɩɩla púíwa, ɩ́ wíwi!
Kaŋtɔmɔ nɔhɔ̃́ túwíwa mɛ́ arɩ́ cɔwɩɩlɔ́;
ʋ ɩ́ɔ̃́ rʋ́ʋ́ tápʋlɛ báá wɩ kaŋ.»
13 Dɩragɔŋ há néé, rɩ ɓa yóú tá tíé nyúú, ʋ dé isi aá kiri háálɔ ná há lʋ́l heŋbóle ní.
14 Ɛ́ nɛ́ ɓa pi kiesí kiŋkeru bɛllɛ, a pá háálɔ ná, rʋ́ʋ́ fil kɛkɛ Dɩragɔŋ mɛ́, a mʋ́ pérú dɩkéni, gɩrbétéke sɩɛrʋ, ráŋ ná ɓa há sʋ́ʋ́ ké, bɩŋsɛ botoro rɩ́ fá.
15 Ɛ́ nɛ́ Dɩragɔŋ tʋ́ɔ́sɛ nyii ɓɩkana, anɛ fuo, rɩ́wɔ́ pal mʋ́ pu háálɔ ná, rɩ́ nyipoo púú kaa col.
16 Ɛ́ nɛ́ tíé fá háálɔ ná búŋse, a poŋ, ká Dɩragɔŋ nyitʋ́ɔ́sɛ ná wuu pal ko zʋ ráŋ.
17 Dɩragɔŋ ná cɔ́ɛ́ wɛ kɩ́ŋkáŋ, háálɔ ná nyúú.
Ɛ́ nɛ́ ʋ bɩrmʋ́ suki háálɔ duo nɩkáánɛ hé, aá yo lal, aá yo nɩɛ ná háá tɩŋ Wɩɩsɛ wɩ́máŋsɛ, aá tɛ sɩɛ́da, rɩ Zeezi wɩ́bʋlɛ ná ká taŋá nɛ́.
18 Ká ʋ isi mʋ́ zɩ́ cɩ́ mʋʋ nʋɔ, hɩɛl daha.