Bɩŋsɛ bʋ́ɩ́ kuorí wɩ́ɛ́
20
1 Ɛ́ nɛ́ káŋ ná malɩ́ka rʋʋ lɛ́ bána rɩ́ tuwi; a ka cúŋcúŋbʋɔ borwí, arɩ́ bɛŋzɛlzeno oro, ʋ nɛ́sɛ mɛ́.
2 Ʋ ka Dɩragɔŋ* ná há ká dʋbɩnɛ́, a nɛ́ a kaŋtɔmɔ nɔhɔ̃́ rɩ́ Sɩtaanɛ* má, a vɔwɛ rɩ́ bɛŋzɛlɛ ná bil, bɩŋsɛ bʋ́ɩ́;
3 a pii kaa mʋ́ yoo hé cúŋcúŋbʋɔ sɩɛrʋ, a ka dánnʋɔ tɔ́, a yakɛ rɩ́ borwí, ká mallɛ tá, rʋ́ʋ́ báá sɩ́ lɩ́ɩ́ yéŋŋi nɩɛ, rɩ bɩŋsɛ bʋ́ɩ́ ná ha wɩ césé.
Rɩ bɩŋsɛ bʋ́ɩ́ ná nɛ́ césé, ɓa sɩ́ lɩ́sʋ́ tá, rʋ́ʋ́ lɛ mʋ́ɔ́.
4 Ɛ́ nɛ́ ŋ ná kuóɓaŋsa, rɩ ɓa bíló, nɩɛ kéŋwó daha; Wɩɩsɛ pá nɩɛ ná wuu há kéŋwó daha dóé, rɩ́wɔ́ dí nɩɛ sarɩ́ya.
Ká ŋ ná nɩɛ dʋŋsɛ má; nɩɛ ná há bʋ́l Zeezi sɩɛ́da wɩ́ɛ́ arɩ́ Wɩɩsɛ wɩ́bʋlɛ ná, ɓa ɓíési nyunni conni, ɓa dʋŋsɛ nɛ́.
Ɓa ɛ́ nɩɛ nɛ́ wɩ ballɔ cʋ́ɔ́lɛ́, a wʋ́ʋ́ veno má cʋ́ɔ́lɛ́; ɓa wɩ ballɔ malla kené ɓa tulli rɩ́wɔ́ nɛ́ŋsa mɛ́.
Ɓa nɛ́ bɩ́rɛ́ isi sʋʋ mɛ́, rɩ́wɔ́ rɩ́ Kirisi* dí kuorí, bɩŋsɛ bʋ́ɩ́.
5 Ɓa nɛ́ ká dʋ́ŋdʋ́ʋ̃́ nɩsʋsɛ́, Wɩɩsɛ há íllé.
Ʋ wɩ nɩsʋsɛ ná náŋa éé ílli, rɩ bɩŋsɛ bʋ́ɩ́ ná wɩ césé.
6 Dʋ́ŋdʋ́ʋ̃́ sʋsɛ ná Wɩɩsɛ há íllé, ɓa ná wér, ɓa há ká Wɩɩsɛ nɩɛ.
Sʋʋ bʋllɛ ná wɩ tíŋ kené ɓa mɛ́.
Ɓa sɩ́ a Wɩɩsɛ rɩ́ Kirisi wuu, vʋk'ɔ́ɔ́sá.
* Ɓa rɩ́ Kirisi sɩ́ dí kuorí bɩŋsɛ bʋ́ɩ́.
Ɓa kéŋ Sɩtaanɛ yoo hé níŋ mʋʋ rɩ́ jirwílʋmɔ sɩɛrʋ
7 Bɩŋsɛ bʋ́ɩ́ ná háá kóó daarɛ, ɓa sɩ́ lɩ́sɛ Sɩtaanɛ bɩnajaa mɛ́ tá.
8 Rʋ́ʋ́ lɩɩ mʋ́ yéŋŋi tíé nyúú tɔ́nɛ duó wuu nɩɛ, ɓa nɛ́ ká Gɔɔgɛ* rɩ́ Magɔɔgɛ* nɩɛ.
Ʋ sɩ́ héwó náŋá mɛ́, ɓɩkáná anɛ mʋʋ nʋɔ hɩɛla, rɩ́wɔ́ yo lal.
9 Gɔɔgɛ rɩ́ Magɔɔgɛ nɩɛ ná sɩ́ lɛ dúníé kíŋkere wuu, a ko kíl Wɩɩsɛ tɔ́cólli rɩ́ Wɩɩsɛ nɩɛ lɛ́ɛ́.
Amá níŋ lɛ́ bána rɩ́, a tuwi díwó wuu.
10 Ká ɓa ka Sɩtaanɛ ná háá yéŋŋi ɛ́ nɩɛ, a yoo hé níŋ mʋʋ rɩ́ jirwílʋmɔ sɩɛrʋ; ráŋ ná ɓa há lá sɩ́ɛ́ kɛsɛ ballɔ, rɩ́ nɛrɔ ná há nyɛ́ nyɩɛrʋ bʋlʋ́ ká Wɩɩsɛ wɩ́laabʋ́llʋ́, a yoo hé.
Ɓa sɩ́ nɩ́ná wɩɩla ráŋ, tɩ́taŋ rɩ́ wɔhɔ, tɛ́ŋ wuu mí.
Hatɩ́ŋnɩ́sarɩ́ya díí wɩ́ɛ́
11 Ɛ́ nɛ́ ŋ ná kuóɓasɩzeno ɓɩpʋmmɔ, nɛrɔ kénú daha.
Bána rɩ́ tíé fá yʋ́ksɛ ɛ́ nɛrɔ sɩ́ɛ́ mɛ́, ɓa báá wʋ́ɔ́ néé.
12 Ɛ́ nɛ́ ká ŋ ná nɩɛ ná há sʋ́sɛ́, bɩbara rɩ́ pʋɔllɛ, rɩ ɓa cɩ́ dahá, kuóɓasa ná sɩ́ɛ́.
Ɓa wúnni kɛnnɛ, a ko wúri kɛnɔ oro, hiẽsó nɩɛ yɩra kɛnɔ.
Ɓa pʋ́ŋsɛ nɩsʋsɛ ná wɩ́'állɛ wuu hé ɛ́ kɛnnɛ sɩɛrʋ nɛ́; ɓa sɩɛ́ bél ɛ́ wɩ́'állɛ nɛ́, ká díwó sarɩ́ya.
13 Mʋʋ úki nɩɛ ná wuu ʋ há díé.
Sʋʋ rɩ́ lɛlɛ tɔ́ɔ́ má úki nɩɛ ná ɓa há líŋé.
Ɓa tɩ́ŋwɔ́ wɩ́'állɛ mɛ́, a díwó wuu sarɩ́ya.
14 Ɓa kɛsɛ sʋʋ rɩ́ lɛlɛ tɔ́ɔ́ wuu yoo hé níŋ mʋʋ sɩɛrʋ.
Ɛ́ níŋ mʋʋ nɛ́ ká, sʋʋ bʋllɛ.
15 Nɛrɔ ná wuu yɩr há to hiẽsó nɩɛ yɩra kɛnɔ ná sɩɛrʋ, ɓaá kaa yoo hé níŋ mʋʋ ná sɩɛrʋ nɛ́.