Babɩlɔɔnɛ ɓálɔ́
18
1 Ɛ́ har rɩ́ mɛ́, ŋ báá ná malɩ́ka nɔ́ŋɔ, rʋʋ lɛ́ bána rɩ́ aá tuwi.
Ʋ fa kéŋ tíŋ wérí, ká ʋ píŋ tʋlɛ́ cuoli tíé wuu.
2 Ʋ túwó búóli kɩ́ŋkáŋ bʋlɛ́:
«Ʋ ɓálɔ́, tɔ́zeno Babɩlɔɔnɛ* ɓálɔ́!
Ʋ bɩ́rmɛ́ kaŋtɔmɔ rɩ́ sabɩŋbɔma duó wuu dɩmɩnɩ́;
a a diíwibɔma duó wuu,
rɩ́wɔ́ ná nɩɛ háá nyɛ́kɛ́, dɩmɩnɩ́,
3 ʋ ɔ́ɔ́ duo wuu nɩɛ nyɔ́ʋ́ cɔ́rmʋ ná, anɛ sɩ́ŋ.
Dúníé kuóre zʋ́ʋ́ cɔ́rmʋ ná sɩɛrʋ, a kánʋ́ pɛ́,
ká dúníé báyɛlɛ́ tɩ́ŋʋ́ kuóɓɩɛ mɛ́,
a ná meéwíé kɩ́ŋkáŋ.»
4 Ká ŋ baa nɛ liŋó nɔ́ŋɔ, ʋ má lɛ́ bána rɩ́ nɛ́ a tuwi bʋlɛ́:
«Ŋ dunɩɛ, ɩ́ lɛ Babɩlɔɔnɛ mɛ́,
a makɛ rɩ́ɩ́wa sɩ́ tɩ́ŋɩ́ a wɩ́bɔma ná ʋ nɩɛ háá ɛɛ́;
rɩ́ wɩɩla ná háá á rʋ́ʋ́ túwú nyúú, péríwa má.
5 Ɓa wɩ́bɔma kánɔ́ a zɩ́ aá tɩkɛ bána mɛ́,
ká Wɩɩsɛ wʋ́ɔ́ wɩ́'állɛ ná há bɔ́mɔ́ mɛ́ sʋ́llɛ́.
6 Babɩlɔɔnɛ há pí ɛ́ tʋ́mɩ́wa mɛ́,
ɩ́ pi ɛ́ tʋ́mʋ́ mɛ́; ʋ há pí ɛ́ túmíwa,
ɩ́ pi ɛ́ naasɩ́ bʋllɛ túmú!
Ʋ há ɛ́ɛ́ ɩ́ nyɔ sɩ́ŋ ná,
ɩ́ a sɩ́ŋ duokí há kɛ ɛ́ naasɩ́ bʋllɛ,
a sú gbaŋa, a pɔ́ʋ́ rʋ́ʋ́ nyɔ.
7 Ʋ há píŋsú tɩɩ, a ɓɩ́ɛ́rʋ́ tɩɩ aá mɔ ɛ́,
ɩ́ a rɩ́ wɩɩla rɩ́ wííle mɔ ɛ́, a pérú!
Ʋ bɩ́ɩ́nʋ́ tɩɩ mɛ́ bʋlɛ́:
‹Ŋ ké hákuóro kéne ní, ŋ to yúhál,
ŋ wɩ yúó wíí ná.›
8 Ɛ́ wɩ́ɛ́ sɩɛ́, tápʋl balá nɛ́,
rɩ́ wɩɩla nyáŋ wuu púú:
sʋʋ, yúó, arɩ́ losu, ká rɩ́ níŋ dúú.
Nyuutɩna Wɩɩsɛ ná há tʋ́ʋ́ sarɩ́ya díí, kéŋ dóé.»
9 Tíé nyúú kuóre ná wuu há tʋ́ŋ cɔ́rmʋ rɩ́rʋ́, a tɩŋ dúú wér, ɓa háá kóó nóú rɩ níŋ díó, rɩ́ nyʋɔsɛ lɩ́lɛ, ɓa sɩ́ wi aá zɛ́sɛ.
10 Tɔ́ɔ́ ná wɩɩla héwíŋ sɩ́ káŋwɔ́, rɩ́wɔ́ mʋ́ cɩ́ dɩbólí, káá búŋsi, a bʋlɛ́:
«Wɩɩla púí!
Wɩɩla púí!
Tɔ́zeno Babɩlɔɔnɛ há kéŋ dóé!
Ɓa díí sarɩ́ya nɛ́ ɛ́, tɛ́ŋ mʋɔ́ mɛ́?»
11 Tíé nyúú báyɛlɛ́ má wi aá zɛ́sɛ, ʋ wɩ́ɛ́, nɛ́ŋ wuu báá há wʋ́ɔ́ báyɛ́lcɩksɛ́ yɔwɛ:
12 ɓa salmɛ, wárɛ, dɔ́wɩ́were,* ziíme, pɛ́ŋbíé gɛnnɛ, gɛmʋ́ɔ́llɛ rɩ́ gɛfɩɛŋsɛ, gɛmʋ́mʋlɛ́, daasɛ ná sɔ́ŋ há wéró, ɓa há kéŋ betúnyɩla bɩrmɛ onni ná, dawere ná há waá ná mɔlɛ́, hɔfɩɛmɔ onni, hɔɔ tɩɩ onni, bʋ́tʋlɛ́ onni;
13 onni ná wuu sɔ́ŋ há wéró, ɓa ná ɓa háá yɩ́rɛ mííri* rɩ́ áŋsáŋsɛ,* sɩ́ŋ, nʋʋ, mɩ́ɛ́ rɩ́ míŋ, nɛsɛ rɩ́ pieŋse, záksɛ rɩ́wɔ́ tórkowa, yósi rɩ́ bɩnajaa nɩɛ.
