Balla ná há lɛ́ mʋʋ aá lɛ
13
1 Ɛ́ nɛ́ káŋ ná ballɔ oro, rʋʋ lɛ́ mʋʋ sɩɛrʋ aá lɛ.
Ʋ kéŋ nyunni balpɛ arɩ́ nyɩ́sɛ fí.
Nyúcikó kílú nyɩ́sɛ ná oro wuu, ká ɓa pʋ́ŋsɛ Wɩɩsɛ zome yɩra ʋ nyunni ná daha.
2 Ɛ́ ballɔ ŋ há néé, ʋ nɩhɩ̃́ ɓee ní, ká ʋ naasɛ nɛ ballɔ oro ɓa háá yɩ́rɛ úrsi,* naasɛ, ʋ nʋɔ má nɛ kɩ́ŋkáná nʋɔ.
Dɩragɔŋ púú dóé pɔ́ʋ́, a púú kuóɓasa pɔ́ʋ́, a pɔ́ʋ́ tíŋ ɓɩzeno.
3 Ballɔ ná nyunni ná nɔ́ŋɔ de nɛ ɓa ɓɔ́ɔ́ cɔ́rɛ, a hé sʋʋ mɛ́; fʋʋ ná háá já rʋ́ʋ́ ɓʋ́ʋ́, sɩɛ́ fɩɛlɛ.
Tíé nyúú nɩɛ wuu sɩɛ́ tɩ́ŋʋ́ mɛ́, a bɩ́bɛ́llɛ.
4 Nɩɛ wuu cɩ́cʋɔlɛ Dɩragɔŋ, ʋ há púú tíŋ pá ballɔ ná wɩ́ɛ́.
Ɓaá cʋɔlɛ ballɔ ná má, a bʋlɛ́:
«Áŋ rɩ́ mɔhɛ̃́, ballɔ?
Áŋ rɩ́ wóú kaá lowi?»
5 Ɛ́ nɛ́ ɓa pá ballɔ ná ŋmɛ́nɔ, rʋ́ʋ́ bʋl nyʋkwɩ́ɛ́, a tʋksɛ Wɩɩsɛ.
Ɓa pɔ́ʋ́ tíŋ rʋ́ʋ́ tʋŋ ɛ́, caŋsɛ mɛɛ́sɛllɛ rɩ́ bɛllɛ.
6 Ʋ isi bʋl wɩ́ɛ́ aá lɔ́rɛ Wɩɩsɛ; a tʋksɛ Wɩɩsɛ rɩ́rʋ́ jaa, a tʋksɛ nɩɛ ná wuu há mɩŋ bána nyúú.
7 Ɓa pɔ́ʋ́ ŋmɛ́nɔ rʋ́ʋ́ yo Wɩɩsɛ nɩɛ, a dí.
Ɓa pɔ́ʋ́ tíŋ, duo wuu nɩɛ, rɩ́ íriŋ íriŋ wuu nɩɛ, rɩ́ líŋsi duo wuu nɩɛ, rɩ́ tɔ́ɔ́ duó duó wuu nɩɛ nyúú.
8 Dúníé nɩɛ ná wuu ɓa há wʋ́ɔ́ yɩra pʋ́ŋsɛ́ hé kɛnɔ ná, há ká Pewie ná ɓa há ɓʋ́ɛ́ hiẽsó nɩɛ kɛnɔ sɩɛrʋ, dúníé púle mí, ɓa wuu sɩ́ cʋɔlɛ ɛ́ ballɔ.
9 Nɛrɔ ná há kéŋ dɩlla, ʋ́ʋ́ tɩ́na zesi.
10 Wɩɩsɛ há sɛ́ nɛrɔ ná mɔhɔ̃́ rʋ́ʋ́ zʋ bɩnajaa, ʋʋ́ zʋ bɩnajaa nɛ́.
Ʋ há sɛ́ nɛrɔ ná mɔhɔ̃́ rɩ́wɔ́ ɓʋ́ʋ́ rɩ́ tókowí, ɓaá ɓʋ́ʋ́ rɩ́ tókowí ní.
Ɛ́ wɩ́ɛ́ nɛ́ Wɩɩsɛ nɩɛ mɔ, rɩ́wɔ́ cɩ́ŋwɔ́ nyamma rɩ́wɔ́ yardá mɛ́.
Ballɔ ná há lɛ́ tíé mʋ́l aá lɛ wɩ́ɛ́
11 Ɛ́ nɛ́ káŋ ná ballɔ oro má báá, rʋʋ lɛ́ tíé mʋ́l aá lɛ, a ka nyɩ́sɛ, anɛ pewie nyɩ́sɛ, káá bʋl wɩ́ɛ́ anɛ Dɩragɔŋ.
12 Ʋ kéŋ ballɔ ná há lɛ́ mʋʋ dóé ní, aá tʋŋ, ʋ sɩ́ɛ́ mɛ́.
Ʋ fɩ́kɛ́ tíé rɩ́rʋ́ daha nɩɛ wuu mí, rɩ́wɔ́ cʋɔlɛ ballɔ ná há lɛ́ mʋʋ, ʋ nyúú nɔ́ŋɔ́ fa ka fʋʋ, ká fɩɛlɛ.
13 Ɛ́ ballɔ tʋ́ŋ nyáŋwɩ́ɛ́ ɓɩkana; a a níŋ má tɩɩ lɛ bána tuwi tíé, nɩbííne wuu sɩ́ɛ́ mɛ́.
14 Ʋ yéŋŋi tíé nyúú nɩbííne, a tɩŋ nyáŋwɩ́ɛ́ ná ʋ há cɩ́ dʋ́ŋdʋ́ʋ̃́ ballɔ ná sɩ́ɛ́ mɛ́, aá a.
Ʋ sɩ́ nɩbííne má veno, dʋ́ŋdʋ́ʋ̃́ ballɔ ná, ɓa há ɓá nyúú cɔ́rɛ ká ʋ wɩ sʋ́wɛ́ yɩr mɛ́.
15 Ballɔ ná há lɛ́ tíé mʋ́l lɛ, ʋ ná dóé, a pi hiẽsó pá mʋʋ ballɔ veno ná, ʋ bʋ́bʋl wɩ́ɛ́, a wólli nɩɛ ná há wʋ́ʋ́ cʋɔlɛ ɓʋ́ɓʋ́ʋ́sɛ.
16 Ʋ fɩ́kɛ́ nɩbííne wuu mí, ɓa hé malla pɔ́wɔ́, ɓa néduu nɛ́ŋsa mɛ́, ɛ́ rá má ɓa tulli mí; pʋɔllɛ rɩ́ bɩbara, ɓɩɛ tɩ́náwa rɩ́ summe, yósi rɩ́ to yósí, ɓa wuu.
17 Rɩɩ ná wɩ ɛ́ malla kené, ɩ wɩ óŋ wuó yɔwɛ, ɩ wɩ óŋ wuó yɛ́llɛ.
Ballɔ ná yɩr, ɛ́ rá má ʋ yɩr náŋɓa nɛ́ ká, ɛ́ malla.
18 Wɩ́zɩmɛ kaa tʋmɛ́ dɩhɩ̃́ nɛ́ nyɛ.
Nɛrɔ ná há kéŋ lɩ́ŋ, ʋ wo ballɔ ná náŋɓa ná mʋ́l aá zɩŋ rɛ́; nɩbíŋ yɩ́r rɛ́.
Ʋ náŋɓa ná nɛ́ ká zɔwalgo rɩ́ mɛɛ́sɩbotoro rɩ́ balgo (666).