Pewie nɩyɔwɩlaalɛ́ yɩl
14
1 Ŋ baa bel, a ná Pewie rʋʋ cɩ́ dahá, paalɔ ná ɓa háá yɩ́rɛ Sɩyɔŋ* daha, ʋ rɩ́ nɩɛ bʋ́ɩ́ zɔlɔ mɛɛ́sɛllɛ rɩ́ baná.
Ɓa pʋ́ŋsɛ Pewie rɩ́rʋ́ Ana yɩra ɓa tulli mí.
2 Ŋ nɛ liŋó há dɔ́mɛ́ lɛ bána rɩ́ aá ko, anɛ nyikana há cúúré aá dɔ́ŋ, anɛ duóŋ há ɓɛ́ɛ́ a dɔ́ŋ kɩ́ŋkáŋ.
Ɛ́ liŋó ŋ há nɩɛ, nɩhɩ̃́ ceŋdúúre má háá dú ceŋsi ní.
3 Nɩɛ ná bʋ́ɩ́ bʋ́ɩ́wa ná cɩ́ kuóɓasa laka nɛ́, oŋwómme ná baná rɩ́ nɩhɩɛ̃́sɛ ná sɩ́ɛ́ mɛ́ nɛ́, aá yɩ yɩfɛlɔ.
Nɛ́ŋ wuu wɩ ɛ́ yɩl wuó máŋsɛ, rɩ nɩɛ ná bʋ́ɩ́ zɔlɔ mɛɛ́sɛllɛ rɩ́ baná ná, Pewie há yɔ́wɛ́ la tíé nyúú dʋŋɔ rá.
4 Ɓa ɛ́ nɩɛ nɛ́ wɩ háála pɩ́nɛ́, a wɩ busunnu kéné.
Ɓa tɩ́ŋ Pewie mí, ʋ dɩmʋ́ɩ́ wuu.
Ɓa yɔ́wɩ́wɔ́, a lɩ́sɩ́wɔ́ nɩbííne sɩɛrʋ nɛ́, a la sɩ́ɛ́ píwó pá Wɩɩsɛ rɩ́ Pewie, anɛ oŋfóle, ɓa há píé pa Wɩɩsɛ.
5 Ɓa ha wɩ nyɩɛrʋ nyɛ́ɛ́ ná, ɓa wɩ wɩ́zɔkɩ́ wuu kené.
Malɩ́kawa botoro wɩ́ɛ́
6 Ɛ́ nɛ́ ká ŋ ná malɩ́ka oro, rʋʋ́ fil bána nyúú.
Ʋ kéŋ Labaarɩwero ná há waá daarɛ nɛ́, rʋ́ʋ́ bʋl pá tíé nyúú nɩbííne.
Rʋ́ʋ́ bʋl pá íriŋ íriŋwa wuu nɩɛ, duo wuu nɩɛ, líŋsi duo wuu nɩɛ, tɔ́ɔ́ duo wuu nɩɛ.
7 Ʋ búóli a bʋlɛ́:
«Ɩ́ fá Wɩɩsɛ, a píŋsú; bee wɩ́ɛ́ tɛ́ŋ péró, rʋ́ʋ́ dí nɩbííne sarɩ́ya.
Ɩ́ dɛnnɛ nɛrɔ ná há á bána rɩ́ tíé, rɩ́ mʋʋ arɩ́ nyibulsɩ́ɛ́.»
8 Malɩ́ka nɔ́ŋɔ má baa tʋkɛ dʋ́ŋdʋ́ʋ̃́ ɓɩnɔ mɛ́, a bʋlɛ́:
«Ʋ ɓálɔ́, Babɩlɔɔnɛ* zeno ɓálɔ́.
Ʋ ɔ́ɔ́ duo wuu nɩɛ nyɔ́ʋ́ cɔ́rmʋ ná kɩ́ŋkáŋ, anɛ sɩ́ŋ.»
9 Malɩ́ka nɔ́ŋɔ baa lɩɩ súúri dʋ́ŋdʋ́ʋ̃́ malɩ́kawa ná bɛllɛ mɛ́, a má búóli bʋlɛ́:
«Nɛrɔ ná háá cʋɔlɛ ballɔ ná há lɛ́ mʋʋ, arɩ́rʋ́ veno ná, a lo ɓa púú malla ná hóú tule rɩ́rʋ́ nɛ́sɛ mɛ́,
10 ʋ tɩ́na má sɩ́ nyɔ Wɩɩsɛ cɔwɩɩlɔ́ ná, anɛ sɩ́ŋ; anɛ sɩ́ŋ ná ɓa há wɩ púllé, ʋ ɔ́ŋsɛ hóú cɔwɩɩlɔ́ gbaŋa mɛ́.
