Hácɔrmɔ ná há ké ballɔ daha
17
1 Malɩ́kawa ná balpɛ há pá gbaŋsɛ ná balpɛ, nɔ́ŋɔ tuu peri bʋ́lɩ́ŋ rɩ́ bʋlɛ́:
«Ko rɩ́ŋ mákɩ́ ɛ́ ná, Wɩɩsɛ háá á rʋ́ʋ́ dí hácɔrmɔ bɩbar ná sarɩ́ya pɛ́ɩ́.
Ɛ́ háálɔ nɛ́ ká tɔ́zeno ná, ɓa há sɔ́ɛ́, ká nyikana pɩ́nʋ́ sɩ́sɩ́ɛ́nnʋ́wa.
2 Tíé nyúú kuóre, rɩ́ nɩbííne wuu ní cɔ́rmɩ́wɔ́ tɩɩ ʋ mɛ́, a buki, anɛ sɩ́ŋ ɓa há nyɔ́ɛ́.»
3 Wɩɩsɛ Sabɩɩna ko súŋ, ká malɩ́ka ná kánɩ́ŋ mʋ́ gɩrbétéke sɩɛrʋ.
Ɛ́ nɛ́ ŋ ná háálɔ oro ráŋ, rʋʋ zɩ́nɔ́ ké ballɩfɩɛmɔ daha.
Ɛ́ ballɔ kéŋ nyunni balpɛ arɩ́ nyɩ́sɛ fí, ká ɓa pʋ́ŋsɛ Wɩɩsɛ zome a tɔ́ʋ́ tɛŋ wuu mí.
4 Háálɔ ná sú gɛfɩɛmɔ nɛ́, anɛ mʋɔlɩ́, a pa salmɛ rɩ́ dɔ́wɩ́tʋlɛ́ rɩ́ ziíme, a ɓɩ́ɛ́rʋ́ tɩɩ.
Ʋ cɔ́rmʋ wɩ́'állɛ ná háá sʋɔrɛ́, sú salmɛ gbaŋa, ʋ pii kánʋ́ nɛ́sɛ mɛ́.
5 Ɓa pʋ́ŋsɛ yɩgɩrɩ́ oro, ʋ tule mí:
«BABƖLƆƆNƐ* ZENO,
HÁCƆRMA RƖ́ DÚNÍÉ
WƖ́SƲƆRƐ́ WUU MAÁ.»
6 Ŋ ná háálɔ ná rʋʋ nyɔ́ cɛ́l kɩ́ŋkáŋ, a buki.
Wɩɩsɛ nɩɛ ná há bʋ́l Zeezi wɩ́ɛ́ ɓa kɛsɛ ɓʋ́ʋ́sɛ, cɛ́l nɛ́ ʋ nyɔ.
Ɛ́ de vɔ́kɩ́ŋ.
7 Ɛ́ nɛ́ malɩ́ka ná bʋl páŋ bʋlɛ́:
«Beé rí tɛ, ɛ́ wɩ́ɩ́ gɩ́rɩ́?»
Háálɔ ná, rɩ́ ballɔ ná há kéŋ nyunni balpɛ rɩ́ nyɩ́sɛ fí, ʋ kénú daha, ŋ sɩ́ lɩ́sɩ́wɔ́ mʋ́ʋ́la pɛ́ɩ́.
8 Ɛ́ ballɔ ɩ há néé, ʋ fa mɩ́nɔ́ rɛ́ ká báá toó.
Ʋ sɩ́ lɛ cúŋcúŋbʋɔ lɛ, a mʋ́ʋ́ dɩzɔkɩ́.
Tíé nyúú nɩɛ ná wuu Wɩɩsɛ há wʋ́ɔ́ yɩra pʋ́ŋsɛ́ hé hiẽsó kɛnɔ mɛ́, dúníé púle mí, ɓa sɩ́ ná ɛ́ ballɔ rʋ́ʋ́ a wɩ́gɩrɩ́ a pɔ́wɔ́, bee wɩ́ɛ́ ʋ fa mɩ́nɔ́ rɛ́, ká báá tóó, ká rʋ́ʋ́ baa ko mɩŋ.
9 Lɩ́ŋtɩɩna nɛ́ sɩ́ zɩŋ wɩ́ɛ́ nyáŋ.
Nyunni ná balpɛ ká pallɛ balpɛ nɛ́, háálɔ ná kéŋwó daha.
Ɓa ká kuóre má balpɛ nɛ́.
10 Kuóre ná bɔmmʋ́ɔ́ nɛ́ ɓa yiki yo, balá nɛ́ haá dí kuorí, ká nɔ́ŋɔ ha wɩ kúé; rʋʋ é kúó la kuorí, ʋ waá dáánɛ.
11 Ballɔ ná fa há mɩ́nɔ́ ká báá tóó, ʋ má ká kuór nɔ́ŋ rɛ́, ɓa a córí; ʋ fa mɩŋ kuóre balpɛ ná sɩɛrʋ nɛ́, ká rʋʋ kúó lɛ, ɓa sɩ́ zɔ́kʋ́.
12 Nyɩ́sɛ ná fí ɩ há néé, kuóre fí ní ɛ́, aá ko rɩ́wɔ́ pɔ́wɔ́ tíŋ, rɩ́wɔ́ rɩ́ ballɔ ná dí kuorí, tɛ́ŋ mʋɔ́ mɛ́; ɓa taŋa ha wɩ kuorí lɛ́ɛ́.
13 Kuóre ná wuu fí, wɩ́kanɩ́ nɛ́ balá:
Rɩ́wɔ́ píwó dóé rɩ́wɔ́ tíŋ wuu, a tʋŋ pá ballɔ.
14 Ɓa sɩ́ cɩ́ Pewie mí, a yóú, amá Pewie sɩ́ yoo díwó, ʋ nɛ́ há ká nyúútɩ́náwa wuu Nyuutɩna, kuóre wuu Kuoro wɩ́ɛ́.
Pewie rɩ́rʋ́ nɩɛ ná ʋ há yɩ́rɛ́, a tʋɔsɛ ɓa tɩ́ŋʋ́ mɛ́, ɓa sɩ́ yoo díwó.
15 Ɛ́ nɛ́ malɩ́ka baa bʋ́lɩ́ŋ rɩ́ bʋlɛ́:
«Nyii ná ɩ há néé rɩ hácɔrmɔ kéŋwó nʋɔ, ɛ́ nɩɛ nɛ́; íriŋwa, nɩkaŋdɔ́ɔ́, tɔ́nɛ arɩ́ líŋsi, ɓa nɩɛ nɛ́.
16 Nyɩ́sɛ ná fí, rɩ́ ballɔ ná sɩ́ bɛ́rɛ hácɔrmɔ ná.
Ɓa sɩ́ wúrkú ɓɩɛ wuu, ká rʋ́ʋ́ ka tɛŋɓɩla ké.
Ɓa sɩ́ dúú namɩɛ ká pa naŋkuléwa hé níŋ mí.
17 Wɩɩsɛ há có rɩ ɛ́ tʋ́mɔ́ nɛ́, ɓa tʋŋ ɛ́, a tʋŋ nʋɔ mɛ́ píwó tíŋ pá ballɔ, rʋ́ʋ́ dí kuorí.
Ɓa sɩ́ tʋŋ ɛ́ a kaá ja rɩ́ Wɩɩsɛ wɩ́bʋlɛ nʋɔ sú.
18 Ká háálɔ ná ɩ há néé, tɔ́zeno ná dóé há kɛ tíé nyúú kuóre ní ɛ́.»