Á bel Zeezi, ká mʋ́ sɩ́ɛ́ rɩ́ nyamma
12
1 Á má sɩɛ́, nɩkaŋdɔ́ɔ́ nyáŋ há ká dáŋsɩ́ɛ́wa a kílrá nyɛ, á tá cɩka rɩ́rʋ́ duó wuu, a tá wɩ́bɔma ná háá lɛ́rmɩ́rá mɔlɛ́ mɔlɛ́, ká ka wérí, a dí nyamma, a fá fɛ́ɛ́ ná Wɩɩsɛ há sɩ́rá fá.
2 Á bíbel Zeezi, á yardá wuu lʋ́ʋ́ nɛ́, ʋ nɩ́ɩ́ bélú mí rʋ́ʋ́ mʋ́ gírsi wérí.
Zeezi nyámmɛ́ dagɛsɛ́* daha sʋʋ wɩɩla; ʋ wɩ ɛ́ sʋʋ duo hɩɩ̃sɛ bélé rʋʋ ká wɩ́ɩ́, bee wɩ́ɛ́ ʋ faá bel satɔrɔ́ ná Wɩɩsɛ há bílú mí ní.
Zaá sɩɛ́, ʋ ké Wɩɩsɛ kuóɓasa néduu ní.
3 Ɩ́ bɩɩnɛ Zeezi wɩ́ɛ́.
Wɩ́bɔŋ'aara há bɛ́rʋ́ ɛ́, a cɩ́nʋ́ mɛ́ ká ʋ nyammɛ, a makɛ rɩ́ɩ́wa sɩ́ bɔ́lʋ́, a sɩ́ ló rí nayʋɔrɔ́ wóllíwa.
4 Ɩ́ rɩ́ wɩ́bɔma háá lowé wuu, ɩ́ ha wɩ lówé a mʋ́ lúri sʋʋ mɛ́.
5 Ɩ́ sʋ́llɛ nadúóriwɩ́ɩ́ ná Wɩɩsɛ há bʋ́lɛ́ pɛ́ɩ́wa, ɩ́ há kɔ́ʋ́ bɛ́lɛ́ wɩ́ɛ́ rɩ́ yáá?
Ʋ sɛ́:
«Ŋ bíí, rɩ Nyuutɩna Wɩɩsɛ nɛ́ tʋ́rɩ́,
ɩ sɩ́ gúónú; rɩɩ á wɩ́ɩ́ má rʋ́ʋ́ bʋ́lɩ́,
ɩ sɩ́ ló ríí naasɛ yʋɔrɛ.
6 Nyuutɩna Wɩɩsɛ há có nɛrɔ ná nɛ́, ʋ tʋ́tʋrɛ,
a bɩ́bɛŋsɛ nɛrɔ ná ʋ há bélé,
rɩ tɩ́na kɔ́ʋ́ bíí.»
7 Ɩ́ nyammɛ wɩhálawa, Wɩɩsɛ tɩ́ŋwɔ́ mɛ́ nɛ́ aá tʋ́rɩ́wa; ʋʋ́ ɛ́ɩ́wa anɛ ʋ bɛlɛ nɛ́.
Bíí mɩ́nɔ́ ʋ áná wʋ́ʋ́ tʋrɛ?
8 Rɩ Wɩɩsɛ nɛ́ wɩ́ɩ́waá tʋrɛ anɛ ɛ́ ʋ háá tʋ́rʋ́ bɛlɛ wuu, ká ná, ɩ́ tóú bitáŋsɛ, ɩ́ ká pʋmmɔ bɛlɛ nɛ́.
9 Á ánáwa ná há lʋ́lrá, ɓaá tʋ́rɩ́rá rɛ́, ká á zízílwó.
Á Ana Wɩɩsɛ há mɩŋ bána nyúú, ra sɩɛ́ wɩ mɔhɛ̃́ ráá múúrírá tɩɩ pá wuu, a makɛ ráá ná mɩɩsɛ rɛ́?
