Pewie hájaasɛ cana wɩ́ɛ́
19
1 Ɛ́ har rɩ́ mɛ́, ŋ nɛ́ liŋó há lɛ́ bána rɩ́, ɓɩzéní, anɛ nɩkana háá bʋl wɩ́ɛ́; ɓa sɛ́:
«Aleluya*!
Á Wɩɩsɛ nɛ́ lá nɩɛ aá tá, ʋ nɛ́ tɛ píŋ rɩ́ dóé.
2 Ʋ kéŋ taŋá ʋ sarɩ́ya díí mí, ʋ wɩ́ɛ́ wuu cɛ́rɔ́.
Ʋ há dí hácɔrmɔ sarɩ́ya a yóú;
hácɔrmɔ ná há tɩ́ŋʋ́ cɔ́rmʋ mɛ́,
a zɔkɛ dúníé wuu.
Wɩɩsɛ dúú tʋtʋnna ná,
háálɔ ná há ɓʋ́ʋ́sɛ́, cɔwɩɩlɔ́ pɔ́wɔ́.»
3 Ká ɓa baa bʋlɛ́:
«Aleluya!
Níŋ ná há dí tɔ́zeno nyʋɔsɛ dé zɩ́zɛ́ bána nɛ́ wuu.»
4 Ɛ́ nɛ́ nɩhɩɛ̃́sɛ* ná mɛrɛ́ rɩ́ baná, arɩ́ oŋwómme ná baná, ɓírmi tíé a cʋɔlɛ Wɩɩsɛ ná, há kénú kuóɓasa mɛ́, a bʋlɛ́:
«Amɩɩ*!
Aleluya!»
5 Liŋó lɛ kuóɓasa rɩ́, a bʋlɛ́:
«Ɩ́ dɛ́nnɩ́rá Wɩɩsɛ,
ɩ́ nɩɛ ná wuu há kɔ́ʋ́ tʋtʋ́nná,
ɩ́ nɩɛ ná wuu háá zílú,
bɩbara rɩ́ pʋɔllɛ wuu!»
6 Ká ŋ baa nɛ liŋó, anɛ nɩkana líŋsi háá bʋl wɩ́ɛ́; aá dɔ́ŋ anɛ nyikana há cúúré aá dɔ́ŋ, anɛ duóŋ háá ɓɛɛ́, kɩ́ŋkáŋ.
Ɓa sɛ́:
«Aleluya!
Nyuutɩna, á dóé wuu tɩ́na Wɩɩsɛ, dúú kuorí.
7 Á jɩ́jʋɔsɛ, a lo ráá tɛŋ pɔrɛ, ráá pípíŋsú.
Pewie hájaasɛ tápʋl péró,
háálɔ ná ʋ háá já rʋ́ʋ́ ja, bɩ́rmʋ́ tɩɩ.
8 Ɓa pi pɛ́ŋbíé gɛtʋlɩ́ há pʋ́mmɔ́ fákɛ́fákɛ́,
a su ɛ́ háálɔ.
Pɛ́ŋbíé gɛtʋlɩ́ ná ká Wɩɩsɛ nɩɛ wɩ́'állɛ ná
há ká tékétékéwa nɛ́.»
9 Ɛ́ nɛ́ malɩ́ka bʋl páŋ bʋlɛ́:
«Pʋ́ŋsɛ hé kɛnɔ mɛ́ a bʋlɛ́:
Nɩɛ ná ɓa há yɩ́rɛ́ rɩ́wɔ́ ko dí Pewie hájaasɛ cana, ɓa ná wér.»
Ká ʋ baa súúri bʋlɛ́:
«Wɩɩsɛ tɩɩ nʋɔ wɩ́táŋsɛ nɛ́.»
10 Ŋ ɓírmi tíé rɩ́ŋ cʋ́ɔ́lʋ́, ɛ́ nɛ́ ʋ sɛ́:
«Sʋ́ʋ́ á!
Ŋ má ká Wɩɩsɛ tʋtʋ́nnʋ́ rɛ́, anɩ́ má, anɩ́ maábináŋa ná há sáŋ Zeezi taŋá ná pɔ́wɔ́ tɩɩ.
Cʋɔlɛ Wɩɩsɛ nɛ́!»
Zeezi taŋá ná, nɛ́ sɩɛ́ ká Wɩɩsɛ wɩ́laabʋlla wɩ́nyúú.
Zákpʋmmɔ zɩ́zɩ́nnɔ
11 Ɛ́ nɛ́ ŋ ná bána rʋʋ wúró, ká zákpʋmmɔ ko lɛ.
Nɛrɔ ná há zɩ́nʋ́ daha, ʋ yɩr nɛ́ ká:
Teketeke rɩ́ Taŋa.
