Wɩɩsɛ dúú cɔwɩɩlɔ́
16
1 Ɛ́ nɛ́ ŋ nɛ líŋzeno oro há lɛ́ Wɩcʋɔlɩjɩzeno ná, a bʋl malɩ́kawa ná rɩ́ bʋlɛ́:
«Ɩ́ pa Wɩɩsɛ cɔwɩɩlɔ́ há sú gbaŋsɛ ná balpɛ, a kaa mʋ́ bɩ́sɛ tá tíé nyúú.»
2 Dʋ́ŋdʋ́ʋ̃́ malɩ́ka púú gbaŋa, a kaa mʋ́ bɩ́sɛ tíé nyúú.
Ɛ́ nɛ́ nɩbííne ná há kéŋ ballɔ malla, káá cʋ́ɔ́lʋ́ veno, ɓa wuu de cúnni fʋbɔma bamma háá wɩɛ́ wérí.
3 Bʋllɛ mɛ́ malɩ́ka púú gbaŋa, a kaa mʋ́ bɩ́sɛ hé mʋʋ sɩɛrʋ.
Mʋʋ ná nyii wuu de nɛ nɛrɔ há sʋ́wɛ́ cɛ́l; ɛ́ nɛ́ mʋʋ sɩɛrʋ onni wuu sʋsɛ.
4 Botoro nyúú mí malɩ́ka púú gbaŋa, a kaa mʋ́ bɩ́sɛ hé polli nyii, rɩ́ nyibulé wuu mí, ɛ́ nyiiri wuu bɩrmɛ cɛ́l.
5 Ɛ́ nɛ́ ŋ nɛ malɩ́ka ná há kéŋ tíŋ nyii nyúú, liŋó, rʋʋ sɛ́:
«Ɩ dʋŋɔ nɛ́ ká Wɩɩsɛ,
ɩ nɛ́ die fa mɩnɛ́, a zaa má mɩŋ.
Ɩ há dí sarɩ́ya ná ɛ́, ʋ sɩ́ɩ́ mɛ́ nɛ́.
6 Ɓa ɔ́ɔ́ ɩ Wɩɩsɛ nɩɛ cɛ́l bɩ́sɛ,
ɩ wɩ́laabʋlla má cɛ́l bɩ́sɛ,
ɛ́ nɛ́ ɩ pi cɛ́l pɔ́wɔ́ rɩ́wɔ́ nyɔ.
Ɛ́ nɛ́ cɛ́rɛ́ rɩ́wɔ́.»
7 Ŋ nɛ liŋó nɔ́ŋɔ báá; ʋ lɛ́ koro ná ɓa háá sakɛ tulaalé ʋ daha nɛ́, a bʋlɛ́:
«Óó!
Nyuutɩna, dóé wuu tɩ́na Wɩɩsɛ,
ɩ kéŋ taŋá ɩ sarɩ́yawa díí mí, ɓa wuu cɛ́rɔ́.»
8 Baná nyúú mí malɩ́ka púú gbaŋa, a bɩ́sɛ waasɛ wɩpomí.
Wɩpomí ná tíŋ, rʋ́ʋ́ púú níŋ nyɩkɛ nɩbííne.
9 Ɛ́ nɛ́ ʋ lʋmɔ ɓɩzeno wuuri nɩbííne, ɓa tʋ́tʋksɛ Wɩɩsɛ, ʋ nɛ́ há kéŋ tíŋ, ɛ́ wɩɩla mɛ́ wɩ́ɛ́.
Arɩ́ ɛ́ wuu, ɓa vɔ́ɔ́ rɩ́wɔ́ tá wɩ́bɔma ɛɛ, ká píŋsi Wɩɩsɛ.
10 Bɔmmʋ́ɔ́ nyúú mí malɩ́ka púú gbaŋa, a bɩ́sɛ hé ballɔ ná kuóɓasa mɛ́, ʋ kuorí wuu de mɩŋ bíno sɩɛrʋ.
Nɩbííne dʋsɛ nɛ́ŋsa aá mɩ́sɛ, wɩɩla háá wɩ́wɔ́ mɛ́ wɩ́ɛ́.
11 Ɓa tʋ́tʋksɛ bána nyúú Wɩɩsɛ, ɓa wɩɩla rɩ́wɔ́ fʋrsɛ ná wɩ́ɛ́.