14 Báyɛlɛ́ ná bʋl tɔ́zeno ná rɩ́, bʋlɛ́:
«Ɓɩɛ ná wuu ɩ háá hɩɛ̃nɛ́, ɓa kɛ́kɩ́ mɛ́, ɩ kuóɓɩɛ ná rɩ́rɩ́ háwerɓɩɛ ná wuu yʋ́ksɔ́, ká tɛ́ɩ́; ɩ báá waá bɩ́rnówó rɩ́ ná.»
15 Tɔ́ɔ́ ná wɩɩla héwíŋ sɩ́ ka báyɛlɛ́ ná, há yɛ́llɛ ɓɩɛ ʋ sɩɛrʋ, a bɩrmɛ kuóre, rɩ́wɔ́ mʋ́ cɩ́ dɩbólí, ká wi aá zɛ́sɛ.
16 Ɓa sɩ́ bʋlɛ́:
«Wɩɩla púú!
Wɩɩla pú tɔ́zeno!
Ʋ faá su pɛ́ŋbíé gɛnnɛ nɛ́,
gɛmʋ́ɔ́llɛ rɩ́ gɛfɩɛŋsɛ,
a hé salmɛ vagɩra, a laalɛ dɔ́wɩ́were* rɩ́ ziíme!
Amá tɛŋ mʋɔ́ mɛ́ nɛ́, ká ɛ́ kuóɓɩɛ wuu yʋ́ksɛ.»
17 Mʋʋ nyiidaborsi tɩ́náwa rɩ́ nɩɛ ná ɓa há pɛ́ɛ́ aá va, nɩɛ ná háá tʋŋ mʋʋ nyiidaborsi mí, arɩ́ mʋʋ náŋwʋ́ɓʋ́ʋ́ra, ɓa wuu cɩ́ dɩbólí,
18 ká ɓa há ná tɔ́ɔ́ ná rʋʋ́ dí níŋ, nyʋɔsɛ lɩ́lɛ, ɓa cícáási a bʋlɛ́:
«Tɔ́ɔ́ wuu fa toó, anɛ tɔ́zeno né!»
19 Ɓa pá kuŋkulo yo aá héwó nyunni mí, ká wi aá zɛ́sɛ a bʋlɛ́:
«Wɩɩla púú!
Wɩɩla pú tɔ́zeno!
Ʋ kuóɓɩɛ ná mɛ́ nɛ́,
mʋʋ nyiidaborsi tɩ́náwa tɩŋ a má a kuóré,
ká, ʋ ɛ́ ɓɩɛ wuu zɔkɛ tɛ́ŋ mʋɔ́ mɛ́!»
20 Ká liŋó ná baa bʋlɛ́:
«Bána nyúú nɩɛ, ɩ́ jɩ́jʋɔsɛ,
tɔ́zeno ná zɔkɛ́ wɩ́ɛ́!
Wɩɩsɛ nɩɛ,
ʋ nɩtʋmɛ́* rɩ́rʋ́ wɩ́laabʋlla, ɩ́ jɩ́jʋɔsɛ!
Ʋ há tʋ́ŋ bɔ́ŋbɔ́ŋ ná ɩ́ mɛ́ wɩ́ɛ́ nɛ́,
Wɩɩsɛ dúú sarɩ́ya.»
21 Ɛ́ nɛ́ malɩ́ka duo oro pi dɔ́wɩ́zeno, há nɩhɩ̃́ nɔŋbúí, a yoo hé mʋʋ sɩɛrʋ, ká bʋlɛ́:
«Nyɛ nɛ́ rɩ́wɔ́ a tɔ́zeno Babɩlɔɔnɛ,
ɓa sɩ́ púú yo tíé, arɩ́ dóé,
rɩ́wɔ́ báá sʋ́ʋ́ ná kál rɩ́ kál.
22 Babɩlɔɔnɛ sɩɛrʋ, gɔkʋ́ báá waá dɛ́nnɩ́ ná,
ceŋdúr waá dúú ná, muule rɩ́ nyɩ́la tɩ́ná
waá múú ná.
Nɛ́sɛ tʋtʋmɩ́ tɩ́na waá tʋ́mɩ́ ná,
míŋ wɩ nɔmɔ mɩ́ɩ́ gɛ́rɩ́ ná.
23 Caanɔ́ má báá waá cuoli, ɩ́ sɩɛrʋ;
ɓa báá wɩ hájaarɔ liŋó nɛ́,
ɓa wɩ baljaarɔ liŋó nɛ́.
Ɩ báyɛlɛ́ nɛ́ fa ká báyɛ́lduoru tíé nyúú wuu mí,
ká ɩ tɩ́ŋɩ́ hɩlwɩ́ɛ́ mɛ́, a yéŋŋi nɩɛ wuu.»
24 Ká ɓa ná cɛ́l, ɩ dɩhɩ̃́:
Wɩɩsɛ nɩɛ rɩ́rʋ́ wɩ́laabʋlla cɛl,
arɩ́ tíé nyúú nɩɛ ná wuu ɓa há ɓʋ́ʋ́sɛ cɛllɛ.