Ʋʋ́ yo lal, ʋ sɩ́ɩ́ mɛ́, aá dí sarɩ́ya má, ʋ sɩ́ɩ́ mɛ́.
12 Ʋ sɩ́ɛ́ dé tʋ́tʋl, anɛ níŋ ní, ká nyúɓiké ɓɩkana tɔ́ʋ́ nyúú mí.
Ɓa pʋ́ŋsʋ́ yɩr máánʋ́ mɛ́, ká nɛ́ŋ wuu wʋ́ʋ́ ɛ̃, ʋ dʋŋɔ nɛ́ ʋ́ʋ̃́.
13 Ʋ gɛsuulí wuu dé ká cɛ́l nɛ́.
Ʋ yɩr nɛ́ ká:
Wɩɩsɛ Wɩbʋlɛ.
14 Wɩɩsɛ zʋ́ɔ́ lalyoore wuu tɩ́ŋʋ́ mɛ́, a wuu zɩ́ zákpʋŋsɛ, a su pɛ́ŋbíé gɛpʋŋsɛ há wɩ busunnu kené.
15 Tókowí háá díé wérí, nɛ́ lɛ́ zákzɩ́nnɔ ná nʋɔ mɛ́ aá lɛ; tókowí ná ʋ háá káá yóó dí tíé nyúú nɩɛ wuu ní.
Ʋ sɩ́ nʋɔlɛ nɩɛ arɩ́ hɔɔ deŋtuke.
Ʋ sɩ́ haasɛ nɩɛ, anɛ tunɔnɔ ɓa háá haasɛ ɛ́, a lɩ́sɩ́wɔ́ sɩ́ŋ, a makɛ dóé wuu tɩ́na Wɩɩsɛ cɔwɩɩlɔ́.
16 Ɓa pʋ́ŋsɛ yɩr oro hóú gɛrɔ mɛ́, a pʋ́ŋsɛ hóú nahúĩ́ má mɛ́; ɛ́ yɩr nɛ́ nyɛ:
«KUÓRE WUU KUORO,
NYÚÚTƖ́NÁWA WUU NYUUTƖNA.»
17 Ɛ́ nɛ́ ká, ŋ ná malɩ́ka oro, rʋʋ cɩ́ wɩɩsɛ mɛ́.
Ʋ yɩ́rɛ diíwiisi wuu, háá fil bána nyúú rí nyúú rí, arɩ́ líŋzeno a bʋlɛ́:
«Ɩ́ ko hé náŋá mɛ́, a dí cana ɓɩdííle ná Wɩɩsɛ há ɛ́ɛ́ bílíwa mɛ́.
18 Ɩ́ ko dí namɩŋsa:
kuóre namɩŋsa, sóójiwa rɩ́wɔ́ nyúútɩ́náwa namɩŋsa, záksɛ rɩ́wɔ́ zɩ́zɩ́nna namɩŋsa, nɩbííne duó wuu namɩŋsa, yósi rɩ́wɔ́ ná há to yósi, bɩbara rɩ́ pʋɔllɛ wuu.»
19 Ɛ́ nɛ́ káŋ ná ballɔ ná, rɩ́ tíé nyúú kuóre rɩ́wɔ́ lalyoore, rɩ ɓa kúó hé náŋá mɛ́, rɩ́wɔ́ yo nɛrɔ ná há zɩ́ záka rɩ́rʋ́ lalyoore.
20 Ɓa yo ballɔ dí, a kaa tɔ́ bɩnajaa; a pɛ́ ka nɛrɔ ná há nyɛ́ nyɩɛrʋ bʋlʋ́ ká Wɩɩsɛ wɩ́laabʋ́llʋ́, a tʋŋ wɩ́nyáŋsɛ ballɔ sɩ́ɛ́ mɛ́, a tɔ́ʋ́ má.
Ɛ́ wɩ́nyáŋsɛ nɛ́ ʋ tʋŋ, a yéŋŋi nɩɛ ná ballɔ malla há mɩ́ŋwɔ́ mɛ́, ɓa cɩ́cʋ́ɔ́lʋ́ veno ná.
Ɓa kɛsɛ ɛ́ nɩɛ bɛllɛ wuu, ɓɩwómmé, a yoo hé níŋ mʋʋ rɩ́ jirwílʋmɔ sɩɛrʋ.
21 Ká tókowí ná há lɛ́ nɛrɔ ná há ké záka daha nʋɔ aá lɛ, ɓʋ́ʋ́sɛ nɩkáánɛ ná wuu.
Diíwiisi wuu ko díwó namɩŋsa vɔksɛ.