Nɩɛ ná wuu háá tʋŋ ɛ́, ɓa sɩ́ ná wɩɩla, níŋ rɩ́ jirwílʋmɔ sɩɛrʋ, Wɩɩsɛ malɩ́kawa rɩ́ Pewie sɩ́ɛ́ mɛ́.
11 Nyʋɔsɛ ná há lɛ́ níŋ ná háá wálmɩ́wɔ́, waá yʋ́ksɩ́ ná.
Nɩɛ ná háá cʋɔlɛ ɛ́ ballɔ arɩ́rʋ́ veno, ʋ yɩr malla mɩ́ŋwɔ́ mɛ́, ɓa wɩ fɩɛla kené tɩ́taŋ rɩ́ wɔhɔ wuu.»
12 Ɛ́ nɛ́ tɛ, Wɩɩsɛ nɩɛ ná háá tɩ́ŋʋ́ wɩ́máŋsɛ, a la Zeezi dí, ɓa sɩɛ́ mɔhɔ̃́ rɩ́wɔ́ ka nyamma.
13 Káŋ nɛ liŋó há lɛ́ bána rɩ́, aá bʋ́lɩ́ŋ rɩ́ bʋlɛ́:
«Pʋ́ŋsɛ wɩ́ɩ́ né:
A kaa pɔ́ nyɛ mɛ́, nɩɛ ná háá sʋsɛ Nyuutɩna tʋtʋmɛ́ sɩɛrʋ, ɓa ná wér.»
Wɩɩsɛ Sabɩɩna sɛ́:
«Óó, ɛ́ nɛ́, a makɛ rɩ́wɔ́ lówó tʋtʋ́ŋduoru ná, ká fɩɛlɛ, bee wɩ́ɛ́ ɓa tʋtʋ́ŋwere ní kɔ́wɔ́ túme.»
Ɓa kʋ́ŋ tíé nyúú ɓɩɛ
14 Ɛ́ nɛ́ ŋ baa bel a ná duóbáŋpʋmmɔ, rɩ omo oro há nɩhɩ̃́ nɩbíŋ bíí, rʋʋ kénú daha.
Salmɛ nyúcikó ní cúú nyúú mí, ká ʋ ka sikɔrɔ háá díé wérí, ʋ nɛ́sɛ mɛ́.
15 Malɩ́ka nɔ́ŋɔ lɛ Wɩcʋɔlɩjɩzeno lɛ, a cáási hé nɛrɔ ná há ké duóbána daha rɩ́, a bʋlɛ́:
«Píí sikɔrɔ ná a kʋsɛ tíé nyúú ɓɩɛ, ɓɩɛ kʋsɛ́ tɛ́ŋ péró.
Tíé bɩ́ɔ́, anɛ ɓɩɛ, a cɩ́ kʋmɛ́ mɛ́.»
16 Ɛ́ nɛ́ nɛrɔ ná há ké duóbána daha, púú sikɔrɔ yoo hé tíé mí, a kʋ́sʋ́ onni wuu.
17 Malɩ́ka nɔ́ŋɔ má lɛ Wɩcʋɔlɩjɩzeno ná há mɩŋ bána daha sɩɛrʋ ko lɛ, a má ka sikɔrɔ ná háá díé wérí.
18 Malɩ́ka nɔ́ŋɔ má báá há kéŋ tíŋ níŋ mí, lɛ tulaaléwa koro* rɩ́ ko lɛ, a bʋl nɛrɔ ná há kéŋ sikɔrɔ ná háá díé rɩ́, kɩ́ŋkáŋ, a bʋlɛ́:
«Píí sikɔrɔ ná, a conni víínyi* tuuni ná há mɩŋ tíé nyúú nɔnɔ.
Ɓa nɔnɔ ná wuu bɩ́ɔ́ rɛ́.»
19,20 Ɛ́ nɛ́ malɩ́ka púú sikɔrɔ yoo hé tíé nyúú, a kʋsɛ víínyi tuuni nɔnɔ ná, a kaa mʋ́ yoo hé tunɔnɔ dɩhaasɩ́ ɓɩzeno ná, há ká Wɩɩsɛ cɔwɩɩlɔ́ dɩhɩ̃́, a mɩŋ tɔ́ɔ́ kíŋkere mí, ɓa haasɛ.
Cɛ́l lɛ ráŋ lɛ, a pal mʋ́ peri kííló zɔɔtoro, ká ɓa lúŋ peri nɩbííno sɛ́sɛ rɩ́ tíé.