Háála rɩ́wɔ́ báláwa kéne
3
1 Háála, ɩ́ má múúríwa tɩɩ pɛ́ɩ́wa báláwa.
Rɩɩ́wa nɩ́ɩ́ tʋŋ ɛ́, háála ná báláwa há wɩ Wɩɩsɛ wɩ́ɛ́ lɛ́ɛ́ dí, ɓa sɩ́ tɩ́ŋwɔ́ háála málwero ná wɩ́ɛ́, a lɔ́ʋ́ dí, rɩ ɓa wʋ́ʋ́ wɩ́ɛ́ bʋ́lɛ́ pɔ́wɔ́ má tɩɩ,
2 bee wɩ́ɛ́ ɓa sɩ́ ná ɛ́ ɩ́ há kéŋ málwero, a ka zíle sabɩɩna má.
3 Ɩ́ sɩ́ɩ́wa taŋá wuu píí hé tɛŋ ɓɩɛra háwerí mí, anɛ:
nyúpʋ́sɛ bɩrmɩdaarɔ́, salmɛ onni héé, arɩ́ gɛpiŋe sui.
4 Amá ɩ́ lo rɩ́ɩ́wa tɩɩ ɓɩɛrɛ́ wuu mɩ́nɩ́wa sɩɛnnɛ nɛ́; ɩ́ ka nyamma, a a nɩpɔrɛ́ má, ʋ nɛ́ ká wér ná há waá tenni, ká ka nyʋɔrɛ́ má wérí, Wɩɩsɛ sɩ́ɛ́.
5 Tésíé mí, háála ná háá tɩŋ Wɩɩsɛ, ɓa yɩɛla má yelli Wɩɩsɛ mɛ́, ɓa tɩɩ ɓɩɛrɛ́ fa ká ɛ́ nɛ́; ɓa fa múúríwó tɩɩ aá pɔ́wɔ́ báláwa.
6 Anɛ Abɩrahaŋ* háálɔ Saara,* fa háá tɩ́ŋʋ́ bála nʋɔ wérí ɛ́, a kánʋ́ aá yɩ́rʋ́ nyúútɩ́na.
Rɩɩ́wa má nɛ́ sɩɛ́ wɩ héwíŋ fá, wɩ́ɩ́ wuu mí, káá ɩ́'a wɩ́ɛ́ ná há wéró, ɩ́ ɓɩɛ́na ká Saara nihẽ ní.
7 Báála, ɩ́ má ka málwero a kánɩ́wa háála wérí.
Ɩ́ zɩŋ rɩ́ ɓa dóé wɩ́ɩ́wa péré.
Ɛ́ wɩ́ɛ́, ɩ́ zízílwó, ɓa rɩ́rɩ́wa wuu ní tʋ́ŋ mɩɩsɛ ná Wɩɩsɛ háá á rʋ́ʋ́ pá mɛ́.
Ɩ́ tʋŋ ɛ́, a makɛ rɩ́ wɩ́ɩ́ wuu sɩ́ɩ́wa wɩsʋlɔ́ naa gbá.
Maábináŋa kéne
8 Ŋ wɩ́tenní ní ká:
Ɩ́ wuu ka sabɩɩna balá; ɩ́ fɩ́fá náŋá susu, a cólli náŋá, bee wɩ́ɛ́ ɩ́ ká maábináŋa rɛ́.
Ɩ́ ka sawér náŋá rɩ́, a múúríwa tɩɩ aá pá náŋá.
9 Rɩ nɛrɔ á bɔ́ŋbɔ́ŋ ɩ́ mɛ́, ɩ́ sɩ́ bɔ́ŋbɔ́ŋ áá túmú; rʋʋ tʋ́ksɩ́wa má, ɩ́ sɩ́ tʋ́ksɩ́ túŋ, amá ɩ́ sʋl Wɩɩsɛ, rʋ́ʋ́ hé bárka pá tɩ́na.
Wɩɩsɛ tʋ́ɔ́sɩ́wa ɛ́ wɩ́ɛ́ nɛ́, a makɛ rɩ́ɩ́wa ná bárka ná ʋ há bílíwa mɛ́.
10 Ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
«Rɩ nɛrɔ wuú já rʋ́ʋ́ ná wér,
ʋ dúníé mí mɩnɛ́ mɛ́, rɩ́ tɩ́na kánʋ́ neŋdulí,
a sɩ́ wɩ́bɔma bʋ́lʋ́, a sɩ́ nyɩɛnnɛ nyɛ́.
11 Rɩ́ tɩ́na sɩ́ bɔ́ŋbɔ́ŋ tʋ́mʋ́, káá tʋŋ wérí,
a fɛ́l sɩ́ɩ́ aá jɔ́ʋ́ rɩ́ nɩɛ pɛ́kɛ wérí.
