Ɩ́ tá tésíé wɩ́'állɛ
4
1 Ɛ́ wɩ́ɛ́, Kirisi há dí wɩɩla ʋ tɛŋnamɩɛ mɛ́ ɛ́, ɩ́ má lo rɩ́ ɛ́ sabɩɩna mɩ́nɩ́wa mɛ́, a ɛ́ɩ́wa nadúóriwɩ́ɩ́; bee wɩ́ɛ́ nɛrɔ ná há dí wɩɩla ʋ tɛŋnamɩɛ mɛ́, ʋ tɩ́na rɩ́ wɩ́bɔma báá wɩ wɩ́ɩ́ kené.
2 A de kaa mɔ nyɛ mɛ́, ɩ́ dúníé mí mɩnɛ́ wuu mí, ʋ mɔhɔ̃́ rɩ́ɩ́wa tɩ́tɩŋ Wɩɩsɛ cólle ní, ká tá nɩbinní.
3 Tésíé mí wuu, ɩ́ faá a wɩ́ɛ́ ná nɩɛ ná há wɩ Wɩɩsɛ tɩŋ, háá ɛɛ́ nɛ́, ʋ sɩɛ́ mɔhɔ̃́.
Ɩ́ faá a nɩlɩɩlɩ́wɩ́ɛ́, aá tɩ́ŋɩ́wa tɩɩ wɩ́hɩɛ̃nɛ́, a nyɔ sɩnnɛ búbuki, a dí aá daarɛ, a pi sɩnyɔ́ɔ́rnaa vɩ́va, arɩ́ venni ɓaarɛ́, ká ɛ́ɛ́ kísú, Wɩɩsɛ ŋmɛ́nɔ mɛ́.
4 Mʋ́l néé mí sɩɛ́, nɩɛ ná há wɩ Wɩɩsɛ tɩŋ ná há zʋ́ɛ́ mʋ́ʋ́rɛ wɩ́bɔma sɩɛrʋ, aá tʋŋ ká báá wɩ́ɩ́waá ná, ɛ́ wɩ́ɛ́ sɩɛrʋ, ʋ ɛ́ vɔ́kwɔ́ rɛ́, ɛ́ nɛ́ tɛ ɓaá tʋ́ksɩ́wa.
5 Amá ɓa sɩ́ bílwó nʋʋsɛ Wɩɩsɛ rɩ́; ʋ nɛ́ kenú tɩɩ rʋ́ʋ́ dí nɩwómme rɩ́ nɩsʋsɛ sarɩ́ya.
6 Ɛ́ wɩ́ɛ́ nɛ́ tɛ, ɓa bʋl Wɩɩsɛ Labaarɩwero ná wɩ́ɛ́ pá nɩɛ ná zaa há ká sʋ́sɛ́ má, bee wɩ́ɛ́ Wɩɩsɛ fa lá sɩ́ɛ́ díwó sarɩ́ya rɛ́, ɓa dúníé mɩnɛ́ mɛ́, anɛ nɩɛ wuu; amá ɓa bʋ́l Labaarɩwero ná pɔ́wɔ́, a makɛ rɩ́wɔ́ tɩŋ Wɩɩsɛ Sabɩɩna mɛ́, a ná mɩɩsɛ nɛ́.
Zeezi laadííre náŋá wérí kanɛ́
7 Dúníé isé pérí tɛ́sɩ́ɩ́.
Ɛ́ wɩ́ɛ́, ɩ́ kánɩ́wa tɩɩ a pɔ́ wérí, a makɛ rɩ́ɩ́wa wólli Wɩɩsɛ cʋ́cʋɔlɛ.
8 Wɩ́ɩ́ ná há fɩ́ɛ́mɔ́ a mɔ rɩ́ɩ́wa la sɩ́ɛ́ a nɛ́ ká:
Ɩ́ hé dóé a cólli náŋá wérí; rɩɩ́wa nɛ́ có náŋá, ɩ́ sɩ́ tɩ́tá wɩ́ɛ́ ɓɩkana, ɩ́ náŋa há ɛ́ɛ́ zɔ́kɩ́wa mɛ́.
9 Ɩ́ cakɛ aá la náŋá wérí, ɩ́ jɩɩsɛ mɛ́, ká sɩ́ wɩ́ɛ́ ŋmúŋmúrmú.
10 Wɩɩsɛ Sabɩɩna dóé ná há ká bámmá bámmáwa, ʋ pii ɓɛ́ɩ́wa, nɛrɔ wuu kánʋ́ ker a tʋŋ wérí arɩ́ taŋá, aá sáŋʋ́ náŋa mɛ́.
11 Nɛrɔ ná há ká wɩ́bʋ́llʋ́, rʋ́ʋ́ bʋ́bʋl wɩ́ɛ́ ná há lɛ́ Wɩɩsɛ; nɛrɔ ná há tʋ́mɛ́ aá pá nɩɛ, rʋ́ʋ́ ka dóé ná Wɩɩsɛ há pɔ́ʋ́ nɛ́, a tʋŋ aá pá nɩɛ.