10 Á ánáwa ná é faá tʋ́rɩ́rá tɛ́ŋ mʋɔ́ rɛ́, a cɛ́rɛ ɛ́ ɓa há có.
Amá Wɩɩsɛ éé tʋ́rɩ́rá, rʋ́ʋ́ ɔ́sɩ́rá wérí ní, ráá sɩ́ busunnu kánʋ́, ká nʋ́ʋ́ tɩɩ.
11 Tɛ́ŋ ná mɛ́ ɓa háá tʋ́rɩ́rá, ʋ ká sazɔkɔ́ rɛ́ a párá, ʋ to satɔrɔ́.
Amá a kaá mʋ́ wuu, nɩɛ ná há máŋsɛ ɛ́, ɓa nɩ́ɩ́ nóú nyʋɔrɛ́; ɓa sɩ́ a tékétéké Wɩɩsɛ sɩ́ɛ́, a mɩŋ tɛŋfɩ́ɛ́l mɛ́.
Ɩ́ pɔ́ rɩ́ bɔ́ŋbɔ́ŋ wuu sɩ́ɩ́wa pɛ́kɛ zʋ́
12 Ɛ́ wɩ́ɛ́, ɩ́ nɛ́ŋsa há yʋ́ɔ́rɛ́, ɩ́ naasɛ gbɛrkɛ, ɩ́ lo rɩ́wɔ́ dúóri a sɩ́ yʋ́ɔ́rʋ́.
13 Ɩ́ lo rɩ́ɩ́wa naasɛ pi ŋmɛ́ŋtérke, a makɛ rɩ nɛ́ŋ dúsú má, rʋ́ʋ́ sɩ́ cʋ́rʋ́, ká rʋ́ʋ́ dúóri ní.
14 Ɩ́ hé dóé, rɩ́ tɛŋfɩ́ɛ́l mɩ́nɩ́wa rɩ́ nɩɛ wuu pɛ́kɛ, a hé dóé, a a Nyuutɩna Wɩɩsɛ nɩtɩ́llɛ, bee wɩ́ɛ́ nɛrɔ ná wuu há tóú nɩtɩ́llɛ́, ʋ wʋ́ʋ́ wuó ná.
15 Ɩ́ pɔ́ rɩ́ nɛ́ŋ wuu sɩ́ Wɩɩsɛ zilé ná mɛ́ gúlú, a pɔ́ rɩ́ nɛ́ŋ wuu sɩ́ bákalá nɛ́, rɩ́ɩ́ pó keŋe, rʋ́ʋ́ haksɩ́ ná daarɛ nɩkana.
16 Ɩ́ pɔ́ rɩ́ nɛ́ŋ wuu sɩ́ lɩ́ɩ́lʋ́, rɩ́ nɛ́ŋ wuu sɩ́ Wɩɩsɛ wɩ́ɛ́ lɔ́rʋ́, anɛ Ezayu* há á ɛ́, a púú hɩɛ̃́sɛ lenni ɓɩdííli.
17 Ɩ́ ɩ́ɔ̃́ rɩ́ ɛ́ har rɩ́ mɛ́, Ezayu háá jɛɛ́, rʋ́ʋ́ áná sʋl Wɩɩsɛ rʋ́ʋ́ hé bárka pɔ́ʋ́, ʋ áná vɔ́ɔ́ nɛ́.
Ʋ wíó má tɩɩ, aá ja rʋ́ʋ́ áná bɩ́rsɛ sabɩɩna, ká gúl.
18 Ɩ́ wɩ túé peri Sinayi* paalɔ ná, nɛ́sɛ há wóú mí aá tɩkɛ nɛ́.
Níŋvásɛ faá lɛ ɛ́ paalɔ nyúú, bíno tɔ́ʋ́ mɛ́ lim, pʋmmɔ toó, pozeno má lúlú ráŋ,
19 nyɩ́la mu aá dɔ́ŋ, liŋó má lɩ́lɛ ráŋ.