12 Wɩɩsɛ sɩ́ɛ́ wuu mɩŋ nɩɛ ná há mɩŋ taŋá mɛ́ nɛ́,
a wúólú dɩlla aá zésíwó sʋlɛ́.
Amá ʋ bɩ́rʋ́ har nɛ́ aá tɛ,
nɩɛ ná háá tʋŋ bɔ́ŋbɔ́ŋ.»
13 Rɩɩ́wa nɛ́ sɩɛ́ bíéri wérí ɛɛ mɛ́, áŋ rɩ́ sɩ́ pi bɔ́ŋbɔ́ŋ ɛ́ɩ́wa mɛ́?
14 Rɩɩ́wa nɩ́ɩ́ tɩŋ tékétéké, ká nɩ́ná wɩɩla má, ɩ́ sɩ́ ná wér!
Ɛ́ wɩ́ɛ́, ɩ́ sɩ́ nɩbííne fá, a sɩ́ ló rɩ́ɩ́wa beŋtunni má fúkli.
15 Amá ɩ́ bíbel Kirisi dʋŋɔ nɛ́, ɩ́ beŋtunni sɩɛrʋ, a lo rʋ́ʋ́ ɛ́ɩ́wa Nyuutɩna.
Tɛ́ŋ wuu mí, rɩ nɛ́ŋ bɔ́sɩ́wa yɩɛla ná ɩ́ há kené Kirisi mí wɩ́ɛ́, ɩ́ kánɩ́wa tɩɩ a tɩ́ŋʋ́ naasɛ pá tɩ́na.
16 Ɩ́ taŋa zíl tɩ́na, a pɔ́rɩ́wa tɩɩ mɛ́, a máŋsɛ pɔ́ʋ́.
Ɩ́ lo rɩ́ɩ́wa sabɩɩna a wérí a pɩ́ dɩbalá, a makɛ rɩ́ hɩɩ̃sɛ ka nɩɛ ná háá zɔ́kɩ́wa yɩra, aá bʋ́lɩ́wa málwero wɩ́ɛ́ bɔ́ŋbɔ́ŋ, Kirisi ŋmɛ́nɔ mɛ́.
17 Rʋʋ nɛ́ ká Wɩɩsɛ cólle, rɩ́ɩ́wa dí wɩɩla a tɩŋ wérí ɛɛ wɩ́ɛ́, ʋ nɛ́ weré a kɩ́llɛ ɩ́ háá dí wɩɩla a tɩŋ bɔ́ŋbɔ́ŋ ɩ́ há ɛɛ wɩ́ɛ́.
18 Kirisi tɩɩ dí wɩɩla naasɩ́ balá, wɩ́ɛ́ ná wuu mí, nɩbííne wɩ́bɔma yɩr mɛ́.
Ʋ wɩ wɩ́ɩ́ zɔ́kɛ́ ká sʋwɛ, wɩ́zɔkra yɩr mɛ́, a makɛ rʋ́ʋ́ káŋrá peri Wɩɩsɛ.
Nɩbííne ní ɓʋ́ʋ́, amá Wɩɩsɛ Sabɩɩna íllú sʋʋ mɛ́.
19 Ɛ́ har rɩ́ mɛ́, ʋ mʋ́ɔ́ bʋ́lʋ́ ballɩ́ wɩ́ɛ́ pá sabɩŋbɔmɔ* ná, ɓa há tɔ́ bɩnajaa mɛ́;
20 ɓa nɛ́ tésíé mí fa vɛ́ Wɩɩsɛ nʋɔ, tɛ́ŋ ná mɛ́ Wɩɩsɛ há nyámmɛ́ aá dɛllɛ rɩ́ Nowe* bɩrmɛ nyiidaborzeno* ná.
Nɩɛ córí dʋŋɔ, ɓa ɓóŋ ní ɛ́, a zʋ nyiidaborzeno ná, a daali nyii nyúú, a lɔ́wɔ́ tɩɩ.
21 Ɓa há dáálí nyii ná nyúú ɛ́, ʋ nɩhɩ̃́ wɩcʋ́ɔ́lɩ́nyimuŋsi ná zaa há lárá aá tá nɛ́.
Ɛ́ nyimuŋsi* sɩɛ́ to anɛ tɛŋ busunnu fó tɛ́ɛ́, amá ʋ ká sʋlɛ́ rɛ́, Wɩɩsɛ rɩ́, rʋ́ʋ́ sɛ́sɩ́rá baŋcɩllɛ wɩ́bɔma nɛ́ tá, a tɩŋ Zeezi Kirisi há bɩ́rɛ́ isi sʋʋ mɛ́ ná yɩr mɛ́,
22 a zɩ́ bána nyúú, a ké Wɩɩsɛ néduu, Wɩɩsɛ malɩ́kawa, arɩ́ bána nyúú tíŋ tɩ́náwa rɩ́ dóé tɩ́náwa wuu, múúríwó tɩɩ pɔ́ʋ́.