Ɩ́ tʋŋ ɛ́ a makɛ wɩ́ɩ́ wuu mí, rɩ́ nɩɛ tɩŋ Zeezi Kirisi mí, a píŋsi Wɩɩsɛ.
Wɩɩsɛ nɛ́ tɛ píŋ arɩ́ dóé, a de kaa mʋ́mʋ́ wuu.
Amɩɩ*!
Wɩɩla ná háá á rʋ́ʋ́ peri Zeezi laadííre
12 Ŋ nɩcólle tɩɩ, ɩ́ dé caasɛ mɩŋ wɩɩla mɛ́ nɛ́ aá dí, ʋ sɩɛ́ ká mɩlɛ́ rɛ́, Wɩɩsɛ pi aá mɩ́lɩ́wa rʋ́ʋ́ ná.
Ɩ́ sɩɛ́ sɩ́ ló rʋ́ʋ́ ɛ́ vɔ́kɩ́wa, rɩ́ɩ́wa bɩ́bɩɩnɛ anɛ wɩ́bérmí rí.
13 Amá ɩ́ jɩ́jʋɔsɛ, bee wɩ́ɛ́ ɩ́ tɩ́ŋɔ́ aá dí wɩɩla ná Kirisi há díé ní, a makɛ rɩ́ɩ́wa jʋɔsɛ rɩ́ satɔrɔ́ ɓɩzeno, kal ná ʋ háá á rʋ́ʋ́ mákʋ́ píŋ pá nɩɛ wuu.
14 Rɩ nɩɛ nɩ́ɩ́ tʋ́ksɩ́wa Kirisi wɩ́ɛ́, ɩ́ ná wér, bee wɩ́ɛ́ Wɩɩsɛ Sabɩɩna ná há píŋó, mɩ́nɩ́wa mɛ́.
15 Ɩ́ pɔ́ rɩ́ɩ́wa oro wuu sɩ́ wɩhála ná, a tɩ́ŋʋ́ há tʋ́ŋ bɔ́ŋbɔ́ŋ wɩ́ɛ́, ɛ́ rá má ʋ há ɓʋ́ nɛrɔ wɩ́ɛ́, ɛ́ rá má ʋ há gɛ́ɛ́ wɩ́ɛ́, ɛ́ rá má ʋ há zʋ́ɛ́ mɩ́nʋ́ nɔ́ŋɔ wɩ́ɩ́ ná há wʋ́ʋ́ bel mí, a kaá kúsi.
16 Amá nɛrɔ ná wuu háá ná wɩhála ʋ há ká Kɩrtɩɛ̃* wɩ́ɛ́, ʋ́ʋ́ sɩ́ hɩɩ̃sɛ fá; ʋ mɔhɔ̃́ rʋ́ʋ́ pípíŋsi Wɩɩsɛ nɛ́, ʋ há ká Kirisi nɛ́ŋ wɩ́ɛ́.
17 Tɛ́ŋ ná mɛ́ Wɩɩsɛ háá á rʋ́ʋ́ dí dúníé sarɩ́ya péró.
Wɩɩsɛ sɩɛ́ á rʋ́ʋ́ púlú nɩɛ mɛ́ nɛ́, a dí ɛ́ sarɩ́ya.
Rɩ Wɩɩsɛ nɛ́ sɩɛ́ á rʋ́ʋ́ púlrá mɛ́ nɛ́, a dí sarɩ́ya, ká ná, nɩɛ ná há vɛ́ Wɩɩsɛ Labaarɩwero ná laa díí, ɓa dɩgírsí á rʋ́ʋ́ nɛ ɛrɛ́ rɛ́?
18 Ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
«Rɩ nɛrɔ ná há ká tékétéké
má tɩɩ laatɛ́ nɛ́ ká wɩ́dúó,
ká ná, nɩtɩɛnnɛ ná há wɩ Wɩɩsɛ tɩŋ,
ʋʋ́ nɛ ɛrɛ́wa rɩ́ɩ́ pɔ́wɔ́?»
19 Ɛ́ wɩ́ɛ́, nɩɛ ná háá dí wɩɩla Wɩɩsɛ satɔrɔ́ mɛ́, rɩ́wɔ́ ha ɩ́'a wérí, ká píwó tɩɩ wuu hé Wɩɩsɛ ná há máwɔ́ nɛ́sɛ mɛ́ ɓóŋ; ʋ há sʋ́ʋ́ ná, ʋʋ́ ɔ́ʋ́ nɛ́.