Ɩzɩrayɛl duo* nɩɛ há nɛ́ ɛ́ liŋó, ɓa sʋ́lɔ́ nɛ́, rɩ́ ɛ́ liŋó báá sɩ́ wɩ́ɩ́ nɔ́ŋ bʋ́l súúri,
20 bee wɩ́ɛ́ ʋ há bʋ́lʋ́ ná kɩ́wɔ́ nɛ́sɛ.
Ʋ sɛ́:
«Rɩ nɛrɔ wuu tɩ́kɛ́ paalɔ né mí, rɩ pʋna má tɩɩ nɛ́, rɩ́wɔ́ yosi ɓʋ́ arɩ́ dɔ́wʋ́ɔ́.»
21 Ɓa há ná wɩ́ɛ́ ná ɔ́ɔ́ héwíŋ zʋ́wɔ́ wérí, Moyizi bɔl ká bʋlɛ́:
«Héwíŋ keníŋ kɩ́ŋkáŋ, ŋ cícel.»
22 Amá ɩ́ é, ɩ́ túó peri Sɩyɔŋ* paalɔ nɛ́, a tuu peri Wɩɩsɛ ná há wómmó tɔ́zeno, ɛ́ tɔ́zeno ní ká bána nyúú Zerizalɛmɛ* ná, Wɩɩsɛ malɩ́kawa bʋ́ɩ́ bʋ́ɩ́ bʋ́ɩ́wa há cíkí ráŋ [aá dí cana], ɓa wʋ́ɔ́ wuó dɩɩsɛ má tɩɩ.
23 Ɩ́ zʋ́ Wɩɩsɛ bihɩɛ̃́sɛ ná yɩra ɓa há pʋ́ŋsɛ́ bil bána nyúú púl ní.
Ɩ́ túó peri Wɩɩsɛ nɛ́; ʋ nɛ́ ká nɩɛ wuu sarɩ́yadííro.
Nɩɛ ná há ká tékétéké a mʋ́ gírsi, ɓa wɩ́ɛ́ cɛ́rɛ wérí, ɩ́ túó pérwó dʋŋsɛ.
24 Ɩ́ kó Zeezi rɩ́ nɛ́; ʋ nɛ́ ká Wɩɩsɛ nʋtʋŋfɛlɔ* ná ʋ há bílé, záárɔ.
Ɩ́ túó peri Zeezi cɛ́l ná há bɩ́sɛ́ nɛ́; ɛ́ cɛ́l há ɔ́sɛ́ wɩ́ɩ́ ná, ʋ kɛ Abɛl* cɛ́l ná há bɩ́sɛ́.
25 Ɛ́ wɩ́ɛ́, ɩ́ pɔ́ɩ́wa tɩɩ mɛ́!
Ɩ́ sɩ́ nɛrɔ ná háá bʋ́lɩ́wa rɩ́ yíkí tá.
Ɩzɩrayɛl duo nɩɛ há vɛ́ɛ́, ɓa wɩ nɛrɔ ná háá cáánɩ́wɔ́ tíé nyúú zésé, ɓa ná wɩhála.
Á má sɩɛ́, nɛrɔ ná háá cáánɩ́rá há lɛ́ bána nyúú ní, raá nɛ́ vɔ́ʋ́, á wɩ́ɩ́ ra wɩ bɔŋ kɩ́ŋkáŋ wuu rí?
26 Tésíé mí, nɛrɔ ná liŋó há ɛ́ɛ́ tíé zíkli, ʋ sɩ́sɛ́nyɛ tá nʋɔ bʋlɛ́:
«Kal nɔ́ŋɔ, ŋ báá sɩ́ a rɩ́ tíé zíkli, amá tíé dʋŋɔ rá, bána má sɩ́ zíkli.»
27 Ʋ há sɛ́ rɩ́ kal nɔ́ŋɔ ʋ báá sɩ́ a, rɩ́ tíé zíkli nyɛ, ʋ mʋ́l nɛ́ ká:
Oŋ'máálɛ sɩ́ zíkli, a nyɩ́ɩ́kɛ, ká rɩ́ onni ná há wɩ wuó zíkli ní la dɩhɩ̃́.