Ká ɛ́ má, ɓa ha wʋ́ɔ́ wɩ́'állɛ ná há bɔ́mɔ́ tɛ́ɛ́.
12 Balgo nyúú mí malɩ́ka púú gbaŋa, a bɩ́sɛ hé mʋnaa ɓɩzeno ná ɓa háá yɩ́rɛ Ɩfɩratɛ sɩɛrʋ.
Ʋ nyii wuu hʋ́ʋ̃́sɛ, ká tɔ́ɔ́ mʋ́l kuóre wólli zʋ, aá daarɛ.
13 Káŋ ná sabɩŋbɔma botoro há nɩhɩ̃́ sɔrɛ; nɔ́ŋɔ lɛ Dɩragɔŋ nʋɔ mɛ́, nɔ́ŋɔ lɛ ballɔ ná nʋɔ mɛ́, ká nɔ́ŋɔ má lɛ nɛrɔ ná há nyɛ́ nyɩɛrʋ, a bʋlʋ́ ká Wɩɩsɛ wɩ́laabʋ́llʋ́ ká tóú, ʋ má nʋɔ mɛ́.
14 Kaŋtɔmɔ ná háá tʋŋ wɩ́nyáŋsɛ sabɩŋsɛ nɛ́.
Ɛ́ sabɩŋsɛ lɩ́ɔ́ mʋ́ dúníé kuóré wuu rɩ́, a yɩ́rwɔ́ hé náŋá mɛ́, rɩ́wɔ́ rɩ́ dóé wuu tɩ́na Wɩɩsɛ yo náŋá, Wɩɩsɛ ballɩ́ makɛ́ tápʋl.
15 Nyuutɩna sɛ́:
«Ná, ŋ sɩ́ ko uri anɛ gaarɔ.
Ŋ há kúé, rɩ nɛrɔ ná wɩ dóŋ pɩ́nɛ́, ká pɔ́ʋ́ gɛnnɛ, tɩ́na wɩ tɛŋɓɩla káá va, hɩɩ̃sɛ wʋ́ʋ́ ka, nɩɛ sɩ́ɛ́ mɛ́.»
16 Sabɩŋsɛ ná yɩ́rɛ kuóre ná hé náŋá mɛ́, dɩhɩ̃́ ná ɓa háá yɩ́rɛ Ebirewa* liŋó mí, Armagɩdɔŋ* nɛ́.
17 Balpɛ nyúú mí malɩ́ka púú gbaŋa, a yo bána rɩ́.
Ɛ́ nɛ́ liŋó ɓɩzeno oro bʋl wɩ́ɛ́ Wɩcʋɔlɩjɩzeno sɩɛrʋ, kuóɓasa cɔɔ rɩ́, a bʋlɛ́:
«Wɩ́ɩ́ wuu ténnó.»
18 Ɛ́ nɛ́ duóŋ fɩ́fɩ́llɛ, a ɓɩ́ɓɛ, dɔ́mɛ dɩ́dɔ́ŋ, tíé zíkli kɩ́ŋkáŋ.
Nɩbííne tíé nyúú mɩnɛ́ mɛ́ wuu, tíé ha wɩ ɛ́ zíkle duo zíklé ná.
19 Tɔ́zeno céŋŋi goru botoro, ká tíé nyúú tɔ́nɛ má wuu yɛ́rkɛ.
Wɩɩsɛ liisi Babɩlɔɔnɛ* wɩ́ɛ́, a a ʋ nyɔ́ʋ́ cɔwɩɩlɩ́zeno, anɛ sɩ́ŋ, gbaŋa sɩɛrʋ.
20 Tíé ná wuu há nyɩ́ɩ́sɛ́ mʋʋ sɩ́sɩ́ɛ́nnʋ́wa yʋ́ksɛ nyii sɩɛrʋ, ká pallɛ má wuu nyɩ́ɩ́kɛ.
21 Ká duódɔ́wʋ́ɔ́, ɓɩzeŋsí há kɛ nɔŋbúó, lɛ bána rɩ́ tuwi aá yosi nɩbííne.
Ɛ́ nɛ́ nɩbííne tʋ́tʋksɛ Wɩɩsɛ, duódɔ́wʋ́ɔ́ ná wɩɩla wɩ́ɛ́; ɛ́ wɩɩla fa zénó kɩ́ŋkáŋ.